المذيعات والتجميل ..والافلام.

[Salwa]

بصراحة الموضوع ده مهم جدا ...واعتقد انه لابد من اتخاذ اجراءات فورية من المختصين ...ده لو كانوا عاوزين المشاهدين يقتنعوا بمصداقيتهم ..

مفيش مرة نتفرج على الفضائية الا واشعر باستياء من كل شئ ..

مثلا...الاسبوع اللى فات وفى الساعة الثانية بعد منتصف الليل شاهدنا فيلم ....حب البنات ..لليلى علوى .

ثانى يوم الساعة عشرة ونصف صباحا .....(( اى بعد اقل من عشر ساعات )) ...مرة اخرى فيلم .....حب البنات ..

يظهر كانوا لسا شاريينه وعاوزين يطلعوا المكسب قوام قوام ........!!!!!!!!!

هو فيه كدة ؟؟ شئ لايصدقه عقل........هو مفيش حد بيراجع على خريطة البرامج ؟؟ هى دى كمان عشوائية !!!

نيجى لمكياج المذيعات ...

هو طبعا فيه فرح على طول ...فى التلفزيون المصرى ...ويظهر الاضواء اسطع من الشمس الحارقة عندهم ...بدليل المكياج الصارخ (( اللى يثير الغثيان )) ...وكأن المذيعات (( مع احترامى الكامل لحضراتكم )) ....راقصات درجة خامسة فى كباريهات رخيصة ..

يعنى زى افلام زمان والخلاعة فى الماكياج ....تجميل ...شكل كل واحدة فيهم عجوز شمطاء حتى لو كانت شابة فى العشرين ..يعنى عيون مرسومة ولا عيون الفراعنة على جدران المعابد !!!...وبوية كذا طبقة ...وحوالين العيون هالات بيضاء ناصعة يعنى آل كأنهم قديسات !!! اصل يعنى مش شكل نجوم هوليوود ...ولا حتى نجوم ضباط ..

حتى فى البرامج الدينية ...

المذيعة كأنها بتقدم برنامج استعراضى ...( الا انها فى الحقيقة تجلس فى وضع محترم ) ....

لكن ؟؟

ده كأنهم مسكوا ورقة ( سوداء ) وقرروا يرسموها بمزاج.......وآسفة يعنى ..آسفة جداااا

شكلهم فعلا فعلا ......( على رأى واحد انتوا متعرفهوش ) ...مصدى .

مش شكل طبيعى ..!!

ربنا يهدى ..

ياريت حد يسمعنا ويعدلوا نفسهم ....

بجد ...شكلهم على الطبيعة اكيد افضل ....شكلهم بمكياج معقول ....مش بوية زيت ؟؟

تحياتى ...

[Sherief AbdelWahab]

قلبك أبيض يا مدام سلوى..

عن الأفلام ، اعتدنا على اللاتنسيق ، فالبرامج لا تبدأ بموعد ومواعيدها وزمنها لا يحدد بالساعة والدقيقة ومع ذلك لا يستحيي القائمون من بث تلك القنوات التي تعاني من تلك الفوضى العارمة فضائياً.. طب ليه؟ .. حتى اختيارات الأفلام ومواعيدها عليها عشرات علامات الاستفهام!

عن المذيعات ، لن أتكلم عن الاستظراف ، فقد فرضت تلك الممارسة نفسها بقوة الاستمرار ، فالكل يستظرف ، هالة سرحان مبعوثة العناية الإلهية لتنوير المجتمع الجاهل تستظرف ، ومنى الشاذلي تستظرف ، والحلوة بتستظرف والوحشة بتستظرف وكله والله أعلم كان فيه سحلية واقفة على دراعه وهو نايم صحي لقى نفسه دمه خفيف ، حتى الاستظراف انتقل لبعض الضيوف وبعض الصحفيين عندما يظهرون على الشاشات ، حمدي رزق مجرد مثال..

الميك أب ، والملابس ، وأحياناً اللغات الأجنبية بشكل متكلف ، مجرد وسيلة من مذيعات متقادمات في السن للفت الأنظار إليهن ليس أكثر ، وأحياناً من الشابات لإظهار أنهن style وروشات طحن ، هناك مذيعة في الفضائية المصرية كانت جريئة - ويحسب هذا لها - في الاعتراف بسنها الحقيقي (35 سنة) ، وهو سن لا يصدق أي شخص أنها تمر به رغم كل المحسنات البديعية التي تضعها هي وآخريات على وجههن!

نفسي أشوف واحدة من دول بدون ميك أب..ولا سفن أب حتى!

خلص الكلام

[Folana]

السلام عليكم ورحمة الله .............

سلوى الثائرة ... موضوع مواعيد الافلام ده واعادتها فى الصباح التالى موجود فى كل المحطات الفضائية...بيعيدوا الافلام اللى تم عرضها ليلا علشان ماحدش يعرف ينجى بنفسه منهم..يعنى اللى راحت عليه نومة بالليل ياخد الجرعة صباحا....

يعنى هو ده النظام ..

موضوع الماكياج وطريقة اللبس والاستظراف فلن اجد وصف ابلغ من وصف اخى شريف...

كان فيه مذيعة زمان كنت باتفرج عليها وانا صغيرة..لكن صورتها لسه فى خيالى اسمها احلام شلبى رحمة الله عليها....لو تفتكريها كانت مثار للنقد بسبب كثرة ماكياجها....واقاموا الدنيا ولم يقعدوها بسبب اسلوبها فى اللبس والماكياج....

دلوقت بقى عادى جدا....كلهن جميلات وشقروات وخفيفات الظل...ولو صادفت انى شاهدت احدى هذه البرامج باشعر انى مارة بجانب كافييه مثلا من تدنى اسلوب الحوار...واللغة اللى بيتكلموا بها مع بعضها...

بس مين المختصيين دول المطالبين بتدخل فورى؟ :blink:

[Sherief AbdelWahab]

قلبك برضه أبيض يا فلانة..

فيه من الناس دول اللي الأنا عنده عالية جداً وتخرم السقف ، ومن الصعب عليه إنه يحترم النظام ، أي نظام يشتغل فيه وجواه ، والظاهرة دي مش بس موجودة في تليفزيون ختم النسر ، دي كمان حتى في القنوات الخاصة..

بالتالي مهما تديه أمر أو تلفت نظره على سلوكه وتصرفاته مش حيتصرف ، دة يمكن يزعقلك ويقول لك تلت التلاتة كام .. يا كابتن!

النوع دة من الناس فاهم نفسه غلط ، بمعنى : إنه بيفهم أو إنها بتفهم مسألة الشخصية العامة غلط ، أظهر في التليفزيون "ملعلطة" ومالية إيديا الاتنين دول صيغة ولا "فيفي عبده" في مسلسل سوق الخضار ، وعاملة مهرجان ألوان في وشي للتغطية على "عوامل التعرية" في الوقت اللي أديها فيه استظراف على طريقة النكتة الميتوزية الشهيرة "مرة واحد قابل واحد بقوا اتنين ، مرة اتنين قابلوا اتنين بقوا أربعة ....الخ".. مش أنا ستار؟

لكن البيه الاستار أو الهانم الاستاراية له حدود هو نساها أو حد نساها له ، إن زي ما من حق الناس تشوفه أو تشوفها على سنجة عشرة شكلاً إنه من حق المشاهد إنه يحس إن المذيع بيحترمه وبيحترم نفسيته..

خلص الكلام

[بنت النيل]

يامدام سلوى تحياتى لكى اولا

بالنسبة للبرامج واعادتها تانى اعتقد ان ده اصبح المعتاد فى كل المحطات الفضائية فهو شىء عادى

يعنى مثلا عندك قناة mbc2 كل برامجها التى تذاع وخصوصا ليلا يعاد اذاعتها مره ثانية طول النهار وبالمساء ابداء من الساعة التاسعة يعرض الجديد وهكذا

وايضا عند قنوات art وخصوصا قناة سينما دى بقى حكاية الفيلم بيعرض فيها تقربيا لمده شهر ليا نهار :blink:

يعنى المسألة مش اهمال ولا عدم متابعه منهم هما يمكن اتبعوا هذه الطريقة فى برامجهم وده على فكره شىء مش وحش يعنى حضرتك بتقولى الفيلم الساعة 2 صباحا كتير جدا لم يستطيع مشاهدة فى هذا الوقت ولكن من الممكن ان يشاهدة فى اليوم التانى الصبح ولا ايه هما بس عوزين يرضوا جميع الاطراف

لكن انا معاكى طبعا فى موضوع المذيعات واسلوبهم ولبسهم والميك اب اللى بيعملوه من جميع الاعمار

سواء كانت صغيرة او كبيرة فى السن

ده غير الاستظراف اللى قال عليه الاخ شريف وكل واحدة جاية معها واحد والاتنين عمالين يستظرفوا ويهزرو مع بعض كانهم فى كازينو ولا قاعدة حلوة مش فى برنامج يذاع امام الناس

كله اليومين دول بقى عادى عادى وربنا يرحمنا

[عبده بيه]

الفاضلة مدام سلوي فتحت موضوع الحساسية بتاعتي من الفضائية المصرية المتخلفة فعلا المتخلفة في نوعية الموضوعات والمتخلفة في اسلوب تقديم البرامج مفيش فرق بين اللي واقف علي الناصية واللي واقف امام الكاميرا امام الملايين يتابعونه وهوه لا يدري مدي خطورة موقعه الحساس والذي يفعله من لفت انظار الناس بالتفاهة والساذجة ثعني الناس فرحنين بشقاوته

المتخلفة ايضا بالمحسوبية علي حساب الماده الاعلامية بدون تعليق

اظرف شيء المذيع مرة استضاف هوه وزميلته الماما بتاعته وتكلموا عن الاتيكيت ومن اليوم ده اتعمل برنامج اتيكيت لماما ومذيعات معها لزوم الدردشة يعني تليفزيون بابا حد يقدر يتكلم ولا حتي يعلق علي اي شيء فلوس بقي

المتخلفة ايضا في الديكور والاحداث الجارية

والفقير الي مذيعيين ومذيعات علي مستوي الحدث مش بالفهلوة حرام عليكم تعبتونا ارحمونا بقي كرهتونا في بلدنا من اسلوبكم الغريب

تحياتي

[inas]

بصراحه موضوع مستفز الى الواحد بيشوفه

انا بتخنق وبستغرب من اللبس والمكياج دا مره مزيعه شفتها حاطه حجات في عنيها مخلياها زي متكون واخدلها بوكسين معتبرين ولا كانها طالعه من ماتش ملاكمه هو في مكياج كده

انا كل الي بتمناه انهم يكونوا على طبيعتهم مش مفتعلين لان الاستظراف الي هما فيه بيزدهم ملاااااااااااااااااقه

قنوات الغتاته انا بسميهم مزيعات سوبر جلو :blink:

وبعدين برامج برامج بلا هدف رغي وبس شوية بنات جين يدلعوا ولا شمطاوات جين غصب عن عنين المشاهدين وكل واحده ماخده ازن ساعتين من المقابر :P

ولا الاعلانات الي مبقاش فيها اي حياء وهنقول ايه غير الحمد لله والي مش عاجبه ميتفرجش وعشان كده انا مبغيرش القناه عن قناة دزني وسبيس تون او اقرا والناس :)

ولي عوده

[نانو]

غاليتي مدام سلوي

قطاع الاذاعه والتليفزيون مثله مثل اي قطاع ....الوسطه والمحسوبيه تنخر فيه

بدايه من فني التصوير الي المخرج ....و بالتالي سوف نجد تجاوزات ....سوف نجد اهمال ...في صوره كثيره

تكرار عرض افلام ...طريقه تقديم البرامج باهته ...ديكورات قاتمه ...اثريه ....الكثير يعمل اداء واجب وليس اكثر

..ولكن اكثر ما يثير دهشتي بالفعل طريقه لبس المذيعات ...انا اتعجب ...و اسال نفسي الا يرون مذيعات الفضائيات الاخري

الا يشعرون بالغيره ....لتفوقهم في الشكل والمظهر و الاداء ....و لا نلقي اللوم كله علي الامكانيات

تناسق الوان الديكور ليس علاقه بالامكانيات ....تناسق الوان ملابس المذيعه و طريقه وضع المكياج و تصفيف الشعر ليس له علاقه بالامكانيات ...كل هذا له علاقه بالغيره علي العمل بالاخلاص في العمل والانتماء للمكان و بذل النفيث والغالي من اجل الوصول اللي اعلي مستوي و الرقي به

بصراحه القنوات المحليه ....حاجه تسد النفس

[Sherief AbdelWahab]

تناسق الوان الديكور ليس علاقه بالامكانيات ....تناسق الوان ملابس المذيعه و طريقه وضع المكياج و تصفيف الشعر ليس له علاقه بالامكانيات ...كل هذا له علاقه بالغيره علي العمل بالاخلاص في العمل والانتماء للمكان و بذل النفيث والغالي من اجل الوصول اللي اعلي مستوي و الرقي به

أصبتِ كبد الحقيقة .. وبح صوتنا في الكلام في هذه النقطة لا سيما الجملة الأولى بالتحديد لسنوات ، كفانا تمحيكاً بشماعة الإمكانيات ، فالإمكانيات + عقلية متخلفة = صفر مربع

خلص الكلام