يوميات رجل متخلف

[Ahmad Farahat]

قريبا أنشر يوميات هذا الرجل..........

إنه رجل خاص.....

خاص جدا.....

جدا......

إنه الرجل......

الرجل المتخلف.........

ستشاهدونه في الميكروباص أو في محل الفول والطعمية.......

أو في .....

في طابور العيش.........

ستستمتعون بحق.........

بحق......

حق......

ق............

[التونسى]

فى انتظار اليوميات ... واحجز لى مكانا من الان فى الصفوف الاولى

مادمت هى دعوة للابتسام .. والبسمه اليومين دول شحت من السوق

بس يا خوفى لتكون بسمة متغلفه بورق المرار

تم تعديل 25 يناير 2007 بواسطة التونسى

[Ahmad Farahat]

في طابور العيش

إعتدت أن أعاني في طابور العيش.............

واعتدت أن أتخبط بين الناس عليه وأن أدفع بقدمي أحيانا وبيدي أحيانا أخرى........

ولا أرى في شرائه يوما هانئا.......

فأنا أزوغ في أيام العمل لشرائه.......

وأقوم متأخرا في أيام الأجازة........

فمنذ أن أعطتنا الدولة يوم السبت إجازة رسمية وأنا بنيم الولية مراتي يومين وافضل سهران قدام الدش أتفرج على الصور!!!!!!

مش لازم أقول إيه هيا.......!!!!!!!!

كلكم عارفينها......

بس الكارثة بتبقى في تاني يوم..........

بقوم متأخَّر من النوم وأتأخر ع الطابور........

المهم.....

في يوم منهم نزلت متأخر بعد ما نمت على أغنية متصورة !!!كويس!!! في ساعة متأخرة زي العادة.

وجريت على الطابور وف إيدي جنيه وقفص فاضي وجريت على المخبز.........

مفيش وقت للصدمة......

أقف وبعدين إتصدم......

يا نهاااااااااااااااااااااااااااااااااااااااااااااار

كل دول

الطابور طويييييييييييييييييييييييييييييييييييييييييييييييييييييييييييييييييييييييييييييييييييييي مش قادر آخد نفسي يييييييييييييييييييييييييييييييييييييييييييييييييييييييييييييل جدا..................

العدد يمكن يعدي الستماية.....!!!!!!!

بس تعدهم إزاي........

ما كانش فيه طابور أصلا......

على رأي سمير غانم.....

الراس جنبيها جزمة.......

المهم وقفت في الطابور على قد مقدر وسرقت عشر أدوار في البداية وبعدين لقيت قفص خارج من المخبز فلقيتني مزقوق على قدام............

والراجل اللي بيبيع عمال يقول.......

-بهدووووووووء........حاضر..........كله هياخد............ما تقف بقى يا جدع إنت وهوا.....

مسروعين على إيه الله يخرب بيوتكم.........

-بجنيه....

-بنص.....

-بجنيه ونص.....

-يا خويا سايبه الواد في البيت.....

-أنا عندي النقرس ومش قادر......

-أنا عندي سرطان.....

-عليه بإيدز....

-أنا حامل يا خويا ومش فاضية.....عندي ولادة النهاردة......

فضل كل واحد يتسول بعاهة عنده علشان ياخد قبل التاني والراجل مش عارف فين بداية الطابور من نهايته ...........

بس بقدرة قادر القفص خلص والعيش اتباع.........

فاتت ربع ساعة.......

نص.......

ساعة الا ربع.........

-هوا العيش فين

-ما تخلصونا بقى

خرج واحد من جوه المخبز شعره أبيض - من الدقيق طبعا- بيدعك إيده في ودانه.........

بلعت ريقي طبعا وانا بتخيل إيده دي وهوا بيعجن بيها.....يا ترى كان حاططها ف مناخيره ولا ودانه قبل ما يعجن.......

المهم البيه الخباز طلع يقول للناس ببساطة مطلقة إن القطعة في أولها والعيش قدامة تلت ساعة كمان...........

بصيت للطابور........وقلت يا ترى في أمل يا دكتور قصدي يا عم نروح النهارده........

صوتي راح طبعا وسط الناس اللي بتشتم وبتلعن في العيش والعيشة واللي عايشينها.........

قلت ف عقلي أروح وأكيد ناس كتير هتروح زيي............

لقيت محدش ساب مكانه خجلت من نفسي بصراحة فقلت أنا مش أقل شجاعة من الناس دي........

الناس دي عندها كبرياء وكرامة وأنا مش أقل منهم، لازم أستنى زيهم........

دفضلت واقف شوية وبعدين جدع محترم قاللي......

-يا سيد ممكن تحافظ على دوري........

-ليه يا أستاذ...........

-القهوة اللي هناك دي هقعد عليها..........

-آسف.........

-يا أستاذ حرام عليك أنا خرمان معسل........

-آسف.......

-عشان خاطري.........

-شوف حضرتك أنا خرمان شاي ومستحمل.........خليك واقف زيي وف ستين داهية المعسل.......

الراجل بصلي بغيظ وطلع الموبايل وضرب نمرة وبعدين قال لمحدثه:

-وائل....أنا عمك غريب.....حجر معسل بسرعة.... لأ .....مش في المحل .....عايزة قدام المخبز...... أيوة أنا واقف في الطابور......بسرعة يا معفن.........

ثم نظر لي شزرا وقال: شكرا

بعد دقائق ظهر قفص تاني واختفى العيش اللي فيه، المصيبة إن الطابور بيزيد والماشيين بيقلوا .......شكلها كده مش باينلها مرواح

دقائق أخرى وظهر وائل حاملا الشيشة في يمينه وهو ينادي في الجمع.........

-عم غرييييييب .... عم غريب يا ويكا.........

إستطاع عم غريب البروز من بين الحشد والتقط الشيشة وبدأ في تدخينها باستمتاع شديد.......

غار الواقفون منه بدأت الطلبات تنهال على وائل الذي أخرج نوتة صغيرة وبدأ في كتابة الطلبات.........

-واحد شاي هنا......

-سحلب.......

-شيح.......ده لعيل صغير كان واقف مع امه........

-كراوية .........ده لعيل تاني لازم يرضع وامه متقدرشي ترضعه قدام الناس..........

المهم طلبات الزباين تعمل قهوة لوحدها.........

المهم تلت ساعة كمان ورجع وائل بعربية نص نقل عليها الطلبات............

(مش عارف ليه مينقلوش المخبز للقهوة)

طبعا هتسألوني تلت ساعة طلع فيهم كام قفص...........

اللي هيسأل السؤال ده أكيد مبيقفشي في طابور العيش

المهم إن العملية خربت وفيه ناس بدأت تكتب وصيتها.......

وفيه ناس تانيه سابت الطابور ليفوتها الفجر!!!!!!!

شوية

شوية

وظهر من بعيييييييييد رأفت

رأفت ده صاحبي عميد في الأمن المركزي

.

.

.

.

.

.

مخدتش العيش في اليوم ده طبعا

بس الللي حصل إن رأفت قابلني بعد يومين وسلم عليه

-إزيك يا راجل كنت فين

-منا شايفك من يومين كنت واقف في الطابور

-آآآآآآآآآآآآه الطابور هيا مكنتش مظاهرة ضد الحكومة

-مظاهرة إيه يا راجل

-الناس الكتيييرة دي ماكنتشي بتتظاهر

-لأ طبعا

-طيب الحمد لله أصلي كنت ناوي أتصل بالداخلية تبعت قوة عشان تلمهم

-وما اتصاتش بيهم ليه

فوجئت بيه بيبصلي كأني غبي وبيقول

-كنت بادور على المخبز عشان اجيب عيش

صحيح إذا عرف السبب.................................

[Scorpion]

بس انا ما عرفتش يا اخ ارسين ,,, في تلت ساعة كام قفص خرج ؟؟؟؟

بس بجد محاولة اولي ناجحة تمامآ .... :sad:

أحسنت يا فتي .... خليك معانا هنا بقي .. و مستنيين بقية اليوميات ...

[Ahmad Farahat]

بس انا ما عرفتش يا اخ ارسين ,,, في تلت ساعة كام قفص خرج ؟؟؟؟

بس بجد محاولة اولي ناجحة تمامآ .... <_<

أحسنت يا فتي .... خليك معانا هنا بقي .. و مستنيين بقية اليوميات ...

يبقى ده معناه انك مبتقفشي على عيش

طبعا مطلعشي حاجة

[shahd]

يوميات ممتعه ياارسين وفي انتظار البقية :wub:

[DESERT ROSE]

بصراحه

بصراحه

بصراحه

تنطحني جاموسه إذا فهمت شيء :wub: والله متعوده أني أفهم بس هالمره ماصابت معايه

هزيت رااااسي برضه مانفع :) يمكن لأني مومصريه<<<أواسي نفسي :)

[Ahmad Farahat]

بصراحه

بصراحه

بصراحه

تنطحني جاموسه إذا فهمت شيء :mellow: والله متعوده أني أفهم بس هالمره ماصابت معايه

هزيت رااااسي برضه مانفع :mellow: يمكن لأني مومصريه<<<أواسي نفسي :unsure:

باختصار يا روز حضرتك معندكيش عيش بتقفي عليه ولا طوابير قدام مخابزكوا..............

موهيك..............

عموما يا ألف علا ومرحبا فيكي............

والرجال المتخلف عمبيسلم عليكي وبيقولك..........

منشان الله ما تخبطي راسك اللي عمبتبظ رقة في الجدار........

[Ahmad Farahat]

يوميات ممتعه ياارسين وفي انتظار البقية <_<

العزيزة\ شهد الكلمات

الرجل المتخلف مش عارف غطسان فين اليومين دول..........

تخيلي بادور عليه ومش لاقيته لحد النهارده.............

[ahmed_tito91]

بسم الله الرحمن الرحيم

يعنى ممكن يكون 10او 12 قفص

شكرا على الموضوع وانا فاهم مغزاه الحقيقى

[Ahmad Farahat]

بسم الله الرحمن الرحيم

يعنى ممكن يكون 10او 12 قفص

شكرا على الموضوع وانا فاهم مغزاه الحقيقى

كويس والله إنك قريته..........

عارف..........

أنا لما لقيت الردود قليلة قلت حماستي باتجاه الراجل المتخلف..........

صدقني أنا عندي منه حاجات كتير.............

وكويس انك فهمت مغزاه الحقيقي...........

بجد شكرا..........

[shahd]

اخي الفاضل ارسين

قلة الردود لاتعني بأن الموضوع لم ينل اعجاب الكثير..

لاتفقد حماسك اخي فنحن في الأنتظار وبكل شوق

خالص احترامي

:rolleyes:

[Simba]

انا معك ارسين

واتابع بشغف فلما تحرمنا منها ... :rolleyes:

[Ahmad Farahat]

إلى العزيزة شهد والحبيب سمبا..........

ربما أكون مخطئا في رأيي..........

ولكنني لا أدعي امتلاك القدرات الإضحاكية في التأليف............

ولكن من أجل خاطركما سأحاول سأضع يومية للرجل المتخلف.............

ولكنني بالفعل كنت أنوي التوقف تماما عن الكتابة في هذا الباب وباب آخر في الفنون أسميته نغمات وكلمات.............

نظرا لقلة الردود..........

ولست أدري هل أنا المخطئ أم أن المشاغل تؤدي بالأعضاء إلى قلة المتابعة

أشكركما كثيرا وإلى اللقاء

[nora]

ارسين روح يا شيخ....................ز

واوعى ترجع تاني

بهزر طبعا متزعلش ان الردود قليله بص اعمل زي انا بكتب لاني عيزة اكتب مش علشان الناس ترد والله ردو ولا مردوش مش بتفرق كتير معايا او بالاصح معدتش تفرق معايا :)

اكتب لنفسك اكتب وعبر عن الي جواك اكتب وخلاص :blink:

[Ahmad Farahat]

عزيزتي نورا............

أنا بالفعل أكتب لنفسي في الأبواب التي أعرف أنها لإبراز ما أمتلكه من خواطر كالشعر وتفصيلات جوهرية...........

أما هذا العنوان والعنوان الذي ذكرته أيضا فأنا لست مرتبطا بنفسي فحسب بل برغبة القراء في الإستزادة...........

ومتخافيش الراجل المتخلف هييجي ان شاء الله تاني.........

[yacho]

عزيزتي نورا............

ومتخافيش الراجل المتخلف هييجي ان شاء الله تاني.........

طب فين ؟؟؟؟؟؟؟؟؟؟؟

والله ضحكتنى بجد مش باجاملك دى الحقيقه ..

ياللا كمل .. مش كفاية سكوربيون بنفسه .. قاللك محاولة ناجحة تماما .

[Ahmad Farahat]

في المواصلات

إعتدت أن أواجه كل يوم مشكلة ما في المواصلات...........

فما بين الأتوبيسات والميكروباصات وحتى مترو الأنفاق يا قلبي لا تحزن..............

ولا احزن وابكي وطرطش دموع العين.........

ما هي البلاوي كتيره يا بوي..........

خلاص إقفل بقك بقى، نرجع لموضوعنا...........

منذ عدة أيام قمت متأخرا كالعادة وكان لابد من الذهاب إلى العمل رغم أنف المواصلات...........

لبست بسرعة ونزلت من البيت وانا بجري عالمحطة طبعا............

نسيت أقلكم إني نازل م البيت مبهدل لكن منظري جنب منظر الشارع رحمة........

الحقيقة المجاري في المنطقة كانت عاملة الشارع ولا فينيسيا، ويا ما جاري في الدنيا يا مجاري............

لكني استعنت ببعض الطوب المحطوط على الأرض وفضلت انط ولا أجدع فرقع لوز لحد ما وصلت لليابسة........

خرجت من فينسيا قصدي منطقتنا الكريه......إحم- الكريمة ووقف على المحطة..........

على المحطة كم من البشر رهيب طبعا كانوا كلهم نايمين بيتفرجوا ع الدش في الليل قدام القنوات الغنائية وصاحيين متأخر ع الشغل......الخلاصة.........

إستنيت الميكروباص أو الأتوبيس أو أي حاجة توديني للمترو ما نا شغلي في مكان ينفع فيه ركوب التلاته...........

لقيت أتوبيس جاي من بعيد ناداني وأول ما ناداني جرالي اللي جرالي فرحت وعملت زي ماجدة وجريت عليه لكن فوجئت إني باتجري عليه مش باجري عليه.............إزاي

باجري عليه معناها إني أنا الذي أقوم بفعل الجري.............

باتجري معناها إني فيه طوفان بيزقني على الأتوبيس او بمعنى أدق بيجرفني ناحيته -حلوه يجرفني دي- المهم ركبت الأتوبيس الأخضر الجديد الحلو ده أبو أربع كراسي.........

الحقيقة الأتوبيس ده حلو بس معذب صحيح الغالي تمنه فيه ملوش دعوة بالناس الغلابة اللي بتقف هوا أتوبيس للجالسين فقط بينما لا تجد بحبوحة في المكان للوقوف..........

بس مصر اللي عاش حبها يعلم كل جيل من بعد جيل...........

علمتنا دايما نلغي كلمة مستحيل..........

في الأتوبيس ده تحديدا المصريين لغوا كلمة مستحيل..............

إزاي..........

المفروض يقف ما بين الصفين واحد بالكتير او اتنين رفيعين...........

وحياتكوا عندي بيقف تلاته واربعه وأحيانا خمسة!!!!!!!!!!!

الإعجاز المصري يأبى إلا أن يذهل العالم..........

علشان كده الأتوبيس ده كان معجنة...........

لما اتجريت زي ما شرحت لقيت نفسي باتطلع فيه وباتوقف – هنا تلغى الإرادة البشرية- المشكلة الكبيرة مش إني اتطلعت الأتوبيس المشكلة ان اتجمدت تماما ومعرفتش اتحرك ما بين قوى الشعب المتأخرة - ع الشغل بس مش حاجة تانيه- نفسي وقف وصدري وقف ومبقتشي عارف اتحرك أو اطلع تمن التذكرة..........

لكن ببجاحة منقطعة النظير هتف بي راكب:

- متتحرك يا أستاذ..........

- .........................................

- هتفضل واقف كتير..........

- ..............................

- عدي بقى يا عمي الرخم

- ...........................................

معرفتش أرد عليه طبعا لكن كل اللي عرفت أقوله:

- في النفيهنون

- إنت بتقول إيه

- الأههفيس همهه

كنت بالضبط عامل زي عادل إمام في المسرحية بس ما كنش فيه بهاء عشان يخف.............

المهم قررت اني لازم انزل م الأتوبيس بأي شكل ولون لكني معرفتش بالضبط الأتوبييس وصل لفين ولا انا هروح فين بس العناية الإلهية أسعفتني في الوقت المناسب إذ توقف الأتوبيس مصابا بالسكتة الموتورية مما دعا الناس إلى النزول من الأتوبيس باحثين عن مواصلة أخرى..........

وقفت حوالي تلت ساعة في انتظار أي مواصلة أخرى فااااااااااااااااااااااااااااااضية..................

صحيح أي ميكروباص معدي عمال يقول فاضي عتبة أو فاضي رمسيس وهوا مليان لتمة عينه بس برضه احنا بنشوف ولا مؤاخذة..........

بعد تلت ساعة ركبت ميكروباص فاضي بجد بس هوا مش عاتق............

فضل ماشي ببطء رهيب لدرجة اني زعقت في السواق

- يلا يا اسطى متأخرين على أشغالنا............

فوجئت بالأسطى يقول:

- وإيه اللي يأخرك، إنتوا بتتأخروا في الصحيان عشان تقرفونا............

سكت تماما إذ وجدت الرجل مصيبا فيما قال.............

إمتلئت السيارة حتى آخر كرسي فيها غير أن السائق والمحصل لم يقنعا بهذا بل ظلا يناديان على السيارة مدعين خلوها من الركاب مستخدمين الكذبة الأشهر في مصر...........

- فاضي كذا...........

لم يمض وقت طويل حتى صارت السيارة بعلبة السلمون أشبه ما يكون.............

صارت السيارة قليلا ثم اندفع صوت نهيق حمار............

بصيت حواليه ملقتش غير الناس...........

لقيت نفسي بقول:

- الحمار ده فين...........

وفجأة...................

بحبك يا حمار ولعلمك يا حمار أنا بازعل قوي لما حد يقلك يا حماااااااااااااااااااااااار............

إكتشفت وقتها أنني أنا الحمار إذ أن المطرب الشعبي الفزيع سعد الصغير يغني رائعته الشهيرة بحبك يا حمار وبصوت مرتفع زاده السائق ارتفاعا..............

أصبت بعد انتهاء الأغنية بصمم جزئي دفعني لرجاء السائق في تخفيض الصوت فأبى قائلا:

- هوا انت برضه، إنت دايما قالل مزاجي كده، لو مش عاجبك إنزل من هنا.................

كنت لم أدفع أجرتي فقلت له:

- ماشي، طظ فيك وف أهلك كلهم..............

- إنت بتقول إيه يا ابن..................................

...........................................................................................................................................................................................................................................................................................................................................................................................................................................................................

ولأن ثروتي اللغوية من السباب جيدة استطعت الخروج من المشكلة بأقل الخسائر واتجهت صوب المترو.........

الطريف في الميكروباصات أن سائقيها يزحفون خلف الركاب حتى يركبوا ويدفعوا المعلوم ثم يتمنوا لو أنهم ألقوهم من النوافذ..........................

قلت في عقل بالي، يا واد المترو جهاز محترم ومفيش حد يضايقك وانت نازل المعادي ومش بعيدة عليك................

ركبت محطة الملك الصالح واستنيت المترو والحقيقة انه جه بسرعه..............

وقف المترو...............

إتفتحت الأبواب................

إلا الباب اللي انا واقف قدامه!!!!!!!!!!!!!!!!!!!

يا نهار اسود دي مش باين لها شمس النهارده.............

جريت على باب تاني لقيت المترو بيقفل.............

إستنيت اللي بعديه طبعا واتفتح الباب االلي انا واقف قدامه...............

المترو ماشي ماشي ماشي ببططططططططططططططططططططططططططططططططءءءءءءءءءءء

ايه فيه ايه............

- إصلااااااااااااااااااااااااااااااااحاااااااااااااااااااااااااااااات

بوووووووووووووووووووووووووووووم

- خير

- شبكة الكهرباء اللي فوق ولعت

وقفنا جوا المترو نص ساعة وصلنا لماري جرجس بقوة الدفع نزلنا كلنا...............

قلت اروح الشغل سيرا على الأقدام ومش مشكلة امضي تأخير.....................

ووصلت...................................

ملحوظة:

أصحابي في الشغل الله يكرمهم ماضولي عادي يعني اليوم زي ما هوا.............

وكل تخلف وانتم بخير

[basmaaa]

كلنا أكيد واجهتنا مشكله العطله والزحام في المواصلات

بصراحه ده تصوير دقيق لما يحدث :blink: .. شكرا ليك

[ahmed_tito91]

بسم الله الرحمن الرحيم

بص يا ارسين انا بصراحه مشفتش زى كده

هو عندنا فى اسكندريه نفس الحوار بس مش بالطريقه ديه فمثلا

كانت راكب فى ميكروباص من منطقه اسمها كامب شيزار وعند منطقه اسمها سيدى جابر لقيت الميكروباص بيزق و راجل راح ماسك الباب وانا نازل طيب يا حاج انزل راح باصصلى من فوق لتحت وقالى متنزل هو انا مانعك قولتله مش عارف انزل قالى انزل بقى وخلصنى وراح شددنى لتحت راح الموبايل واقع تحت العجله

حاجه تانيه احنا برضه عندنا اتوبيسات غاليه وعاديه الغاليه قسمين الاول اجره موحده 1.25والثانى اجره موحده 2جنيه علشان ده مكيف اما العادى تتراوح الاسعار على مزاج الكمسرى من ربع جنيه حتى جنيه

حاجه تانيه الاتوبيس الموحد عدد ركابه 14 راكب مره ركبته كان عدد الركاب 35ووقفت على الباب

اما القطارات ايدك منها والارض اولاد المدارس بيركبوها ويسيبو القطار فاضى من جوه ويقفوا على الباب يا بنى ادخل جوه عايز اركب لا يا حبيبى عايز اركب ومره ست حامل جت تركب وقعت علشان القطار مشى قبل ما سياده البودى جارد اللى على الباب يسيبها تطلع وسعات يركبوا على الجرار ويشدوا فرامل القطار وبيمشوا فوق القطار ومره ولد وقع من فوق القطار ايديه اتقطعت اقولك ايه ولا ايه

المهم انا طولت عليك اعذرنى انا كل لما اشوف المناظر ديه ببقى عايز اعيط بس بكتم فى نفسى

وشكرا على الموضوع الرائع وانا مستنى الفصل الثالث

احمد تيتو