سبب وجودي في المحاورات

[batman]

اتعرفت على المحاورات سنة 2008 ,, وقتها كان قسم الهجرة لكندا هو أكبر وأهم مصدر معلومات عن الهجرة لكندا بالعربية .. كنت بأقضي ساعات طويلة يومياً في قراءة المواضيع في هذا القسم .. وتصادف وقتها كتابات لشخصيات رائعة مثل د. الشامي ود. محمد التهامي بأسلوبهما الشيق .. ذكريات جميلة :)

تحياتي للجميع

[Grandma]

بدون أدني شك كل واحد فينا قبل ما يسجل عضوية هنا .. كان بيخش المحاورات كزائر .. فترة طويلة أو قصيرة ... ( في حالتي مثلآ كانت أكتر من سنة ).. لحد ما اللمبة نورت جواه .. شاف مقالة .. مداخلة .. موضوع .. قام قال في عقل باله ... ما بدهاش .. انا لازم اقول رأيي في الموضوع ده ..

في الموضوع ده اتمني ان الزملاء .. (و بالذات الأعضاء اللي عمرهم ما كتبوا) .. يكتبوا عن سبب وجودهم هنا ...

مثلآ .. انا عرفت المحاورات عن طريق اخويا .. قاللي بص بصة عالمنتدي ده .. فيه حاجة مختلفة .. أول ما دخلت اكتشفت عالم تاني خالص ... و ناس الواحد يفخر بجد أنهم مصريين ... و فضلت متابعهم من بعيد مكسوف او ما عنديش ثقة في نفسي اني اقدر أجاري فطاحل زيهم ... و في نفس الوقت كان فيه اعضاء حاسس انهم ولاد حتتي .. من شلتي .. بطريقة كلامهم ...زي شعنونة .. حشيش ... وايت هارت... سي السيد .. و ابن مصر افتكر انه كان فيه موضوع كوميدي انواع النساء .. حرب بين رجال المنتدي و "فكيهاته" .. زي ما كانوا مسميين نفسهم .. الموضوع ده كان بيخليني ارغرغ من الدموع من كتر الضحك .. و كنت عايز اوي اشارك فيه ... بس بصفة ايه .. ما عرفتش .. و فضلت اقاوم الكتابة لحد ما جه الموضوع اللي قلت .. ما بدهاش .. كان موضوع لو الزمن رجع....حتعمل ايه؟ .. اداني الدفعة او التشجيعة اني اشارك .. كتبته و كنت قلقان شوية من رد الفعل لدخول جسم غريب في كيان جديد ..

عدت ... و ابتدت معاها مرحلة أكتشفت فيها جانب ما كنتش اعرفه موجود جوايا ....

أنتم بقي ... ايه سبب وجودكم هنا ؟

الحقيقة انا ما أخدتش لفة على المواضيع قبل تسجيلي في المحاورات ولا راقبت المنتدى مدة

بنظرة سريعة وجدت ان المنتدى لسه فيه النفس عكس منتديات تانية كتير انتهى أمرها

وبما ان الاحداث السياسية و الاجتماعية ساخنة جداا اليومين دول ... وانا عادة بحب أتعرف على آراء من حولي

و أحيانا يؤدي هذا لبعض الاشتباك ... فبدل ما أغلس على معارفي و أصدقائي على الـ Facebook أو في الواقع

ونزعل من بعض ... قلت أغلس على ناس ما أعرفهمش ولا يعرفوني :)

[أبو محمد]

فبدل ما أغلس على معارفي و أصدقائي على الـ Facebook أو في الواقع

ونزعل من بعض ... قلت أغلس على ناس ما أعرفهمش ولا يعرفوني :)

i*:

كده كده