أجندة مواعيد لقاءات المحاوريين -فرع الكويت

[بنت النيل]

فكرة كويسة يا ابو حميد

انا عن نفسى رايحه رايحه بأذن الله طبعا منتزة الشعب يوم الجمعه بصراحة مش عوزة اضيع يوم ذى ده

شكلة كدا هيبقى يوم جميل وفيه الجو المصرى بتاعنا

وبأذن الله ابقى اجى بعد كدا على سلطان شوية

[رمضان]

نزولا عند رغبة السادة الاعضاء فرع الكويت وبعد مراجعة جدول اعمال قررت باذن الله ان اقوم بزيارة منتزه الشعب من الثالثة الى السادسة ومركز سلطان ان شاء الله من السادسة الى الثانية عشرة .

والله ولي التوفيق

[رمضان]

الحمد لله تم اللقاء وكان اكثر من رائعا كالعادة ولكن ليس هذا محور حديثي .

محور حديثي هو أين الاخوة الاعضاء الافاضل الجدد الذين قالوا انهم سيأتون ؟؟؟؟؟؟؟؟؟؟؟؟؟؟؟؟؟؟؟؟

[وائل كيوان]

السلام عليكم ورحمة الله وبركاته

احب اشكر الاعضاء اللى حضروا لقاء يوم الجمعه وبجد كان اكثر من رائع كما قال الاخ رمضان والاعضاء الجدد ان شاء الله يتواجدوا المرة القادمة للمشاركة معنا وفى انتظارهم دائما ونقول للجميع للقاء المرة دى كان فيها استفاده كبيرة جدا وفعالة وان شاء الله نتناقش فى الامور التى تحدثنا فيها مرة اخرى

مع خالص تحياتى

[zedan]

السلام عليكم ورحمه الله وبركاته،،،

الأخوه الأفاضل ، فعلا لقاء الأمس كان جدا مثمر بالأفكار الجديه وإن شاءالله اللقاء القادم سيتم مناقشة ماتم في اللقاء السابق بصورة أوسع وذلك لعدم تواجد بعض الأعضاء الناشطين وفي انتظار الاعضاء الجدد

ولكم التحية،،،

[M.Farid]

السلام عليكم

كيفكم

منورين والله امال بيقولو المصريين وحشين مع بعض لية في الغربة

انا من اسكندرية وبقالي هنا 4 شهور بس بجد حاسس ان الكويت مليااااااااااانة مصريين وكلهم جدعان جدا ( مش كلهم قوي بس منتدي بقي وكدة )

منورين الكويت ومصر والخليج والعالم كلة

واتمني نتناقش كتير في المنتدي هنا وفي الواقع

فكرة التواصل فكرة حلوة جدا جدا جدا

M.F.A

[وائل كيوان]

السلام عليكم

كيفكم

منورين والله امال بيقولو المصريين وحشين مع بعض لية في الغربة

انا من اسكندرية وبقالي هنا 4 شهور بس بجد حاسس ان الكويت مليااااااااااانة مصريين وكلهم جدعان جدا ( مش كلهم قوي بس منتدي بقي وكدة )

منورين الكويت ومصر والخليج والعالم كلة

واتمني نتناقش كتير في المنتدي هنا وفي الواقع

فكرة التواصل فكرة حلوة جدا جدا جدا

M.F.A

اولا بحب ارحب بالاستاذ فريد بالكويت وبانضمامهم لينا لو يحب ينضم وهيفرح قوى بالمجموعة الاكثر من رائعه ان سمحت له الفرصة وقدر يتواصل معانا فى اللقاءات مش فى المنتدى بس وياسيدى لو المصريين كلهم مش كويسين زى ما بتقول خلينا احنا نحلى الصورة السيئة اللى واصله لمعظم الناس وصدقنى فعلا عاد فيه اجمل اسرة من المغتربين المصريين بالكويت اللى بتتجمع اسبوعيا لقضاء يوم من اجمل ايامنا بالغربة وكمان نتناقش فى امورنا ومحاولة طرح طرق لحلها وهتتبسط قوى لما تشارك وتشوف قد ايه الاسره دى بتحب بعضها مش مبنية على مصلحه او شئ بل للوقوف جنب بعض فى غربتنا .

وبنرحب بيك نيابة عن كل اعضاء الاسرة بالكويت وبندعوك للانضمام وكل اخواتنا المصريين

مع خالص تحياتى

[وائل كيوان]

السلام عليكم ورحمة الله وبركاته

مجموعة االكويت الكرام اية انتوا نسيتوا اننا هنلتقى يوم الخميس الساعه 6 مساءا ولا اية بالظبط طمنونى انكوا فاكرين اللقاء القادم يوم الخميس بمركز سلطان السالمية الساعة 6 مساءا تاريخ 17-3

والحاضر يعلن الغايب يا ولاد الحلال

ينادى المنادى من داخل الديرة

هل من مستمع هل من مجيب

ابو حميد

دكتور هوبا

بنت النيل

رمضان

داركر

نور الدنيا

زيدان

رشا

النسر المصرى

ابو ايمان

حسين

البحرى

اليكس لوفر

نانو

كمبوس

؟

؟

؟

يااااااا ه

انا هبطت من كتر مابنادى اصلكوا يا جماعه ماشاء الله بقينا عزوة اما اريح شوية لحد ما حد يرد عليا

:angry: smk: md2:

:) pps:

[أبو حميد]

الموعد طبقا للمتفق عليه الخميس 15/3/2007 مش 17 يا وائل وشيل النتيجة المضروبة اللي بتنقل منها التواريخ الغلط.

الساعة السادسة مساء بمركز سلطان اللي على البحر .

[بنت النيل]

الموعد طبقا للمتفق عليه الخميس 15/3/2007 مش 17 يا وائل وشيل النتيجة المضروبة اللي بتنقل منها التواريخ الغلط.

الساعة السادسة مساء بمركز سلطان اللي على البحر .

فعلا يا ابوحميد

عوزين نشوف المشكلة دى والنتيجة المضروبه اللى عند وائل ومنين مصدرها بظبط

كل تواريخها سابقه بيوم او يومين انا لاحظت ده

يا وائل الخميس هيوافق 15/3 والجمعه 16/3 والتاريخ ده بالذات انا عارفه كويس اوى تعرف ليه

لان 16/3 ده تاريخ ميلاد الانسه خلود :angry:

[deemuck]

السلام عليكم ورحمة الله وبركاته،،،

عدد المصريين بالكويت تقريبا كام؟

ديم مق

[أبو حميد]

لان 16/3 ده تاريخ ميلاد الانسه خلود :angry:

كل سنة وخلود طيبة والمرة الجاية هناكل تورتة عيد ميلادها طبعا وقولي لأبو محمود ما يزعلش مني ومن التدبيسة أنتي اللي قولتي.

عدد المصريين بالكويت تقريبا كام؟

الأرقام الرسمية 250 آلف من سنة لكن في أحصائيات غير رسمية بتقول 400 آلف.

[وائل كيوان]

يا فضحتك اللى بقت على الهوى يا وائل يا كيوان

والله يابو حميد ويا بنت النيل انا المشكلة لما نبهتنى ابص على كل التواريخ اللى عندى تعرف ان التواريخ كلها ظابطها مع بعضها يعنى الموبايل واللاب توب والساعه اللى فى ايدى والنيجة كلهم مخرفين على نفس التاريخ اللى قولته ومش عارف ازاى عجايب مع انى كنت حريص جدا قبل ما اكتب التاريخ علشان الفضايح اللى سبقت منى فى الاول بس كان المفروض تداروا عليا وتبرروها انها فروق توقيت بين الدول وتعدى والسلام .

يالله هيفيد بايه الكلام مهى الفضايح بقت على عينك يا تاجر اشترى واتفرج .

[وائل كيوان]

على العموم تكفيرا عن الغلاطات السابقة والحالية

هنعمل تورتاية مخصوص لخلود وهنعملها عيد الميلاد على البحر

وكل سنة وهى طيبة وعقبال ميت سنة وتشوفيها عروسة

يا جماعه انا بعلنها على الملئ وبذيعها لكل الحضور تورتة خلود عندى وهتكون فى انتظاركم فى السالمية

واللى عايز ينهض حقه فيها يجى بدرى

اجرى بقى لاحد يمسك فيا

سلميلى على خلود لحد ما اشوفها

بااااااااااااااااااااى

[أبو حميد]

هنعمل تورتاية مخصوص لخلود وهنعملها عيد الميلاد على البحر

وكل سنة وهى طيبة وعقبال ميت سنة وتشوفيها عروسة

يا جماعه انا بعلنها على الملئ وبذيعها لكل الحضور تورتة خلود عندى وهتكون فى انتظاركم فى السالمية

التورتة دي لا تغني عن تورتة أم محمود بس تكون صنع أيديكي مش تخلي أبو محمود يشتريها ويا سلام بقى لو تكون "شيز كيك" وصفة نانو يبقى أحسن.

[بنت النيل]

هنعمل تورتاية مخصوص لخلود وهنعملها عيد الميلاد على البحر

وكل سنة وهى طيبة وعقبال ميت سنة وتشوفيها عروسة

يا جماعه انا بعلنها على الملئ وبذيعها لكل الحضور تورتة خلود عندى وهتكون فى انتظاركم فى السالمية

التورتة دي لا تغني عن تورتة أم محمود بس تكون صنع أيديكي مش تخلي أبو محمود يشتريها ويا سلام بقى لو تكون "شيز كيك" وصفة نانو يبقى أحسن.

الله الله ايه جماعة انتم عملتوا عيد ميلاد ولا ايه انا مش بعمل عيد ميلاد

لكن طبعا ده ميمنعش انى اشكركم على ذوقكم وحبكم لخلود

وايضا لا يمنع من تشيز كيك لابوحميد انت تأمر يا باشا :angry:

الاخ الفاضل وائل انا متشكرة على ذوقك وده واجب عليا انا

عموما اطمنوا اذا كان على التورته او الجاتوه انا تحت امرك يا سلام انا ليا مين اعز من اعضاء محاورات الكويت smk: md2:

امابقى عن الفضايح فده اعتبره انذار لك يا وائل عشان تظبط تواريخك كلها بعد كدا

فكرتى بالنكته اللى بتقولك ايه

مره واحد بيسأل التانى انت اتولدت امته قاله يوم الجمعه

قاله ده اجازة يا حلو :)

تم تعديل 13 مارس 2007 بواسطة بنت النيل

[وائل كيوان]

التورتة دي لا تغني عن تورتة أم محمود بس تكون صنع أيديكي مش تخلي أبو محمود يشتريها ويا سلام بقى لو تكون "شيز كيك" وصفة نانو يبقى أحسن.

انت قصدك يا ابو حميد انها مش بتعرف تعملها ولا ايه طب ايه رايك يا بنت الدنيا انك لازم تسبتى لابو حميد انك احسن واحده تعمل شيز كيك بايدها وبدون براشيم من نانو ومتخفيش لو باظت ولا حاجة انا التورتة اللى معايا هعنهالك استبن من ورا الجميع حلو من ورا الجميع دى واحنا على الهوا مباشرة

يا شماتت ابله ظاظا فيا

:angry:

[وائل كيوان]

امابقى عن الفضايح فده اعتبره انذار لك يا وائل عشان تظبط تواريخك كلها بعد كدا

فكرتى بالنكته اللى بتقولك ايه

مره واحد بيسأل التانى انت اتولدت امته قاله يوم الجمعه

قاله ده اجازة يا حلو :lol: :lol:

الله يجبر خاطرك زى ما جبرتى خاطرى يا ام محمود يا اصيلة هى وصلت لكدا ( يالهوىىىىىىى ) انا بقيت على الهوى فى كل محطات الكويت تعرفى ان بسببكوا اصدقاء ليا قروا الموقف كلمونى وعايزنى اخد دروس فى الفلك على اساس ان انا لو معندي ساعه ابدء ابص من البلكونة واحسب التاريخ من حركات النجوم وكدا يعنى .

بس تعرفى ان انا اتولدت يوم تلات مش يوم جمعه

بس مش بطلت ضحك عليها والله :lol: :lol: :lol:

اودى وشى فين من الناس طيب

انا معتش هكتب حاجه فيها تواريخ خالص

[رمضان]

السلام عليكم

اولا كل سنة وانتي طيبة يا خلود وعقبال 163 سنة و7 شهور

للاسف ممكن ما اقدرش اجي ميعاد يوم الخميس لظروف ما .

اتمنى لكم لقاء سعيدا ومشرقا كالعادة ان شاء الله تعالى .

[أبو حميد]

طب ايه رايك يا بنت الدنيا

أجمل حاجة في وائل أنه كل يوم بيجيبلنا أعضاء جداد زي "بنت الدنيا" و "نور النيل" ودول لسه جداد أول مرة معانا.

وكمان بتلخبط في أسماء عضوات المنتدى التورتة بقت تورتين وشوية حبشتكنات والمشاريب عليك. وخد دي :lol:

يا شماتت ابله ظاظا فيا :lol:

للاسف ممكن ما اقدرش اجي ميعاد يوم الخميس لظروف ما .

لو أنت مجيتش أحنا هانجيلك فخدها من قاصرها وشرف الإجتماع عاوزينك ضروري.