انت في حالك وانا في حالي

[inas]

ليه بقينا نخاف من الناس

وبعد مكنا بنقول النبي وصا على سابع جار

بقينا نقول:

صباح الخير يا جاري انت في حالك وانا في حالي

الباب الي يجيلك منه الريح

البعد عن الناس غنيمه

الي داخل بيتك يا حاسدك يا فاسدك

وكتير كتير من الكلمات الي بتشجع على الوحده والتقوقع وقفل البيبان على نفسك

لهذه الدرجه بقة الناس تخاف من بعض

لهذه الدرجه ؟؟؟؟؟؟؟؟؟؟؟؟؟؟؟؟؟؟

انا عن نفسي بقول كده وبعمل كده وببعد عن الناس لان مبيجيش من الناس غير المشاكل ووجع القلب

ايه رايكم ؟؟؟وهل الكلام ده صح؟؟؟؟؟؟؟؟؟

[أبو حميد]

ليه بقينا نخاف من الناس؟؟

من اللي الواحد بيشوفه من الناس.

وانتي قلتي مشاكل ووجع قلب ومحدش بيراعي ظروف حد. الحياة صعبة والواحد يا دوب بيقدر على مشاكله ومحدش فاضي لحد.

دي الحقيقة بدون رتوش.

[عبده بيه]

العزيزة ايناس تحية طيبة

فعلا كلامك مظبوط ودي حقيقة مش هنختلف عليها ولكن هل ممكن الواحد يقدر يعيش لوحده طبعا مستحيل

انا اري ان الناس اتغيرت عن زمان ولكن ما زال في خير ولازم احنا نحاول ان نقاوم انفسنا الي الاحسن لازم نصلح من نفسنا و الباقية هتاتي بخير ان شاء الله

انا شخصيا ياما اضحك عليا من الناس واتنصب عليا كتير ولكن غيرت طريقة تعاملي الغبية وبدات اعيش الواقع ولكن بطريقتي تحياتي

[nash]

شوفي يا أينو....

أنا شخصيا عندي معارف كثير جدا"...لكن مش أصحاب...فيه فرق...كبير بين التعريفين...

بالنسبه لي....ليس لدي الوقت لعمل صداقه وطيده مع أحد...وإن كنت مصممه هذا العام...علي رؤيتكم في الصيف القادم...وربنا يستر..

لكن مبدئيا عندي خط في حياتي...من يثبت لي أنه لا يستاهل صداقتي أضع عليه خط...ولا يمكن أبدا العوده عن قراري....لإن مبدأي يا أبيض يا أسود...لا أعترف باللون الرمادي..

وأصلا أنا أعرف طرق جميله لشغل أوقات الفراغ...أولهم معرفتكم الجميله...

وسابعهم برضه معرفتكم الجميله.....

[أبو زياد]

كلامك صح يا إيناس واللى ( اتقرص ) من الشوربة ينفخ فى الزبادى

أنا بقيت كل ما أشوف إنسان أو حتى أسلم عليه أنفخ فى أقرب زبادى !!!

لكن كدة الموضوع انتهى ؟ والا إحنا اللى انتهينا ؟

مشكلتى إنى شايف دة أكبر خطر يحيق بينا و لا نشعر به

لأننا كدة باختصار : مجتمع بينهاااار

[inas]

ابو حميد فعلا دلوقت الكل بيقول يلا نفسي ومعدش حد يعرف حاجه عن حد بقينا ندور في ساقيه ومفيش غير عالمنا الي احنا اخترناه وانعزلنا عن المجتمع ودا بيشكل في حد ذاته مشكله اعرف منين جاري تعبان ولا جعان زمان كنت امع ان الجيران لما تطبخ اكله تبعت للجران دلوقت انا دلوقت لو بعت يا هنتقد يا اما هيقولوا مالها دي عيزا ايه بتجر ناعم ليه؟؟

عبده بيه هي دي المشكله ان الواحد اضحك عليه واتبهدل كتير من حسن النيه وعشان كده بقول الاختصار حلو

نونش بس تعالي وانا مش هسيبك ،انا بجد معنديش اصحاب وكل ده بسبب خوفي من الناس والكلام الكتير انا من النوع الي ميعرفش يخبي ولا يتلائم وتلاقي الكل عايز يعرف اخبارك ويطلع يتكلم ويقول دا حصل وحصل واخت من النوع الي شبه البكره بتاعت الخيط شدي طرف الخيط بس :)

ابو زياد فعلا احنا اجتماعيا بننهار الموضوع مش مقتصر على الجيران وبس لا دا تعدى للارحام بقت الناس تقاطع ارحامها برضه من وجهة هو انا فاضي

[رمضان]

الصداقة والمعرفة والجيرة مطلوبة طبعا بس في حدود علشان ما يحصلش مشاكل .

فيه كلمة لوالدي كان دايما يقولها وبتعجبني جدا كان بيقول ( صاحبي وصاحبك على القهوة ) البيت له حرمته ومش اي حد يدخل البيت . وبكده يكون لينا اصدقاء بس بدون مشاكل

[Eldisel]

مشكلتى إنى شايف دة أكبر خطر يحيق بينا و لا نشعر به

لأننا كدة باختصار : مجتمع بينهاااار

دة فعلن هيبقى انهيار للمجتمع ... ان كل واحد في حالة وملوش دعوه بجارة وملوش اصدقاء ..دي تبقى كارثة

مش معنى ان حصل موقف او موقفين او عشره والواحد اتلسع منهم ان الواحد يبعد عن الناس ولا يعرف احوالهم لا يتفاعل مع المجتمع المحيط به .. طب يالي اتلسعت من الناس كذا مره قد يكون العيب مش في الناس العيب يمكن ان يكون فيك انت , انت تعطي ثقتك لمن لا يستحق

ان كان في استطاعتي اني اساعد شخص او احلله مشكلتة فلية لأ , ان كان في استطاعتي اني اكون شخص معطاء للخير يفك كورب الناس فلية لاء ...... فاياك ان تسعى لتكون قمر يعكس نور الشمس ولكن كن شمس تسطع بنورها

قدم الخير للناس ..... ولا تنتظر منهم المقابل فالناس لا بتقدم ولا بتاخر

فيجب عليك قبل ان تعامل الناس ان تعامل الله في الناس ... ودي اجمل حاجة في شريعة المسلمين الم تسمعوا بقوله صلى الله علية وسلم ( الدين المعامله )

غير سيل الاحاديث النبوية الشريفة التي توصي بفك الكرب عن المسلم وتوصية جبريل للرسول صلى الله علية وسلم بالجار وقصه الرسول علية الصلاه والسلام مع جارة اليهودي الذي كان يضع الاذى امام بيت الرسول وعندما مرض ذارة الرسول الكريم مع اسائتة للرسول

وانا شايف ان الحالة الي وصل اليها الناس دلوقت من ضياع الحقوق لان كل واحد بقى في حاله ولا يهتم لمشاكل الغير ..... تلاقي مثلن واحد بيعاكس وحدة في الشارع ويعدي من جمبهم راجل كبير وشكلة وقور وبدل ما يعمل موقف معاهم بالنصح او غيرة تلاقية يحط راسه في الارض ويقول وانا مالي خليني في حالي

ونتيجة للسلبية دي بقيت الرزيلة تفعل في الشوارع على مرئا ومسمع من الجميع والحمد لله الناس رفعه شعار السلبية ( انا في حالي مليش دعوة بحد )

ربنى فضلنى عن باقي الامم بالايجابة ( نامر بالمعروف وننهى عن المنكر ) وننحن تخلينى عن ذلك

شكلي طولت عليكم وللموضوع بقية

يتبع

[أبو زياد]

انت تعطي ثقتك لمن لا يستحق

قدم الخير للناس ..... ولا تنتظر منهم المقابل فالناس لا بتقدم ولا بتاخر

وانا شايف ان الحالة الي وصل اليها الناس دلوقت من ضياع الحقوق لان كل واحد بقى في حاله

ربنى فضلنى ( ربنا فضلنا ) :) عن باقي الامم بالايجابة ( نامر بالمعروف وننهى عن المنكر ) وننحن تخلينى عن ذلك

شكلي طولت عليكم وللموضوع بقية

اخى الديزل الحبيب أهلا بيك منور ..

ياريت تراجع موضوع ( الناس جرا لها إيه ) علشان نستفيد معا باستكمال المناقشة فى هذا الموضوع الذى طرحته الفاضلة إيناس و ربما كانت عباراتها قريبة إلى حد كبير من رؤوس الموضوع الآخر ..

ولا أرى مانعا ابدا من استكمال المناقشة و الإضافة والمشاركة فى هذا الموضوع ..

المهم أن نصل معا إلى شىء يصلح الصدع الذى أصابنا قبل فوات الأوان إن لم يكن قد فات ...

أخى حضرتك ماطولتش ولا حاجة و طول ولا يهمك كلنا آذان صاغية ..

القصد :

تعرف يا أخى و يا أخواتى الأعزاء يمكن اللى اتعلموا فى مدارس مصر كان فيه دائما فى كل فصل شلة بتقعد فى آخر الفصل كل وظيفتهم التهريج و الإستهزاء مش كدة ؟ كنا بنسميهم شلة فاسدة

الشلة الفاسدة دى كبرت معانا و مع تقادم الأجيال أصبحوا يشكلوا مش أغلبية لكن نسبة كبيرة جدا هما دلوقت اللى بقوا مسيطرين على سير المجتمع وتوجهاته و ذوقه وكل شىء ..

هذا عن موضوع الفساد ...

ديننا الحبيب أوجد لنا حل لكل ذلك و هو ( الأمر بالمعروف و النهى عن المنكر )

تعرف ياديزل إيه معناه ؟

أولا هو فرض على كل مسلم بإجماع الأمة و الأئمة ..

معناه يا سيدى إن اللى يغلط .. يعنى واحد مثلا غلط فى صاحبه او فى قريبه أو فى جاره ..

كان زمان مابيقدرش يورى وشه للناس و كانوا بيربطوه فى حمار بالعكس و يمشى فى زفة من أهالى الحى ..

كانوا زمان بيقولوا كلمة ( يا عيب الشوووم ) و مثلا : حتركبنى العيبة إذا فعلت كذا ..

مش هوة دة الأمر بالمعروف اللى إحنا سيبناه بحجة التطور و الغربانية و العلمانية ؟؟

طيب الغرب عندهم حاجة إسمها : shame & fame تعرف معناها إيه ؟

إن الإنسان مايعملش حاجة تسىء لسمعته ..

يعنى حتى هما عندهم أمر بالمعروف لكن بصورة أخرى إحنا بقه عندنا إيه ؟؟؟

عندنا دين أمرنا بما يحيييييينا

زى ماقلت سيادتك : خللينى ف حالى ..

في إخوة كتير حيقولوا أنا مرة و اتنين تدخلت و حصللى اللى حصل طيب ما هو دة الجهاد و فى هذه الحالة يبقى ثواب جهاد وهو أفضل الأعمال ...

الخلاصة :

لابد من وجود مجتمع محاسب .. ( مش خريج تجارة :) ) لكن خريج أصول و أصول الدين ..

وبدون وجود منطق الحساب و العقاب فى المجتمع حينهاااااااار collapse)

سوف أتوقف هنا وفى انتظاركم حتى نتفق ماذا يستطيع كل منا أن يفعل مع نفسه حتى لو كانت القيامة حتقوم بكره ..

و سأبدأ بنفسى و ربما كنت بدأت و لكن فترت الهمة :

لا تسكت عن المنكر

[Eldisel]

اخويا الكبير في المحاوات ابو زياد .... والله انت وحشني والمحاورات كمان وحشاني بقالي فترة منقطع عن المحاورات واخبرها لظروف نفسية ... :) ويمكن عشان كدة لم اقراء موضوع العزيزة اناس ( الناس جرلها اية ) بس بجد احوال الناس والسلبية في الشارع والفهلوة في الشغل والمحسوبيات ... الخ اكتر الحجات الي تعباني جداً

المهم ... كلامك مذبوط يا ابو زياد احنى لاذم نتكاتف ونصصح اخطئنى ونرجع لاصلنى عشان نحس تاني بالكرامة والعزة الي الواحد بجد قرب ينساهم

فعلن في ناس كتيرة اتأذت في حكاية الامر بالمعروف والنهي عن المنكر ... وناس كتيرة استسلمت وبطلت بس عشان الي شفتة نتيجة دة

بس الاول انا شايف ( من وجهة نظري الشخصية ) ان مش اي حد يعرف يامر بالمعروف وينهى عن المنكر لاذم يكون عند الشخص دة مقومات وقواعد يمشي عليه , ولاذم يكون عارف هدفة اية , ولاذم يكون يعرف معنى الامر بالمعروف والنهي عن المنكر اية ..... وفيما يلي انا هحاول افسر دة من وجهة نظري الشخصية قد تصيب وقد تخطئ , وقد تكون منقوصة وواريد من حضراتكم المتابعة والتصحيح والتشوار حتى يعم النفع:-

وقبل كل دة انا عاوز اوضح حاجة فانا لو تمعنت في معنى الجملة شوية ( الامر بالمعروف والنهي عن المنكر ) حسيت بان معنى الجملة جامد شويه .. في ( أمر ) و ( نهي ) والامر والنهي بيقى تقيل على النفس البشريه شوية فاكيد ان في مرحلة قبل الامر والنهي وهي مرحلة النصح والموعظة الحسنة قال تعالى ( ادع الى سبيل ربك بالحكمة والموعظة الحسنه , وجادلهم بالتي هي احسن )

فالامر بالمعروف والنهي عن المنكر لا يصلح مع كل الناس ولا يصلح في جميع المواقف فالاول انا شايف ان النصح هو الطريق الي بندور عليه

طيب لو سئلنى نفسنى ايه هو الهدف من النصح ..,.. اوالامر بالمعروف والنهي عن المنكر الهدف منه هو اني ( اصلح المجتمع( بشكل عام) او امنع رزيلة او خطئ كان هيرتكبة شخص ما او ادلة على خير ممكن يعمله يستفاد بية هو او يفيد بيه غيرة ( بشكل خاص ) دون الاعتبار الى الفائدة الي ممكن تعود على .. ودون ان يتخلل ذلك العمل شئ من الرياء فقط اقدم النصيحة لوجة الله حتى دون الاعتبار ان كان هذا الشخص سوف يعمل بهى ام لا المهم اقدمهى )

يعني مش الهدف اني ابين للناس اني احسن منهم واصلَح منهم واني انا الصح وهما الغلط ... او عشان افضح الشخص دة مثلاً واقول ده انا كونت بنصحه كدة النتيججه هتبقى عكسيه تماماً .,. فيجب ان تكون النصيحة بذوق وبادب وفيها مراعاة لشعور الغير باختصار ( اهيء الجوا المناسب للشخص الي هقدملة النصيحه عشان يستقبلهى مني بصدر رحب ) فلو كان الشخص الي انا عاوز انصحة اكبر من في السن احاول مبينلوش انه صغير او غلط (( فكرين قصه الحسن والحسين مع الرجل العجوز الي كان مش عارف يتوضئ .... شوفتوا هما علموه اذاي )) ولو كان اصغر مني او طفل احاول اني اكبرة عشان يستعد لتقبل النصيحة ..... وهكذا

انا هقوم دلوقتي عشان الحق الشغل .......

يتبع .....

تم تعديل 19 فبراير 2007 بواسطة Eldisel

[أبو زياد]

قال الأخ العزيز الديزل :

ايه هو الهدف من النصح ..,.. اوالامر بالمعروف والنهي عن المنكر الهدف منه هو اني ( اصلح المجتمع( بشكل عام) او امنع رزيلة او خطئ كان هيرتكبة شخص ما او ادلة على خير ممكن يعمله يستفاد بية هو او يفيد بيه غيرة ( بشكل خاص ) دون الاعتبار الى الفائدة الي ممكن تعود على .. ودون ان يتخلل ذلك العمل شئ من الرياء فقط اقدم النصيحة لوجة الله حتى دون الاعتبار ان كان هذا الشخص سوف يعمل بهى ام لا المهم اقدمهى )[/size]

هذه الكلمات التى اقتبستها ممتازة منك يا أخى ..

النصح هو صورة من صور المر بالمعروف و للأسف بعض الناس يفهمونه على أنه صراع و عنف و هذا الفهم ( و الدعاية ) الخاطئة لهذه الشريعة تعتبر إساءة للشريعة نفسها

فمن أهم قواعد الأمر بالمعروف و النهى عن المنكر ألا يكون بمنكر آخر وفى هذه الحالة يكون هو نفسه منكر لأنه يضر بمصالح الفرد و المجتمع التى يضمنها و يحميها الإسلام ..

بالطبع لابد من مقومات شخصية يمتلكها هذا الشخص الذى يتصدى لهذه المهمة و أهم منها المقومات الصلاحية أو السلطة نفسها ..

فهذا الدور يبدأ من ولى الأمر الذى يمتلك هذه الصلاحية ثم ربما تنتهى إلى الشخص العادى الذى فى رأيى لا يمتلك إلا النصح كما تفضلت ..

وهذا النصح راجع كثيرا لمقومات هذا الشخص و معلوماته ثم الموقف نفسه ثم قدرة الشخص على الإقناع و التأثير .

فى النهاية حتى لا يتحول هذا الأمر إلى منكر وضرر لأى طرف ..

وهذا هو السؤال و التساؤل و مربط الفرس .. كيف نهيىء الظروف لهذا أن يحدث ..؟

كيف نتقبل هذه الشريعة و يكون لها دور ..؟

ربنا يوفقك فى عملك و إلى اللقاء مع جميع الإخوة ..

[inas]

الاخ الفاضل ابو زياد شكرا ليك وعلى الكلام الجميل ده وعلى توصالك واهتمامك

وااسف لاني لم اشاهد موضوعك

الموضوع فعلا كبير واحسست بمدى اهميته من العلاقات المحيطه بي من جيران واصدقا الصداقه اكيد شي رائع وان يكون لك جيران يودوك ويكونوا قربك وقت الضيق والفرح شيئ اجمل

لكن نقف حائرين امام خوفنا من الناس ومن الاختلاط بهم وتجد كل من هم حولك يحذرك وينصحك بالابتعاد

اما موضوع الامر بالمعروف فده اكيد شي مهم بس في ظل الظروف الي حاصله للمجتمع

فتلاقي الواحد بقى يخاف يتكلم وبقى الاغلبيه يتبعون مبدا اضعف الايمان هو بالقلب فقط

زمان لو واحد شاف وحده بتتعاكس كان يهب لنجدتها دلوقت الزمن اتغير بقى الناس لو شافت وحده بتتعاكس تقف تتفرج دا اذا معكسوش هما كمان وقطعولها هدومها زي الحادث الي حصل في السينما

اقف حائره امام كل ذلك وقول ايه الي حصل ايه الي اتغير فينا ليه القلوب ماتت كده ليه محدش عاد قلبه على حد ليه كل الناس بقت تدور على مصلحتها ويلا نفسي وبس الف ليه بلا اجابه ومئة علامة تعجب

الحمد لله على كل شي وربنا ينجدنا من الي هنوصله

شكرا يا ديزل على مشاركتك وكلامك الجميل عندك حق فعلا اصبت ولم تخطا

ولي عوده

[باهى الطائر الحزين]

كل ما اروح فى حته

الاقى ...

الباشمهندس ياسر

قد سبقنى

الموضوع ده جميل ومهم علشان كده حبابب ارفعه