استشارة إلي المصريين في ايطاليا

[mizooo]

السلام عليكم ورحمة والله وبركاته،،

في البداية أحب أن أشكر القائمين علي هذا المنتدي الرائع والذي يناقش مشاكلنا بصورة أو بأخري نحن المغتربين .... وبعد،،

أنا شاب مصري عمري 26 سنة حاصل علي مؤهل جامعي وأعمل بأحدي أكبر شركات الالماس بدولة الكويت بوظيفة إدارية جيدة جدا، ولكن من فترة كبيرة وكان يروادني الحلم الاروبي ، يعني زي أي شاب قرر الغربة ومن خلال عملي تعرفت علي أشخاص كثيرة ومن ضمنهم شخص مصري إيطالي الجنسية ومع الحديث المستمر بيننا حس كدة اني مش قادر أتأقلم مع المجتمع الخليجي ودة صحيح فعرض عليا فكرة الهجرة إلي ايطاليا بطريقة شرعية 100% وقد كان بالفعل وقمت بإرسال اوراقي حتي يقوم بالبدء بعمل أوراق الأقامة للعمل بالطريقة الشرعية كما ذكرت ، وحتي لا اطيل الحديث أنا عايز اتعرف علي ظروف ايطاليا من حيث العمل والسكن والمعيشة والمصروفات الشخصية يعني بصراحة كل مايخص هذا البلد لان في الاخر هي غربة بغربة والمطلوب هو التوفير ، اتمني أن يقوم أحد بالمساعدة حتي أستطيع أخذ القرار السليم.

[عبده بيه]

اخي الكريم

وجه السؤال مباشرة الي الاخ الكبير سيكربيون وهو شخص متزن ويستطيع ان يدلك ولا يبخل في المعلومات هذا ما لمسته منه خلال تعليقاته

وبالتوفيق ان شاء الله

[Scorpion]

أولآ أشكر الفاضل عبده بيه علي ما كتبه في حقي :o .. ربنا يديم الأحترام و المودة بيننا كلنا..

الفاضل mizooo

اولآ مرحبآ بك في محاورات المصريين ....

نخش عالمفيد ...

بالنسبة لأيطاليا ( و ان كنت اعرف طلاينة كتير بيدوروا علي شغل في الخليج و دبي بالذات مش عارف ليه ) فده يتوقف علي حاجات كتير

أولها ... فين في ايطاليا ؟ في شمالها و لا في جنوبها .. يعني دي لوحدها فيها فرق حوالي 15 قول 20% زيادة في الأسسعار لو رحت الشمال .. مبدئيآ حفترض انك رايح الشمال .. ميلانو ....جنوا … فلورنسا … علشان البيزنس هناك و الوظائف متوفرة اكتر شوية ..

il Veneto بوجه عام… عالم شغالة بحق و ماعندهاش ياما ارحميني .. شوية متعنطزين لكن حقهم بصراحة ... بس عشان العنطزة دي انا رحت اعيش في الجنوب ...

الأول.. قريب حضرتك ده .. مالي ايدك منه .. و الا قريب من بعيد .. من النوع اللي بيعمل البحر طحينة في اللمة و قدام الناس .. لكن ساعة الجد تلاقيه خلع... او تلاقي شخصية تانية مختلفة عن اللي بيحكيها لما بيكون بين اهل بلده ...

تاني هام ... الشغل اللي حيلاقيه ليك .. شامل السكن و الا لأ ؟

لأن السكن لوحده ممكن يطير فيه مش أقل من 60% من المرتب ...

بمعني في الشمال لو اشتركت مع مجموعة يعني .. حاجة كده نظام شقة طلبة .. و حضرتك ليك فيها اوضة بسرير و دولاب .. مطبخ و حمام مشترك .. مش حتلاقي اقل من 400 يورو شهريآ في الضواحي ... انما لو العملية فيها شقة للأيجار لوحدك نظام اوضتين و مطبخ و حمام .. مش حيقل عن 700/ 800 يورو شهريآ ...

لكن لو الموضوع شامل السكن . عالبركة ... وافق و ابتدي المشوار ...

مصاريف اليد .. اممم .. ده حسب ايد حضرتك يعني ..

تذكرة الأوتوبيس او المترو تمنها حوالي يورو

لو اشتريت عربية نص عمر ممكن تلاقي من اول الف يورو لما فوق ... و البنزين اللتر بيورو و 400 سنت ...

لو ليك في السجاير متوسط سعر العلبة 3 يورو و نص ...

لو اخدتلك فنجان قهوة اسبريسو مع كرواسوناية عالفطار .. سعرهم حوال 2 يورو ...

عالغدا .. تيك آوي عالسريع .. ساندوتش او حتة حاجة مقلية .. او طبق مكرونة .. حسبة 8 / 10 يورو

العشا .. لو بيتسا و ازازة كوكا علي حبة بطاطس محمرة .. مش اقل من 10 يورو ... الماكدونالد 4 / 5 يورو

و عالعموم في مصريين و لبنانيين كتير هناك عندهم مطاعم و مش حتلاقي حاجة ناقصاك باسعار كويسة ...

نفسك هفتك علي طبخة ... الخضار متوسط سعر الكيلو 3 يورو ...الفاكهة شرحه ... اللحمة متوسط الكيلو 10 / 12 يورو .. السمك من 6 ل 35 يورو الكيلو علي حسب ..

تذكرة السينما 8 يورو

تقص شعرك ب 15 يورو ...

الهدوم ممكن تلاقيها في الأسواق الشعبية باسعار كويسة ... و ممكن تلاقيها عند الصينيين باسعار معقولة ... و مكن تلاقيها عتد فيرساشي و فالنتينو بمرتب 6 شهور

علي ذكر المرتب ... لو صاحب الشغل حيعينك رسمي ,, فالمرتب الأساسي حسب النقابات ما يقلش عن 1200/1300 يورو في الشهر .. و علي هذا الأساس تقدر تحسب حسبتك...

بس نصيحة .. قبل ما تصطاد سمك في ميه .. مع احترامي الكامل لقريبك .. لازم تكون واثق مليون في المية من التفاصيل ...و اهمهما علي الأطلاق ... طبيعة العمل .. المرتب .. و لو شامل السكن ...

علي فكرة .. ايه نظامك في اللغة ؟ علشان الطلاينة ماشاءالله عالم مثقفة بس مالهاش في اللغات .. او كبيرهم انجليزي مدشدش ... يعني لازم تكون حصيلة لغوية معقولة قبل ما تسافر احسن حتتعب كتير في الأول ...

في الحلقة اللي جاية نتكلم عن الجنوب ... اللي هي حتتي ...

بس اسمحلي نصيحة صغيرة في الآخر : ليس كل ما يلمع حجر كريم ... ممكن يطلع في الآخر حتة ازازة

[عبده بيه]

ماشاء الله عليك اخونا الفاضل اسكربيون والله ما بتتاخر علينا بارك الله فيك

[mizooo]

السلام عليكم ورحمة الله وبركاته،،،

اخي الفاضل سكربيون

شكرا جدا علي المعلومات الثمينة ، وعلي فكرة كل اللي قلته هو تقريبا اللي قاله الراجل ، المرتب، السكن ....إلخ ، بالنسبة لسؤالك عن الطلاينة اللي بيدورا علي شغل في الخليج ده سؤال مهم، وده لان المجتمع الخليجي طول ماهو شايف شخص يتحدث لغة غير العربية اويحمل جنسية غربية يبقا ده بيفهم حتي لو كان في بلدة عفوا في التعبير صايع ومش لاقي يتعشا بس بردة بيفهم ، بالنسبة للغة الايطالية انا درستها لمدة سنة كاملة واعرف اساسيات اللغة بس محتاج شهرين ولا حاجة ممارسة تاني عشان الانجليزي حاليا هو اللغة الاولي عندي، طيب بالنسبة لإجراءات السفارة في مصر وبما اني متعاقد أية هي نسب إحتمالات القبول والرفض لان زي مانت عارف انا بشتغل ومش عايز اضحي وعلي ما سمعت ان اجراءات التأشيرة بتأخد وقت شوية ، علي فكرة مكان العمل هيكون في الشمال يا باشا :wub:

[م الغزالى]

أولا شكرا على الإيجاز الجميل وليس بغريب على العزيز سكوب

تذكرة الأوتوبيس او المترو تمنها حوالي يورو

يابلاش

عندنا أقل سعر لمنطقة واحدة فقط فى جنوب ألمانيا 2.30 يورو

السمك من 6 ل 35 يورو الكيلو علي حسب ..

أهى أحلا حاجة عنكم السمك ده وطبعا فى الجنوب أنا أكلت مرتين سمك فى جنوة مش قادر أنساهم

كنت فاكر الأكل عندكم أرخص شوية بس يبدوا إن أوربا بقت فعلا موحدة

تم تعديل 14 فبراير 2007 بواسطة م الغزالى

[dodo12]

سؤال الى الأخوه ممكن ؟

انا معى تاشيره سياحيه الى قبرص وقد نفذتها فى شهر 9 ولم اكسر حيث قصيت 10 ايام فقط فى نقوسيا وانا اعمل مدرس ثانوى فهللو تقدمت للحصول على فيزا سياحيه الى ايطاليا سهل ام صعب الأن؟شكرا لكم يااخوتى واسف للإلأزعاج