سؤال لكل طبيب يعمل في الخليج...

[zonobia]

السلام عليكم جميعاً....

عندي اسئلة مهمة جداً لاني والله محتارة جدا ومش عارفة اعمل ايه ... بداية انا طبيبة مصرية لسة مخلصة فترة الامتياز ومستنية نتيجة التكليف وعندي فرصة سفر ان شاء الله للامارات قريب ...

اولا عايزه اعرف هل في فرص عمل ممارس عام ولا الافضل لي اني استني لما ابقي اخصائي من ناحية الراتب ....

خاصة اني بفكر اقدم في الزمالة المصرية خصوصا لما مابقتش بتشترط قضاء اي فترة في التكليف بس المشكلة انها بتاخد فترة اقلها 3 سنين وانا عايزه اسافر بعد فترة قليلة...

ولا الدبلومةفي الحالة دي هاتبقي افضل لي ؟؟

وبالنسبة للزمالة البريطانية ...قريت ان من شروطها التفرغ للدراسة وانا كنت بسأل هل ينفع اشتغل اي شغل جنبها و لو بصورة غير رسمية لاني عايزة عن طريق الشغل ده اوفر لو حتي تكاليفها لاني مش متخيلة الطبيب ازاي هايتفرغ للدراسة خصوصا لو مكانش عنده مصدر تاني للدخل.......

والبورد العربي هل بيشترط برده التفرغ للدراسة ؟؟؟؟

وبالنسبة للتخصصات ايه هي التخصصات المطلوبة هناك ؟؟؟

افيدوني افادكم الله ....لاني بجد في حيرة شديدة جداً.....

[drhouba]

عندي اسئلة مهمة جداً لاني والله محتارة جدا ومش عارفة اعمل ايه ... بداية انا طبيبة مصرية لسة مخلصة فترة الامتياز ومستنية نتيجة التكليف وعندي فرصة سفر ان شاء الله للامارات قريب ...

اولا عايزه اعرف هل في فرص عمل ممارس عام ولا الافضل لي اني استني لما ابقي اخصائي من ناحية الراتب ....

خاصة اني بفكر اقدم في الزمالة المصرية

ولا الدبلومةفي الحالة دي هاتبقي افضل لي ؟؟

وبالنسبة للزمالة البريطانية ...قريت ان من شروطها التفرغ للدراسة

والبورد العربي هل بيشترط برده التفرغ للدراسة ؟؟؟؟

وبالنسبة للتخصصات ايه هي التخصصات المطلوبة هناك ؟؟؟

دكتورتنا العزيزه أولا إنتى لم تذكرى إن كانت فرصة السفر اللى قلتى لنا عليها فرصة عمل و اللا لأ لو كانت فرصة عمل فهى فعلا فرصه لأن العمل كطبيب فى الإمارات شئ صعب جدا لأنهم بيعملوا إمتحان مش سهل زى ال MRCP

فلو كانت فرصة عمل فتوكلى على الله لأن أهل الإمارات إذا وجدتيهم أساسا ناس طيبين جدا بالمقارنه ببقية دول الخليج فلو حبيتى تستنى لما تبقى أخصائى الشغل مش حيستناكى و طبعا الراتب مش حيزيد بعد الماجستير إلا لو فيه خبره كمان يعنى السفر حيكون مش أقل من بعد 5 سنين على الأقل ... يدينا و يديكى طولة العمر .

ثانيا الزماله المصريه و عن خبره لبعض الزملاء فى مصر مش معترف بيها بره مصر على ما أعتقد و هى غير منظمه جيدا حتى الآن اللى دخلوها ما كانوش مبسوطين فيها لغاية ما تركت مصر فى أوائل القرن الحالى .

بالنسبه للدبلوم لو حبيتى تآخديه ... كل دول الخليج بإستثناء السعوديه بتطلب ماجستير و الدبلوم فرصته قليله فى السفر أما فى السعوديه و لكونك بنت ففرص الشغل متوفره لك بأى شهاده ما تقلقيش

و ال MRCP أو الزماله البريطانيه فلا تتطلب التفرغ و هى من جزئين نظرى و جزء CLINICAL و الإمتحان بيتم فى كل دول الخليج و رسومه فى الكويت على سبيل المثال 225 دينار كويتى يعنى إنتى بتشتغلى و تذاكرى و فى موعد الإمتحان تآخدى لك كام يوم أجازه و تمتحنى و لو الموعد مش مناسب لك ممكن تدخلى فى الموعد اللى بعده أو فى موعد آخر فى بلد خليجى آخر .

و بالنسبه للبورد العربى فأنا أول مره أسمع عنه و لكن نصيحتى إبعدى عن كل ما هو عربى فى العلم عموما و فى الطب خصوصا و لو سافرتى أى بلد عربى ممكن تبدأى تعملى الMRCP و إنتى بتشتغلى زى ما قلت لك .

و بالنسبه للتخصصات المطلوبه زى ما قلت لك فى السعوديه كونك بنت فده تخصص مطلوب فى حد ذاته و بمرتب مش بطال حتى لو كنتى ممارس عام و طبعا يا ريت يبقى نسا أما فى باقى الدول الأخرى فيا ريت يكون تخصص مفيهوش نبطشيات متعبه زى الأشعه التشخيصيه أو التحاليل أو الباثولوجى و بالتوفيق إن شاء الله و طمنينا عليكى

تم تعديل 10 مارس 2007 بواسطة drhouba

[ابن الصعيد]

الاخت الطبيبه

الدكتور هوبا افاض في الموضوع ولكني اريد ان اوضح نقطة

في كل دول الخليج وخصوصا الامارات لازم امتحان قبل ممارسه المهنة والامارات لكي تعملي ممارس عام لازم تدخلي امتحان الوزاره ومن شروطة ثلاث سنوات خبره

نصيحتي بلاش استعجال خدي ماجستير نسا ثم الخليج

وبالتوفيق

[zonobia]

السلام عليكم ‘

في البداية عايزة اشكر دكتور هوبا والاخ الكريم واحد تايه شكراً جزيلاً ومكنتش متصورة والله اني الاقي رد لمشكلتي....

اللي ما وضحتوش عن سفري للامارات هو اني سأتزوج خلال سنة من مهندس بيشتغل هناك ، و ناوية اسافر معاه ان شاء الله بعد فترة التكليف ..و عايزة اشتغل هناك طبعا يعني هادور علي فرصة عمل و انا هناك...

فكنت عايزه استفهم منكم عن الاختبار اللي بيتم قبل ما امارس المهنة ...و ينفع اشتغل هناك ولو ممارس عام لحد ما اخد MRCP....خصوصا ان سنين الخبرة هاتبقي سنتين بس لو كملت فترة التكليف بتاعتي الا لو ربنا وفقني وعرفت اسجل في الدبلومة بدري ...

وبالنسبة للماستر هو بياخد وقت كبير زي ما حضرتك قلت وانا مش عايزه اقعد في مصر كتير عشان ظروف زواجي يعني اقصاها معايا هاتبقي دبلومة....

واللي خلاني اسأل دلوقتي حكاية الزمالة المصرية اللي هايكون التقديم فيها من اول استلامي للتكليف و طبعا انا شلتها خلاص من دماغي دلوقتي بعد اللي قلتوه عنها ...

مرة تانية انا متشكرة اوي للمعلومات القيمة دي واتمني الاقي رد عندكم لبقية استفساراتي...

[drhouba]

دكتوره ... كده كده إنتى مش حتلحقى تخلصى فى سنه واحده إلا دبلوم و زى ما قلت لك الطلب على الدبلوم فى الخليج ضعيف إلا فى السعوديه و بالنسبه للإمارات أنا معلوماتى إنهم بيعملوا إمتحان تقريبا زى ال MRCP و محتاج مجهود كبير بس لو إنتى ركزتى شويه و إنتى هناك ممكن تعدى .... بالنسبه للتسجيل سواء دبلوم أو ماجستير فأعتقد إن فيه نسبة حضور بمعنى إن القرار صعب و لكن لأن فيه مشروع جواز فتوكلى على الله مع جوزك و سيبيها على ربنا و حتفرج .

[kokowawa1979]

الأخت الفاضلة الدكتورة زنوبيا

بداية أحب أن أشير بأنني لست طبيبا - لكن كما ذكر الإخوة الأفاضل أنه للعمل بالإمارات فإنه لابد لك من امتحان وذلك لمزاولة المهنة وهذا من أصعب الامتحانات في الإمارات - وبحكم صداقتي للعديد من الأطباء هنا فإن نسبة النجاح في هذا الامتحان لاتتعدى أكثر من 25% في أقصى الحالات - ومن هنا لايمكنك حتى مزاولة المهنة في عيادات القطاع الخاص وليس الحكومة إلا إذا اجتزت هذا الامتحان .

النقطة الثانية أن الإمارات أصبحت لاتعترف بشهادة البكالوريوس في الطب أو الدبلومة فقط - بل أصبحت تنظر إلى من يحمل الماجيستير أو الدكتوراه - فحامل الماجيستير يعين على درجة أخصائي - بينما يعين حامل الدكتوراه مع خبرة في وظيفة استشاري .

أرجو ألا تفهمي من كلامي أنني أريد أن أصيبك بالإحباط والعياذ بالله - بل هي الحقيقة التي يستطيع أن يذكر لك أي طبيب يعمل بالإمارات ما هو أكثر منها .

هذا للعلم - مع أطيب أمنياتي لك بالتوفيق إن شاء الله

تم تعديل 13 مارس 2007 بواسطة kokowawa1979

[zonobia]

السلام عليكم ،

اشكرك للمرة الثانية يا دكتور هوبا كما اشكر الاخ الكريم kokowawa ، مع ان رده ممكن يحبطني زي ما قال ، بس هي دي الحقيقة المرة ، واشكره لانه قالي المعلومات دي لانها هاتفيدني ان شاء الله في تحديد الخطوة الجاية اللي هاعملها في مشوار دراستي الطوييييييييييييل ....

مع تمنياتي لنا جميعاً بالتوفيق وتحقيق ولو جزء من احلامنا لان صعب نحققها كلها ..