في مصر "شجرة مسلمة" و بدبي بنوك إسلامية تبحث عن حصة سوق تشمل غير المسلمين

[shazly]

في مصر "شجرة مسلمة" و بدبي بنوك إسلامية تبحث عن حصة سوق تشمل غير المسلمين

الكاتب: معتز الشاذلى - بتاريخ: 21 - فبراير - 2007

مش عارف أقول إيه غير إني بقيت خلاص متعود على مظاهر التخلف البشري للشعب المصري الساذج الج*** الغلبان الضعيف "المسالم". مشيها "المسالم" وبلاش الجاهل عشان مبقاش بسوء سمعة مصر :ph34r:

للي مش عارف الخبر هقول, واحد عسكري متجند لقا شجرة محفور عليها و إفتكرها معجزة الهيه عشان لقا لفظ الجلالة و محمد رسول الله..لحد كده عادي جدا معروف إن عساكر الامن المركزي مبيجيبوش أكتر من كده لكن الغريب إنو بيعرف يقرا أساسا و ده إللى مخليني شاكك في مصداقية الخبر إلا لو كان فهمها بالشكل و ده طبعا عشان مصري فهلوي, المهم.

بعدين بقا الناس أتلمت و شمو ريحة الكافور و إتقال مسك و الناس كبرت و هللت في مشهد يمثل روعة الروحانيات و يوضح مدى عمق الدين فى نفوس المصريين و كيف هم شعب متدين يحب يحس إنو عايش فى خيال علمي طول الوقت و أعتقد إن ده ناتج عن كتر شرب البانجو و الحشيش...المهم برضوا

جت ناس متعلمة و الحمد لله في مصر عندنا منهم كتير لكن للأسف مش واخدين فرصتهم و أكتشفول إن إللي حاصل ده بفعل فاعل و ليست ظاهرة طبيعية أو إعجاز إلهي من الله سبحانه و تعالى.

طبعا اللمة والزيطة والتهليل والتكبير والدبح على روح الشجرة عمل زحمة, -محصلش دبح على حد علمي لكن ده عشان السياق الدرامي-.المهم الأمن طوق المكان و فض الناس الموهومة إللي طبعا شككت فى مصداقية بتوع الحكومة و قالن إنهم عايزين يداروا على الشجرة المسلمة لأحسن تبقا مزار دولي و كل شعوب الأرض تدخل فى الإسلام وده طبعا ضد مخططات الحكومة الكافرة الداعرة...

فى مكان تاني على الأرض فى دولة صغيرة كده أصغر من أي محافظة واحدة في مصر, في حته إسمها دبي. في بنوك إسلامية بتطبق العلم و بتبحث عن حصة سوق أكبر تشمل غير المسلمين و بتستخدم العلم كوسيلة عشان توصل لده.

بطبيعة الحال في مصر الناس الفقرا هتيجي للسياحة, تتفرج على المصريين كتحف متحركة و في دبي الناس الغنية هتروح تستمتع في مكان حضاري جميل -مفيهوش فراعنه و حضارة 7000 سنة- بس فيه ناس محترمة و متعلمة, عشان يبعدوا عن ظغوط العمل في بلادهم المتقدمة علميا.

تحياتي...

شاذلى.نت

[MZohairy]

الى متى سيدوم ظلم المسلمين للإسلام بسبب الجهل و الحب و الضعف؟

[أسد]

موضوع الشجرة ده موضوع خزعبلي بشكل غريب ..

الحقيقة أنا مش متصور إن فيه حاجة كده .. أو فيه ناس كده ..

ولكن في بلاد العجائب .. وبلاد يعيش فيه الناس في غيبوبة غريبة ..

قد يحدث أكثر من ذلك ..

الغريب ...

الموضوع إستغرق عدة أيام لوقف هذا التخلف ..

ولا أعرف إذا كان قد توقف تجمهر الناس عند الشجرة أم لا .. ولكن عهدة على ماكتبه شاذلي ..

مقارنة شاذلي واقعية ومنطقية ..

حاجة تزهق ..

[shawshank]

- أتحفظ على عبارة "شجرة مسلمة" في العنوان . إذ يقول سبحانه و تعالى "و إن من شئ إلا يسبح بحمده " - الإسراء 44 .

- إن لم يحدث ، فإننا نؤمن أنه من الممكن أن يحدث . لأن الله سبحانه و تعالى على كل شئ قدير .

[عبده بيه]

الاخ شاذلي

سيدي انا متفق معاك في حالة المصريين الغلابة واللي بيرجعوا لمئات السنين بدون ما ندري ولا نبالي

في حين ان مستوي الثقافة في مصر بيتراجع امام الخزعبلات

اما قدرة الله فسبحانه قادر علي كل شيء ارجوا استيعاب هذه الجملة فقط فهو علي كل شيئا قدير

تحياتي

[se_ Elsyed]

إمبارح كتبت مداخلة طويلة عريضة في الموضوع ده بس راحت في الوبا

ما علينا نعيد كمان

أخوكم سين سين في رحلته الأخيرة للمحروسة كان شاهد عيان على تلك المهزلة الشجرية المتفرعة من بذور الجهل المغروسة في حقول العقول المصرية والتي أتت ثمارها ونحن الان في مرحلة القطاف ( حلوين البؤين بتوع الزراعة دول ؟ )

فمحسوبكم شبه مُقيم في مدينة العبور .. يعني باعدي على المكان بتاع الشجرة ده ييجي 3 أو 4 مرات يومياً لإنها قريبة من مدخل المدينة ولكن على طريق مصر الإسماعيلية وتحديداً على بوابة أحد الوحدات العسكرية ..

وبالتالي إنكويت بنارها ومن الخنقة كنت باتمنى يبقى عندي منشار كهرباتي من اللي بيشتغل منه فيه أول ما الواحد يشد الفتلة بتاعته وأروح قاطع الشجرة دي وقاطع راس أي حد يقرب منها من كتر الزحام الرهيب اللي في الطريق ومن كتر العربيات اللي مرزوعة في نص الهاي واي الحيوي وأصحابها نازلين يشوفوا الشجر المعجزة .. لدرجة أنا أطلقت على اللي بيحصل ده

مولد " سانتا تري Santa Tree " حقوق الطبع مُعلبة .. قصدي محفوظة

وأنا بأسأل نفسي ... هل نحن في حاجة إلى شجرة مثل هذه لثُبتت بما لا يدع مجالاً للشك وجود الله ؟!!!!

شي غريب !!!!!!!!!!!!!!!!!!

وياريت اللي شاف الشجرة ولمسها عشان تحل عليه البركة أو حتى اللعنة .. ياريت بقى يراجع نفسه ويشوف إمتى أخر مره أدى الصلاة في المسجد ... وياريت بالمره يراجع نفسه ويشوف إمتى أخر مرة صلى فيها الفجر حاضر ... وياريت اللي إنعدم ضميره وأصبح يرى الفساد أما عينه ويتعايش معه ويستفيد منه في بعض الأحيان .. ياريت ينصلح حاله بعد ما راح للمبروكة ...

فإذا حدث ذلك .. فأنا سأطلق حملة قومية وأسميها " شجرة لكل مواطن "

والأن معكم صورتين طازجتين للشجرة مصورهم واحد مهندس مُحترم المفروض كان في بيننا ميعاد عمل ولطع اللي جابوني ساعتين ولما سألته " كنت فين يا باشمهندز ده انا حمضت من الإنتظار ؟ فقالي كنت بأصور الشجرة المعجزة

شجرة 1

صورة 2

[New]

عندى سؤال صغير...

الباشمهندس اللى صور ... ماخدش باله من كتابة تانية محفورة فى الشجرة بالانجليزى وظاهرة بوضوح شديد فى الصورة الاولى؟؟؟

[se_ Elsyed]

اتفق معك عزيزي نيو ... ودي طبعاً من الحاجات اللي ماحدش اتكلم عنها ... ربنا يهدي

[عادل أبوزيد]

الفاضل س س

لم أستطع رؤية الصور التى أشرت إليها هل هناك عيب فى البرمجيات لم يمكنك من إدراج الصورة فى المداخلة كما نعمل طول الوقت ؟

و بالنسبة لموضوع الشجرة و هوس العامة بها - كما فهمت - فالواقع أن فى مصر و فى الأرياف بالذات و أقصد بالأرياف مدن و قرى الوجهين البحرى و القبلى ، فهناك كمية كبيرة من العادات ذات الشكل الدينى عادات أقرب إلى الجاهلية ذاتها .... مراسيم الحزن فى الصعيد لا يمكن وصفها أو الحديث عنها و تجد من يصدقك من المثقفين ناهيك عما يحدث فى الموالد سواء من المسلمين أو المسيحيين - بصرف النظر عن ديانة صاحب المولد - .

السؤال الذى شغلنى فى موضوع هذه الشجرة هو هل الجهل فى تقدم و توسع رغم السموات المفتوحة و الإنترنت و التعليم و كل ما نراه من حولنا.

هل هناك تقدم و توسع حثيث فى إنتشار الجهل و الجهل المرسخ بمعنى الجهل القوى المستقر.

[New]

الاخ الفاضل se_Elsyed

فعلا ربنا يهدى الجميع...

اثناء بحثى وجدت رابط بيتكلم عن الظاهرة دى... "تفسير نص او صورة نراها لبعد دينى معين" ... الظاهرة دى موجودة فى كل الدنيا بشكل او بآخر وناس كتيرة بتصدق

(طبعآ ده على افتراض ان موضوع الشجرة ده حقيقى وماحدش عامله)

الرابط:

http://en.wikipedia.org/wiki/Religious_pareidolia

[Sherief AbdelWahab]

طالما أن الفهم العام للدين هكذا ، وأن المؤسسة الأزهرية تقوم بدور المتفرج على الخرافة ومن يدعمونها وخزعبلات من يسمون أنفسهم مفكرين إسلاميين ، ماذا ننتظر؟

خلص الكلام

[غريب الزمان]

من وجهه نظرى الى حصل ده فى منتهى المنطقيه وانا شايف ان الى حصل ده مش نابع من جهل ولا حاجه بدليل ناس متعلمه ومثقفه راحت صح ولا انا غلطان

الموضوع ان كل المصريين ماعدا طبعا (الحزب ومنتفعيه والى عارفيين يعيشوا فيها براحتهم) فاقديين الثقه الكامله فى انفسهم

نعم الشعب فاقد الثقه فى نفسه وايقن بصوره مرضيه انه مهما هيعمل مفيش حاجه هتتغير لان معظم المصريين بقا ياخد تجاربه سمعيا يعنى ايه سمعيا يعنى مثلا واحد جاره جرب يعمل حاجه او واجه فساد وفشل وجه حكى له بتدخل القصه جوا نفسه كانها تجربته الشخصيه

ولذلك اصبح معظم الشعب متجمد كتلك الشجره ومستنى ان ربنا هيعمل معجزه وهيحصل شىء كما ذكرتم شبيه بافلام الخيال العلمى يغير واقعهم المرير الى حياه جميله فيها خير وسعاده وبردوا يفضلوا قاعدين مبيتحركوش

وطبعا ربنا قادر على كل شىء وهوا الى بيقول للشىء كن فيكون

بس لا يغير الله ما بقوم حتى يغيروا ما بانفسهم

وسلامى عليكى يا مصر

[أبو محمد]

هذه المهزلة جعلتنى أعود بذاكرتى إلى الوراء أربعين سنة .. بعد هزيمة 1967 .. وجعلتنى أقارن حالنا اليوم وحالنا وقتئذ ..

أما لماذا رجعت بالذاكرة كل هذه السنين .. فهو أننا فوجئنا فى صبيحة أحد الأيام بالجرائد تزف إلينا خبرا - نقلا عن شهود عيان - عن تجسد السيدة مريم البتول فوق كنيسة الزيتون ..

يا للهول .. العذراء تجسدت لنا لتواسينا فى مصابنا ولتشد من أزرنا أمام الحدث الجلل ..

وبدأ الناس فى (الحج) إلى الزيتون ليروا السيدة العذراء .. وأقسم المئات أنهم رأوها فوق قباب الكنيسة .. وأصبح الناس يتوافدون لرؤيتها بعد المغرب .....

هناك يا سادة من يبيعون الوهم لهذا الشعب المتدين بطبعه .. ولكن باعة الوهم بعد الهزيمة كانوا أذكى .. لقد قرروا أن يبيعوه لكل الشعب .. مسلميه ومسيحييه .. فالوهم فى تلك الأيام كان فى صورة رمز مقدس للمسيحيين والمسلمين .. مقدس عند الشعب كله .. أما باعة الوهم فى هذه الأيام السوداء فقد تماشوا مع الموجة .. الموضة .. توظيف الإسلام فى وقت بات فيه المسلمون مهيئين لتلقى وابتلاع وهضم الخزعبلات فتصيبهم فى عقولهم وقلوبهم لتظهر عليهم أعراض الدروشة والبهللة ..

يا ألله .. هل هذا مخدر محفوظ فى الأدراج يخرج بكل خبث فى أوقات الأزمات لينطلق بالبسطاء إلى عالم النشوة .. ويأخذهم "لبعض الوقت" بعيدا عن واقعهم المرير .. هل هو حلقة من مسلسل سنتابع حلقاته تباعا ؟ .. هل هو خارج من هذا الخندق .. أم ذلك .. أم ذاك ؟

اللهم إن هذا دينك فانصره

اللهم إن هذا دينك فنقه من عبث العابثين ..

اللهم إن هذا دينك فامنع خوض الخائضين فيه

أتوجه إليك يا ألله بهذا الدعاء لأننى أرى من بين المسلمين (بخبث أو جهل) من هم أشد خطرا علي دينك من أعدائه

اللهم هذا دعائى .. ورجائى ..

اللهم اغفر وارحم .. إنك تعلم ما لانعلم .. إنك أنت الأعز الأكرم

[Alshiekh]

أعتقد اننا نقسوا على شعبنا أكثر من اللازم ، فالعالم ملئ بمثل هذه الخرافات وكما يقول المثل كل يغنى على ليلاه.

ولكن مايحزن ويحز فى النفس ان اناس على درجات عالية من التعليم والخبرة فى الحياة يؤمنون ويدافعون عن ذلك ، كما فى موضوع الشجرة مثلا ولم يكلف احدهم خاطره ويسأل وماذا عمن لايفهم العربية ، ماذا تعنى له مثل تلك النقوش.

وكما ذكر الاستاذ ابو محمد عن قصة السيدة مريم ، فهى تتكرر فى العالم كله ، اذن فالمسألة ليست قاصرة على المصريين فقط وبهم نسبة امية عالية ، لذا فلا تظلموا المصريين ، وياأستاذ شاذلى الناس فى دبى ليسوا افضل حالا من جيرانهم فالكل فى العقل سواء.

اليكم بعض المعجزات المزعومة من خارج مصر.

تمثال السيدة مريم يبكى دما ( من مدينة كاليفورنيا )

حائط به بعض الاوساخ الترابية وبعد سقوط المطر كونت صورة شبحية ظنها البعض انها صورة السيدة مريم واخذوا يتهافتون عليى الحائط باعتباره حائطا مقدسا

والشجرات المسلمات

وهنا من يدعى ان هذه الصورة هى لجثة فرعون وحفظت بالبحر لآلف السنين وطبعا حرمت على الاسماك ان تلتهما مستندين الى تفسيرهم للآية القرآنية:

" فَالْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ آيَةً وَإِنَّ كَثِيرًا مِنَ النَّاسِ عَنْ آيَاتِنَا لَغَافِلُونَ "

[Doofy]

==========================================================================

لا اود الحديث عن الشجرة ففي كل لحظة اشهد بعظمة الله عز وجل و يملئ الكون عيني دليلا على وجوده ولا نهائية قدرته

ولكنني في كلا الحالتين اود ان اسجل مع الجميع حالة الحزن والأسى

لأن في حالة صحة المعجزة او عدم صحتها اوصلتنا إلى نتيجة سيئة جدا

نتيجة لاحظها الكثيرون ممن كانوا على موعد لمشاهدة تلك الواقعة ولو حتى بطريق الصدفة مثلي

فالتوقف الطويل الذي واجهته سيارتي جعلني اهتم بكل حنق لمعرفة السبب الذي ادى إلى بطئ الحركة لصف هائل من السيارات على طريق من المفترض انه طريق سريع.....

ولكن مع اقترابك للحدث تجد المئات من الناس يحيطون بشجرة و المئات ممن يتدافعون بشكل قوي للوصول أليها ورأيت الكثير يحملون اموالا في ايديهم وكأنهم يشترون لحمة الجمعية أيام الرخص...

النتيجة في واقع الحال ان هناك اطياف كثيرة تعاني من جهل ديني ودنيوي كبيرين

جهل نجده في طريقة تعاطيهم مع الحدث وفي طريقة فهم الرسالة وفي طريقة الرد الإيجابي عليها

فرغم القصص والحواديت التي طالت تلك الشجرة

ورغم أفعال الجاهلية التي حدثت ومن المتوقع حدوثها من قبل من لم يجدوا حل لمشاكلهم من قبل اولياء الله الصالحين وصكوك الغفران

تخيلت ولو للحظات اليوم الذي ستتدافع فيه كل تلك الأطياف لقلع شجرة النظام التي طرحت ثمار الفقر والإنكسار والمذلة

تخيلت ولو للحظات اليوم الذي ستتدافع فيه كل تلك الأطياف للدفاع عن عمدان الأقصى الشريف من جرذان صهيون

تخيلت ولكن الوجوه التي رأيتها هناك لا تعطيني الأمل القريب ان اشاهد ذلك اليوم ولكنني أتمنى..

وتحياتي للجميع

[atropine84]

كنت عايز أوضح شوية حاجات كدا من ردودكم فى الموضوع دا..

أولا: كذا واحد اتهم اللى راحوا عند الشجرة دى بالجهل .. ببساطة أى واحد عقله خلاق وعنده حب استطلاع هيروح يشوف اللى بيحصل برضو.. حتى لو مش مسلم.

ثانيا: فاكرين أيام الرسوم المسيئة بتاعت الدنمارك؟ فاكرين ازاى المسلمين احتجوا على إعادة نشر الصور فى الصحف والمجلات بعد كدا؟ دلوقت بئا شايف أخ اسمه سى السيد حاطط صورة للشجرة بيقول إن واحد صاحبه أخدها. اقروا اللى مكتوب عليها .. محمد بالعربى وتحتها Toz! يعنى دى برضو حاجة من الحاجات اللى بتحبطنى من المصريين .. ازاى حطها؟ ولو واحد دنماركى كان حاططها كنتم هتقلبوا عليه الدنيا. و ملحوظة كدا.. الصورة دى مش بتاعت الشجرة اللى بيقولوا عليها واللى شاف الشجرة يعرف.. وياريت الصورة دى تتشال عشان شكلها مش لذيذ.

ثالثا: ليه فى كل مرة لما حد يجيب حاجة مش كويسة فى دين معين الناس تجيب قصص عن نفس الحاجة دى فى الاديان التانية؟ يعنى لزمته ايه الكلام عن تمثال العذرا وقصة ظهورها فوق كنيسة الزيتون. لو واحد مسلم دخل منتدى غير مسلمين بيتكلموا عن حاجة مستغرَبة بتتعمل عندهم فى الدين وواحد منهم رد ان المسلمين بيعملوا كدا برضو .. يبئا رد فعله ايه؟ ببساطة هيقول (والجماعة دول أصلا يجيبوا سيرة الاسلام ليه؟ هو لازم فى أى حاجة غلط عندهم يطلعونا غلطانين معاهم؟).

ورابعا: عايز أقول ان أى انسان متدين بدين معين وواحد قال له دينك دا غلط ,دى تعتبر إساءة للشخص. اللى عايز يروح للشجرة يروح واللى عايز يروح للأولياء يروح. اللى عليك انك تقول ل كلمتين بالحسنى وهو حر .. مش تقول له (إيه التخلف اللى انت بتعمله دا!!)

الخلاصة من الأربع نقاط دول أربع نصايح:

1- مانحكمش أحكام عامة على أى إنسان عمل حاجة معينة من غير ما نكون ملمين بالموضوع من أوله لآخره (أنا لو كنت هناك كنت هنزل أشوف واصور الشجرة بالرغم انى مش مؤمن بالمعجزات اللى من النوع دا)

2- ياريت اللى يتكلم أو يعرض على غيره حاجة يكون متأكد منها الأول ويكون منطقى فى كلامه .. لو كلمة Toz دى على الشجرة, يبئا أى انسان هيكون واحد من اتنين. إما إنه يقول دا لعب عيال وكل دا واحد مش مسلم اللى عملها .. أو يكون مؤمن إنها معجزة واللى كتب الكلمة القبيحة دى واحد (كافر) وتقوم الفتنة الطائفية ال4432037230597545 فى مصر!

3- اللى يتكلم فى موضوع معين ياريت مايتكلمش عن غيره .. إلا لو غيره دا هو اللى عايز يتكلم. وأبسط مثال لو انت أب وبتزجر عيل من عيالك عن حاجة عملها وقال لك : أخويا عمل كدا الاسبوع اللى فات.. هتطلع عينه وتقول له مالكش دعوة بأخوك دلوقت! لأن واضح ان الواد عايز يطلع العيب فى اخواته كلهم مش هو بس

4- ماحدش يغلط فى غيره لمجرد إن أيدلوجية اللى ادامه متعارضة معاه. وماحدش ينكر إن كلنا فينا شوية حاجات وحشة.. وعلى رأى المثل: اللى بيته من إزاز مايحدفش الناس بالطوب.

وشكرا

[أبو محمد]

كنت عايز أوضح شوية حاجات كدا من ردودكم فى الموضوع دا..

أولا: كذا واحد اتهم اللى راحوا عند الشجرة دى بالجهل .. ببساطة أى واحد عقله خلاق وعنده حب استطلاع هيروح يشوف اللى بيحصل برضو.. حتى لو مش مسلم.

ثانيا: فاكرين أيام الرسوم المسيئة بتاعت الدنمارك؟ فاكرين ازاى المسلمين احتجوا على إعادة نشر الصور فى الصحف والمجلات بعد كدا؟ دلوقت بئا شايف أخ اسمه سى السيد حاطط صورة للشجرة بيقول إن واحد صاحبه أخدها. اقروا اللى مكتوب عليها .. محمد بالعربى وتحتها Toz! يعنى دى برضو حاجة من الحاجات اللى بتحبطنى من المصريين .. ازاى حطها؟ ولو واحد دنماركى كان حاططها كنتم هتقلبوا عليه الدنيا. و ملحوظة كدا.. الصورة دى مش بتاعت الشجرة اللى بيقولوا عليها واللى شاف الشجرة يعرف.. وياريت الصورة دى تتشال عشان شكلها مش لذيذ.

ثالثا: ليه فى كل مرة لما حد يجيب حاجة مش كويسة فى دين معين الناس تجيب قصص عن نفس الحاجة دى فى الاديان التانية؟ يعنى لزمته ايه الكلام عن تمثال العذرا وقصة ظهورها فوق كنيسة الزيتون. لو واحد مسلم دخل منتدى غير مسلمين بيتكلموا عن حاجة مستغرَبة بتتعمل عندهم فى الدين وواحد منهم رد ان المسلمين بيعملوا كدا برضو .. يبئا رد فعله ايه؟ ببساطة هيقول (والجماعة دول أصلا يجيبوا سيرة الاسلام ليه؟ هو لازم فى أى حاجة غلط عندهم يطلعونا غلطانين معاهم؟).

ورابعا: عايز أقول ان أى انسان متدين بدين معين وواحد قال له دينك دا غلط ,دى تعتبر إساءة للشخص. اللى عايز يروح للشجرة يروح واللى عايز يروح للأولياء يروح. اللى عليك انك تقول ل كلمتين بالحسنى وهو حر .. مش تقول له (إيه التخلف اللى انت بتعمله دا!!)

الخلاصة من الأربع نقاط دول أربع نصايح:

1- مانحكمش أحكام عامة على أى إنسان عمل حاجة معينة من غير ما نكون ملمين بالموضوع من أوله لآخره (أنا لو كنت هناك كنت هنزل أشوف واصور الشجرة بالرغم انى مش مؤمن بالمعجزات اللى من النوع دا)

2- ياريت اللى يتكلم أو يعرض على غيره حاجة يكون متأكد منها الأول ويكون منطقى فى كلامه .. لو كلمة Toz دى على الشجرة, يبئا أى انسان هيكون واحد من اتنين. إما إنه يقول دا لعب عيال وكل دا واحد مش مسلم اللى عملها .. أو يكون مؤمن إنها معجزة واللى كتب الكلمة القبيحة دى واحد (كافر) وتقوم الفتنة الطائفية ال4432037230597545 فى مصر!

3- اللى يتكلم فى موضوع معين ياريت مايتكلمش عن غيره .. إلا لو غيره دا هو اللى عايز يتكلم. وأبسط مثال لو انت أب وبتزجر عيل من عيالك عن حاجة عملها وقال لك : أخويا عمل كدا الاسبوع اللى فات.. هتطلع عينه وتقول له مالكش دعوة بأخوك دلوقت! لأن واضح ان الواد عايز يطلع العيب فى اخواته كلهم مش هو بس

4- ماحدش يغلط فى غيره لمجرد إن أيدلوجية اللى ادامه متعارضة معاه. وماحدش ينكر إن كلنا فينا شوية حاجات وحشة.. وعلى رأى المثل: اللى بيته من إزاز مايحدفش الناس بالطوب.

وشكرا

أولا أهلا وسهلا بك يا أخ "أتروبين" فى "محاورات المصريين" .. كنا نود أن تعرفنا بنفسك أولا كما جرت العادة .. على العموم نرحب بك بيننا أخا كريما ... وألف شكر على النصايح الغالية

بس سؤال من فضلك : حضرتك بتقول :

الصورة دى مش بتاعت الشجرة اللى بيقولوا عليها واللى شاف الشجرة يعرف.. وياريت الصورة دى تتشال عشان شكلها مش لذيذ.

وبعدها بكام سطر وبالتحديد فى النصيحة رقم 1 حضرتك بتقول :

1- مانحكمش أحكام عامة على أى إنسان عمل حاجة معينة من غير ما نكون ملمين بالموضوع من أوله لآخره (أنا لو كنت هناك كنت هنزل أشوف واصور الشجرة بالرغم انى مش مؤمن بالمعجزات اللى من النوع دا)

ومن ضمن النصائح أيضا وبالتحديد فى النصيحة رقم 2 حضرتك بتقول :

2- ياريت اللى يتكلم أو يعرض على غيره حاجة يكون متأكد منها الأول ويكون منطقى فى كلامه

فى الحقيقة حصل عندى لبس .. هو حضرتك شفت الشجرة ولا ما شفتهاش ؟ ..

والسؤال التانى بالنسبة لموضوع ظهور العذراء فوق قباب كنيسة الزيتون هل حضرتك قرأت الجزء ده ؟ :

أما لماذا رجعت بالذاكرة كل هذه السنين .. فهو أننا فوجئنا فى صبيحة أحد الأيام بالجرائد تزف إلينا خبرا - نقلا عن شهود عيان - عن تجسد السيدة مريم البتول فوق كنيسة الزيتون ..

يا للهول .. العذراء تجسدت لنا لتواسينا فى مصابنا ولتشد من أزرنا أمام الحدث الجلل ..

وبدأ الناس فى (الحج) إلى الزيتون ليروا السيدة العذراء .. وأقسم المئات أنهم رأوها فوق قباب الكنيسة .. وأصبح الناس يتوافدون لرؤيتها بعد المغرب .....

هناك يا سادة من يبيعون الوهم لهذا الشعب المتدين بطبعه .. ولكن باعة الوهم بعد الهزيمة كانوا أذكى .. لقد قرروا أن يبيعوه لكل الشعب .. مسلميه ومسيحييه .. فالوهم فى تلك الأيام كان فى صورة رمز مقدس للمسيحيين والمسلمين .. مقدس عند الشعب كله .. أما باعة الوهم فى هذه الأيام السوداء فقد تماشوا مع الموجة .. الموضة .. توظيف الإسلام فى وقت بات فيه المسلمون مهيئين لتلقى وابتلاع وهضم الخزعبلات فتصيبهم فى عقولهم وقلوبهم لتظهر عليهم أعراض الدروشة والبهللة ..

هل ترى أن فى هذا الجزء ما ينطبق عليه قولك :

ليه فى كل مرة لما حد يجيب حاجة مش كويسة فى دين معين الناس تجيب قصص عن نفس الحاجة دى فى الاديان التانية؟

وهل بعد قراءة هذا الجزء ما زلت تتساءل :

يعنى لزمته ايه الكلام عن تمثال العذرا وقصة ظهورها فوق كنيسة الزيتون

أهلا وسهلا بك مرة ثانية وشكرا على اهتمامك بنصحنا من أول مشاركة لك