ياترى نصدق مين فيهم : مبارك الأهرام - واللا مبارك الجمهورية!!!

[kokowawa1979]

لفت نظري اليوم صدور جريدتي الأهرام وأبولمعة الشهيرة بالجمهورية - وفي مانشيتاتها الرئيسية العنوانين التاليين :

ده الأهرام :

مبارك في افتتاح مؤتمر العمل العربي‏:‏

استثمرنا‏12‏ مليار جنيه في‏560‏ مصنعا وأوجدنا‏12‏ ألف فرصة عمل

وده الرابط للخبر علشان مانطولش عليكم

http://www.ahram.org.eg/Index.asp?CurFN=fr...tm&DID=9152

وده مانشيت جريدة أبو لمعة الشهيرة بالجمهورية أو جمهورية سمير رجب سابقا ولاحقا !!!

كلمة الرئيس .. لمؤتمر العمل العربي في شرم الشيخ :

مبارك : فرص أفضل للأحزاب .. والعدالة الاجتماعية وتمكين المرأة .. هدف التعديلات الدستورية

التنمية علي أرض مصر شاملة .. من توشكي إلي سيناء

وفرنا 750 ألف فرصة عمل في العام الأول للبرنامج الانتخابي

وده برضه الرابط بتاع الخبر

http://www.algomhuria.net.eg/algomhuria/to...ge/detail00.asp

ياترى بقى نصدق مين :

الريس بتاع جريدة الجمهورية

واللا الريس بتاع الأهرام !!!

أنا بصراحة بقى لامصدق ده ولا ده لإن مفيش فرص عمل من أصله- إلا إذا كانوا بيحسبوا خريجى الشرطة والكليات العسكرية فرص عمل !!!!!

تم تعديل 11 مارس 2007 بواسطة kokowawa1979

[mohamed_mido87]

السلام عليكم

عزيزى كوكو انا اساسا مش بقرا الجرايد القوميه دى جرايد الحكومه لو مكنتش هيا الى تحمى الحكومه مين الى حيطنش على اعمالها الجميله

وعموما العيب فى الجريده سواء الاهرام او الجمهوريه فكلاهما عرايس يتم تحريكها

العيب فى ....................

وبعدين فين فرص العمل دى

هوه ممكن يكون الخبر 750 الف مقهى فيهم 10 مليون شاب اه ده ممكن اصدقه

لكن يقولوا انه تم توفير 12 الف ولا 750 الف فرصه عمل فهذا افترااااااااااااااااااء والله اعلم

وعموما ان بصدق مبارك بتاع اخبار الرياضه

[yasser6666]

الغريب ان الفرق كبير جدا جدا بين الرقمين

يعني لو احدهما قال 12 والتاني قال 15 ممكن نقول مافرقتش كتير في تلاتة الاف

انما الفرق بين 12 و 750 فرق شاسع

واهو كله لايساوي ثمن الحبر المكتوب به

انا معاك يا أخ محمد الجرايد القومية بتجيب الضغط

والله ان لا افكر في قراءتها الا اذا كنت اشعر بالملل الشديد وعاوز اضحك شوية

انما تقولي اصدقك مين فيهم

دي صعبة عليا قوي

[Sherief AbdelWahab]

في كل جريدة من الجرائد "الكاومية" هناك بهوات صحفيون ، وباشاوات رؤساء تحرير ، ومن سلطات من هم أعلى في الهرم التحريري مراجعة كل ما يكتب في العدد تحسباً لوقوع أخطاء "قاتلة" .. ومن الأخطاء الصحفية ما هو قاتل فعلاً!

المدهش في الموضوع حتى لو فرضنا أن صفراً كان على يمين الـ 12 ألف (يعني الرقم بقى 120 ألف) ، برضه الفرق كبير..

وربما تنفرد روزا اليوسف بالرقم الحقيقي ، وهو حاصل قسمة 750 ألف على 12 ألف! :)

خلص الكلام

[Alshiekh]

الموضوع أن الأهرام كتب عنوان الخبر 12 ألف فرصة عمل ، وفى تفاصيل الخبر اشاروا الى انه تم توفير 12 ألف فرصة عمل من خطة مبارك للئاسة بتوفير 750 ألف فرصة عمل ، فراح بتاع الجمهورية باصص فى ورقة بتاع الأهرام وغش منه لكن على طريقة التلميذ الخايب اللى مابيعرفش يغش فى الامتحان ، وراح ناقل الرقم الاكبر علشان يجيب مجموع كبير يؤهله لرئاسة التحرير فى المستقبل. بس كده

المهم فى الارقام دى انها 12 الف من 750 الف ، يعنى مش 6 سنين ، دول حايبقوا 62 سنة ، ابقوا اوصوا احفادكم يشوفوا اللى حصل بعد 62 سنة !!!!

وبعدين مش واخدين بالكوا ان 12 فرصة عمل كلفت 12 مليار جنيه ، يعنى الفرصة الواحدة بمليون ..... يابلاش !!!!!

[kokowawa1979]

محمد ميدو كتب :

هوه ممكن يكون الخبر 750 الف مقهى فيهم 10 مليون شاب اه ده ممكن اصدقه

لكن يقولوا انه تم توفير 12 الف ولا 750 الف فرصه عمل فهذا افترااااااااااااااااااء والله اعلم

وعموما ان بصدق مبارك بتاع اخبار الرياضه

بمناسبة القهاوي - أشد مايؤلمني حينما أجلس كمدعو من صديق على إحدى مقاهي وسط البلد - وهناك أفاجأ بكم هائل من الشباب والشابات يحملون حقائب على ظهورهم لبيع أشياء لاحاجة لك بها لكنك قد تجد نفسك مضطرا للشراء من أجل مساعدتهم على كسب لقمة عيش شريفة - وهؤلاء الشباب معظمهم خريجي جامعات - وأحترمهم جدا - لأنهم يحاولون مساعدة أنفسهم بطريقة شريفة - ويمكن الحكومة حسبت هؤلاء الشباب من ضمن ال750000 فرصة !!!!

ياسر كتب :

والله ان لا افكر في قراءتها الا اذا كنت اشعر بالملل الشديد وعاوز اضحك شوية

ماهو احنا حطينا الخبر من أجل الترفيه برضه wst::

شريف عبد الوهاب كتب :

أخطاء "قاتلة" .. ومن الأخطاء الصحفية ما هو قاتل فعلاً!

هي الناس دي عندها دم أصلا يا أستاذ شريف لما يسخروا بعقول الناس عيني عينك !!

محمد كتب :

المهم فى الارقام دى انها 12 الف من 750 الف ، يعنى مش 6 سنين ، دول حايبقوا 62 سنة ، ابقوا اوصوا احفادكم يشوفوا اللى حصل بعد 62 سنة !!!!

وبعدين مش واخدين بالكوا ان 12 فرصة عمل كلفت 12 مليار جنيه ، يعنى الفرصة الواحدة بمليون ..... يابلاش !!!!!

ماهو لما وضعوا الأرقام في المانشيتات - ماكانش في اعتبارهم إن واحد زي الأستاذ محمد هيقرا الأرقام ويحللها بالطريقة العقلانيه دي - إنما هم عارفين إن آخرة الجرنال عند بتاع الموز - لإنه الوحيد اللي لسة بيلف الموز بورق جرايد هو وبياع الفسيخ !!!!! :wub:

[Alex Lover]

هو مبارك يتشك في كلامه .....؟؟؟ صدقوا الاهرام والجمهورية وكمان صدقوا الوسيط لو قال حاجة تالته ... لازم تصدق وتصدق وتصدق علشان هو مش بيكذب هو في الاهرام شغل 12000 شاب وفي الجمهورية شغل 750 الف وفي الوسيط باع الباقي لازم تصدقوا .. لاحول ولا قوة الا بالله