بابا .. يعنى ايه حكومة ؟

[الحاج فوزى]

جلست بعد العودة من الدوام مسترخيا على الاريكة

ولانه يوم الخميس فهو دور زوجتى فى اعداد الغذاء مما زاد استرخائى وانا اداعب ابنتى الصغيرة وهى تلهو بجانبى ..

لمست يدى الريموت بغير قصد فقفزت على شاشة التلفاز نشرة الاخبار باحدى القنوات المصرية

وكانت المذيعة ذات الستين ربيعاً تذيع اخر الاخبار.

وجدت ابنتى تكف عن اللعب وتنظر نحو التلفاز وهى تحاول ان تفهم ماذا يقال. وجدتها فرصة تشغلها قليلا حتى انعم ببعض النوم قبل الغذاء

لكن ابنتى اخذت تجذبنى من يدى وهى تسألنى ، بابا يعنى ايه حكومة ؟

ذهلت قليلا من السؤال ، وجلست مفكرا كيف اجيب ابنتى اجابة جيدة تناسب عمرها

قلت لها : الحكومة يا حبيبتى ده مجموعة موظفين زى بابا كده ، بيروحوا كل يوم الشغل ومسئولين عن رعاية الناس ورعاية مصالحهم ومساعدة الفقير ، يعنى تاخد من الغنى شويه وتدى الفقير شويه وتعمل مشروع يفيد البلد والناس

لاحظت ان ابنتى شردت باتجاه التلفاز والمذيعة تقول : وقامت الحكومة باقرار قانون الغاء الدعم عن بعض السلع والمشتقات البترولية ورفع تعريفة التليفون والكهرباء و ...اسرعت الفت نظر ابنتى ورفعت صوتى وانا اقول : ومش بس كده يا حبيبتى الحكومة كمان هيا الى بتعمل مستشفيات يعنى بتدفع مرتب الدكتور والممرضة وتشترى الاجهزة وتعالج الفقير والغنى و ..

" خبر عاجل اعلن السيد رئيس الوزراء ان خبر تسرب قرار بمنع علاج المواطنين خارج مظلة التامين صحيح ، وان الهدف من ذلك هو تعميم .... "

رفعت صوتى اعلى قليلا وانا اقول : ويا روح بابا الحكومة مسئولة لما اثنين يختلفوا او يتخانقوا تحكم بينهم و لما واحد يعمل حاجة كويسة تعمل له مكافأة ولما واحد يغلط تحاسبه على قد الغلط

علا صوت المذيعة فى تحد سافر وهى تقول : " ولازلت التحقيقات مستمرة فى حادثة العبارة التى راح ضحيتها اكثر من 1000 مصرى منذ ثلاث سنوات حتى الان "

رفعت صوتى اكثر وقلت : وكمان يا حبيبى الشباب بعد م يخلص المدرسة والكلية ويبقى مهندس او مدرس او دكتور ، الحكومة بتشغلة وتديله مرتب وتساعده يشترى شقة علشان يتجوز ويعمل اسرة ويخلف بنت امورة زيك

توقفت لحظة وانا انظر للتليفزيون بتحفز وكأنى انتظر ان يذيع خبر اخر ولكن الخبر هذه المرة جاء من ابنتى

قالت ابنتى متسائلة فى براءة

امال احنا يا بابا ليه مسافرين وانت وماما بتشتغلوا فى الكويت ؟ وليه انت وماما بتبعت قسط شقة كل شهر؟ وليه بتبعت فلوس كل شهر لجدو فى مصر علشان المستشفى ؟ وليه تيته كانت بتقول ان المعاش مش بيكفى الاكل والشرب والدوا ، وليه عمو محمد مش بيشتغل ؟

قلت : هـه ؟

" اخر الاخبار ، بعض انتهاء الخطة الخمسية للخصخصة ، جارى وضع الخطة التالية لخصخصة النيل والاهرامات و...." هتفت ابنتى " بابا بابا هوا يعنى ايه خصخصة ؟؟؟؟؟؟ "

سمعت زوجتى من المطبخ يقول مستغربة انت بتزعق ليه يا حسين صوتك عالى قوى !

علا صوتى اكثر واكثر وانا اقول لزوجتى : هوا لسه بدرى على الغدا ولا ايه ؟؟

قومى يا حبيبتى قولى لماما بابا جاع يلا الاكل بقه !

حسين

[bassem_2009]

متهيألي إن كمان الحكومة هي المسئولة عن إننا لما نتعوج و نقول عايزين حاجة أو مش عايزين حاجة تعدلنا

وكمان الحكومة مسئولة عن توعية الناس بخطر التفكير

يعني ربنا يخليهم لينا بيفكروا لنا وبيخططوا لنا واحنا عاملين فيها قال يعني بنفهم ، المفروض علشان نثبت وطنيتنا ندعي للحكومة ربنا يخليها لنا إنما الأونطة بتاعتنا دي وجع قلب وخلاص