إلي إيمن نور لسمير عبد الباقى

[اشرف سمير عبد الباقى]

إلي إيمن نور

ذنبك يا أيمن

إنك صـّدقت

صدقت قريبك

في براءة

فكشفت له عيبك

صدّقت عدوك

بحماقة

وعملته نسيبك

ما فـّرقتش

بين اللي بيفحت ليك

وبين مين في الزّفة حبيبك

صدقت بإن الحداية

بتحدّف كتاكيت

*********

**********

وان الديموقراطيه من الإتيكيت ..

إيزوريس يا إبني

ما كانش منوفي

وإيزيس مش جنيـّة

لكنه الهم

اللي كلـّت منه كتوفي

ما كانش هزار

ولا صورة شعرية

دي سياسة..

بحرها كلـّه

ف عصر النـّخـّاسة – نجاسة

لكن بشويش وكياسة

تلهفها بكل حماسة

من غيـْر ما تزعل أي شاويش

من غيـْر ما تخرج بـْرة البراويز

تفهمها بدون أي حساسة

إن الحلــْم

ماهوّاش علم

وتلعبها بكل طفاسة

كأن العلم

ما هواش فيلم

لعبة غدرخباثة

سابقة التجهيز

وعشان يسمح لك بالتنفيذ

لازم يبقي لك ضهر و عكاكيز

دانا ياللي بلدياتك ...

وعلي نيـّاتي زي حالاتك

إستعجبت في هذي الأيام السودة

إزاي عـدّيت

علي كل دي بزابيز

وما شفتش

كل دي مهاميز

واستقتلت..ما صدقتش

إنها محسوبة

ما فهمتش

حكمة غرَق النوبة

و لا مغزي خيبة توشكي

و لا حواديت الضربة الجـّوية ..

والسر ورا الطوبة

اللي ما بتصيبش الا العرقوبة

ما حرمتش من دي النوبة

ما دقتش خبز التوبة

وصدقت ان القرعة

المزروعة في الصوبة

طبيعية

وإن اللي جعانة

بتعزم ع الفتة جيرانها

وإن الهاتمة

بتكشف علي ضـرّتها اسنانها

***

فاصبر يا صاحبي

علي ليل الزنزانة ..

إستحمل انت ف مصر ..

اللي كاتم علي نفسك

قاتل مستقتل

واللي معاك أو زيـّك

شايل متحمل ذنبه

و بيتجمـّل...

الشبعانة جبانة

والكركوبة السهتانة راضية

بدور الكومبارس..

ذاك لأن اللي تعوزه

المستعفية

متحـّرم شرعياً في بلدنا

علي العيانة ..

تم تعديل 17 مارس 2007 بواسطة أحمد محمود