استفتاء للزوجات

[inas]

حبيت اعرف نسبه قبول السيدات لان يكون لهم ضره ورايكم كمان لو حبيتوا

لان في سيدات كتير بيرفضوا الموضوع رفضا قاطعا مقطوعا ( على راي نسر)

سواء زوجه اولى ويتجوز عليها

او تجوز واحد متزوج اصلا وتكون زوجه تانيه او ثالثه؟؟

انا عن نفسي

لاااااااااااااااااااااااااااااااااااااااااااااااااااااااااااااااااااااااااااااااااااااااااا :sad:

[بنت النيل]

كيفك يا اناناس ايه المواضيع الجميلة دى

شوفى ياستى موضوع الزواج من اكثر من زوجه فهو شرعا حلال ولا مانع منه ولكن له شروط واسباب

ومش هندخل فيها عشان الموضوع ما يكبرش :sad:

بالنسبة لرأى الشخصى لاء ارفض بشدة ان اكون زوجه تانية فى حال من الاحوال

وخصوصا اذا لم يكن هناك شيىء يغصبنى على هذا الوضع فلماذا اقبل ؟؟؟ :sad:

[Ahmad Farahat]

لا مؤاخذة يا إيناس.........

هدخل على موضوعكم.......

أنا شايف إن الموضوع ده تحصيل حاصل...........

من غير زعل..........

فيه واحدة هتقلك أو تفكر كده إنها تقلك أيوة أنا أقبل أتجوز على ضرة

ملحوظة

أنا لسة متجوزتش أصلا

[inas]

انا معك بجد يا بنت النيل

في بعض الظروف الي بتجبر الواحده انها تقبل واكيد هو شرعا حلال

ارسين اولا شكرا و جايز يكون كلامك صح ان الموضوع تحصيل حاصل

ولكن

لو زي ما انت بتقول امال ازاي في رجاله متجوزين اتنين وتلاته و اربعه

الستات دي اكيد بتقبل وفي غيرهم مبيقبلوش في وحده بتفرق معاها وغيرها معندهاش مانع يكون ليها ضره

واكيد الشي دا بيبقى بيعتمد على شخصيت المرأه نفسها

شكرا ليك مره تانيه

تم تعديل 25 يناير 2007 بواسطة inas

[Ahmad Farahat]

أنا أعتذر مرة تانية.........

بس لازم أعقب على كلام حضرتك..........

مش معنى إن فيه حد متجوز على مراته إن مراته وافقت...........

ببساطة هيه مش قادرة عليه.........

وده شيء عادي.........

أنا أولا مش طموحي أتجوز أكتر من واحدة...........

بس لازم حضرتك تعرفي إن الجواز من أكتر من واحدة مش حاجة شاذه ومش غريبة بس مع الأيام إحنا اللي بقينا بنستغرب منها...........

ستات كتير بتعيش مع جوزها على ضرة بس طبعا هيموتوا من الغيظ بس ميقدروش يفتحوا بقهم...........

إنما راضيين ما أظنش...........

الحاجة اللي أتمناها من حضراتكن..........

أوعوا تفهموني غلط

[inas]

مش معنى إن فيه حد متجوز على مراته إن مراته وافقت...........

ببساطة هيه مش قادرة عليه.........

وده شيء عادي.........

مين الي قال كده

وانا مقلتش ان دا شىء شاذ بالعكس انا قلت انو شرعا حلال و لم اتطرق الي انو شاذ وسبب سؤالي ان زي ما انت تفضلت وقلت ان مع الايام بقينا نستغرب منو

واكيد ان الستات الي ليهم ضره بيموتو غيظ لان دي طبيعة البشر الغيره موجوده حتى في امهات المؤمنين

انا مش فهماك غلط انت الي مش عايز تفهمني :sad:

[Ahmad Farahat]

السؤال.........

هل تقبل المرأة أن يكون لها ضرة؟

الجواب.......

لا

السؤال ......

هل الجواز من أكتر من واحدة شاذ؟

الجواب لا

السؤال....في حالة حدوث هذا الأمر هل تكون الزوجة موافقة؟

الجواب....لا

السؤال طيب إمتى بتحصل حكاية إن واحد يتجوز أكتر من واحدة؟

الجواب......................................................................................

السؤال طيب لو الواحد اتجوز أكتر من واحدة فيه مجال للإعتراض

الجواب أكيد بس بيبقى إعتراض ضعيف الإرادة لأن الراجل اللي يقدر يتجوز أكتر من واحدة أكيد عنده حاجة تشنه في قوتها حق الفيتو..........

السؤال طيب لو الست ركبت دماغها واعترضت؟

هناك ثلاثة احتمالات إما الراجل هيتجوز الجديدة ويطلق الأولانيه يا إما هيسيب الجديدة ويفضل مع الأولانية

طيب والإحتمال التالت............إنها متقدرشي على بعده في النهاية

وأنا قصدت بم تفهمونيش غلط

إنكم تفتكروا لإني باشجع الموضوع

أنا نفسي بس انه يرجع عادي زي ما كان

انما مابشجعوش

ياريت محدش يعلق على الجملة القبل قبل الأخيرة

بس عشان مااتجرش

وانا آسف لاخواتي الزوجات لو كان رأيي مش حلو عشانهم

[nash]

صباح الخير يا أيناس

......................

شوفي ياستي....رأيي الشخصي في الموضوع.....

الزوج لا يفكر في البحث عن زوجه ثانيه.....إلا في حاله واحده فقط....توقف حبه لزوجته الحاليه ...

هنا يبدأ يسوق في أعذار وأسباب ليبرر لنفسه الأعذار والأسباب التي تدفعه للزواج بالثانيه.....وما أكثرها..

..............................................................................................................

الحقيقه برضه من وجهه نظري ولا ألزم بها أحد.....

الزوجه التي تقبل بهذا الوضع...هي إما

زوجه غير متعلمه...وبالتالي ليس لها وظيفه تقتات منها....ونظامها هايكون ضل راجل ولا ضل حيطه.

زوجه متعلمه ....ولكن ضعيفه الشخصيه...وتكون بتخاف من كلام الناس....وشماته العدوين .

زوجه ...مالهاش ضهر تتسند عليه....وبالتالي ليس لها ملجأ إلا القبول بهذا الوضع.....

زوجه معمول لها غسيل مخ....وأن ده الأسلام...وأن التعدد سنه...وأن ثوابها هايكون كبير...إذا هي قبلت بالوضع.

لذلك لا تستغربي موافقه بعض النساء علي القبول بهذا الوضع الشاذ .

.........................................................................................................................

بالنسبه لي أنا...طبعا أرفض...لأسباب كثير منها...أولا... إن الله كما حلل الزواج من الثانيه ....حلل الطلاق....وحلل الخلع

كما أن من ضمن شروط طلب المرأة للطلاق كرهها لزوجها....وبالتأكيد الزواج من الثانيه سيجعلني أكرة زوجي...وهنا

لن يكون عليَ شيء إذا طلبته...

ثانيا...الحمدلله متعلمه ومعي شهادتي....

ثالثا...لست ضعيفه الشخصيه....

رابعا...لي ضهر ..وسند...والحمدلله ألجأ إليه بعد رب العالمين في المحن والشدائد.....

خامسا...ليس معمول لي غسيل مخ ولله الحمد.....وبالتالي أستطيع أستعمال عقلي جيدا.....وأستطيع أن أوقفه بإرادتي....لست تابعه لإحد في التفكير....

........................................................................................................................

صدقيني للأسف موضوعك جاد...وسيتحول في النهايه...لسيرك ومهرجين.....

وسيخرج عن مسارة...

إذا بقي في هذا الإطار( أقصد الجديه ) سأعود لأتناقش....أما إذا خرج عن مسارة فلا أعدك بالعوده ثانيه

.........................................................................................................................

تم تعديل 25 يناير 2007 بواسطة nash

[inas]

نونش حبيبتي والله كلامك واسلوبك منظم

وعندك حق في ان ربنا شرع الطلاق لو الواحده معادتش قادره تكمل

ووالله كل واحده وظروفها في الي ملهاش غير جوزها فتكون مرغمه تكمل وفي الي بتضحي براحتها وبكل شيء علشان سعادة اولادها وتعتبر الزوج شيء لابد منه في تكملة كيان الاسره حتى ولو مره في الاسبوع وتقبل ان تشارك في نص راجل :sad: ولا ربع

بس انا الي بيدايقني اوي والله يا نونش لما وحده تكافح مع جوزها وتبدا معاه المشوار من تحت الصفر واول ما المايه تجري في ايدو (زي مبيقولوا) يروح يروش نفسو ويشفلوا وحده اد اولادو تحسسو بشبابو وتضحك على عقلو وتفضيلو جيوبو وتهدلو بيتو ولو اتكلمت مراتو يقول غيرانه وميبصلهاش غير من وجهة نظرو هو كشرقي متعصب

ويخوض التجربه وتتدمر الاسره ويتشرد الاولاد ويرجع في النهايه اسف ونادم انا مش بقول كلام افلام دي حقائق موجوده

والله قد تكون حالات فرديه ولكنها موجوده ولا احرم الزواج التاني بس الزواج من اخرى لازم يكون في حدود و بشروط

اهمها موافقة وعلم الزوجه الاولى مش في السر و طبعا لو الزوجه الاولى مثلا مش بتخلف ولا عندها مرض عضال ولا هو مش سعيد معاها يتم بالاتفاق بينهم على ذلك لكن مش بالارغام والاذلال

وبعجب من زوج اول مزوجتوا تمرض ولا يجرالها حاجه يتركها ويروح يشوف نفسو ويهملها ويقول حقي اشوف نفسي وابحث عن سعادتي مع اخرى وبذلك هو ميكنش بيعمل حاجه غلط وتتفلق الزوجه الاولى وينسى ان ربنا قال وامر بالعدل في كل شيء بين الزوجات حتى في الاهتمام ومراعته لمشاعرها

لكن لو اختلف الوضع وزوج هو الي مرض ولا مر بضائقة ماليه في حياتو وراحت الزوجه تطلب الطلاق لانها من حقها تدور على سعادتها تكون هي قليلة الاصل وتنتقد من الجميع :wub:

اتمنى اني اشوف ارائكم وياريت منخرجش عن الموضوع ونتحلى بالهدوء في المناقشة وتكون جاده شكرا ليكم

تم تعديل 25 يناير 2007 بواسطة inas

[عصام]

طيب لو سمحتولى .. ولو ما سمحتوش حد يبلغنى فى رسالة خاصة :sad:

دعونا نصيب قلب الموضوع واساس المشكلة .. لماذا يتزوج الرجل أكثر من امرأة؟

باعتبار أننا اذا وصلنا لإجابة هذا السؤال سوف نستطيع متابعة النتائج بشكل أفضل ..

باعتبار إننى رجل .. ولدى بعض الخبرة فى عالمى الرجال والنساء .. وسنى يعنى شوية كبير .. ممكن اقول

1. أعترف - كرجل - أن ربنا خلق الرجال بشكل عام يعانون من "العين الفارغة" بطبعهم .. نعم هذا صحيح! (مش عايز ضرب) لكن هناك من يكبح جماحها وهناك من لا يستطيع

2. المرور بأزمة منتصف العمر (أقرا موضوع ذو صلة كتبه سكوربيون)

3. نزوة سرعان ما يفيق منها

4. عيب معين فى زوجته (عضوى أو نفسى)

5. عيب معين فيه هو شخصيا (عضوى أو نفسى)

6. إضطراب حياته الزوجية

ولا اعتقد ان الأسباب قد تخرج عما بعاليه

طيب إذا حدث وتزوج الرجل من أخرى .. طبقا لأحد تلك الأسباب .. فإن رد فعل الزوجة الطبيعى سيكون إما الرفض أو الرفض أو الرفض أو الرفض إلخ

أما بخصوص كيف تتصرف الزوجة .. فأترك هذا للزميلات ..

[nash]

أهلا يا أيناس

................

أسمحيلي أرد علي نقاط أوردتيها هنا.....

برضه من وجهه نظري...ولا ألزم بها أحد.....

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

بس انا الي بيدايقني اوي والله يا نونش لما وحده تكافح مع جوزها وتبدا معاه المشوار من تحت الصفر واول ما المايه تجري في ايدو (زي مبيقولوا) يروح يروش نفسو ويشفلوا وحده اد اولادو تحسسو بشبابو وتضحك على عقلو وتفضيلو جيوبو وتهدلو بيتو ولو اتكلمت مراتو يقول غيرانه وميبصلهاش غير من وجهة نظرو هو كشرقي متعصب

........................................................................................

طبعا شيء يضايق....وخاصه إذا قارنا نسبه من يفعل ذلك من الرجال إلي النساء....

سنجد الغلبه للرجال.....وسنجد ألف من يبرر فعلتهم...هذا راجع إلي أننا في الأساس مجتمع يرفع رأس الرجل فوق رقبه المرأة....

لكن إذا كانت الزوجه قويه الشخصيه...تستطيع..أن تضع حد لإستهتار زوجها ونزواته....خاصه إذا كانت لا تخشي الطلاق...ووضعت أعصابها...وسلامتها النفسيه في المقام الأول,,,,,قبل التضحيه بأي شيء

أسفه يا أيناس....أنا شخصيا لا أحترم المرأة الضعيفه أو التي تتنازل عن أي جزأ من حقها...تحت أي مبرر حتي لو كان الأطفال مثلا....لإن الأطفال مسؤليه مشتركه...في يوم من الأيام سيكبرون ويرحلوا وتظل هي تتجرع مرارة الأيام...وقد لا يتذكرون في الأساس ما الذي قدمته لهم هذه المسكينه الصابرة.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

حبيبتي حتي لو الزوجه لا تستطيع الأنجاب ...

ليس مبرر كاف لإن أيضا ممكن أن تكون المشكله للرجل وساعتها علي الزوجه الوقوف بجانبه أو عدم التخلي عنه....

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

حبيبتي أعتدنا أن نقرأ في كتب التاريخ..والتراث...وقوف الزوجه بجوار زوجها وتضحياتها لإجله....لذلك أصبح غريبه في الأونه الأخيرة نغمه رفض المرأة لذلك الوضع

...............................................................................................

حبيبتي الحياة بنعيشها مرة واحده....يا نعيشها صح...... ولازم نعيشها صح....ياكل واحد يروح لحاله ويادار ما دخلك شر

.............................................................................................

هي وجهه نظر لا ألزم بها أحد صدقوني

[inas]

شكرا ليك يا استاذ عصام ويشرفني وجودك معانا ويسعدني رايك

فعلا الاسباب الي قلتها صحيحه واولها رقم واحد :sad: ( مش عايزه حد يضرب)

ولكن مش الكل بيرفض والله في ستات بتقبل امال ازاي وجدت الزوجه التانيه وهي مجوزاه اساسا وهي عارفه ان في زوجه اولى من الاول وقبلت بكده يبقى في ستات بتقبل يكون ليها ضره بس ايه الاسباب ممكن تكون حل لمشكلة العنوسه ويكون الراجل ده هو المنقذ :wub:

وممكن يكون طمع من الزوجه التانيه وممكن يكون مرض منها انا مش بتحامل على الزوجه التانيه ولا بقول انها خرابت بيوت بس لازم تراعي ربنا وهي بتعمل كده في وحده غيرها وعلى الاقل متساعدش وتشجع الزوج على ظلم الزوجه الاولى وخداعها وتحط نفسها مكانها

والزوج ايضا عليه ان يراعي ضميره ويحط مصلحت بيتو واولادو في الاعتبار ولو شاف ان دا ممكن يهد كيان الاسره بايي حال من الاحوال فعليه ان يتراجع ويحاول يحل مشكلوا

وانا معاك يا ناش بس بجد الاطفال ايه زمبهم في شيء زي دا والا هنطلع جيل مريض ضعيف وعارفه ان الاطفال مسئولية مشتركه لكن ازا احد الطرفين تخلى عن دوره في حيات اولادو هل في المقابل ان الزوجه تقول يلا نفسي وتروح تزود المشكله اكتر وتطلب الطلاق و تجوز هي كمان من اخر والاولاد مين يربيهم الجد ولا الجده لان لا مرات الاب ولا زوج الام هيطيق ابن مش ابنو للاسف هما دول الضحيه الحقيقية الى بيتعمي عنهم الازواج في لهثهم وراء سعادتهم الزائفه وكبريائهم

واما بخصوص عدم الانجاب والله ليا صديقه بتعاني من الموضوع دا ربنا يكون في عونها وللاسف زوجها دائم التهديد لها بالزواج عليها فمتتخيليش مدى المعاناه والياس والاحباط والقهر والذل وكان دا شيء بادها ومصيرها في يوم الاستسلام او الطلاق

قرينا فعلا عن تضحية المراه لكن فين تضحية الراجل مفيش راجل بيضحي بحياتو عشان وحده للاسف مش تحامل على الرجال بس جايز تكون انانيه منو وجايز يكون حقو ولكن في بعض الاحيان بيحمل الكثير من الظلم على حق المراه نفسها في سبيل المحافظه على حقو هو

انا بكلم على فكره من ناحية المبدا لكن عمري مفكرت لو انا في المكان ده ممكن اعمل ايه هل هقدر اكمل عشان اولادي ولا هضحي بيهم عشان سعادتي وراحتي لكن مظنش اني اقدر اقسى على ولادي لو هو قسي عليهم يبقى هنجور عليهم احنا الاتنين كفايه واحد بس يكون اناني حرام بجد اننا نبهدل عيالنا عشان حقي وحقك مش ضعف مني بس انا بجد سعادتي في سعادة اولادي وليكن ما يكون :wub:

[se_ Elsyed]

ارفض بشدة ان اكون زوجه تانية فى حال من الاحوال

ده عين العقل

بس في الحالة دي يا بنت النيل هاتبقي إنت الزوجة الأولى مش التانية :sad:

وكما قال الشاعر

القديمة تحلى .....

والمعنى في بطن الشاعر

[DARWEEN]

أنا شخصيا لا أمانع أبدا في وجود الزوجة الثانيه ... والثالثة .. والرابعة ... وما ملكت يميني ( بلا خيبة قال يعني شهريار ) :sad: :wub:

أتكلم جد ... لماذا تنصب المناقشة على مجرد التفكير المادي للأمور .... لماذا لا تكون الزوجة الثانية هي لسبب نفسي عاطفي بحت ... وهنا تكون الزوجة الأولى هي المسئولة عن الأمور

ولماذا لا يكون الأستفتاء عن ... هل تقبلي أن تكوني زوجة ثانية ؟؟

[بنت النيل]

ارفض بشدة ان اكون زوجه تانية فى حال من الاحوال

ده عين العقل

بس في الحالة دي يا بنت النيل هاتبقي إنت الزوجة الأولى مش التانية :wub:

وكما قال الشاعر

القديمة تحلى .....

والمعنى في بطن الشاعر

ماشى ياعمو سى السيد اصلحها عشان يبقى الكلام مظبوط

ارفض اكون زوجة تانية او زوجه اولى ( قديمة ) يعنى اللى بتقول عليها تحلى

مبسوط كدا ياسيدى :sad:

[عصام]

أبويا علمنى حاجة باعتبرها نقطة فاصلة فى حياتى ..

قبل ما تاخد أى قرار يخص أى إنسان .. حط نفسك مكانه .. وشوف رد فعله !!

وفى بلاد الفرنجة بيقولوا مثل ... إلبس حذاؤه أولا :sad:

ودا فيما يخص الإقبال على الزواج من رجل متزوج بالفعل ... يعنى ببساطة حطة نفسك مكانها .. مع العلم ان اللى اتجوز مرتين هايتجوز تلاتة واربعة !!

دى حاجة

أما بقى فيما يخص موقف الزوجة الأولى .. فلى أمام عينى حالتين مختلفتين .. فى نفس العمارة اللى ساكن فيها :wub: وربنا يستر على اللى فاضل فيها

الأولى .. فراغة عين .. قريبة زوجته .. رايحة جاية عليهم .. زوجته كسولة .. هى نشيطة .. زوجته جافة .. هى حنينة .. زوجته مهملة .. هى ذكية .. كان عايش كويس لحد ما شاءت الظروف أن تضعهم أمام بعض فى مقارنة لا يراها إلا أعمى .. خد القرار وتزوجها .. بعدها بدأ مرحلة التخلص من الأولى .. المحصلة .. تم طلاق الأولى .. تم طلاق الثانية .. طفلين من الأولى .. طفل من الثانية .. مبروك

الثانية .. زوجة تتمنى له الرضا يرضى .. جميلة .. مرتبة .. على خلق ودين .. ونعم الزوجة .. هو .. عينه فارغة .. كل يوم مغامرة .. هى مستحملة .. هو اتجوز .. عرفى .. تقبلت الأمر بشكل أو بآخر .. نفسيا محطمة ولكن تقبلت الأمر .. هو طلق الجديدة .. بعد شهر .. وهايطلق الأولى قريب .. المحصلة .. زوجة محترمة .. أصبحت مطلقة لا لشيء ارتكبته .. لكن لفراغة عين جوزها

لو عايزين حالات كتير - من الحياة - لباقى الأسباب اللى أوردتها فوق .. أنا جاهز

[inas]

شفتو لدي عاجبه ولا دي عاجبه

ولذلك ربنا امر بان المرأه لا تخضع في القول عشان الي في قلوبهم مرض وكمان امر بعدم خروج المرأه الا للضروره ومتجتمعش في مكان مع راجل اجنبي عنها فيجي سهم كيوبيد يشيلهم هما الاتنين

الحمد لله على نعمت الاسلام الي للاسف مبنعملش بيه ولو عملنا بيه لرتحنا من كل الي احنا فيه

[nora]

لاه طبعا لما يدبحوني مقبلش لا اكون زوجه تانيه ولا عليا ضرة ولو مش عجبو يطلقني اه انا زي الفريك محبش شريك وبعدها ملهوش دعوة بالعيال دي مسؤوليتي لوحدي انا الي متكفله بيهم وهعيش ليهم مش هفكر في الجواز لان ابسطها الي اتجوزني وانا لوحدي مستحملنيش هلاقي مين يشلنا هيلا بيله عيالي اولى وفيه مليون حاجه تملى دنيتى كفايه ضحكت عيالي مع اني عرفه ان ربنا باذن الله مش هيحطني في موقف زي ده

وفي حاجه انا لقتكم متكلمتوش فيها في ستات بتثق في ازواجها ثقه عمياء ومش بتخونه ابدا وبتسبلو الباب موارب وفجاه تلاقي طوفان جلها وده غلط لازم الست مع اي راجل في طول الوقت ومن حين لاخر تحسسه ان في عيون وراه لان الرجاله فعلا ملهاش امن في المواضيع دي لان عنيهم زيغه دايما وده فعلا حق لان من صغرهم اتعودو من الاهل وخلي بالكم قلت الاهل لان الام بتشترك في الغلطه دي كمان

بنربي في الولد من صغره ان البنات حاجه لازم نوقعها ونقوله بوس البنت دي يا حبيبي شيفين الولد من صغرو عنيه زيغه الولد ميحبش غير انه يلعب مع بنات الولد مبيسكتش غير في ايد وحده الواد بيمووت في حاجه اسمها بنات انا الكلام ده بيتقال فدامي على ابني بس مش بسكت بقول لاه سيف بيلعب مع كل الاطفال سيف حنين على اي طفل لدرجه ان كبستهم في مرة كنت في النادي ولقيت سيف بيبوس طفل فكلو قال دي بنت فقلتلهم لاه مش شرط رحت وفعلا لقيتو ولد واسمه مروان وقلتلهم سيف مش بيفهم الكلام ده فشيفين المشكله بتبدا من امتى لكن لو علمنا اولادنا من صغرهم انه عادي خلاص يمكن المشكله تقل شويه اه ومن التعليقات التنيه الي بتتقال ده بيموووووت في نانسي عجرم او اي وحده بتترقص مع ان سيف بيموت في سعد الصغير و محمد سعد واحمد حلمي كل دول معتقدش انهم فيهم انوثه علشان سيف يعجب بيهم فهمتو انا عيزة اقول ايه احنا الي بنربي الرجاله وبنعودهم على كده ان عنيهم تبقى زيغه ياريت نفوق ونبطل الهبل ده لان انا بجد بقرف جدا لما حد يعد يقوم الفكرة في مخ طفل...

بس ده راي

[Ahmad Farahat]

سؤال إلى الزوجات............

هل ترفضن الضرة من أجل كرامتكن أم من أجل الحب وحده؟

وده سؤال بريء جدا والله...............

[مصرية يعني مصرية]

أنا عن نفسي أقبل في حالتين

الحالة الأولى

أسأله لو فيا عيب ....لو أنا مقصرة في حاجة تخليه محتاج يتجوز غيري

أنا موافقة بشرط يبعدها عني تسكن لوحدها و نشوف بعش في المناسبات فقط

لحد ما أعرفها كويس و لو كانت تنفع صديقة أصحبها و نبقى سمن على عسل

في الحالة التانية

الظروف تضطرني اعرف إنسان تعبان في حياته الزوجية مراته مش عارفة تسعده

هو عاطفي و حنين و رومنسي مفكر شاعر حساس قريب و هي جافة متحجرة متبلدة الإحساس

كل همها شغل البيت و ياريت مزبوط ....و فولانة قالت و فولانة عملت غير متقفة..لدرجة إن كل واحد

بقى عايش لوحده وهو تعبان من الوضع ده و بالنسبة ليا أنا كل المواصفات إلي عايزاها في الراجل

إلي أنا بحلم بيه متوفرة فيه

في هذه الحالة أقبل أكون زوجة تانية لرجل كهذا أفضل عندي أن أكون زوجة أولى و وحيدة لرجل

لا مبالي لا بمسؤوليته ولا بعواطفي ....ولا....ولا....إلخ