العامية و فؤاد حداد

[عبده بيه]

العامية والمقاومة والقضية والحرية وعمنا فؤاد حداد

الأرض بتتكلم عربي

يا دمعة العين ما تخافيش تجرى لابد منك في الحماس الحق الدنيا صيف والجو مش أخضر و الموت ماهوش في صفحة الوفيات ولابد من إتنين الجوع وناكل العطش ونشرب الحياة والموت الهزيمة وننتصر الصبر لاكن مافيش صبر في الدنيا يقدر وإن كنت عمري ميت سنه وإن كنت ميت ألف لاجئ ما فيش صبر في الدنيا يقدر يفطمني عن وطني

فؤاد حداد "قصيدة "الأمل "

أنا حرّه وأموت في الحريّه

ومزاجي أعمل سحلـيّـه

أزحف ع الأرض وع الحيطه

واطلع وانزل واعمل زيطه

واضرب في الشمس طرمبيطه

أنا حره بديلي وبراسي

وماحدّش يكتم أنفاسي

وما احطش ماسك لإحساسي

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي

أنا حرّه وأموت في الحريّه

ومزاجي أعمل سحلـيّـه

أرقع في الشمس الزغروطه

واخد حمام من غير فوطه

أنا حره براسي وبديلي

حره بنهاري وبليلي

حره بمناخيري القطقوطه

أنا حره بخشمي ماهوش خشمك

وما احطش برقع ولا يشمك

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا حرّه وأموت في الحريّه

ومزاجي أعمل سحلـيّـه

أنا ابقى سحليه وسيمه

ويجيني برص بتاع سيما

وبتاع مزيكا وترا لم لم

واتاوي في حضنه وأنا باحلم

ويقول لي ابتسمي يا بسيمه

وافرحي بالميه وبالخضره

ماتحطيش احمر ولا بودره

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا حرّه وأموت في الحريّه

ومزاجي أعمل سحلـيّـه

سحليه وحبايبي سحالي

أنا حره بحالي ومحتالي

حرة أصحصح والا أسخسخ

والا أغني وقلبي يشخشخ

أبواب الدنيا فاتحه لي

ما اقعدشي في الأوده لوحدي

وما احطش إيدي على خدي

ولا احط قزاز

ولا أقفل شيش

عقلي يا هزاز

كلّك نغاشيش

وأنا حره أعيش

أنا عاوزه أعيش

أنا بدي أعيش

أنا نفسي أعيش

على كيف كيفي

"فؤاد حداد – قصيدة "ذي سحالي

من ديوان "رقص ومغنى" ضمن ديوان "أشعار فؤاد حداد" (أو الدواوين الخمسة) – الناشر دار المستقبل العربي

=========

اصحى يانايم

وحد الدايم

وقول نويت

بكره ان حييت

الشهر صايم

والفجر قايم

أصحى يانايم

وحد الرزاق

رمضان كريم

مسحراتى من جنود الأرض

منقراتى كل دقه بفرض

أطلب غنايا زى أب ضناه

القدس لاحت فى الطريق حضناه

يارب علمنى العطش والجوع

واجعل لعينى دموع

وأجعل لقلبى ضلوع

واجعلنى صوت الشهيد

فى النبض والتنهيد

شريان فلسطينى شجر مزروع

فى الارض جدر وفى الليالى فروع

يسمعنى خال فى كل بلده وعم

جرح الملاجئ عمره ما يتلم

تفنى الليالى ولا يبور الدم

ولا طيارات الامريكان تمنع

النور من المصنع

ولا كل ريف تحت السما يسمع

طير الحمام يسجع

ولا ابن انسان الامل يرضع

ولا ليل شجاع يولد نهار أشجع

ولابد يوم أرجع

ويمد فى كل العرب حبلى

المشى طاب لى

والدق على طبلى

ناس كانوا قبلى

قالوا فى الامثال:

الرجل تدب مطرح ما تحب

وانا صنعت مسحراتى فى البلد جوال

حبيت ودبيت كما العاشق ليالى طوال

وكل شبر وحته من بلدى

حته من كبدى

حته من موال:

شيلينى يا دنيا

قبل النور وحطينى

بالراحه بالقوه

فى الريح الفلسطينى

خلينى قبل الصباح

أعرف صلاح دينى

اصحى يانايم

وحد الدايم

وقول نويت

بكره ان حييت

الشهر صايم

والفجر قايم

أصحى يانايم

وحد الرزاق

رمضان كريم

======

المثال

*******

كأنها فى الغرام

شهيدة للأبد

أهدابها لاتنام

لاتنثنى للكلام

لاتستحل الطعام

لا عيش ألا كبد

اذا رأتها العيون

رأت مثال السكون

فى الأرض مثل الوتد

***

أتمت الظهر شمس

شقت غضون الجباه

نادى يتيم أباه

هل كان لليوم أمس

أو كان لليوم غد

***

أطل ليل تمهل

على رؤوس الجبال

نبض الوجود تململ

أغفى غريب ومال

الى ظلال البلد

تاقت أليها الظلال

وارتج طيف الخيال

لكن أم الولد

ذات الغرام الكبير

لم يغف منها الضمير

أو كل منها الجسد

كانت مثال الجلد

بنيان حق صمد

يفوق كل الدروع

ماضمنته الضلوع

من قوة لاتحد

من

قوة

لا

تحد

=====

رسالة من الحمام

***********

رساله من الحمام

فى المسجد الحرام

من أرض الراشدين

تهدى صلاح الدين

والقاهرة

سلام

جت فى ساعة ندى

الفجر اللى ابتدا

يشق من المشارق

على طول المدى

وطيبت حنين

اخواتها الفرحانين

فى مادنة الأمام

رساله من الحمام..

أنا من أرض النبى

وقلبى حن بـى

الى السيف اللى دمر

الظلم الأجنبى

يايوسف الأمين

يادرع المسلمين

متبارك المقام

رساله من الحمام

عن حبـى لاتسـل

كلمتـك بالمثـل

وعرفتك من جراحك

ياقاطف العسل

تشفى المستضعفين

ترفع عن البـنين

مشـقة الأنتقـام

رساله من الحمام

*****

رساله من الحمام

فى المسجد الحرام

من أرض الراشدين

تهدى صلاح الدين

والقاهرة

سلام

******

حيكون يوم زى تلاته و عشرين

من شهر يوليه

تموز

حيكون يوم زى الفاتح

من شهر زى نوفمبر

و الدنيا كل الدنيا حتكبر

فى صف واحد من تمام الصلاة

أستغفر الله

فى ايدين العدو المسجون

مسرى النبى و جبل الزيتون

حيكون

يوم فى تاريخ أكبر من الحرية

أكبر من الحرية

*

يا دمعة العين ما تخافيش تجرى

لابد منك فى الحماس الحق

الدنيا صيف و الجو مش أخضر

و الموت ماهوش فى صفحة الوفيات

و لابد من اتنين

الجوع و ناكل

العطش ونشرب

الحياة والموت

الهزيمة و ننتصر

الصبر

لكن مافيش صبر فى الدنيا يقدر

و إن كنت عمرى ميت سنة

و إن كنت ميت الف لاجئ

مافيش صبر فى الدنيا يقدر

يفطمنى عن وطنى

يا لاجئين طالعين على الضفة

متغربين مستغربين باصين

بعيون طويلة زى نور الشمعة

بوجوه شامية زى والدى صغير

بإيدين بطيئة من الطبق للفم

حيكون يوم و حيكون أم للأيام

*

يوم فى التاريخ أكبر من الحرية

أكبر من الحرية و البترول

الدم والبترول

الساعة والزلزال

فى كل شبر هلال

بس نمشى

و الأرض بالنبض اللى قال بورسعيد

تعرف تقول و تعيد

و الأمل و جدوره مليون شهيد

مايتقلعشى

و يا صبر ليل

الفجر فى الفجر يدن

يشاء القدر ان يكون احليما كتبا الشعر بالعامية باللهجة المصرية واحد من الشام والتاني من تونس اي فؤاد حداد وبيرم التونسي

رحم الله كل من احترم الفن وقدمه في صورة تليقه به