القمه العربيه قاااادمه حط نفسك مكانهم

[drhouba]

قريبا جدا يتجدد اللقاء مع القمه العربيه المعتاده فى الرياض يوم 31 مارس و طبعا كلنا على أحر من الجمر فى إنتظار قراراتها الرادعه كالعاده فى ظل التطورات اليوميه المتدهوره على الساحه العربيه فى كل المجالات حط نفسك مكانهم لو إنت قاعد فى قاعة الإجتماعات كيف ستتعامل مع المتناحرين العرب و ما هى القرارات التى ستطرحها و تتبناها ؟

تم تعديل 16 مارس 2007 بواسطة drhouba

[DARWEEN]

من مراسلنا في القمة المقبلة أفادنا بالآتي

- إلتقى الزعماء بالقبلات كالعادة

- تناولوا الوجبات المعتادة كالعادة

- تبادلوا الكلمات الإفتتاحية عديمة الجدوى كالعادة

- شجبوا ورفضوا وأيدوا كالعادة

- تبادلوا الكلمات الختامية كالعادة

- قام الأخ العقيد بعمل بعض الإشكالات كالعادة

لذا نجد أن القمة ... كالعادة

ولا أرانا الله مكروها في قمة لدينا ولديكم

[drhouba]

يعنى مفيش أفل على رأى اللمبى ؟ طيب ده اللى إنت متوقعه منهم أنا عاوز ما نستسهلش و نحط نفسنا مكانهم حنعمل إيه لو إحنا اللى قاعدين هناك إيه التصرف اللى ممكن نعمله و إيه القرارات اللى حنحارب عشان تشوف النور و حنعمل إيه مع القذافى عشان نلم الموضوع

[أبو محمد]

معلهش يادكتور ..

أنا لو منك كنت حطيت الموضوع ده فى منتدى "دعوة للابتسام" :sad:

[محمد علي عامر]

أنا لو كنت رئيساً عربيا

لحللت المشكلة…

و أرحت الشعب مما أثقله…

أنا لو كنت رئيساً

لدعوت الرؤساء…

و لألقيت خطاباً موجزاً

عما يعاني شعبنا منه

و عن سر العناء…

و لقاطعت جميع الأسئلة…

و قرأت البسملة…

و عليهم و على نفسي قذفت القنبلة…

أحمد مطر

[drhouba]

من وجهة نظرى قبل ما نتكلم عن مواقف سلبيه فى مواجهة إسرائيل و تخاذل فى المواقف جيل بعد جيل لازم نصلح علاقاتنا الأول يعنى لو أنا هناك طبعا أول حاجه حأحارب علشانها محاولة تقريب الشعوب العربيه مش بالكلام و بس ...

ليه ما نحاولش نعمم تجربة دول مجلس التعاون الخليجى و نطورها و نستبعد سلبياتها لأن هذه التجربه أنا شايف إنها بذره جميله و أساس ممكن نبنى عليه لأولادنا ....

نعمل هيئة تصنيع عربى بجد مش سخانات و بوتاجازت بعقول عربيه و تمويل عربى أيضا لأنى متأكد إننا لا نعانى من أزمة عقول و علماء و أكيد مفيش أزمه ماليه حاجات كتير ممكن تتعمل بس المهم نكون على قلب رجل واحد و عاوزين نعمل حاجه ......

يا رب أعيش لغاية لما أشوف بداية حركه .....

أى حركه

[zedan]

القمة العربية هتكون إيجابيه ، لما الزعماء ينسوا حبهم للكرسي ....

يعني لو زعماء القمة العربية دخلوا المنتدي للإقتراع والتصويت علي هذا الموضوع، هتكون نسبة 99% = ( أنا ماليش دعوة بالموضوع ده)

تحياتي،،

[وائل كيوان]

على العموم يا دكتور ايهاب هى كالعاده

بس انا لو مكانهم هحب اسعى لشى مهم جدا جدا وعارف طبعا انه هيبقى صعب بس اهو يكفينا شرف المحاولة

هحاول ادعى لتوحيد الصف العربى كما اشرت اننا نكون سوق عربية مشتركة نعمل اكتفاء زاتى زى ما عملت الصين واصبحت متسيده العالم الان وانا كمنطقه عربية عندنا مقومات النجاح عندنا الدول الغنية اللى تمول سوقها العربى بالاموال عندنا الايدى العاملة اللى اثبتت نجاح فى كل دول العالم الغربى مش العربى بس عندنا اهم حاجة النفط اللى نقدر نأثر بيها على العالم ومن خلال سلاح النفط ننادى بحق اصيل لينا كوطن عربى وهو حق الفيتو كدولة عظمى عندنا زراعه عندنا النيل والفرات عندنا صناعه عندنا ....... عندنا ...... ايه ولا ايه ولا ايه اللى مش عن حد فى الدنيا عندنا الجيوش اللى لو اتحدت تقدر باتحادها تتحدى العالم باجمعه طبعا حد هيقولى فين الجيوش لا يا جماعه لو كان هناك اتحاد مصرى سورى عراقى كقوة بشرية مدربة وتمويل من البلاد الغنية اللى معندهاش جيوش كنا هنبقى اعظم قوى على الارض واصبح عندنا السلاح كنا هنبقى اية فى الحالة دى قدام العالم هيتودد لينا الاخ بوش هيتودد لينا لاخ بلير وكمان الاخ المرت يااااااااااااااااه كنا بقينا اية تخيلوا لو كنا وصلنا للمرحلة اللى كان بيسعى ليها جمال عبد الناصر قبل ما يموت بتوحيد الصف العربى .........

بيتهيقلى حلم صعب بس كان لازم نحلم علشان نعيش مش كدا حلم جميل

مع خالص تحياتى لكل الزعماء العرب اللى رافعين راسنا فى كل مكان .............؟؟؟؟؟؟؟؟؟؟؟

[قديم]

بمناسبةِ قُرب انعقادِ مؤتمر القمَّة العربية في الرياض ، استمعتُ لمقطعٍ مضحكٍ مُعَبِّرٍ عن حال هذه القمم . ولطرافته أحببت إمتاعكم به .

وقد وصف صاحبه القمم العربية بثلاث صفات : البُرودْ ، والسَّخافة ، والتَّناحة .

ثم شبهها بحال من يستمع إلى شريط فارغ مستمتعاً به ! وهذه قمة البُرودْ !

وأما كونها قمةَ السخافة فلأنها كمن يقلبُ هذا الشريط ويستمع إلى وجهه الفارغِ الآخر !

وأما كونها قمة التناحة فهي كمن يستعيد مقطعاً أعجبه من الشريط الفارغ !

اضغط هنــا

فوائد لغوية :

- السَّخافَةُ : على وزن السَّحابةِ ، هي رِقَّةُ العقل وغيره ، وبعضهم يخصُّها بالخِفَّةِ التي تعتري الجائع !

- التَّناحَةُ : لم أجدها في معاجم العربية التي بين يدي وهي كثيرة ، ولعلها من باب الإِتْباع ، وهي تجمع مع رقة العقل وخفته، تمادياً في الصفتين .

[عبده بيه]

حكام بلا شعوب وشعوب مغلوبة علي امرها

[الحازم حسن]

البيان الختامي للقمة

[DARWEEN]

إليكم مشهد من القمة

أحد القادة العرب يلقي بكلمته ...

الرئيس : إن الموقف في فلسطين يحتاج من لإتخاذ موقف في منتهى القوة لحماية إخواننا الفلسطينيين وحماية المسجد الأقصى وكافة المقدسات .... ويجب إتخاذ موقف في منتهى الشدة ضد الأفعال الإسرئيلية المجرمة

مكالمة للرئيس على هاتفه المحمول تقطع إلقاءه لكلمته ... الرئيس يرد ....

الرئيس أثناء المكالمة : yes Mr president ... yes sir .. yes of course .... ok sir

يستأنف الرئيس : أخواني ... لا أعتقد أن المواقف العنيفه ستجدي وأنا أرى أنه لابد من التفاوض مع أبناء العم في إسرائيل حتى نجد صيغة مشتركة ترضي كافة الأطراف وكذلك عدم وقف الإنشاءات الإسرائيلية في القدس

يحيا العرب

[Modest]

حط نفسك مكانهم

أنا ماحطش نفسي مكانهم

[Tafshan]

طبعاً - اسف - لن اعلق على القمه العربيه لاننى غير مقتنع ان هناك تجمع يجمع المتحدثين باللغه العربيه اساساً غير المجمع اللغوى ..

المهم ..

القمه زي غيرها .. قمة الاحبط لمن يؤمن بوحدة العرب ..

ما لن يكون في القمه هو الهدف منها : ما هو هدف العرب من مثل هذا التجمع ؟؟

هل يتقبل العرب مشاركه فعاله غير مجانيه ؟؟

المواقف المسبقه ....

مبارك : انا قلت كده من الاول

القذافى : ح يتخانق مع اي حد

السعوديه : ستروج لاتفاق مكه و الخ الخ

دول الخليج : وعد بمساعدة فلسطين و الخ و ارسال معونات نقديه و عينيه .. و ادى وش الضيف !

دول المغرب العربي : تستمتع بمأدبة العشاء الفاخر

السودان : بعد انتهاء القمه ... يقوم المتحدث الرسمى بافاقة الرئيس البشير بعد ان داهمه النوم ,,,,

و كل قمه و انتم بخير ,,,

[se_ Elsyed]

بيعجبني قوي تفاؤل الشباب اللي إنتو فيه ده ...

بس خدوها حكمة من شاب متفائل بس كرف شويه على إكتئاب :

1- أولاً إجتماع الزعماء والرؤساء والملوك والسلاطين المُسلطنة العرب بيكون تحصيل حاصل وكل القرارات بيتم الموافقة عليها في إجتماع وزراء الخارجية وده تم بالفعل من إسبوعين تقريباً في القاهرة .

2- إلى الأخوة الذين يهاجمون الأخ العقيد معمر القذافي بسبب وبدون سبب .. أحب أريحكم وأقول لكم ....

القذافي إعتذر وليبيا مش هاتحضر القمة لإنه خايف يتعكش في السعودية ويسلموه للهيئة بعد اللي عمله ومحاولته منذ سنوات قليلة إغتيال ولي العهد السعودي الملك عبد الله حالياً وتحجج القذافي المرة دي إن مكان إنعقاد القمة كان القاهرة ولكن تمت الموافقة على تغيير المكان للرياض فالراجل إتقمص وأخد على خاطره وقال : والله مانا حاضر .

3- المفاجاة الكبيرة والتقيلة بقى .. وأرجو ان يتسع صدركم لهذا الخبر وكل واحد يمسك أعصابه .... الحيزبونه المتوحشة كوندليزا رايس ستزور مصر الأسبوع القادم وبالأمر هاتجتمع بـ 4 حتت وزراء خارجية عرب في " أسوان " عرفت تختار المكان بنت اللذين عشان تديهم مسودة القرارات يذاكروها قبل القمة ده لو كان في قرارات أساساً .

بالمناسبة .. أنا سمعت الخبر ده في الراديون الظهرية كده وتفتقت الموهبة التأليفية الهلامية وألفت قصة قصيرة سياسية عبثية إسمها

" يا ست ليزا .. إحنا التلاميذه " وهانشرها هنا في باب الإبتسام غداً إن لم يكن بعد غد بإذن الله

وقابلني على الإمة يا حمو

[الحازم حسن]

2- إلى الأخوة الذين يهاجمون الأخ العقيد معمر القذافي بسبب وبدون سبب .. أحب أريحكم وأقول لكم ....

القذافي إعتذر وليبيا مش هاتحضر القمة لإنه خايف يتعكش في السعودية ويسلموه للهيئة بعد اللي عمله ومحاولته منذ سنوات قليلة إغتيال ولي العهد السعودي الملك عبد الله حالياً وتحجج القذافي المرة دي إن مكان إنعقاد القمة كان القاهرة ولكن تمت الموافقة على تغيير المكان للرياض فالراجل إتقمص وأخد على خاطره وقال : والله مانا حاضر .

والله كارثة ان مصير دول وشعوب وامة بحالها يكون في ايد ناس زي دول

اللي مقموص واللي واخد على خاطره واللي مقاطع التاني وزعلان منه واللي ملهوش نفس يحضر

نسوا انهم في مراكزهم عشان يهتموا بمصالح شعوبهم وأعطوا الاولوية لخلافتهم الشخصية وكأن كل واحد فيهم عنده عزبة أو تكية بيتصرف فيها زي ما هوه عايز

[drhouba]

و ليه دايما العيب فى الحكام و إحنا يا عينى الغلابه اللى ربنا إبتلانا بيهم ليه ما يكونش العيب فينا إحنا و الناس دى عقاب من ربنا لأننا نسيناه و لم نعد أسباب الإنتصار سواء فينا إحنا أنفسنا أو أسباب ماديه .... و الإنتصار ده مش لازم يكون على إسرائيل ممكن يكون علينا إحنا نفسنا أولا ( إن الله لا يغير ما بقوم حتى يغيروا ما بأنفسهم ) .

فعلى الأقل لازم الأول نفكر و نطرح العيب فين و إيه الحلول و إذا خلصنا مشاكلنا مع نفسنا و جه يوم من الأيام واحد مننا بعد الشر قعد كرئيس فى قمه من القمم دى و ما كانش مقموص من اللى قاعد جنبه أو مخاصم اللى قاعد قدامه إيه القرارات و المشاريع اللى ممكن يتبناها لمصلحة شعبه و كل الشعوب العربيه كخطوه أولى لبداية الإنتصار

تم تعديل 19 مارس 2007 بواسطة drhouba

[ahmed amer]

يا سادة عصر المواقف القوية انتهى وليس أدل على ذلك قرار فك الحصار عن الحكومة الفلسطينية بعد أن أعلن العرب أنهم سيفكون الحصار الاقتصادى ثم جاهدت حماس على أن تستنهض العرب لتنفيذ قرارهم وكأنها تحاول تنفيذ القرار رقم 242 والصادر من مجلس الامن عموما هذة المؤتمرات ثبت أنها لتنشيط السياحة لذلك ديما تحاول مصر دائما أن تستحوذ عليها وذلك فى إطار النشاط المكثف لوزارة السياحة المصرية ولكن يمكن فى الاونة الاخيرة لاحظنا ظهور منافسة قوية من السعودية وذلك لتغير سلوك الحكام العرب والميل نحو السياحة الدينية وذلك لظروف السن وإنقلاب أمريكا عليهم فى بعض المواقف مما يعتبر أنهم فى كرب عظيم لذلك يحبذون الدعاء فى هذة المناسبات لرفع الكرب عنهم ولتأليف قلب السديق الامريكى عليهم ومحاولة توحيد وجهات النظر فى كيفية إرضاء السديق .

ولا عزاء للكوميين ولا الاسلاميين ولا حتى جمعية الاطفال المتحدون لتحرير العالم العربى من براثن الوحش وسلاحف الننجا . :unsure:

[drhouba]

أما و قد وقعت الفأس فى الرأس و ستبدأ القمه العربيه العالميه الهلاميه البدنجانيه و لم نطرح كمحاورين أى بدائل أو مقترحات قويه فى حال

كنا مكانهم فى قاعة الإجتماعات ....

بالصدفه و أنا أشاهد كعادتى كل القنوات التلفزيونيه فى نفس الوقت بواقع ثانيتين لكل قناه إستوقفتنى عباره سمعتها أثناء مناقشه دائره

فى برنامج القاهره اليوم حول المبادره العربيه للسلام التى طرحها حبايبنا القاده العرب من كام سنه فى قمة بيروت ...

الكلمه هى من نص المبادره و هى المطالبه بالعوده لحدود 4 يونيو 1967 ... بصراحه أنا سمعت الجمله دى كتير قبل كده و كانت بتعدى و

لكن هذه المره توقفت عندها !!!!

لقد إستمر الصراع العربى الإسرائيلى من عام 48 لمدة 19 سنه حتى جاء 5 يونيو و تكلفنا ما تكلفناه خلال هذه السنوات من أموال و

شهداء و خطط تنميه متوقفه على كلمه واحده هى عدم الإعتراف بوجود إسرائيل و المطالبه بإزالتها حتى جائت الوكسه و الخيبه التقيله

فأصبحت النغمه هى العوده لحدود 4 يونيو .... يعنى هو إحنا لا نقبل بوضع معين إلا عندما نصل لوضع أسوأ فدعونا نتخيل الوضع السياسى

الحالى لو قبلنا عام 48 بقرار التقسيم أو القبول بحدود 4 يونيو فى وقتها أو إتحدت الدول العربيه مع السادات فى مفاوضاته عام 77 هل كنا

سنكون فى وضع تفاوضى أضل الآن أم لا ؟ ....

هل نحن أمه لا تتحرك إلا بسياسة الأمر الواقع ؟ هل لابد أن نتحرك بالقوه و نتحرك بالعوده للوراء و الموافقه على ما نرفضه دائما

لقد رفضنا قرار التقسيم عام 48 بقوه و الآن لا نحلم بهذا القرار !!!!!!!!!!!

رفضنا مجرد سماع إسم إسرائيل قبل 5 يونيو 67 !!!!!!!!!!!

رفضت الدول العربيه مشاركة السادات مفاوضاته عام 77 !!!!!!!!!

يا ترى إيه من اللى بنرفضه النهارده و بنعتبره من رابع المستحيلات حنوافق عليه بكره و نحلم بتحقيق ربعه ؟

الواضح أننا كنا و ما زلنا أمه لا تتعلم من أخطائها و المشكله أننا لا نريد أن نتعلم

تم تعديل 27 مارس 2007 بواسطة drhouba

[ابو محمود]

l اما بعد معلش استحملونى والنبى استحملونى انا شايف اننا رفضنا تقسيم 48 وبعدين بعد كدة قلنا ممكن وجائت نكسة يونيو وقالو برضة لا ودلوقتى قبلو هل انا بتكلم صح حد يقولى ويرد عليا اصل اسرائيل قالت لازم تعدلو المبادرة يعنى مش قبلاها يعنى فية حرب تانية علشان نطلع حاجة اقل ونقول احنا قبلنا حدود 2007 اهو دة اللى ناقص اكيد انا تعلمت من الماضى لانة يشبة الحاضر مش كدة ولا ايية ؟؟؟؟؟؟