هل انت مستعد ان تساعد في الاعمال المنزليه؟

[inas]

-_-

مكنتش اقثد والله

بث فعلا كتير لما بيدخلم المطبخ بيكركبم كل حاجه اثالني انا :happy:

[الحاج فوزى]

ولا يهمك يا ثت ايناث

انا بث بقول ان المثاعده مش عيب وانا بثاعد مراتى

حثين

( ملحوظة :

بلغنى انه تم تحويل كل حروف السين بالثاء فى كلمات اللغة العربية طبقا للاخت الفاضلة ايناس :) :)

)

[inas]

للاسف الكي بورد كانت معلقه

بث دا كل الي حثل يوه هشتري وحده تانيه بكره :)

اثل الكي بورد بتاعتي لدغه :)

[CAMPS]

المشكله مش ان الراجل يساعد

المشكلة ان الست بتتعود على كده وتشعر ان ده طبيعي ولو ما ساعدش تزعل

[رمضان]

السلام عليكم

الاخت ايناس بالنسبة لي أنا ارى ان المطبخ من حق الزوجة ده وجهة نظري الشخصية .

اما بالنسبة للطبخ والله احيانا بفكر وحاولت لكن كانت النتئجة فشل ذريع بكل معنى الكلمة .

انا حتى لو اكلت اكلت بيت طبيعي بتعب منه خلاص اتعود على اكل التيك اوي ربنا يكون في عونا

[nora]

بصي يا ايناس جوزي الحمد لله بيساعدني تقريبا في معظم الحجات الا الحجات دي

الطبيخ

الغسيل

تغير للاطفال

ترتيب

تنظيف

لكن ممكن يشيل معايا السفرة ويحط معايا

يمسكلي نور او سيف

ياكل حد فيهم

يلاعبهم

يجبلي حاجه او ينولهالي

يشتريلي طلبات

يعملي شاي او نسكافيه لانو بيعملو ممتاز بوش

بس

انا مش بطلب منو هو بيعمل كده من نفسو ولو معملش مش بزعل بس لما بيعمل كده ببقى سعيده لاني بحس انو مقدر تعبي وخاصة ان نور وسيف قريبين اوي في العمر فبهلك بنهم

بس فمش بطالبو باكتر من كده لانو كمان مش بيعرف يسخن الاكل مش يطبخ اصلا

[spddesh]

ايناس .... أنا قريت كل الردود والتعليقات ... واللى خاللانى أشارك ..... انى ما لاقيتش شبيه لحالتى

وتتلخص فى الأتى ...... ان حرمنا المصون هى اللى بترفض أساعدها.... وليها أسبابها ألا وهى ..... أنى لما بدخل المطبخ ببهدل الدنيا و أستخدم حاجات كتيره هى ما بتستعملهاش ... دى حاجه ..... الحاجه التانيه ..... انى ما بيعجبنيش طريقة تنظيمها للمطبخ .... وأفضل أقولها المفروض ديه تبقى هنا و ده يبقى هنا .... الحاجه التالته و بصراحه أنا مش لهبوبه زيها ...... أنا باخد وقت كتير وبراحتى على الأخر ..... يعنى ممكن نتغدى وقت العشاء .... وأنا فعلا بتعذب دلوقتى لأنى متغرب و دايق المر من زمايلى المهملين واللى طبخهم ما قولكمش حاجه توجع البطن والحمد لله ..... بس هانت خلاص ..... أنا رايح أتغدى ما تيجوا أتفضلوا معايا .... أنا عارف ده وقت العشاء ... بس هيه أدى الله و أدى حكمته ........... سلام لحسن ما لاقيش حاجه أكلها .

[العمرلحظة]

أنا بقه عندى رد يحل المسائل المهزوزة ديه

إذا كانت الزوجة لا تعمل فمن واجبها أن تهتم بأمور بيتها بس ده لا ينفى دور الأب أيا كان

أما إذا كانت الزوجة تعمل كما يعمل الرجل فالبيت يجب أن يكون متساويا بينهم فى جميع الأعمال مع الإحتفاظ بدور كلا منهم فى التربية

وأنا شخصيا بساعد مراتى فى كل صغيرة وكبير وإيدى قبل إيديها ولى الشرف

[darlengs]

احترامي للجميع 00 الموضوع فعلا جميل جدا 00انا كبرت فبيت باباكان متعاون ديما مع ماما الي اقصي حد - ربنا يديلو الصحه- لسا فاكره لما كنا نصحا يوم الاجازه الجمعه علي الروايح المفحفحه كان بيحضر احلا فطار و يصحينا 00 و ماما مفكتر ابدا انها حضرت السحور في رمضان لان دا كان مزاج عند بابا انه يحضر افخم سحور و يصحي البيت كله يتسحر 00 اصل بابا نفسه حلو اوي اوي في الطبيخ 00 حتي السمك كان ديما بيساعد في تنضيفه مع انه كان بيعمل فترتين 00اصل بابا حنون اوي 00كانت ماما لسا بتكلمني اليوم بتقول ياخد من عمري و يديلو 00 شوفو بأه يا بخت اللي مراته تكون رضيا عنه 00

و لما تزوجت ما كان زوجي يعمل اي شئ 00 لكن مع مرور الوقت و الشعور بالموده و الرحمه 00 بقا متعاون الي اقصي حد 00 غالبا مع العشره و بعد ما بيمر الازواج بالتجارب المختلفه المشتركه حلوه أووحشه 00 دا بيقربهم اوي من بعض 00 و مع الوقت معدش بيبقا فيه قواعد محدده سلفا او تحديد للمسئوليات 00 كل واحد بيساعد التاني علي قدر المستطاع علشان يخفف عنه اي تعب 00 طبعا المساعده في اعمال المنزل دي قمه الرجوله و اصدق معني للتراحم 00 و متتصوروش الزوجه بتتأثر ايجابا اد ايه - بغض النظر عن كونها ربه منزل او موظفه - لما تحس ان زوجها بيقدر تعبها بيحس بيه و بيحاول يشارك بقدر المستطاع 00ليخفف عنها 00 و الاولاد لما بيشوفو كده بيشعرو بروح الحب في البيت 00 و ساعات و الله كمان بيساعدو علي قد ما يقدرو 00

بس معرفش ليه الازواج كلهم بيبدعو اوي في عمل الشاي و النسكافيه و بيتفوقو فيه جدا عن الزوجات ؟؟؟ :blink:

[الكونت]

الزوجه مكانها الأساسى البيت

و الزوج مكانه الأساسى خارج البيت

لكن اذا الظروف الماليه اجبرت الزوجه على العمل خارج البيت , فمن العدل ان يكون الزوج ايضا مشارك داخل البيت

بكده لو مراتى بتشتغل خارج البيت يبقى لازم اساعدها بقدر طاقتى فى كل الأعمال داخل البيت

لكن لو مش بتشتغل خارج البيت يبقى انا مش هاساهم داخل البيت