أخبار النادي الاهلي

[Ahmad Farahat]

تفتكر يا س.س.........

قدامنا قد إيه عشان نحسم لقب نادي القرن الواحد وعشرين..........

[kokowawa1979]

غنوا ولحنوا زي ما إنتم عايزين يااهلوية --- فالليل مهما طال لابد من طلوع الفجر - وانتم ليلكم طول زي ليل الشتا - لكن الفجر قرب إن شاء الله !!

[النسر المصري]

غنوا ولحنوا زي ما إنتم عايزين يااهلوية --- فالليل مهما طال لابد من طلوع الفجر - وانتم ليلكم طول زي ليل الشتا - لكن الفجر قرب إن شاء الله !!

اخث عليك يا كوكي

بقى عاوز تشمت في الأهلي افريقياً....وانا اللي عمال باشجع روح الإخوة بين الجماهير.... :blink:

تقوم ترد علينا كده...الله يسامحك انا مش هرد عليك....بس هخلي أونكل سين سين الزعيم الأكبر للكره الأهلاويه...والقائد المفدى لروح المحبة الحمراء....هخليه هو بعظمته يرد عليك

اشرب بقى ياحلو

شوف مين ينجدك :lol:

[العمرلحظة]

أخى الفاضل سي السيد

من الجميل أن نجد فريق يحترم الكرة واللعب الجميل فالنادى الأهلى بالذات هو النادى الوحيد الذى يشعرنى بأن الكورة فى الملعب

مع الأحترام الشديد للنادى الأسماعيلى الذى نتمنى من قلوبنا أن يجتاز الأزمة القادمة

نشكرك على الأسم الجميل الذى أطلقته وأستأذنك فى أقتراح أسم خاص وهو نادى العظمة والمفاجئات

أشكرك

العمرلحظة

[Ahmad Farahat]

كوكوواوا كتب:

غنوا ولحنوا زي ما إنتم عايزين يااهلوية --- فالليل مهما طال لابد من طلوع الفجر - وانتم ليلكم طول زي ليل الشتا - لكن الفجر قرب إن شاء الله !!

هوا الزمالك بيطلع منه فجر.........

وبعدين قلبتها ليه زكي طليمات.........

مانت كنت كويس.........

كوكوواوا........

خليك عصري وشجع الأهلي........

مسمعتش

الأهلي...........صلاحية مدى الحياة

[kokowawa1979]

أرسين كتب :

كوكوواوا........

خليك عصري وشجع.....

أشجع إيه ياعم أرسين ؟؟؟ قول تاني كدة أحسن أنا سمعي تقيل

[se_ Elsyed]

- لكن الفجر قرب إن شاء الله !!

طب قوم إتوضا بقى وصلي لك ركعتين يمكن ربنا يتوب عليك وتبطل تتعاطى الزمالك

إيه يا كوكو ... إنت بتستعد للإحتفال بعيد تحرير سينا فبتمسع أجزاء من الأفلام التاريخية رد كلبي .. والرصاصة ما تزال في كلبي والحاجات دي ؟

دي كوره يا حبيبي .. يعني مدورة ..

وإنت لو رياضي قراري كنت شجعت اللعبه الحلوه - الأهلاوية -

لكن الظاهر الزمالكوية داخلين المجال الرياضي من الباب الوراني lol

على العموم إنت لو في مصر .. فول سمحت إقبل دعوتي لحضور مباراة الشياطين الحُمر أمام برشلونه ... بس غوعى تطمع وتبيع التذكرة في السوق السودا

[se_ Elsyed]

ولسه دور الإتحاد الليبي .. الترجي التونسي .. النجم الساحلي التونسي ... الجيش الملكي المغربي ..

( هايلعبوا النهاردة )

كما توقعنا دور الثمانية هايبقى عربيٌ أنا

: وصل حتى الأن

الأهلي المصري

الهلال السوداني

الترجي التونسي

النجم الساحلي التونسي

الجيش الملكي المغربي

شبيبة القبائل الجزائري

واليوم الإتحاد الليبي .. والوداد البيضاوي المغربي وبإذ الله يتأهلا ولو إن فرصتيهما ضعيفة إذا أن نتيجة مبارتي الذهاب لم تكن جيدة كما انهما سيلاقيا فريقين قويين وهما النجم الكونجولي أما الإتحاد الليبي ، والوداد ربنا معاه لإنه هايقبل فرقة من أفضل فرق أفريقيا وهي أسيك ميموزا الإيفواري ...

[Lion King]

السلام عليكم

المفروض نسمي بطولة افريقيا السنه دي بالذات دور الثمانية

دور الثمانية لرابطة الأندية الأبطال العرب الأفارقة ( الابطال الافريقية سابقا) وعقبال كل عام

فعلاً بطولة دورى أبطال أفريقيا السنة دى طعمها مختلف لوجود فرق عربية كثيرة صعدت لدورى المجموعات لدرجة يمكن أن نتخيل اننا بنلعب بطولة عربية مش أفريقية ... و ده يدل على قوة الفرق العربية فى أفريقيا فى الآونة الأخيرة ... طبعاً بسبب هجرة لاعبى أفريقيا السمراء لأوروبا من أنديتهم

[لا تعليق]

السلام عليكم

المفروض نسمي بطولة افريقيا السنه دي بالذات دور الثمانية

دور الثمانية لرابطة الأندية الأبطال العرب الأفارقة ( الابطال الافريقية سابقا) وعقبال كل عام

فعلاً بطولة دورى أبطال أفريقيا السنة دى طعمها مختلف لوجود فرق عربية كثيرة صعدت لدورى المجموعات لدرجة يمكن أن نتخيل اننا بنلعب بطولة عربية مش أفريقية ... و ده يدل على قوة الفرق العربية فى أفريقيا فى الآونة الأخيرة ... طبعاً بسبب هجرة لاعبى أفريقيا السمراء لأوروبا من أنديتهم

بس مش شايف انها هتكون صعبة على الاهلى وانتوا عارفين الحساسية بينا وشمال افريقيا

نفسي الاهلى يروح اليابان تاني

اهلوي مجنون بالاهلى يا أعظم نادي في العالم

بحبك يا ابو تريكة

[se_ Elsyed]

ليلة حمرا في أستاد القاهرة

لا تقولي برشلونه ولا على دلعونه ... إحنا الأهلاوية أجدع ناس لو سألونا

عايزينها إحتفالية نتفرج فيها على كرة نضيفة مش العك الكروي بتاع الدوري .. واتمنى لو الأهلي ادى بنفس أداءة في بطولة الأندية في اليابان في ديسمبر الماضي والنتيجة في الأخر بتاعت ربنا ....

موعدنا في التاسعة والنصف بتوقيت القاهرة وعلى السادة المقيمين خارجها مراعاة الفروق الفردية .. فالكبير لا يلعب إلا مع الكبير .... سامع يا دكتور هوبا إنت ودكتور كوكو وكل الدكاترة الأعداء :)

عايز كل الأخوة الأهلااوية ييجوا الناحية دي عاليمين ربنا يجعلنا من أهل اليمين

[kokowawa1979]

سي السيد كتب :

لا تقولي برشلونه ولا على دلعونه ... إحنا الأهلاوية أجدع ناس لو سألونا

لسه مصر على إن الأهلوية أجدع ناس :unsure:

فالكبير لا يلعب إلا مع الكبير

هو برشلونة كان فاكر الأهلي كبير :D

موعدنا في التاسعة والنصف بتوقيت القاهرة وعلى السادة المقيمين خارجها مراعاة الفروق الفردية

زي ما يكون لعيبة الأهلي قروا الكلام ده قبل ماينزلوا المباراه - منك لله ياسي السيد - خضيت اللعيبة قبل ماينزلوا الملعب زي ماقال حسام البدري - اللعيبة اتخضت وجالها إسهال لما شافوا لاعبي برشلونة :lol:

عرفتم بقى إنكم فرقة مكسحة ياتالت العالم :lol: 4 على الواقف وسبعة ضايعين على القاعد :lol:

خش عليه يادكتور هوبا ولايهمك - ماهو صاحبك بتاع العكاوي شرفهم امبارح هو ورئيس الجمهورية سنة 2050!!!

[se_ Elsyed]

مالقوش في الورد عيب ...

الاهلي لعيبه مكسحة ؟

اومال الزمالك يعتبروا إيه ؟ مومياوات من أيام الفراعين

وبعدين لما تتغلب من برشلونه بيتهيأل أشرف من غزل المحلة وغزل السويس وغزل دمياط وأسمنت السويس وأسمنت أسيوط والهلال والفيصلي .... ولا أنت شايف إيه يا كوكو

[kokowawa1979]

قول كل اللي انت عايزه ياسي السيد على لعيبة الزمالك هابصم لك عليه بالعشرة - لكن ماتنساش برضه إن غزل السويس ضيع الدورى من الأهلي سنه لما هرسه 2/صفر - وكذلك نفس الفريق أخرج الأهلي من الكاس في نفس الموسم - والمحلة برضه ضيعت على الأهلي الدوري سنه لما فاروق اتعادل مع الأهلي والاسماعيلي كسب الدوري في نفس السنة وكان الأهلي بقيادة الجهبذ كوزين قصدي جوزيه !!

يعني برضه الفرق الضعيفة ياما كلت على الأهلي عيش وحلاوة برضه :lol:

وبرضه ماننساش إن الهلال نفسه أخرج الأهلي من بطولة أفريقيا لما فاز عليه في مصر والسودان - وجيلبرتو أبو رجل خشب وصديقه إيفلينو اللي الأهلي اشتراه وكان عنده السل :lol: ( باتكلم جد) - فاكر الحكاية دي ياحاج - الأهلي اشترى لعيب عنده السل علشان جاب فيه جون :lol: كسبوا الأهلي 4/2 مع فريقهم على أرض استاد القاهرة برضه !!!!

وبعدين إحنا مش تالتين العالم زيكم كدة - بس والله حقيقي لعيبة الأهلي كانوا صاعبنين على لإنهم كانوا عاملين زي فراخ الجمعية البيضا - اللي بيحقنوها ميه علشان وزنها يتقل :lol: وبعدها لاتتحرك شمال ولا يمين !!

وبعدين أنا قلت برضه ياحاج إن الأهلي فريق مكسح بيلعب وسط مشاليل في مصر ودي حقيقة واضحة وضوح الشمس .

وارجع واٌقول الحمد لله إن الكرة كانت بتخبط في عصام الحضري كتير لاحسن فضيحة أفريقيا كانت هاتبقى بجلاجل !!

تم تعديل 25 أبريل 2007 بواسطة kokowawa1979

[se_ Elsyed]

عارف يا كوكو ... إنت زملكاوي مثير للشفقة .. أنا باتكلم جد .. وياريتك كنت زي هوبه أو موديست ... بتحب الكوره من اجل الكورة .. لإنك لو حبيت الكورة يا كوكو كنت هاتبقى شخص مُختلف وكنت سترى العالم بعيون موضوعية مُحايدة .. مش زي الزملكاوية العيانين ...

إستنى عليه هاجيب لك مقالة لواحد عيان من عنبر زملكاوية تي في كاتب فيها إيه

- النادى الاهلى المصرى سرطان الكره المصريه

حيث ان خلايا السرطان هي خلايا تنمو بسرعة كبيرة مما يجعلها تشكل ورمايظل ينمو علي حساب الجسد العائل له حتي يصل به الي التدمير الكامل فأن هذا ما نجده في واقع الكرة المصرية حيث نمي الورم الاحمر ودمر جسد الكرة المصرية

فوز نادى واحد بمسابقة الدورى العام لعشرة مواسم وسبعة مواسم على التوالى وتكرار فوزه بالبطولات بهذه النسبة المغوليه يؤثر من واقع التحليلات الرقميه على المستوى العام للمنتخب المصرى وهى معادلة متكرره فى كل بلدان العالم المتأخره كرويا.

وهو ما يثير العديد من علامات الاستفاهم والتعجب بلا اى اجابة واضحه .شراء النادى الاهلى لجميع نجوم الاندية الاخرى واحتكاره لمواهب اللعبة بين صفوفه لاجيال كامله يضعف من مستوى المسابقة فى مصر و التى لا تنتج لاعبا قادر على تمثيل مصر دوليا.

احتفاظ الاهلى بنجوم منتخب مصر بين صفوفه ورفضة لفكرة الاحتراف الخارجى ما هو الا تكريس لبطولات محلية واضاعة كل الفرص فى الوصول للعالميه .

لوووووووووووووووووووووووووووووووووول

بالذمة مش زملكاوي عيان ولا أنت شايف إيه ؟

فريق محترم عنده القدرة زي أي فريق عالمي محترم زي برشلونة اللي شاري لعيبة القارات لاستة أو ريال مدريد أو مانشستر .. وبيكسب وبيحقق بطولات كل عام .. ييجي يقول : لأ والنبي يا عبدو انا هاخسر قدام الفرق الغلبانة عشان مابقاش سرطان .. يادوب ممكن أبقى إنفلونزا او كُحه ... لوووووووووووووووووول

او بلاش كده .. هاسيب الزمالك يشتري بالعشر لعيبه في الموسم الواحد بملايين الجنيهات .. وانا أنزل ألم لعيبه من الشوارع والحواري وأنزل درجة تانية عشان أعج ..

تعالى لي على جنب بق ... الاهلي لما أتغلب يا كوكو من بيترو اتليتكو في 2001 4 -2 كان ماتش تحصيل حاصل وكان الأهلي يحتل به المجموعة وفاز بكأس الأمم الأفريقية في عامها .. وكان سبب الفوز .. ركز معايا الله لا يسيئك .. هو الثلاث نقاط اللي خدناهم لما هزمنا بيترو أتليتكو نفسه على أرضه في أول مباراة 3-1 وساعتها الأهلي مشي كويس في باقي مبارياته وضمن التأهل قبل ماتش 4-2 ..

ياريتكو تعملوا نص ما بيعمل الأهلي وتتغلبوا من طوب الأرض بس تكسبوا بطولة ولو الدورة الرمضانية لمركز شباب الحبانية

أما الهلال السوداني .. فلقد كانت النتيجة معقوله التعادل في القاهرة وواحد صفر هناك .. يعني ماخدوناش غسيل ومكوى ( أو في لغة الفرنجة .. دراي كلين ) زي ما عملوا فيكو 2-0 و 2-2 يعني بالصلاتو عالنبي 4 حتت في عين العدو ده غير التقطيع .

أما اللعيب اللي عنده السل إفيلينو .. فاهو على الأقل لعب موسم مع الأهلي ... مش زي نيسلون دي سوزا اللي جبتوه من على قهوة السواقين في لشبونة .. أو ساني كنج اللي جبتوه من حواري نيجيريا أو جونيور اللي قاعد في فيلا بالمعادي واكل شارب نايم تاخن لحد دلوقت ومالعبوش كلهم بتعريفه .. ولا نسيت كمان محمد باو .. وبابا أركو اللي لزقوا الزمالك لا مؤخذه على قفاه ومالعبوش 5 دقايق وعقدهم إنتهى وراحو وهما في مصر إحترفوا في أندية أخرى من غير مجلس إدارة الزمالك ما يعرف ... لوووووووووووووووووووووووووووووول

أما مستوى جيلبترو .... فأقسم بالله إن كثير ممن يفهمون لا مؤخذه كوره بيتمنوا يبقى عندنا باك او ونج ليفت مثله .. ولولاش الإصابة الخطيرة كنت هاتتفرج عليه في كأس العالم الأخيرة اللي وصلت لها أنجولا .. مين يا عم سمعني ؟ أنجولا يا كوكو اللي بيلعب لها فلافيلو وجيلبترو أبو رجل مسلوخه اللي مش عاجبينك ..

وعلى ما يبدو يا كوكو إنك كنت مسافر بره وما عرفتش إن الاهلي ما بيلعبش داخل مصر مع المشاليل ومرضى القلب فقط .. ولكنه بطل أبطال أفريقيا وإسمه بيزرع الرع في قلوب الأعداء قبل أن يستقل طائرتة الخاصة ليلاقيهم في عقر دارهم .. وكذلك فعلها في إشتراكه في بطولة العالم للاندية مرتين متتاليتين في سابقة لم يسبقه أي نادي على مستوى العالم إيه ...

عايزين نسجل الحاجات دي على شرايط أو سي ديهات عشان لما ترجع من مجاهل أفريقيا حيث لا زرع ولا ماء ولا دش ولا فيديون تبقى شتوفها وتعرف أخبار الأهلي ..

وبعدين هل ده ذنب الأهلي إن اللي حواليه مشاليل ؟

يعني عايزنا نلم من بعض ونجيب لهم اجهزة تعويضية ؟

ولما هما مشاليل إزاي المنتخب بتعنا دلوقت أنا بأعتبره في أحسن حالاته الفنية والثراء من حيث وفرة اللاعبين ...

أما خوفك علينا من الفضيحة .. فما تقلقش يا أخ كوكو .. لم يحدث منذ ان عرف تاريخ الإنسانية لعبة كرة القدم أن تم فضح فريق في مباراة ودية ..

لكن الفضائح اللي بجلاجل والجُرصة أم حناجل بتبقى في المباريات الرسمية زي فرق الفيصلية والهلالية والمحلاوية ...

شيلووووووه وهاتو اللي بعضه عشان يتشطف ...

[kokowawa1979]

سي السيد كتب :

عارف يا كوكو ... إنت زملكاوي مثير للشفقة .. أنا باتكلم جد .. وياريتك كنت زي هوبه أو موديست ... بتحب الكوره من اجل الكورة .. لإنك لو حبيت الكورة يا كوكو كنت هاتبقى شخص مُختلف وكنت سترى العالم بعيون موضوعية مُحايدة .. مش زي الزملكاوية العيانين ...

هاتجاهل الجزئية دي علشان خاطرك بس المرة دي يا س.س علشان العربية ماتطر طش على الغلابة اللي واقفين على الرصيف !!!

وطبعا إنت بتختار من الزمالك تي في الحتت اللي على مزاجك لكن الأمانة في النقل تقتضي إني أنقل المقال بالكامل وإلا هنبقى زي لامؤاخذة اللي بيقولول لاتقربوا الصلاة !!! لإن المقال ده بالذات جزء متكامل مع بعضه يعني ما ينفعش فيه قص ولصق - أو آخد حتة واسيب التانية !!! فليتك تتحفنا بباقي المقالة - حتى يرى باقي الإخوة هل كاتبها على حق أم عيان !!!

لو هانتكلم على اللعيبة - فمين قال إن إيفلينو لعب موسم كامل ؟؟ دول كلهم مباراتين وكان فيهم احتياطي ولما اكتشفوا إنه مريض بالسل - فنشوه بدري بدري !!

وياترى فاكر قصة جورج آرثر اللي خد المقدم وفك على بلده - وفاكر الواد صنداي اللي جاب لكم جون في ريال مدريد وماكملش بعدها - وفاكر كاستيللو اللي كانوا رجليه الاتنين شمال ؟؟؟

اللايحة طويلة من الأفارقة - ولو دخلت في المصريين مش هايكفي 5 توبيكات !!!

شيلووووووه وهاتو اللي بعضه عشان يتشطف ...

أنا طبعا ماٌاقدرش اقول لك كدة لإني ماشتغلتش ........قبل كدة :lol:

[Ahmad Farahat]

يا عم س.س سيبك انت.........

الفشل طول عمره على قلب الزملكاوية أحلى من العسل

تم تعديل 27 أبريل 2007 بواسطة Arsen loben

[kokowawa1979]

ربنا يخلليك لنا يا محمد يافاروق ومايحرمناش من أمثالك أبدا !!!!!!!!!!!!!!!!!!!!!!!!!!!!!!!!!

[Doofy]

===============================================================================

ياخوانّا الأهلوية محدش عنده فكره عن صفقت هوار العراقي ..؟؟؟

اللاعب داه معجزة ..!!!

:

:

[se_ Elsyed]

تم الإعلان مس عن قُرعة دور الثمانية لبطولة أفريقيا للاندية

مجموعة الاهلي

- الاهلي

- الترجي

-أسيك ميموزا

- الهلال السوداني

مجموعة قوية .. لكنني أرفض التهويل .. فمن يرغب في اللعب في بطولة كبيرة والعمل على الفوز بها .. فإما أن يكون كبيراً .. أو ليترك الأمر للكبار ..

ومنذ ان صعدت 7 فرق عربية لدور الثمانية وقلنا إنها هاتبقى بطولة نار ..

ولقد وعدت أخي النسر المصري بإن الهلال السوداني هايبقى في مجموعتنا .. وكنت جايب له النتيجة من الكنترول ... واوفينا وهدية من عندي كمان .. اول مباراة للاهلي هاتبقى أمام الهلال في القاهرة .... اظن مش ناقص إلا إني أقولكم إن النتيجة هاتبقى 3-0 للأهلي (2 فلافيلو .. وواحد ابو تريكه )

هـــا حد عايز نتيجة الثانوية العامة قبل الإمتحانات ما تبدأ ؟ :sad: