محاورات المصريين (( بقطر))

[adrianocrespo]

السلام عليكم

عقد عمل لصيدلي في الدوحه

6500 شامل السكن و المواصلات

10 ساعات عمل يومي

و يوم اجازه

مجموعه صيدليات خلود التابعه للمجموعه الطبيه العالميه

ايه رأي حضراتكم

[Abu Reem]

السلام عليكم

عقد عمل لصيدلي في الدوحه

6500 شامل السكن و المواصلات

10 ساعات عمل يومي

و يوم اجازه

مجموعه صيدليات خلود التابعه للمجموعه الطبيه العالميه

ايه رأي حضراتكم

يعني الناس بتسأل وتستخسر توضح بعض المعلومات ، علشان الناس تفهم صح وبعدين تجاوب

1- هل أنت بتسأل عن مناسبة هذا العقد لك ، أم انت تعرض فرصة العمل هذه على الأخرين وتود تعرف من يقبلها.

2- إذا كنت تسأل عن هذه الفرصة لك ، فإذا كنت عازب وغير متزوج ولا تنوي الزواح قريبا ، فممكن تكون بداية لأن السكن هنا للأسرة في شقة صغيرة غرفتين وصالة ( معقولة ) بحوالي من 5000 إلى 7000 ، يعني لازم تشارك حد في السكن ( يعني حط من 1000 : 2000)

3- المواصلات هنا ( مفيش تاكسي ) يعني لازم إما أن تركب سيارة خاصة بك ، أو تتعاقد مع سائق خاص يويدك الشغل ويجيبك وهذا في حدود من 1000 إلى 1500 في الشهر

4- مصاريف الحياة العادية غالية مقارنة بالسعودية ، فعلى الأقل عشان تعيش كويس ( مصاريفك الشهرية ) لن تقل عن 1000 ريال.

مع تحياتي ،،،

[adrianocrespo]

شكرا استاذ ابو ريم

العقد لاحد اصدقائي و انا قولتله حأسألك الاساتذه في قطر

جزاك الله خيرا علي التوضيح

و يا ريت لو اي حد يعرف سمعه الصيدليات دي و اصحابها

[alaa elshafiey]

السلام عليكم ,,,,,,,,

ازيكوااا يا جماعة الخير يارب تكونوا بخير

السؤال الخاص بنقل الكفالة مفيش اى مشاكل فى نقل الكفالة ابدا انا أخوية نقل ايام احداث غزة وصديقى القريب منى نقل من ثلاثة ايام

ولكن بالنسبة للاردينيين سمعت انهم يعنى شوية فى مشاكل لكن المصريين الحمدلله كلة تمام الحمدلله

اما بالنسبة لعقد الصيدالى اظن انة ممكن يكون الراتب قليل شوية يعنى لو زيادة 2000 ريال هيكون كويس بس على العموم زاى ما إأبو ريم قالك بالظبطلو بداية ومش وراك التزامات يبقى زاى الفل

ومش تنسونا يا جامعة الخير كدة

[adrianocrespo]

شكرا لردك يا استاذ علاء

و هل نقل الكفاله ميسر في قطر اصلي اسمع انه في السعوديه وحش اوي و صعب بالمره

تحياتي

[مصريه في قطر]

جزاك الله خير

ومتشكره لاهتمامك

وياريت لو حد يحكى لنا تجربته عشان زوجي احتمال كبير ينقلها في شهر 4

هو مهندس معماري

ربنا يقدم اللي فيه الخير :mellow:

[alaa elshafiey]

السلام عليكم للجميع

بعد التحية ,,,,

بصوا يا جماعة الخير نقل الكفالة وحش جدا فى اى مكان سواء قطر او السعودية او الكويت

محدش بينقل كفالة غير برضا تام من الكفيل بتاعة لو متفق معاة والكفيل مش ممانع يبقى مفيش اى مشكلة

ام لا قدر الله ممانع يبقى مفيش حل الا اذ كان الكفيل مقصر فى اى بند من بنود العقد المتفق علية بينك وبينة ووقتها حقوق الانسان

وادارة العمل هما الحل رغم انهم مش حل اوى يعنى بس ساعات بيعملوا حاجة

وربنا يسهل للكل والى عاوز ينقل كفالة ربنا معاة

عقبالى انا بقة يارب اصلى مش عندى امل خالص فى نقل كفالة ونفسى اعملها

تم تعديل 15 مارس 2009 بواسطة alaa elshafiey

[جحا]

معلش يا جماعه انا اسف

انا طبيب و جايلي عقد في قطر علي 11 الف ريال و هما هيأمنوا السكن

انا متزوج و معايا 3 اطفال و الكبير في سنة اولي ابتدائي و اللي بعده علي وش دخول السنة الجاية و التالت طفل صغير

ايه رأيكم في العقد ده

و متوسط مصروفي الشهري هيبقي كام

و مصاريف المدارس

و سعر السيارات انا عايز سياره 2000 سي سي اوتوماتيك موديل فوق 2002

مع العلم انني معايا رخصة سعودية و كانت مصاريفي هنا حوالي 2000 ريال سعودي

فياريت حد يفيدني بخبرته انا عارف اني كان مفروض ابحث و هلاقي الاجابة بس انا طمعان في كرمكم

مع العلم اني باخد نفس الراتب تقريبا في السعودية

و شكرا للجميع

[osmel33]

معلش يا جماعه انا اسف

انا طبيب و جايلي عقد في قطر علي 11 الف ريال و هما هيأمنوا السكن

انا متزوج و معايا 3 اطفال و الكبير في سنة اولي ابتدائي و اللي بعده علي وش دخول السنة الجاية و التالت طفل صغير

ايه رأيكم في العقد ده

و متوسط مصروفي الشهري هيبقي كام

و مصاريف المدارس

و سعر السيارات انا عايز سياره 2000 سي سي اوتوماتيك موديل فوق 2002

مع العلم انني معايا رخصة سعودية و كانت مصاريفي هنا حوالي 2000 ريال سعودي

فياريت حد يفيدني بخبرته انا عارف اني كان مفروض ابحث و هلاقي الاجابة بس انا طمعان في كرمكم

مع العلم اني باخد نفس الراتب تقريبا في السعودية

و شكرا للجميع

يا حبيبي أنت بتعتذر ليه ؟ أنت تدخل برجلك اليمين زى الأسد

أولاً أهلاً بيك فى حوارات المصريين فرع الدوخة أقصد الدوحة

الأول العرض اللى جايلك ده فين ؟ عشان ممكن نفيدك ونقولك العرض ده مناسب للمكان

ولا لأ ده من ناحية

أما العرض نفسه فممكن نقول يعنى ماشي الحال بس مش حلو وخاصة أن عندك أولاد

فى مدارس ودى تكلفة تقطم الوسط لوحدها ودى طبعاً متوقفة كمان على تعليمهم

هاتوديهم مدرسة نوعها أيه ؟

متوسط مصروفك الشهرى لأسرة أنسى موضوع السعودية ده خالص هنا البلد غالية حبة

لأ حبتين للأسف

والسيارة برضه لما تيجي وتشوف انت عايز أيه وهاتشترى كاش ولا كريديت

ونيجى بقى لمربط الفرس أنت جاى هنا تعمل أيه ؟ عايز فلوس وتحوش كويس ؟

لأ ما عتقدش الراتب ده هايوفر ده فنصيحتى ليك لو كان ده هو نفسه راتبك فى السعودية

وأنت هدفك تحوش يبقى تفضل فى السعودية لأن قطر ماينفعش فيها الموضوع ده بالراتب

ده إلا إذا كنت مش هاتدخل ولادك مدارس وهاتصرف على القد

أما بقى لو عايز تعيش فى مكان حلو وخلاص وأتورطت وده مثلاً واحد زى حالاتى وأصدقاء

كتير هنا للأسف عايشين وخلاص واللى جاى على قد اللى رايح يبقى أهلاً بيك فى الدوخة

ما تزعلش منى لو كنت صارحتك بالحقيقة بس هو ده الواقع للأسف

تم تعديل 18 مارس 2009 بواسطة osmel33

[جحا]

و الله شكرا ليك يا اخي

انت كده و ضحتلي الامور

انا لسه في السعودية و العرض ده معروض عليا في مصر

و انا طبعا متغرب عشان اوفر فلوس في المقام الاول

و انا هاخد بنصيحة حضرتك و ان شاء الله هاعرف تفاصيل العقد و المكان و اخر كلام في الراتب و ابلغ حضرتك و تبقي تقولي رأيك

و اشكرك جزيلا انت و جميع الاخوة بقطر و ربنا يوفقكم

و ان شاء الله لو جيت قطر هاجي عشان فيها ناس حلوة زيكم

[osmel33]

و الله شكرا ليك يا اخي

انت كده و ضحتلي الامور

انا لسه في السعودية و العرض ده معروض عليا في مصر

و انا طبعا متغرب عشان اوفر فلوس في المقام الاول

و انا هاخد بنصيحة حضرتك و ان شاء الله هاعرف تفاصيل العقد و المكان و اخر كلام في الراتب و ابلغ حضرتك و تبقي تقولي رأيك

و اشكرك جزيلا انت و جميع الاخوة بقطر و ربنا يوفقكم

و ان شاء الله لو جيت قطر هاجي عشان فيها ناس حلوة زيكم

الله يبارك فيك يا دكتور جحا ... دكتور ؟ وجحا ؟؟؟؟ مش راكبة خالص

ربنا ييسر لينا ولك الحال

[طالب علم]

سؤال للشباب - بما انكم مش بتضيقوا من الغلاسة والالحاح وما شاء الله بتردوا في كل المجالات - سمعت ان هناك بعض الجهات تتحمل مصاريف المدارس الخاصة للابناء فهل الحكومة من تلك الجهات ام لا ؟؟؟؟؟

[osmel33]

سؤال للشباب - بما انكم مش بتضيقوا من الغلاسة والالحاح وما شاء الله بتردوا في كل المجالات - سمعت ان هناك بعض الجهات تتحمل مصاريف المدارس الخاصة للابناء فهل الحكومة من تلك الجهات ام لا ؟؟؟؟؟

للأسف لأ اغلب الحكومة ما بتديش أحنا أهو فى حكومة ومش شايفين حاجة ....

إحتمال بس مش أكيد مستشفى حمد ودى حكومة بس مش متأكد إذا كان فيه أسكول ألوينس ولا لأ

الإماكن المعروفة اللى بتدى ذى كيو بي وقطر غاز وطبعاً الشركات اللى تحتهم

[مصريه في قطر]

السلام عليكم

متشكرة للاستاذ علاء للتوضيح ويارب يوافقوا لزوجي على نقل الكفالة

كنت عايزة اسال لو حد عارف مكان طالب محاسبين

اخو زوجي معاه اقامة وهو بيدور علي عمل وكان محاسب في الضرايب في مصر

[مصريه في قطر]

السلام عليكم

اخباركم يا اهلنا بقطر ايه

انتوا ليه بتغيبوا عن الصفحة دي كتير

[saad badr]

يا جماعة حبيت بس تكون ليه مشاركة معاكم وتكون المشاركة بتاعتي بس للتنوية عن" حلم العلم "

شفت دكتور زويل ولا مصطفى السيد ولا يعقوب ولا مين ولا مين تتمنى تشوف ابنك مكانه او بنتك او اخوك

يبقى لازم نشارك في التنمية الفكرية والعلمية ونبدء نخطط لعلم بجد وللتغير فكري بجد

واحنا اطفالنا اذكى اطفال العالم ايه اللي بيحصل بعد كده ؟؟ واحنا فينا من التقدم العلمي ؟

ولو ابنك قالك بابا انا عملت حاجه جديدة وحسيت انه عالم او مخترع صغير هتقوله ايه روح المدرسة ولا يكون فيه باب قدامه وصرح حضاري كبير يحتوي عبقريتة وينميها ؟

له الناس لما تحس ان ابنها موهوب كورة تجري وتدور على نادي لان النادي موجود ؟

يبقى ان شاء الله لما تحس ان ابنك عبقري ولا مخترع ولا عالم لما يكون الصرح العلمي موجودة هتجري على طول توديه

يبقى لازم نشارك كلنا في الحلم ده ونحوله لواقع وحقيقة ...............

بيقولوا في الامثال لو عندك كلمة خير قلها معندكش سمعنا سكاتك

هل مستشفى السرطان تاني مستشفى على مستوى العالم والأولى عربيا وفي الشرق الأوسط مع العلم بامكانيات منطقة الخليج اللي يقدروا يعملوها المستشفى كانت حلم واتنفذ على ارض الواقع وكانت المشكلة في الأول فين ومنين ؟؟؟

السد العالي في عز الخراب والحرب علينا من العالم كله يبقى له منسبناشي من الاحباط والكلام ونحط ايد في ايد

صدقوني والله مصر اعدائها كتير اوي والدنيا كلها عينها على مصر

ايران الفارسية وانا هنا في الخليج وعارف كويس اوي حلمها الخليج الفارسي وعارفة ان مصر هية اللي في وشها ومصر سنية وتحاول تهز صورتها قدام العرب ويكون هناك من الجهلة من العرب اللي انقسموا على مصر بفعل ايراني

اسرائيل عدونا اللدود ومش هقول اكتر من كده

الغرب واطماعهم في المنطقة واداركهم ان مصر هية الدولة الوحيدة اللي ممكن تقف ضدهم

والله انا ممكن اتكلم واشرح بس ده مش موضعنا

موضوعي الحلم ده موجود على الفيس بوك والناس بتشارك برايها له منرحش نشوف واللي عنده فكره يقولها

وكمان اللي يقدر على حاجه يعملها

وصدقوني لما ربنا يكرمك وتشوف علماء مصريين زي الاول عملوا ....

ولا ابنك واحد منهم واخترع ...

ولا ولا ولا ونقدر نقول عندنا علم وعندنا عمل ونقدر نغير ونقدر نرجع مكانتنا

وايه ده بس مش هتعمل حاجه هتقدر تدفع مية جنية ادفع مية جنية كرت شحن وماله

هتقدر تدفع عشرة جنية بحق علبة سجاير وماله

هتقدر تدفع جنيه وماله

مش معاك ومش هتقدر تدفع قول بس يارب اكرمهم علشان بكره وعيالي واحفادي يكون ليهم مستقبل مش يدوروا يهجوا

وتخلع جذروك من اجمل مكان في الدنيا

عامة ده اللينك وان شاء الله كلنا نشارك

http://www.facebook.com/reqs.php#/group.php?gid=67969053584

وكمان فيه مقترحات واراء

يلا كلنا بنحب مصر واللي يلف الدنيا مش هيلاقي احسن من تراب مصر

ترابها ده كنوز

ده الشمس بتضحك لما تعدي على مصر وتشرق على المصريين

والنسمة ترقص لما تعدي من اسكندرية وكمان من حلايب وشلاتين

ولا العصرية وساعة المغربية والحلاوة جاية والشمس تبكي من فراق الفلاحين

ولا السمسية ولا القلوب الطيبة في الشراع شراع المحتاجين

ياناس كفاية نسمة صباها صبية دايما ارض الملايين

عمرانه بالخير والخيرين

وحياة هواها ونسمة صباها لانول رضاها وارجع هناها

ويقولوا عليها انها قاسية مين يهون على امه وازاي نهون على ام المصريين

دهية عافية قووووي وصبورة وصابرة وماترد ايد ولا تزعل حبيب

يا بلاد طيبة وقريبة وحبيبة وقت الخطر امي بتحملي همي حضنك ده دفه وحنان

ايوة دفه وامان وقت الخطر درعي وسيف من غدر الزمان

ولا نقول ماشفش الرجال السمر الشداد ولا العناد في عيون الولاد

ولا نقول احلف بسماها وبترابها

مصري مغترب زيه زيكم بيعشق تراب مصر وروحي فدا كل شبر فيها وبحبها زيكم

شاركوا معنا احنا المصريين اللي معندناشي مستحيل

واحنا المصريين احفاد قطز وصلاح الدين

اللي عندها الادب والف اديب وشوف واسمع صلاح شاهين

عندنا العلم احنا الفراعنة وعرفناه من سنين

عندنا مصر ارض الحب بتلم شمل المصريين

واحنا يا جدع الجدعان الطيبين

عمي فلاح مسكين شايل رزقه والصبح يصبح يقول رزقي عليك يا كريم

وشايل رزقه على كتفه ورايحه ارضه اللي احن عليها من النيل

بيضرب بأيده فيها وتسمع قلبه بيقول بضرب فيك ولو بيوجعك ضربي قلبي فيه سكاكين

ولكن بضرب بطلع خيرك اللي مش موجود اللي في ارض المصريين

وتقول يا جدوا عاوزة برتقالة بلدي ووردة بلدي من خير ارضي

عرفت انها بلدي واصلي وامي

هية شرفي وهية عرضي

تحيا مصر والمصريين

[Aboraiamba]

السلام عليكم جميعا

يا اهل الخير دلونى ,,,

انا محاسب فى شركة بقالى سنة ونصف , وانا المحاسب الوحيد فى الشركة المهم حصلت مشاكل بينى وبين المدير المالى بتاعى بقالى حوالى اربع شهور المهم انا عقدى غير محدد المدة وقدمت استقاله بقالى شهر ومداوم فى شغلى عادى بس المدير مرضاش يمضى عليها طبعا بالاستلام طبعا هو بيحاول معايا على شان اسحبها انا مش راضى ,واتفقت معاه انى امشى اخر شهر 4 الى جاى , المهم انه دلوقتى غير نبرتو فى الكلام بنبرة تهديد , بمعنى انه بيهددنى انه ماسك عليا حاجات اختلاسات وما شابه ذلك طبعا انا عارف انه كلام كله اهبل وهو بيعمل كدة على شان اخاف واسحب الاستقاله , المهم

سؤالى

1- من الاخر اروح مكتب العمل على طول واسلم الاستقاله هناك والموضوع يمشى رسمى علما بأن ليه زمايل كثير اشتكو برضو فى مكتب العمل وما عملهمش حاجة وضاع كثير من مستحقتهم .

2- ايه هو الوضع القانونى بتاعى على اساس ما أتهورش فى رد الفعل ,او ايه هى المسئوليات الى عليا بمعنى انا هنا المحاسب الوحيد يعنى بعمل كل الصرف والقبض وحسابات العملاء وكل حاجة فى الشركة ومافيش رقابة على الحسابات نهائى والمدير المالى ده بيعتمد المصاريف بالتليفون ومش متواجد فى الشركة كثير وعلى فكرة هو مصرى ( ربنا يكفينى شره ) .

انا دلوقتى بصراحة حتى مستحقاتى مش عايزها وحسبى الله ونعم الوكيل عايز اروح وخلاص .

تنصحونى بأيه يا اهل الخير بالله عليكم

[ام بودى]

السلام عليكم انا كان عندى سؤال بخصوص المدارس ابنى فى المصرية للغات و حابة انقلة مدرسة تانية تكون لغات برضة بس فية رقابة عل الولاد من ناحية السلوك الولد اكتسب سلوكيات سلبية فى الطبع والكلام وكل ما اقومة واعلمة دا غلط يتعلم حاجة جديدة وانا تعبت عايزة مدرسة تهتم بهذة الناحية ان وجد وكمان بنتى داخلة كى جى السنة الجاية يا ترى فية مدرسة كويسة ولا حتحصل اخوها

[osmel33]

السلام عليكم جميعا

يا اهل الخير دلونى ,,,

انا محاسب فى شركة بقالى سنة ونصف , وانا المحاسب الوحيد فى الشركة المهم حصلت مشاكل بينى وبين المدير المالى بتاعى بقالى حوالى اربع شهور المهم انا عقدى غير محدد المدة وقدمت استقاله بقالى شهر ومداوم فى شغلى عادى بس المدير مرضاش يمضى عليها طبعا بالاستلام طبعا هو بيحاول معايا على شان اسحبها انا مش راضى ,واتفقت معاه انى امشى اخر شهر 4 الى جاى , المهم انه دلوقتى غير نبرتو فى الكلام بنبرة تهديد , بمعنى انه بيهددنى انه ماسك عليا حاجات اختلاسات وما شابه ذلك طبعا انا عارف انه كلام كله اهبل وهو بيعمل كدة على شان اخاف واسحب الاستقاله , المهم

سؤالى

1- من الاخر اروح مكتب العمل على طول واسلم الاستقاله هناك والموضوع يمشى رسمى علما بأن ليه زمايل كثير اشتكو برضو فى مكتب العمل وما عملهمش حاجة وضاع كثير من مستحقتهم .

2- ايه هو الوضع القانونى بتاعى على اساس ما أتهورش فى رد الفعل ,او ايه هى المسئوليات الى عليا بمعنى انا هنا المحاسب الوحيد يعنى بعمل كل الصرف والقبض وحسابات العملاء وكل حاجة فى الشركة ومافيش رقابة على الحسابات نهائى والمدير المالى ده بيعتمد المصاريف بالتليفون ومش متواجد فى الشركة كثير وعلى فكرة هو مصرى ( ربنا يكفينى شره ) .

انا دلوقتى بصراحة حتى مستحقاتى مش عايزها وحسبى الله ونعم الوكيل عايز اروح وخلاص .

تنصحونى بأيه يا اهل الخير بالله عليكم

لازم كده كده تروح تشتكيه فى مكتب العمل عشان اثبات الحق ولو الموضوع اتصعد ممكن تروح لجنة حقوق الإنسان القطرية

ودى بتساعد كتير فى المواضيع اللى زى كده

[osmel33]

السلام عليكم انا كان عندى سؤال بخصوص المدارس ابنى فى المصرية للغات و حابة انقلة مدرسة تانية تكون لغات برضة بس فية رقابة عل الولاد من ناحية السلوك الولد اكتسب سلوكيات سلبية فى الطبع والكلام وكل ما اقومة واعلمة دا غلط يتعلم حاجة جديدة وانا تعبت عايزة مدرسة تهتم بهذة الناحية ان وجد وكمان بنتى داخلة كى جى السنة الجاية يا ترى فية مدرسة كويسة ولا حتحصل اخوها

وعليكم السلام ورحمة الله وبركاته

الأخت العزيزة أم بودي كلنا فى الهم شرق دى بداية كانت لازمة ...

الأول معلش يا ام بودي احنا اخوات وهاكلمك بصراحة ومعلش باسهاب لأن الحديث ذو شجون بالنسبة لى

الأول انتى عايزة أيه من المدرسة ؟ عايزة علم قوى ؟ ولا مدرسة ماشي الحال بس تكون بتراعي سلوكيات الأولاد ؟

للأسف الشديد الموضوع ده تعبنى نفسياً مع ولادى واللى بيه قررت أنى انزلهم مصر السنة اللى فاتت وده اللى حصل رجعوا المدرسة اللى كانوا فيها فى مصر وهى مدرسة رانكيد ومن أفضل المدارس فى مصر وقولت على ما افكر هاعمل أيه وللأسف يا ام بودى مش عارف هاعمل أيه وهاقولك على المشكلة من بدايتها المشكلة باختصار انا عايز ولادى يتعلموا تعليم محترم ومايكونش عندهم عقدة لا من ماس ولا من ساينس وأكيد انتى عارفه أن دول تقريباً اهم مادتين واللى بسببهم ناس بتقرر تهرب منهم فى ثانوي وده بصراحة أنا مش حابه

المهم... أنا بعد التقصى والتحري وبمقارنة المواد فى مدارس تانية وإنترناشونال بالمناسبة وبعمل نوع من الإمتحانات بين الولاد اللى اعرفهم فى المدارس دى وولادى أو تحديداً ابنى الكبير لقيت حاجة مفجعة أن مناهج المدارس الإنترناشونال مش نفس الاستاندارد بتاع مصر يعنى مثلاً الشويفات هنا مش نفس مناهج الشويفات فى مصر وهكذا ولقيت ان الماس اللى بيدرسه الولد فى كامبردج تحديداً فى السنة الرابعة أبنى كان بيدرسه فى الصف التاني وعملت فعلاً امتحان صغير كده لولد من كامبردج فى الصف الخامس من منهج ابنى اللى كان وقتها فى الصف الرابع الأفندى كأنه شاف عفريت وقالى يا عمو آى دونت اندرستاند ؟ يا فرحتى بيك ... ولا يا فرحة أبوك بيك وأبوه ده واحد صاحبي

المهم لما قعدت مع مدرسين من كذا مدرسة ومن المصرية كمان اكتشفت عايز تعلم ابنك منهج متعب ويطلع كويس تبقى المصرية عايز بقى تدلعه وتخليه يتكلم انجليزى كويس ومش مهم الباقى وكمان مش هاتتورط فى دروس خصوصية عليك بالإنترناشونال بس ادفع بقى يا حلو فيها

أم بودى معلش طولت عليكي سامحينى بس الموضوع ده تاعبنى جداً وكنت على فكرة عامله توبيك من فترة طويلة فى المنتدى

هنا

أنا عارف ان سلوكيات المدرسة زفت وأن الافندى الدكتور مدير المدرسة شخص غير مؤهل للدور ده وحاطط على طول ورقة على باب مكتبه انه مابيقابلش حد من أولياء الأمور علشان البيه مشغول بالإدارة اللى هو مش عارف اساسياتها أصلاً

وعلى فكرة أنا عندى ابنى الصغير اكتسب سلوكيات مش عايز اقولك من المدرسة دى

المهم انا بعد ده كله لى ناس معارف بقالهم سنين طويلة فى الدوحة وبصراحة ولادهم كانوا فى المصرية وكل ولادهم باسم الله ماشاء الله عليهم اللى دخل طب واللى هندسة واللى اعلام حتى واحد فيهم قالهالى صراحة قالى انت عايز ايه اكتر من ابنك يدخل كلية محترمة وللأسف على طرف النقيض أعرف ناس ولادهم خريجين الإنترناشونال وبالكاد دخلوا ادارة اعمال ولا تسويق وكمان فى الجامعات الخاصة ومنهم اللى راح جامعة فى الإمارات

أنا أسف جداً جداً جداً يا ام بودى انا حاسس انى احبطتك بس للأسف مش هاتلاقى المعادلة الكاملة (تعليم جيد + سلوك قويم) وانتي عارفه انا كنت مدخل بنتى الأرقم أكاديمى قولت إلا البنت على جثتى أنها تدخل المصرية علشان السلوك طب وبعدين الولاد هايتعلموا بطريقة والبنت هاتتعلم بطريقة ؟

أنا مستنى ردك يا ام بودى علشان انا فعلاً محتاج افكر فى الموضوع ده واحسم المسألة دى

ودومتى بألف خير

تم تعديل 26 مارس 2009 بواسطة osmel33