نقابة المهندسين فرع المحاورات

[nora]

انا كل الي اعرفو عن النقابه اني كل سنه بروح ادفع الاشتراك كل سنه غير كده ولا حاجه مش سلبيه والله بس مشاغل الحياه وبعد المكان بيني وبين النقابه مش اكتر بس انا شفت النقابه كانت عمله شغل جامد كانت عمله تامين صحي وده يشمل المهندس وليه خصومات في مستشفيات ودكاتره كتير وطبعين كتيب بالعناوين والاسماء المستشفيات والاطباء و الاشتراك زهيد جدا والخصم يصل ل 50 % و ممكن تعمل لاب والام اشتراك بس بيكون اغلى شويه وللابناء ايضا بس الابناء لازم تثبتهم اول باول وبيكون الاشتراك كل سنه في اول العام فقط وعملتو مرة وحده التامين الصحي ده لما كنت بعمل تجديد الاشتراكمن بعدها مجددتوش مش لشيء اكتر انه شغلانه وحتوته طويله وانا مش بستغلو في اي شيء وفي مستشفيات كبيره اوي منها اعتقد الجنزوري وحجات تنيه والاشتراك بيكون في شهر اكتوبر لحد 12 بس بعد كده السنه الي بعدها لو حد مهتم ممكن اقولكم اسم المستشفيات والطريقه والمواعيد وقيمة الاشتراك وكل التفاصيل لان الكتيبات كلها عندي

[عصام أبوالفتح]

سعيد جدا بوجود العدد الكبير ده من المهندسين فى المحاورات .. ما شاء الله

مهندس معمارى - دفعة 1999

على فكرة المهندسين الشباب اللى لسه متجوزوش ,, اوعوا تفوتوا اعانة الزواج من النقابة و هى 1000 ج للمهندس النقابى ، واللى يتجوز مهندسة ليه وليها 2000 ج ,, والله ما عرفت المعلومة دى الا قريب جدا ومن النت .. قعدنا نضحك انا ومراتى المهندسة ,, راح علينا 2000 ج ، ساعتها كنا محتاجينهم اوى .. ومكناش نعرف طبعا .

والاشتراك بينفع بعدين فى التقاعد ان شاء الله ، والتامين الصحى فعلا رائع للى قاعدين فى مصر .

اللى عايز احذر منه .. المصااااااااااااااااايف اللى بتحجزها النقابة .. أوعوا .. تعبانة جدا

اطلع على اى مدينة واستخدم نادى المهندسين وفى بيوت للمبيت بمضاعفات ال 3 ايام باسعار معقولة ..

تحياتى

[أبو حميد]

وجدت هذا الخبر بالمصري اليوم الأمن يجهض «يوم الغضب» للمهندسين.. ويمنع أعداداً كبيرة من التظاهر في «رمسيس»

وأحببت أن اطمئن على أخونا محمد عبد العزيز ياريت يطمنا

وقامت قوات الأمن التي انتشرت بكثافة عددية كبيرة بسد جميع المنافذ المؤدية للمظاهرة وأغلقوا مداخل ومخارج محطات مترو الأنفاق بالمنطقة، كما فرضت طوقاً أمنياً مشدداً من خلال المتاريس الحديدية والعربات المصفحة، في حين تعرض العديد من المتظاهرين لتهديدات شديدة اللهجة بالاعتقال إذا ما تجرأوا علي الدخول لمشاركة زملائهم المحاصرين أمام النقابة في المظاهرة، فضلاً عن المشادات الكلامية التي وقعت بين عدد من المهندسين وضباط الشرطة.

طبعا سيارة أمن مركزي لكل متظاهر اللي أكيد عددهم مش هايزيد عن 200 أو 300 مهندس بالكتير.

وقال المهندس عمر عبدالله عضو تجمع «مهندسون ضد الحراسة»: نعبر عن حقنا المشروع، فلماذا المنع والحصار والقمع الأمني؟!.. معرباً عن دهشته إزاء حالة الاستنفار الأمني التي شهدتها النقابة. وأعرب عن تصميمه علي استمرار المظاهرات والتي تبدأ أولاها في ٢٧ فبراير الجاري أمام اتحاد المهندسين العرب.

أنا كمان مندهش يا عالم يا ....... دول مهندسين مش مثيري شغب ولا غوغاء ولا ارهابيين ما تسيبوهم يقفوا شوية وهايمشوا بعد كده هم ممكن يعملولكم أيه ؟؟؟؟؟ ولا عاوزين نمشي جوة الحيطة ولا تسمعولنا حس ولا تشوفولنا وش ونتكتم لحد ما نموت من الهم والغيظ.

[أبو حميد]

للإستفادة من خدمات نقابة المهندسين يمكن الدخول لموقع النقابة المرفق.

موقع نقابة المهندسين المصرية

تم تعديل 22 مايو 2007 بواسطة أبو حميد

[hooba]

شكرا يا ابو حميد علي المبادرة الجامده دي ....

و نتمني العدد يزيد اكتر من كده ...

إيهاب

مدني

المنصورة 2002

[abouali]

هندسة الأسكندرية قسم ميكانيكا / دفعة قديمة /....( دفعة م . حسب الله الكفراوى )...

[miramar]

اللهم زد و بارك

بس أنا مش مهندسة

أنا بس داخلة أطمن عليكو

مليتو البلد

ميمو

اللهم اغفر للمؤمنين و المؤمنات و المسلمين و المسلمات الأحياء منهم و الأموات

[hooba]

ملينا البلد !!!!!

علي فكرة خلي بالك ......اللي بييجي علي المهندسين ما يكسبش !!!!! md2:

[miramar]

يا اخي باهزر معاكو مهزرش ممنوع ؟!

على العموم آسفين wst::

ميمو

اللهم اغفر للمؤمنين و المؤمنات و المسلمين و المسلمات الأحياء منهم و الأموات

[Ahmad Farahat]

يا اخي باهزر معاكو مهزرش ممنوع ؟!

على العموم آسفين wst::

ميمو

اللهم اغفر للمؤمنين و المؤمنات و المسلمين و المسلمات الأحياء منهم و الأموات

يا ستي هزري حد اتكلم

بس حلوة مليتوا البلد دي

بس أنا ماعتقدشي إن احنا اللي ملينا البلد

ممكن النصابين والحرامية

إنما احنا لأ

[walidsm]

حلوة فكرة النقابة دي اوي يا ابو حميد.

انا اسمي وليد.... مهندس مدني.... جامعة الاسكندرية.... 1992

شكرا ليك على موقع نقابة المهندسين بس انا دورت على معلومة بس ملقيتهاش..

انا ما دفعتش الاشتراك من مدة طويلة فهل فيه مشكلة وما عي الجزاءات.

وبالتوفيق

[محمد عبدالعزيز]

وصلتنى هذه الرسالة عبر البريد الإلكترونى ﻹحدى المجموعات الهندسية, أحببت أن أشارككم بها

الزملاء المهندسون المحترمون

السلام عليكم ورحمة الله وبركاته

عندما نتحدث مع زملائنا المهندسين لطلب مساندتهم في قضية النقابة ، تواجهنا عدة أمور

يدور الحوارحولها ... وسأحاول استعراض بعض ما واجهته خلال محاولاتي القليلة لشرح قضية النقابة لبعض الزملاء الذين كانوا بعيدين عنها ... وأجتهد في إيجاد الاجابة المباشرة البسيطة التي لا تنقصها شجاعة التعبير عن ما تطمئن له ضمائرنا ، بغير دعوى لاحتكار الرؤية الصحيحة موقنا أنه لا يستطيع فرد أو مجموعة بمفردها انقاذ نقابة المهندسين والسير بها بخطوات صائبة وآمنة نحو ما نصبو إليه ، والله المستعان .

لبعض الزملاء المهندسين وجهات نظر قد نختلف معها أو نتفق ، ولكن المهم أن نتحاور جميعا لنصل إلى رؤى متقاربة نعلم بها مواقع أقدامنا ..فلن يفيدنا تجنب الحديث عن أمور يراها البعض شائكة ... وللبعض الآخر من الزملاء أسئلة لن يستطيعوا المشاركة بغير أن يجدوا لها إجابة تطمئن لها عقولهم وضميرهم ..وعلينا أن نجد جميعا الاجابات سويا ... فالبداية الصحيحة للاصلاح الآمن والمستمر هي التقارب الجماعي في الرؤى والثقة المتبادلة بين الساعين للاصلاح .

وهذه هي بعض وجهات النظر وبعض الأسئلة ...وبعض الاجتهادات في الردود

يقول البعض ... يا باشمهندس مفيش فايدة في البلد دي

ليه نقول مفيش فايدة ...هو احنا لسه حاولنا ... يعني كل الشعوب اللي حاولت واتفقت واشتغلت ونجحت أحسن مننا ... ليه ما نحاولش اننا نتحاور ونتفق ونصبر على بعض ونشتغل سوا ونحدد هدف وخطة عمل ... ونركز في مجال معين ..زي اصلاح نقابة المهندسين ونحاول نحقق هدفنا واذا نجحنا حنبقى عملنا نموذج ممكن غيرنا يقتدي بنا .

يعني هو اصلاح نقابة المهندسين اللي حيحل مشاكل البلد ... ده يبقى اصلاح فئوي

احنا مش بنقول اننا حنحل كل مشاكل البلد ..احنا بقول اننا كمهندسين اذا ركزنا في دائرة معينة وحاولنا نطبق عليها الأسلوب العلمي في حل المشكلات من رصد للواقع وتحديد للهدف وتقسيمه إلى مراحل وتحديد مهام وأفراد يقومون بهذه المهام ...حننجح بعون الله واذا نجحنا مجموعة تانية تمسك مشكلة أخرى مثل مشكلة الأمية ..ومجموعة ثالثة تمسك مشكلة التعليم ..كل مجموعة في تخصصها وحسب قدراتها ..وبالتالي مع الوقت والجهد والهمة تحصل حركة نهضة شاملة للوطن ككل ..ولذلك نحن لا نعتبر تركيز الجهد على اصلاح نقابة المهندسين هو تركيز على فئة معينة من المصريين بل هو جهد يصب في النهاية في نهضة شاملة للوطن ..كما لا ننسى أن كل مهندس يؤثر في عدد من المصريين بمتوسط خمسة أفراد فإذا نجحنا في عمل رعاية واصلاح لنقابة تضم أربعمائة الف مهندس مصري نكون قد أدينا نفع لحوالي مليونين من المصريين وهذا مما لا يشك أي منصف في قيمته .

يقول البعض الآخر .... اللي عاوزاه الحكومة حتعمله ,,احنا مالناش دور ولا رأي ولا تأثير

ليه ترضى لنفسك كده ... ليه ترضى انك ما يكونش لك تأثير ولا قيمة لرأيك ... ومن قال انه اذا اتفق المجتمع الهندسي المصري على رأي ..ستريد أو حتى تستطيع حكومتنا أو أي حكومة تجاهله ..

هل يقتنع عقلك أننا إذا تجمع عشرة الاف مهندس متفقين على رأي واحد واسلوب لكيفية ادارة نقابة المهندسين بعد رفع الحراسة وآليات لتطبيق حقوق المعرفة والتعبير والمحاسبة لجميع المهندسين ، لن تستجيب الحكومة وترفع الحراسة ويتم اجراء الانتخابات ... أظن أنه لا يستطيع أي مسئول تجاهل أعداد أقل من هذه بكثير بشرط أن تتفق رؤاهم .

طب هو اساسا احنا عاوزين نرفع الحراسة ليه ..والنقابة ممكن تعمل لنا ايه ؟

عندما أسمع هذه السؤال ، أشعر بالارتياح فهذا السؤال هو فعلا دليل المحاولة الجادة للفهم والمشاركة وبداية ايجابية السائل ودليل على تخلصه من احساسه باليأس والعجز وأنه ليس له قيمة أو تأثير وتوهمه ان البلد خلاص انهارت ولازم نلحق نهرب منها وندور على اي كفيل وعقد عمل ..

ولكن نحتاج لاجابة هذه السؤال إلى شرح مبسط لقانون النقابة 66 لسنة 1974 .. وهو القانون الذي نرتضيه لتطبيق افكارنا ... ولتيسير الفهم كتبت بعض الاجتهادات ... وهي تحتاج بالطبع الى تعديلات واستكمالات وهي موجوده في الوصلة التالية ... وسبحان من له الكمال .

http://elshehab.net/eng_nekaba/why.htm

طب الحمد لله احنا فهمنا موضوع النقابة والحراسة .... هو احنا نقدر نعمل ايه بقى ... ؟

عاوزينك تشارك ..نحط ايدينا في ايد بعض ... نتابع أخبار النقابة ... نعطي لها وقت وجهد ونفكر سوا ...كيف نرفع الحراسة ... وكيف نستطيع اجراء انتخابات ..تأتي بمجلس منتخب يرعى المهندسين ويرفع شأن المهنة ويحمي الشباب من مشاكل البطالة ، يوفر السكن والرعاية الصحية للمهندسين وأسرهم ... يبنى مستشفى للمهندسين ..ليه مما يكونش عندنا مستشفى لو حدث لأي فرد في اسره مهندس مكروه لا قدر الله يجد رعاية صحية كريمة ... عاوزين مجلس منتخب قوي ومستقل يرفع صوت النقابة الوطني أمام أي فساد أو اهمال في المجال الهندسي ..

شارك في تكوين افكار .. كيف نستعد لمرحلة ما بعد رفع الحراسة ,,, وهي سيتم رفعها عاجلا أو آجلا إن شاء الله ... كيف نحافظ على النقابة مستقلة عن التبعية لأي جهة فلا يكون ولاء مجلسها إلا للمهندسين وصالحهم وصالح وطنهم ونهضته ... تدرب على المشاركة ... اختر أي مجموعة هندسية بريدية واكتب فيها وجهات نظرك .. ساهم في تكوين العقل الجماعي للمهندسين ..الذي سيدير نقابتهم ... اكتب لبريد القراء في الصحف مطالبا كل منصف بمساندة قضية نقابة المهندسين لتساهم في تكوين رأي عام ضاغط لصالح رفع الحراسة ...

كلم زملاءك من المهندسين وطلبة الكليات الهندسية ... واشرح لهم اهمية مساندتهم

طب والمهندسين من جماعة الاخوان المسلمين ..ما احنا برضه عاوزين نفهم ... ؟

مالهم بس .. دول زملاءنا زيهم زينا ... أي مهندس يبقى واحد مننا ..مش عاوزين تصنيفات سياسية ضد حد ولا عاوزين تمييز ديني لصالح حد أو ضد حد ... محدش يقول ده مهندس في المعارضة وده مهندس في الحكومة ... محتاجين ننسى التصنيفات اللي فرقتنا دي ... دي نقابة المهندسين ..طالما مهندس ...يبقى من حقه يستفيد من خدمات النقابة ويعرف كل حاجة ويعبر عن رأيه ... مفيش فرق بين مسلم ومسيحي ولا بين مهندس ومهندسة ..ولا بين مهندس في الحزب الوطنى ومهندس في حزب معارض ..كلنا مهندسين ايد واحدة عاوزين نصلح النقابة لتكون لكل المهندسين .. وكل واحد فينا قبل ما يدخل من باب النقابة يترك أي انتماء سياسى له خارج النقابة لأننا جوه نقابة المهندسين مش عاوزين نعرف مين منتمي لايه ..محتاجين نبطل نشك في بعض ... نشتغل كلنا سوا ... بلاش نقلق من بعض ... ونقول ده تبع الحكومة وده تبع الاخوان ... كلنا مهندسين مصريين .

انت على فكرة بتحلم ..ده ولا خمسين سنة لما تترفع الحراسة ... وننفذ الاحلام دي ؟

طب لنفرض اننا محتاجين خمسين سنة ... مش كل ما نبدأ بدري يكون أحسن برضه

يا عم خلينا في حالنا ..عاوزين نربي العيال ... انا مالي ...

اذا قال لك كده بعد ده كله ... اطلب منه تشوف شهاده البكالوريوس بتاعته لأنه في الغالب مش مهندس أصلا ...

ولكم صادق الود والاحترام ،،،

مهندس عمرو عرجون

تم تعديل 4 يوليو 2007 بواسطة محمد عبدالعزيز

[badroora]

ابوحميد طبعا انا مش هندسة بس حبيت اباركلك على النقابة

ولى طلب صغير يعنى لو فيه مصيف ولا شقق مخفضة ولا رحالات يا ريت يعنى :lol: :lol: لو مافيهاش رزاله على فكرة انا تبع الباش مهندز ارسين يعنى لو حد اعترض وهابقي اخليه يحط اسمى معاه فى الابونيهة

:unsure: عموما الف الف مبروك والى مزيد من التقدم والرقي

معلش يا ابو حميد لى محلوظة صغيرة يا ريت تتقبلها بصدر رحب

اولا كلمة ولاد كارى مش ماشية مع نقابة عريقة زى نقابتكم الراقية دى

ثانيا تدشين دى بتحسسنى انكم هتعملوا تنظيم قاعدة ولا يا اعوذ به wst:: لمؤاخزة اوعى تزعل انا كاخت فرحانه لاخواته عالنقابة الجديدة لفت نظرى بس تدشين وكارى ووجب على التنبيه

ولى طلب اخير ولو ان طلباتى كترت

انا مقاطعة النقابة بتاعتى منفسنه منها شوية ممكن ابقي اشترك معاكم باسم ارسين بردة بحكم انه هيبقي باشمهندز ان شاء الله

واخيرا باهنيكم للمرة الثانية عالنقابة الف الف مبروك

تم تعديل 4 يوليو 2007 بواسطة نجفة المغرورة

[Ahmad Farahat]

ولى طلب صغير يعنى لو فيه مصيف ولا شقق مخفضة ولا رحالات يا ريت يعنى :unsure: لو مافيهاش رزاله على فكرة انا تبع الباش مهندز ارسين يعنى لو حد اعترض وهابقي اخليه يحط اسمى معاه فى الابونيهة

إنتي تؤمري

حتى ولو مكنتش لسة متخرجتش

معايا يا نجوفة

[أبو حميد]

حلوة فكرة النقابة دي اوي يا ابو حميد.

انا اسمي وليد.... مهندس مدني.... جامعة الاسكندرية.... 1992

شكرا ليك على موقع نقابة المهندسين بس انا دورت على معلومة بس ملقيتهاش..

انا ما دفعتش الاشتراك من مدة طويلة فهل فيه مشكلة وما عي الجزاءات.

وبالتوفيق

أهلا وليد أنت دفعتي وتخصصي بس من أسكندرية أهلا بيك.

بالنسبة لتاخير الإشتراك في غرامة تقريبا 2 جنيه عن كل سنة متاخرة ومفيش مشكلة.

[seeem]

انضم للنقابة

seeem مهندس مدني - الاسكندرية 2001

[ahmeddada]

[font="Comic Sans MS"

مساء الخير على الجميع

اخوكم مهندس مدني من لبنان. مدينة صيدا

ماجستير هندسة مدنية.

الهوايات: الدردشة و تبادل المعلومات.

كان نفسي اعيش في مصر و لكن اللي جرى جرى

بس اما تيجي و انا احكيلك عاللي جرى :sad:

[مسالم]

ياسر ابو احمد

هندسه الكترونيه .. 1987

[مصري أصيل]

أنا خريج مدرسة المهندس خانه ............ أنفع معاكم؟؟؟؟؟؟؟؟؟؟؟؟؟

مهندس أشرف

هندسة المنصورة ميكانيكا قوى دفعة 1991

تم تعديل 23 أكتوبر 2007 بواسطة مصري أصيل

[Ahmad Farahat]

والله كويس يا شباب

شكل المحاورات عن قريب هتبقى منتدى مهندسين بس

يا مرحبا بالأعضاء الجدد