القلب و لا العين ......مين السبب في الحب؟؟؟؟

[عازفه على أوتار الذهب]

القلب و لا العين ......مين السبب في الحب؟؟؟؟

أنا بقول من الأفضل لأستمرار العلاقه تكون العين.....

هتسألوني ليه هقولكم.....لأن العين هي اللي بتنقل كل حاجه للعقل....

والعقل هو الأهم في اي علاقه لأن لو العقل قابل كل حاجه في الشخص مش هيكون في مشكله بعد كده....

وحب القلب اللي بيجي بعد العقل هو الحب النالجح من وجهة نظري....أما الحب اللي بيبتدي بالقلب بس ده بيكون حب متسرع لأن ممكن العقل بعد كده

يرفض حاجات فبالتالي القلب هيتراجع انا مش بتكلم عن عيوب البشر الطبيعيه اللي لازم كلا الطرفين يتحملها انا با أتكلم عن العيوب اللي لا يقبلها عقل.....

وانا شايفه ان الحب بيأتي عن طريق الأفعال والمواقف التي يتخذها الطرفان وبالتالي العقل بيدرك هذه الافعال فالقلب بيحب وساعة مايحب ....

محدش يقدر عليه ..ولا ايه؟؟؟.... :wub:

وتحياتي للقلب والعقل والحب....

ده رأيي أنتوا رأيكم إيه....مين السبب في الحب؟؟؟؟

تم تعديل 31 يناير 2007 بواسطة عازفه على أوتار الذهب

[Ahmad Farahat]

كلاهما هام لوجود الحب واستمراره وبقائه.............

[عازفه على أوتار الذهب]

اشكرك على مشاركتك الفاضل آرسين لوبين.......

وأنا اتفق معك في الرأي ان كلاهما هام لوجود الحب واستمراره وبقائه....

لكن انا من وجهة نظري إن الحب افعال والإنسان موقف.....

بس هو الموضوع للدرجادي مش محل مناقشه؟؟

[nash]

صباح الخير يا دهب

.....................

من وجهه نظري....أكيد العين الأول.....

لإنها ستنقل صورة عن الإنسان الذي أمامك...إلي العقل والقلب

وقد نستريح لهذه الصورة...أو نكرهها.....

هناك مثل يقول ( فيرست إمبريشن....إيز زا..لاست ديزيشن )<<<<<<متعوب عليها والله الجمله الأخيرة :lol: :excl: :o

[النسر المصري]

والنبي الله يخليك ياعازفه ماهياش ناقصاك :lol:

حب بالقلب ..حب بالعقل......حب بالعين..... حب بالبتنجان....المهم ان في الآخر انا عاوز احب :excl:

انا زهقت...مش معقوله كل ماتدخلواحدة قلبي ...ألاقي المواضيع ماتظبطش من اول مرة مع بعض

وألاقي اللي بتحبني او بتعجب بي ..مابقبلهاش ابدا

المفروض واحد زي عدى الثلاثينات.... يكون زمانه عنده خمس ست عيال :wub:

مش قاعد في البلكونه بيشيش ويهش دباان :o

يارب الرحمه والحب

[Ahmad Farahat]

العين قد تُخدع والقلب قد يَخدع............

بصراحة...........

أنا بحب بحواسي كلها وبذرات جسمي كلها.............

[نانو]

اهلا يا دهب بالمواضيع الرومانسيه ديه :)

اييييييييييييييييييه........ دنيا ....يعني لازم تجيبي سيره الحاجات اللي بتعمل حساسيه ديه :wub:

بس عموما ..انا بقه باشوف الحب بشكل تاني خالص

باحس ان القلب هو اللي بيحب ...لان العين بتشوف كتير اوي ناس شكلا جميله .....لكن مش كل جميل بترتاحيله

الراحه بتيجي من القلب...الاحساس و الحنين اللي بيشدك ويخطفك ناحيه حد مش بسبب العين ... و تكوني انتي شايفاه اجمل انسان في الكون....مالوش علاقه بالعين بدليل انك ممكن تحبي انسان كل الناس شايفه شكله مش حلو وانتي شايفاه بالدنيا واللي فيها

والفيرست امبريشن اللي قالت ناشنوش عليه ده ...اعجاب ...و مش دايما بيتحول لحب ....ممكن اوي يقف عند صداقه ... وبس بيتطور لحب لما القلب يحس و يرسل ويستقبل ...موجات

صحيح العين لغه جميله جدا ومن اجمل لغات الحب كمان ....لكن مش هيا المسبب لحاله الحب

اما بقي موضوع استمرار الحب او نجاحه فده شئ تاني خالص مالوش علاقه بالقلب ....لكن طبعا ليه علاقه بالعقل

يعني السبب في الحب القلب .....العين لغه جميله من لغات الحب ....العقل ضروري لاستمرار الحب

[memo2007]

ياااااااااااااااااااااااااااااااااااه اغيب يومين ارجع الاقى الرومانسيه :) دي كلها ا

نا رأيي من رأي نانو ................

حرام عليكم هاتفتحو نفسي للحب :wub:

وانا لسه صغيره على رأي سعاد حسنى ...........

تم تعديل 2 فبراير 2007 بواسطة memo2007

[عازفه على أوتار الذهب]

أهلآ أهلآ بالحبايب والناس الرومانسيه....

أيوه كده انا كان هيجيلي إحباط وقلت خلاص الحب ماعدتش ينفع نتكلم عنه دلوقتي بقى في حاجات أهم.....

بس الحمد لله لقيت لسه في ناس بتحب (سيرة الحب)دي أول أغنيه حبيتها للسيده أم كلثوم....

ياسلام عالقلب وتنهيده في وصال وفراق...وشموع الشوق لما يقيدوا في ليل المشتاق....

يا سلام عالدنيا وحلاوتها في عين العشاااق.....ياسلام يا سلام على حلاوتها يا سلام ياسلام....

وانا خدني الحب لاقيتني بحب....لقيتني بحب وأدوب في الحب...أدوب في الحب وصبح وليل وليييل على بابه....

المهم عشان ما أبعدش لو غنينا للست للصبح مش هنشبع.....

**************************************************

نونوش حبيبة قلبي انا بقول من زمان نونوش رومانسيه محدش مصدقني :)

هو ده الكلام الموزون وهو ده قصدي إن العين بتنقل للعقل والعقل يا بيقبل يا بيرفض....

بالتالي القلب بيحب....أما عن ال( فيرست إمبريشن....إيز زا..لاست ديزيشن ) فهو فعلآ ضروري جدآ :wub:

*****************************************************************************************

نسر النساسير...أنا قلت برضه حتى الطيور الجارحه رومانسيه......... :)

بس انا من رأيي انك تمشي على الحب بالبتنجان صدقني هو ده اللي بينفع.....

بلا قلب بلا عقل ....وبعدين هي قعدة البلكونه وحشه حد طايل بدل ما تصدع طول النهار بس يا واد بس يابت....

لابجد يانسر انت بتقول :ألاقي اللي بتحبني او بتعجب بي ..مابقبلهاش ابدا....

هو ده الفرق بين القلب والعقل...العقل لازم يقبل عشان بالتالي القلب يقبل.....

عمومآ ربنا يوفقك يارب يا عمرو وتلاقي بنت الحلال ويوفق ابناء المسلمين جميعآ يارب....

**************************************************************************

أرسين لوبين....شاعرنا الجميل......

(العين قد تُخدع والقلب قد يَخدع............

بصراحة...........

أنا بحب بحواسي كلها وبذرات جسمي كلها).............

من الممكن ان كل شئ فينا يخدع لو لم يسبقه العقل.....

ولكن هذا هو دائمآ إحساس الشاعر عندما يحب.... يحب بكل ما فيه....

تحياتي آرسين لوبين....

*****************************************************************************

كفايه كده النهارده وأرجع لكم بكره.......

[bassem_2009]

قد يحب اعمى

أما أن يحب من هو بلا قلب فهذا مستحيل

قد يحب المجانين(مش مجانين أوي يعني) فالحب أصلا جنون

أما أن يحب من بلا قلب فهذا مستحيل

[nash]

يوة....دهب.....أنتي فاكراني مش رومانسيه؟؟؟ :angry2:

الله يسامحك.... :wub: :wub:

أنا الصراحه أحب أكون مع نفسي.....وكده يعني :blush:

[مصرية يعني مصرية]

اهلا يا دهب بالمواضيع الرومانسيه ديه :blush:

اييييييييييييييييييه........ دنيا ....يعني لازم تجيبي سيره الحاجات اللي بتعمل حساسيه ديه :angry2:

بس عموما ..انا بقه باشوف الحب بشكل تاني خالص

باحس ان القلب هو اللي بيحب ...لان العين بتشوف كتير اوي ناس شكلا جميله .....لكن مش كل جميل بترتاحيله

الراحه بتيجي من القلب...الاحساس و الحنين اللي بيشدك ويخطفك ناحيه حد مش بسبب العين ... و تكوني انتي شايفاه اجمل انسان في الكون....مالوش علاقه بالعين بدليل انك ممكن تحبي انسان كل الناس شايفه شكله مش حلو وانتي شايفاه بالدنيا واللي فيها

والفيرست امبريشن اللي قالت ناشنوش عليه ده ...اعجاب ...و مش دايما بيتحول لحب ....ممكن اوي يقف عند صداقه ... وبس بيتطور لحب لما القلب يحس و يرسل ويستقبل ...موجات

صحيح العين لغه جميله جدا ومن اجمل لغات الحب كمان ....لكن مش هيا المسبب لحاله الحب

اما بقي موضوع استمرار الحب او نجاحه فده شئ تاني خالص مالوش علاقه بالقلب ....لكن طبعا ليه علاقه بالعقل

يعني السبب في الحب القلب .....العين لغه جميله من لغات الحب ....العقل ضروري لاستمرار الحب

نانو

لا فض فوك

برافو عليكي كلامك صح يا قمر

مسيبتليش حاجة أقولها في الموضوع ده

بس عندي سؤال محيرني :

ما الحب إلا للحبيب الأول

الكلام ده صح؟؟؟؟

[nora]

نتم بتتكلمو عن ايه .......................

والله فكرتوني بنكته هقولهلكم بس بعد اذنك يا عازفه

كان الزوج بيتخانق مع مراته في يوم وبيزعق فيها وبيقولها انت مهمله ونكديه ووووووو نفسي ارجع البيت الاقي مرة رومانسيه فقامت بعد الخناقه اتصلت بامها بتقولها ايه الرومنسيه دي يا ماما جوزي بيقولي عايز رومانسيه !!! فقالت ليها والله مانا عرفه يا بنتي بس احتياطي انقعي الرز :blush:

بصي يا عازفه انا زمان كنت بحب الاغاني والبحر واعد اعيط والكلام ده كله وانا بؤمن ان لكل مرحله ليها احاسيسها فانا دلوقتي اقدر احكملك عن الحب بشكل مختلف لان الحب بالنسبه ليا هي العشرة والبيت والسكينه والاطفال يعني انا دنيتي كلها سيف ونور فلقيت حب من نوع اخر وجربت الحب التاني الي انت بتقولي عليه

انا شيفه ان اصح حب حب القلب والعقل لانك بتكوني حكمتى على الشيء من اهم جوانبه

بعد كده يجي حب العين

والله مش كل جميل حلو في ورد جميل جدا بس سام وكلو شوك ......

فانا مع ان الحب بالعين غلط خالص ........

وقلت لناش انا اعرف ان فيرست انبرشن از اولويز رونج امبريشن

بعد كده نيجي نتكلم على حب الروح ده اسمى انواع الحب نيجي ممكن نلاقي وحده حلو مووووووووت وجوزها مش حلو بالمرة او العكس نقول ايه ده اهو هو ده الحب وممكن يكون وقعتو السوده

ولو قسناها على الام اشهر مثل خنفسه شافت عيلها على الحيط قالت لولي ملضوم في خيط يعني كل واحد بيشوف الي بيحبو احلى واحد في الدنيا بغض النظر عن الشكل .....

بس ده راي اي الحب حب قلب وعقل مش عين بالمرة انت ياما ممكن تشوفي حجات حلوة ورجاله وسيمه بس لو قربتي منهم تلقيهم ولا حاجه والعكس صحيح ممكن تلاقي وحده قمرررررررررررررررررر بس جواها هوا فراغ برده ملهاش طعم ولا ريحه .....

ثاتس اول الله يسمحك فكرتيني بالذي مضى ونصيحه يا عم نسر خليك في البلكونه احسن :angry2:

[CAMPS]

عازفة:

هو ده الكلام الموزون وهو ده قصدي إن العين بتنقل للعقل والعقل يا بيقبل يا بيرفض

انا رأيي مختلف تماما

القلب هو اللى بيحب فقط

والعقل ليس له اى سلطه

هو فقط يدفع الثمن فيما بعد

وربنا يستر ...

تم تعديل 3 فبراير 2007 بواسطة CAMPS

[nash]

:wub: وقلت لناش انا اعرف ان فيرست انبرشن از اولويز رونج امبريشن <<<< ماحصلش....وإمتي بأة قولتيلي ها ؟؟؟ إمتي ؟؟ :angry2: :blush:

...........................................................................................

وبعدين تعالوا هنا...هاتهرجوا....يعني هاتشوفوا كائن غريب ...وهاتحبوة بالقلب...علي طول مثلا.....؟؟ ده أيه الجمال ده...

لأ طبعا أول صورة بتوصل للإنسان بتكون عن طريق العين إذا أستريحت للشكل بتبتدي باقي الحواس تشتغل.....

..........................................................................................

يعني أيه بأة حب الروح ده.... مش لما أشوفه الأول يعني...ولا هاحبه في السما...؟؟

يعني هاحب واحد ماشوفتوش ؟؟

..........................................................................................

يانهاركوا أخضر.....بجد هوة أنا كده كائن مش طبيعي ؟؟؟ جاوبوني يا جماعه... :wub:

أنا بجد بديت أقلق

بس لعلمكم بأة أنا رومانسيه...بس بحس أنها شيء خاص جدا...في الطباع....

الومانسيه والحب حاجه بجد أروع واعظم من أن الواحد يعبر عنها...لإنها كلمه مش ممكن وصفها...بسهوله <<<<< دي برضه متعوب عليها B)

[CAMPS]

طب م الواحد طول النهار ممكن يشوف اشكال حلوه

هل بيحبها ؟؟؟؟؟؟؟؟

القلب فقط

[nora]

انا مقلتش حبي كائن فضائي ولا حتى حبي قرد بس ممكن يكون شخص جميييييييييييييييييل جدا بس من الاخر شخصيه لا تطاق وممكن يكون انسان عادي في الملامح لا حلو ولا دميم جدا بشع من الاخر بس يكون شخصيه روعه وروحو حلوة وسبحان الله ربنا بياخد حاجه ويعوضها بحاجه انا مثلا بلاحظ ان اغلب الناس الي دمها خفيف وتموت من الضحك مش حلوين !!!!

فبرجع اقول اه حب الروح شغل اشباح باه من الاخر :angry2:

فحب الروح اسمى انواع الحب وانا عرفه بقول ايه في وحده ممكن تحب واحد علشان وسيم محفظتو مليانه حب مصلحه بس حب لكن اسمى انواع الحب هو الحب الي مش علشان حاجه حب الروح ولا ايه !!!!

[nash]

فحب الروح اسمى انواع الحب وانا عرفه بقول ايه <<<<<<< طيب وهو حب الروح دخل إزاي علي الروح.... :angry2:

كنتي ماشيه في الشارع...وفجأة حسيتي بيه يعني.....؟؟؟ معلش أصلي كنت أدبي :blush:

............................................................................................

ردي يا صبيه مستنياكي.......أنتبهي تاخدي برد الله يخليكي ..... :wub:

[عازفه على أوتار الذهب]

إيه ده كله ما شاء الله يا أهلآ بالرومانسيه والناس الرومانسيه......

أنا ها ارد بس على نانو وميمو وجايالكم واحد واحد

عشان واضح ان في اعتراضات كتير على رأيي.....

أهلآ بنانو الجميله......مساء الرومانسيه يا قمر....

أنا معاك إن القلب هو اللي بيحب وان الإحساس والحنين بيجي من القلب....بس انا بااقول ان العقل هو اللي لازم يسبق القلب....

والعين بتوصل للعقل وأنا بقول العقل لأن الحب بيجي عن طريق مواقف بيعملها الشخص عقلنا بيقبلها او لايقبلها.....

بعد كده بيحب أو لأ ..يعني الحب بيجي عن طريق الأفعال الحلوه اللي العقل بيستقبلها وبعدين القلب بيحب الشخص عن طريقها....

والاعجاب كمان بيجي عن طريق العقل...

(.اما بقي موضوع استمرار الحب او نجاحه فده شئ تاني خالص مالوش علاقه بالقلب ....لكن طبعا ليه علاقه بالعقل )

وأهم شئ واجمل شئ ان يستمر الحب ....

تحياتي يا نون عالكلام الجميل ده.....

****************************************************************************************

أهلآ بيكي ميمو بينا......

واضح إنك رومانسيه....ويارب نفتح نفسك للحب وكلنا نحب....

الحب له أكتر من معنى في حياتنا الحب لو موجود حاجات كتييييييييييير قوي هتتغير ياريت كلنا نحب

بقلب صادق وبوفاء وبإخلاص زي الحب بتاع زمان......قول للزمان إرجع يا زمان.....

تحياتي......

تم تعديل 3 فبراير 2007 بواسطة عازفه على أوتار الذهب

[inas]

لو قراتم المداخلات السابقه سوف تلاحظون لهفت من لم يسبق لهم الزواج للحب

اما المتزوجون فعادي

بيكلموا عن الحب بمنظور اخر واقعي اكثر من الخيال

لانهم نزلوا الي ارض الواقع وشافوا الحياه عمله ازاي

الحب شيء جميل حقا وااكد ان الحب الصادق ياتي دائما بعد الزواج

بيقولك" تعرف فلان تقول اه يقولك عاشرته تقول لا يبقى متعرفوش"

اقصد ان الحياه الزوجيه شيء تاني غير الحب والخطوبه والارتباط

قبل الجواز بيبقى هاريها هدايا وكلام حب بعد الجواز مبيعبرهاش بورده ولا حتى كلمه ودا بيكون سبب في ضياع الحب

والزواج هو علاقه دائمه مستمره يظهر فيها الطرفان على كامل حقيقتهم دون اقنعه

والست بدون مكياج بيشوفها بلبس البيت وهي صحيا من النوم وشعرها منكوش

ايام الخطوبه بيشوفها وهي دائما على سنجة عشره

وهي بتشوفه على حقيقته وهو عصبي ومتنرفز وبياكل ونايم وصاحي من النوم

ودقنه طويله وشعره منكوش غير ايام الخطوبه والحب اكيد

وبيواجهوا مع بعض المشاكل الاسريه ومشاكل الحياه اليوميه واصعب سنين الزواج هي اول ثلاث سنوات

لان فيها بيتعود كل واحد من الاتنين على بعض وبيصتدموا ببعض

لان كل واحد من الاتنين كان له اسره مختلفه في الطباع والعادات والاسلوب والاكل حتى مختلف

ويبداو يكون معا شخصيتهم ويتصالحوا على بعض ولو حبهم ضعيف اكيد مش هيستطيعوا ان يصمدوا امام ما يواجهوه في هذه السنوات

كفايه كرهتكم في الجواز :angry2:

وفي حب الام الذي لا يضاهيه حب وحب الابناء وبكره تجربوه ربنا يرزق الجميع له مذاق خاص

لك ان تتخيلي لو انك في عز نومك دلوقت وحد يصحيكي ولا هتعبريه

قلب الام بيحمل اعظم حب حتى لو الابن قسي

مش بيقولوا" قلبي على ولدي انفطر وقلب ولدي عليا حجر"

وفي حب الله وحب الرسول

للحب انواع كثيره

بس انا مش مع حب العين "فعشق الجسد فاني "

وحب من اجل المال "يا واخد القرد على ماله يروح المال ويفضل القرد على حاله" :blush:

وحب القلب دا اكيد مبيجيش غير من بعد ما الواحد يشوف شخص ويقع في حبه من النظره الاولى ولكن دا خطا ووهم

فالحب ياتي بعد النظره الالف

اما الحب الحقيقي هو حب العقل والقلب معا العين شافت قبلت القلب حب تمام نحكم العقل باه يناسب ولا لا ميناسبش يبقى مش حب وهم

مهو مجيش احب واحد اد ابويا وقول وسيم وبحبه مينفعش العقل بيقول كده

اما الحب الاول ففي كلمه لاحسان عبد القدوس في الوساده الخاليه بتقول

"في حياة كل منا وهم كبير اسمه الحب الأول"

كفايه كده