في السفر والغربة

[أبو حميد]

دائما ما يقترن السفر والغربة عندنا بمواقف طريفة أو مواقف حزينة وأحداث غير متوقعة وهذه المواقف تحدث لمن يسافر أول مرة وتحدث في بعض الأوقات لمحترفي السفر وتحدث للمغتربين نتيجة أختلاف العادات واللغة والمسميات.

بعد سفري وجدت ان هذه الحكايات والمواقف تكون وقود كل جلسات الدردشة التي احضرها وتكون دائما مطلوبة من المستمعين ودائما ما يحب من تحدث له هذه المواقف أن يحكيها ويشارك الأخرين فيها. ففكرت في فتح موضوع خاص بهذه الحكايات والمواقف لننتفع من خبرات الأخرين كما أنه موضوع مسلي.

أنتظر مداخلاتكم وحكاياتكم وتعليقاتكم.

تم تعديل 1 مارس 2007 بواسطة أبو حميد

[الحاج فوزى]

طيب يا سيدى ابدأ بنفسك وسمعنا عجائب وطرائف ابوحميد :victory:

حسين

[أبو حميد]

طيب يا سيدى ابدأ بنفسك وسمعنا عجائب وطرائف ابوحميد :victory:

أول حاجة بتيجي على بالي عن اول سفرية ليا كانت الحر الرهيب بالكويت وكانت سفرية قصيرة لمدة 3 أيام فقط لعمل أنترفيو والعودة وصادف الحظ انها كانت بمنتصف يوليو ولكم ان تتخيلوا الحر في هذه الفترة من العام.

كانت اقامتي خلال هذه المدة بفندق وكنت أخرج صباحا وأعود ظهرا ثم أخرج وقت المغرب وأعود ليلا وكان الفندق والسيارة والمكتب مكيفين ولم أشعر بالحر وفي ثاني يوم لاحظت أن السائق لكل يوصلني امام باب الفندق بالضبط يضطر للسير مسافة طويلة جدا فقلت له أن ينزلني بالقرب من الفندق وانا سأسير لمسافة 40 متر لأصل للفندق فقال لي لن تستطيع فسكتت وبعد أن سار لمسافة طويلة ولف حول الفندق ثم تركني على بعد 10 خطوات من باب الفندق بدلا كم تركي أمامه كالمعتاد فنزلت وبدأت أشعر بعد خطوتين بطاقة حرارية هائلة تدفعني للأمام فاسرعت في مشيتي حتى انني صعدت درجات الفندق الخمس في خطوة واحدة من شدة الحر وعرفت كم كنت مخطئ في طلبي وكم كنت سأعاني لو تركني أسير المسافة كلها.

خلال أول يومين لم أخرج من الفندق بمفردي لأني كنت مشغولا بما ستنتهي إليه المقابلات وفي ثالث يوم وبعد أن تم الأتفاق وعند العودة قررت أنني لابد أن أخرج لأتفرج على البلد ولكني قررت الخروج ليلا حتى يكون الجو ملائما وأنتظر أن ينتهي الحر كما يحدث في مصر وأفتح النافذة لأجد الحر شديد وأنتظر لساعة وأجرب فأجد الحر شديد مع أن الوقت يقترب من منتصف اليل والجو يبدو كان الشمس موجودة ولكن في الظلام وزاد من شعوري بالحر أن الجو في التكييف بديع والرطوبة بالخارج رهيبة وأنتهت الليلة على أستحالة خروجي في هذا الجو عند الساعة الثانية بعد منتصف الليل في هذا الحر الرهيب.

[إبن مصر]

بعد التواصل مع العضو الفاضل صاحب الموضوع وتأكيده على أن الموضوع مهم وله جدواه وان لفظ الدردشه لم يكن مقصودا به تحويل الموضوع الى دردشه.. تتمنى اداره المحاورات للمشاركين وقتا سعيدا فى سرد ذكرياتهم وما قد يفيد الاخرين .

الاداره

أحمد محمود

[أبو حميد]

شكرا لإدارة المحاورات على تفهمها وتقديرها لأن كل موضوع يفتحه أي منا يضع فيه جزء منه ويحزن لإن لم يجد أهتماما ويفرح بكل قارئ وكل مشارك فيه كأنه نبت صغير يحتاج للرعاية والإهنمام ولذلك أكرر شكري.

وأطلب من كل واحد منا أن يضع كل ما يعتبره خبرة شخصية له يمكن أن تفيد الأخرين كان جهله بها في الماضي سببا لحدوث مشكلة له وهو بذلك يفيد الأخرين فكما يقولون "الغريب أعمى ولو كان بصيرا"

[Scorpion]

اول اسبوع في ايطاليا .... ما زلت مشبعآ حتي النخاع بتعاملاتي الأنسانية في مصر... اتمشي انا و زوجتي ... و فجأة تتراءي لي سيدة عجوز .. تسير محملة بأكياس المشتروات ... التعب و الأجهاد الشديد يبدون علي وجهها ... تلقائيآ تركت يد زوجتي .. و اقتربت منها حاملآ الكيس الذي يبدو اكثر ثقلآ قائلا : عنك يا ماما .... لقد ترجمتها حرفيآ و قمت بأداء شيء طبيعي ... مثلما كنت افعل قبل اسبوع في شبرا..

و لكن بدلآ من الدعاء الذي كان يشجو في أذني في مصر .. فوجئت بها و هي تصرخ و تستغيث من الحرامي (اللي هو أنا ) الذي يحاول سرقتها ...

صعقت بالفعل ... صعقت بشدة .. حتي اني تركت الكيس يقع رافعآ يدي في الهواء ... محاولآ تهدئتها و الشرح ... مرت دقائق ثقيلة ثقل الجبال علي قلبي ... قبل ان تهدأ العجوز .. فلقد ساعدتني زوجتي علي الشرح بطريقة أفضل .... و ما أن ابتعدنا بعد ان ساعدناها في لم ما وقع مني ... حتي قالت لي زوجتي : انت اتجننت ... انت مش في مصر دلوقتي ...

ظللت صامتآ و شعور بالحزن يغمرني .... انا مش في مصر ......

ملحوظة جانبية اضافت حزنآ علي الحزن ... فرضآ لو كنت لصآ بالفعل ... خلال صراخ العجوز و استغاثتها بالجميع .. و لقد كان هناك كثيرآ من المارة ... لم يقترب أحدآ لينقذها مني ....

أنا مش في مصر ....

[أبو حميد]

"أنت مش في مصر" لكن "مصر فيك".

يا رب نفضل محافظين على الأخلاق المصرية الجميلة اللي مغروسة جوانا ومننساهاش مهما حصل بره وجوه مصر.

[rar]

وجدت هذا الموضوع و أنا أفكر في فتح موضوع مشابه... بصراحة بدأت أحس ان أي موضوع نفسي اتكلم فيه... أكيج فيه حد فتحه :(

حكايات كتير قوي حصلت معايا في أول سنة هجرة... بعضها مضحك و بعضها مبكي... بس عمري ما هأنساها...

أول حكاية كانت في تاني اسبوع ليا في كندا... و أنا مروح من الجامعة للأوضة اللي كنت مأجرها...

واحدة ست عجوزة شكلها شيك... و اقفة بتصور بيت في الشارع... غالبا عجبها شكله المعماري...

عديت من وراها... و كملت طريقي... عادي يعني...

و دي راحت ملفوته نحيتي... و صرخت من الفزع... و طلعت تجري ورايا وتندهلي...

أخوكم طبعا اتفزع... لا تتبلي علي و تجيبلي مصيبة...

الست حصلتني... وهاتك اعتذار... و انحناء... و أسف... و أنا واقف مشعوف... ملاحق يدوب علي فهمها (تاني اسبوع... عادي يعني... كنت باحسس)...

فين بعد دقيقة و لا اتنين... استوعبت انها مش قادرة تواجه نفسها انها شغلت الرصيف و هي بتصور البيت... فأجبرتني "أنزل" من علي الرصيف عشان أقدر أعدي!!!

و طبعا ده اعتبرته تضحية و مجازفة من طرفي... نتيجة لامبالاتها و أنانيتها...

بعد دقيقة كمان ابتديت استوعب ان واحد فينا احنا الاتنين مجنون... يانا يا هي...

تقبلت اعتذارها و شكرتها... و كملت المشوار للبيت... و أنا بأفتكر لا اراديا ميدان العتبة!!!

[هشام الكندي ان شاء الله]

بسم الله الرحمن الرحيم

الفكرة بالفعل مستوحاه من اقوال الاخت الفاضله بدريه مكاوي هجرها الله سالمه الي كندا

حبيت نعمل موضوع جديد الي حد ما

موضوع غير جاد بالمره او بمعني ادق موضوع للضحك و الفرفشه

غير مقبول اطلاقا الحديث عن اي قضايا فكريه او سياسيه او اقتصاديه

غير مقبول حتي الاختلاف في الراي لان هذا الموضوع ليس به اراء اصلا او موضوع نقاشي

باختصار

اللي عنده موقف شافه او سمع عنه لمغترب فيا ريت يقوله خلينا نفرفش شويتين

و المغترب هو اي انسان موجود في بلد لا يحمل جنسيتها

و ليكن انا المبتدئ

الموقف الاول: ايام ما كنت في اعدادي كنت بروح المتحف و القلعه و الهرم علشان اكلم السياح بالانجليزي لحد ما وصلت ثانوي و بقيت اكلمهم شويه انجليزي علي شويه ايطالي

في مرة كنت في المتحف و اتعرفت علي واحد الماني اسمه reiner و قعدنا يجي ساعه الا ربع نحكي في حاجات كتير جدا في تاريخ المانيا و اوروبا العصور الوسطي و شغله

و قالي انه كل مرة في مسمط و جاتله نزله معويه و كان بين الحياه و الموت

قلت له انتا اللي جبته لنفسك

المهم

كان فيه واحد( غالبا شاويش او صول) عمال يبص لي و يختفي شويه و يرجع تاني يبص و يختفي

لحد في مرة شاور لي سيبت الحاج reiner و رحت اشوف ايه الموضوع

قاللي انتا بتكلمه ليه؟ قلتله بنحكي شويه. قالي طيب سيبه و امشي بدل ما اعمل لك محضر

كنت ساعتها صغير و مش فاهم حاجه قلتله طيب و جيت امشي قالي استني

قلت له ايه

قالي اقعد معاه شويه و ابسطه حبتين و بعدين امشي علشان متنكدش عليه الراجل جاي يتفسح و يشوف له يومين حلوين و ابساطه واجب قومي

قولت في سري يعني تنكد عليا و السلام, و قمت رايح ل reiner

قالي خير يا اتش, قلت له الموضوع كذا و كذا

اتنرفذ اوي و عرق هتلر طلع عليه و قالي ازاي الكلام دا, هوا انا متراقب هنا و لا ايه؟

قلت له وطي صوتك احسن يفهم

قالي انا هوديه في داهيه, ازاي يتدخل في شئون الناس.

قلت له يعني توديه في داهيه و توديني معاه

سكت و قاللي طيب انتا زنبك ايه؟ يا كبدي يا ضنايا, قلت له شفت بقي

قاللي خد رقمي في المانيا انا مسافر بكره و لو حد عمللك حاجه ابقي كلمني

قلتله طبعا, و سابني و مشي

قام جه الراجل الشاويش و اخد الرقم طبعا و قطعه و قطع علاقتي بصديقي الالماني

هههههههههههههههه

بكره هحكيلكم عن موقف تاني

[arad]

بسم الله الرحمن الرحيم

الفكرة بالفعل مستوحاه من اقوال الاخت الفاضله بدريه مكاوي هجرها الله سالمه الي كندا

حبيت نعمل موضوع جديد الي حد ما

موضوع غير جاد بالمره او بمعني ادق موضوع للضحك و الفرفشه

غير مقبول اطلاقا الحديث عن اي قضايا فكريه او سياسيهالموقف الاول: ايام ما كنت في اعدادي كنت بروح المتحف و القلعه و الهرم علشان اكلم السياح بالانجليزي لحد ما وصلت ثانوي و بقيت اكلمهم شويه انجليزي علي شويه ايطالي

الكلام المكتوب ده حصل في مصر يعني مش مغترب .انا عايز اسمع مواقف حصلت لما توصل كندا تبقى كده مغترب بجد...

[هشام الكندي ان شاء الله]

يبدو انك مفهمتش انا اقصد ايه

المغترب هنا هو راينر الالماني و ليس انا

[ELSHAMY]

ردك زكى و حلو يا هشام يا كندى ان شاء الله

[arad]

يبدو انك مفهمتش انا اقصد ايه

المغترب هنا هو راينر الالماني و ليس انا

اه فهمت صاحبك الالماني عايز ايه بس برده مافهمتش احنا عايزيين قصص لمغتربين مصريين مش المان قصص حصلت في الغربة مش في حي القلعة و ميدان التحرير و الجيزة.

[هشام الكندي ان شاء الله]

بسم الله الرحمن الرحيم

ميرسي يا استاذ الشامي علي المجامله الرقيقه دي و علي ذكرك اسمي كاملا

نيجي بقا للموقف التاني

و هو موقف في القلعه مع توم و كريستين من كندا الشقيقه هجرنا الله اليها سالمين

كنت في القلعه في يوم من الايام و كنت لسه صغير برضه في اعدادي تقريبا

و لاقيت هيصه و زيطه اتاري كان فيه رحله مدرسيه في القلعه و كان مجموعه اطفال في ابتدائي او اعدادي عمالين يصفروا و يهيصوا ببص علي المكان اللي بيبصوا عليه لاقيت واحد و واحدة بيقبلوا بعض

انا كمان استغربت بس قلت لما اكلمهم

رحتلهم و كلمتهم و كانوا ناس في منتهي الذوق و (كنت هقول الادب)

بدات كلامي معاهم عن كندا و اخبار دوله كندا الشقيقه و رايهم في مصر لاقيتهم بيقولوا ان مفيش وجه مقارنه بين كندا و مصر

بعدين سالوني هوا الاطفال دول كانوا بيهيصوا ليه؟

قلتلهم علشان كنتوا بتقبلوا بعض

ضحكوا اوي و حكيتلهم عن الدنيا في مصر عامله ازاي و كدا و استغربوا جدا من بعض عادات المصريين

طلعوا اصلا مش متجوزين و انهم لسه مخطوبين من مفيش اسبوعين و قال ايه كريستين حامل يا رجاله!

انا خفت احسن عيله كريستين يجوا يضربوا نار و شغل قرود و كدا يعني لكنهم ضحكوا اوي و قالولي متخافش احنا كنديين يا بابا و دا سلو بلدنا

و اتكلمنا يجي ساعه و اتصاحبنا و كله تمام و قالوا انهم هيحاولوا يحتكوا اكتر بالمصريين علشان يعرفوا الدنيا ماشيه ازاي هنا

قلت في عقلي استحملوا اللي هيجرالكم

و سيبتهم و لفيت شويه و جيت ماشي و اركب لقيتلك في موقف اتوبيسات القلعه عمكم توم و خالتكم كريستين بيكلموا ولدين شكلهم متشردين جدا بعد كدا مشيوا معاهم

قمت مشيت وراهم لقيتهم خدوهم علي جنب في حواري القلعه كدا بس قريب برضه من الشارع العمومي و لقيتهم معاهم اتنين اصحابهم تانيين بياخدوا الكاميرا كانهم بيصوروهم و عمالين يهزروا بالايد معاهم و وضح علي شكل توم و كريستين انهم اتضايقوا جدا

جم يمشوا العيال مسكوهم ساعتها قلت بس الكنديين بيتقلبوا يا رجاله!

قلت ابلغ البوليس و لا اعمل ايه

كان معايا واحد صاحبي قمنا رايحين للعيال و عملنا نفسنا تايهين فوصفوا لنا السكه و لقيت توم و كريستين بيكلموني بالانجليزي طبعا قمت طمنتهم اني مش هسيبهم و العيال مش فاهمه حاجه

قمت بصيت للعيال و قلت لهم:

يا نجم انتا و هوا خدوا بالكم من الراجل و الست دول خطرين(بكسر الخاء) اوي

قالوا ازاي يا برنس؟

قلتلهم انا لسه راجع من القلعه و دول مديرين عموم في كندا و كان معاهم اتنين عساكر حراسه جوه القلعه و لما كلمتهم دلوقتي قالولي ان البوليس هيبدا يدور عليهم بعد ساعه بالكتير و سالوني هل دا هزاركم و لا انتوا كدا بتقلبوهم (قال يعني مش عارفين طباع المصريين)

فانا من منطلق اني ابن بلد و انتوا ولاد بلد قلت احذركم من الخواجات دول احسن تروحوا اونطه يا جدعان

قالولي يا سلام انتا برنس عالي اوي

و العيال المتشردين فهموهم انه هزار و ادوهم الكاميرا و كله ضحك و تحيا مصر

قمت مطمن توم و كريستين و خدتهم و مشيت و ركبوا و قالي توم كلمه شفتها في حلم فيما بعد

i think u 'll be a minister one day in canada, i really don't know why

i think i saw u b4, however i actually never did

then they kissed me and went

[Nile Bird]

بسم الله الرحمن الرحيم

نيجي بقا للموقف التاني

و هو موقف في القلعه مع توم و كريستين من كندا الشقيقه هجرنا الله اليها سالمين

كنت في القلعه في يوم من الايام و كنت لسه صغير برضه في اعدادي تقريبا

الأخ هشام مش شايف إن الموضوع وسع منك شوية يعنى إنت كنت شغال مرشد سياحى من إعدادى وكان شغلك الشاغل إنك تتكلم مع الأجانب بالساعات ومن إعدادى!!!!! هو حضرتك خريج مدارس أمريكية ولا إيه ؟ ياريت توضح لنا....... لأن الموقف الأول قلت إنك إتكلمت مع الألمانى لمدة ساعة والأن مع توم وكريستين لمدة ساعة فياريت تحكى لنا على كواليس تعليمك وما الدرجة التى حصلت عليها فى إختبار الأيلتس الأن بعد أن خلصت تعليمك المفروض إنك تكون مش أقل من 9 من تسعة بحكم إنك بتمارس اللغة لساعات من أيام إعدادى

و سالوني هل دا هزاركم و لا انتوا كدا بتقلبوهم (قال يعني مش عارفين طباع المصريين)

ممكن تقول حضرتك بتقصد إيه من كدة هل يعنى طباع المصريين إنهم يقلبوا السياح وبعدين ياسيدى على إفتراض إن دة بيحصل فهل من الرجولة والشهامة إنك تنشر غسيلك الوسخ ( آسف على اللفظ) على الملأ كدة يا عم هشام مكنشى لها لزمة الجملة دى

فانا من منطلق اني ابن بلد

إبن بلد مصرى ولا كندى؟

و العيال المتشردين فهموهم انه هزار و ادوهم الكاميرا و كله ضحك و تحيا مصر

قمت مطمن توم و كريستين و خدتهم و مشيت و ركبوا و قالي توم كلمه شفتها في حلم فيما بعد

i think u 'll be a minister one day in canada, i really don't know why

i think i saw u b4, however i actually never did

then they kissed me and went

يا سيدى ربنا يسهلك وتكون وزير بس هل سألت نفسك إنت ممكن تكون وزير إيه وهل عندك المقومات لذلك؟

على فكرة أنا كمان مصرى خريج آداب إنجليزى ومقيم بالكويت وكلما يسألنى شخص جنسية غير عربية عن مصر أحكى له عنها لدرجة إنه بيكون أمنية حياته إنه يزور البلد دى ويشوف أهلها الكرام الطيبين

أخ هشام هناك فرق كبير جدا بين مصر الحكومة ومصر الشعب

[nash]

صدق القائل...كل يري الناس بعين طبعه....قال مش عارفين طباع المصريين قال

[إيزيس]

الأخ هشام مش شايف إن الموضوع وسع منك شوية

كنت هأقولها

[se_ Elsyed]

غير مقبول اطلاقا الحديث عن اي قضايا فكريه او سياسيه او اقتصاديه

غير مقبول حتي الاختلاف في الراي لان هذا الموضوع ليس به اراء اصلا او موضوع نقاشي

ما شاء الله تبارك الله

أنا شايف إن بقى لك فترة نازل توجيه وهندسة وإصدار أوامر تنظيمية في المنتدى بالرغم من إن مالكش أي صفة تنظيمية .

ولذلك توجب تنبيهك بهذا الامر وياريت لو عندك حاجه مفيدة تكبتها من سكات ومن غير توجيهات ....

وده إنذار لك يا اخ كندي إن شاء الله .

سي السيد

الإدارة

[vipwithyou]

غير مقبول اطلاقا الحديث عن اي قضايا فكريه او سياسيه او اقتصاديه

غير مقبول حتي الاختلاف في الراي لان هذا الموضوع ليس به اراء اصلا او موضوع نقاشي

ما شاء الله تبارك الله

أنا شايف إن بقى لك فترة نازل توجيه وهندسة وإصدار أوامر تنظيمية في المنتدى بالرغم من إن مالكش أي صفة تنظيمية .

ولذلك توجب تنبيهك بهذا الامر وياريت لو عندك حاجه مفيدة تكبتها من سكات ومن غير توجيهات ....

وده إنذار لك يا اخ كندي إن شاء الله .

سي السيد

الإدارة

انا فعلا جالى الانطباع دة اول ما قرأت المشاركة وكنت ناوى ما اشاركش فى التوبيك دا طالما ً انه غير مقبول اى حاجة فى اى حاجة

لكن الأستاذ الفاضل سي السيد قام بالواجب

وبعدين واضح اننا فى البداية فهمنا هشام غلط

كنا فاكرين انه مصرى زهق من البلد علشان كدة بيهاجر

لكن دا هو مهاجر من زمان

وبعدين مش عاجبه سلو البلد اللى فيه قرود بيضربوا نار

وعاجبه سلو البلد اللى فيه زنا علنى

اتق الله اتق الله اتق الله

يكفينا ما تقوله عن نفسك

وشكرا

[badroora]

الفكرة بالفعل مستوحاه من اقوال الاخت الفاضله بدريه مكاوي هجرها الله سالمه الي كندا

انت بتدعى عليه ولا بتدعيلي يا هشام :rolleyes:

عموما يا سيدي ربنا يوفقنا جميعا يا رب ونتقابل فى الاراضي الكندية المتحدة wst::

موقفك وانت فى الاعدادى فكرنى بنفسي بالظبط هذه الفترة

عندما كنت اعد نفسي قبل كل رحلة بحفظ بعض الجمل الانجليزية زى

انا اسمى كذا

ما اسمك ؟منين؟ بتحب مصر ؟ وحاجات من دى وكنت بابقي سعيدة اوى لما الاقي حد اجنبي يتفاعل معايا ويفهمنى ويرد على كنت باحس انى باعرف اتكلم انجليزي مفهوم .

وعلى فكرة وانا فى الاعدادى بردوه من ضمن الاجانب اللى اتكلمت معاهم كانت واحدة ممرضة امريكية وكنت مستغربة ان امريكية وممرضة :unsure: امال فى بلدنا الممرضات نازلين بيهم الارض ليه وطبعا كل دا كان قبل مابقي انا كمان ممرضة .

بالمناسبة انا كنت فى مدرسة حكومى وكنت باعرف انجليزي كويس من وانا فى 6 ابتدائي

عنوان مدرست للتأكد من ذلك

مدرسة النجع الاعدادية المشتركة بنين :lol:

نرجع بقي لموقف اخونا بتوع كندا المباركة

شوف يا هشام انا كنت فى نوفمبر اللى فات فى اسوان وبعدين لاقيت خناقة كدا على جنب مع 2 من كندا ولد وبنت مع بتاع المركب

المهم قبل البنت ماتيجي تستنجد بينا كنا بنكلم واحد على مركب كنا 3 قالنا الواد ب 30 جنية رايح جاى .

وبعدين البنت الكندية جت وزعلانه اوى بقولها زعلانه ليه قالتلى شوفى الاستغلال عشان احنا اجانب قولتلها خير قالتلى قالنا الواحد رايح جاى ب 27 جنية :happy: قمت ضحكت قالتلى انا عارفه انكم بتدفعوا سعر اقل مننا بس حرام انا مش معايا فلوس كتير المهم

روحت للراجل قولتله بقي الكندية ب 27 وانا المصرية 30 طب مش عيب كدا

المهم فى الاخر اخدنا المركب ب50 جنية وخلناها تشترك معانا وكانت مبسوطة اوى .

وبعدين هى كان شكلها مبهدل اوى قولنا تلاقيها موضة ولا حاجة احنا ايش فهمنا .وبعدين سالتنى انتوا ليه معاكم 3 موبيلات وانتوا مع بعض موبايل واحد كفاية قولتلها لاء مش ينفع المهم قالتلى تصورى انا فى كندا معنديش تليفزيون معنديش موبايل معنديش سيارة

قولتلها ليه قالتلى عندى لاب توب ودا كفاية وعندى تليفون ارضي بالبيت والموصلات موجودة ولما باكون فى الشغل بيبقي فيه تليفون يبقي ليه متلك كل دا . wst::

قولت ياااه شكلى كدا هابيع اللى ورايا واللى قدامى لما اروح كندا :happy:

لى مواقف كتيرة بقي فى البحرين بس لما افضي هابقي اكتبها .

بخصوص بعض الاشياء قراتها هنا واحزنتنى كثيرا

هى اسلوبنا فى الرد على بعض وتشككنا فى كلام بعض .

الكلام موجود اللى عاوز يشارك يا هلا واللى مش عجبة يقلب الصفحة ويبقي ولا كاننا شوفنا حاجة .

المفروض اننا كبار وناس بروفيشونال ويجب ان يكون اسلوبنا اكبر من كدا .

العزيز س س

عشان بقي منقعش فى حتة الادارة وقرارتها ومحدش يسخن ولا يولع ولا يعدل قرارات الادارة .

انا بس لي تعليق بسيط على اسلوبك فى تناول المواضيع هذه الايام

مرة تهديد ومرة انذار انا مش شايفة بصراحة كلام هشام فيه اى تعدي على اى حد ولا بيدي توجيهات

انا قرات الكلام وحسيت انه هزار ومينفعش يكون غير هزار .

اما اسلوب الارهاب دا بصراحة ازعجنى انا المرة اللى لاقيتك بتهدد فيها تملكت نفسي وخرجت من الموضوع بدون تعليق حتى لا يقال انى باعدل على الادارة او بناقش قرارتها بس المردة دى بصراحة مقدرتش .

بليز يا س س خليك دايما زى ماتعودنا منك بتعالج الامور باسلوب ممبز بتوصل رسالتك اللى مكلف بها وبدون تجريح ا فى مشاعر حد او تحسسنا اننا فى عصر القهر والاستبداد .

المفروض لما يكون اسلوب حد مش عجبنا نعامله بالاسلوب اللى نحب نتعامل به مش نستفذ مشاعر الاخرين ونثير غضبهم ونقول بنعالج .

"Treat people the way you want to be treated"

.

تم تعديل 24 فبراير 2008 بواسطة Badria Mekkawy