زراعة الطماطم بالحليب والسكر .

[kokowawa1979]

طبعا كنت أرغب في فتح هذا الموضوع منذ زمن - ولكن بعد أن قرأت موضوع الجبنه من بودرة السيراميك واليوريا قفز إلى رأسي موضوع زراعة الطماطم ( الشيري ) وهي طماطم أكبر حجما من حبة الكريز - وفي حجم أو أقل من الليمونة !!!

تتم زراعة هذا النوع من الطماطم بطريقة عضوية أي بدون أسمدة كيماوية أو مبيدات حشرية ( لأنها مخصصه للتصدير ) وثمار هذا النوع بزراعتها بهذه الطريقة تظل أكثر من شهرين في الجو الحار وخارج الثلاجة دون أن تتأثر .

هذه حقيقة لمستها بنفسي وشاهدتها على الطبيعة في الصيف الماضي .

والزراعة تتم بطريقة معينة بعمل شبكة من البوص بطريقة سبعات وتمانيات - ثم الربط بينها بسلك معين - ثم تزرع الشتلات أسفلها - ثم تتم تغذية الشتلات بمحلول أسباني معين ( في رأيي مثل خميرة البيرة مضاف إليها انزيمات ) وهي ليست بهرمونات لأن المحصول للتصدير فقط لأوروبا وبالطبع أوروبا لن تسمح باستيراد خضروات مهرمنه أو معاملة بمبيدات الحشرات . بلإضافة إلى الحليب الطبيعي والسكر .

قمت بعمل سي دي كامل لهذه العملية - ونزلت 4 أيام مخصوص لتصويرها في البداية - ثم حصلت على سي دي آخر لنهاية الزراعة وبدء التصدير

إنتاج الفدان الواحد يتراوح بين 20- 40 طن حسب نوعية الأرض .

سعر الطن 1200 يورو . ( 9600 جنيه تقريبا ( أي 280000 جنيه إنتاجية للفدان )

تكلفة الفدان حوالي 90000 جنيه ( تسعون ألف جنيه)

هذه العمليه حقيقية وليس فيها أي نوع من أنواع التدليس .

سأرفق لاحقا بعض الصور .

ها مين قال عايز يزرع بالحليب والسكر :flr1:

[se_ Elsyed]

في كام هايبر ماركت هنا .. باخاف أعدي من جنب الطماطم دي ( خفت اقول عليها قوطه أحسن يكون لها حد قريبها هنا وتزعل ) ... الكيلو بـ 30 ريال يابا ... اغلى من اللحمه .

بس قبل ما تشرب الطماطم بقى يا كوكو

لازم يكون هناك ترتيبات معينة للتصدير عشان الحاجات دي مش هاتمشي في مصر ...

يا عم روح .. إحنا لاقيين اللبن ولا السكر لما نسقي بهم الطماطم

[Folana]

السلام عليكم ورحمة الله

..

عايزة اقول معلومة بس لسى السيد...الطماطم الشيرى موجودة هنا فى مصر بسعر اقل بكتير من اللى بتقول عليه...ما اعرفش بكام بالتحديد لانى مش انا اللى باحاسب:flr1:

لكن متوفرة فى السوبر ماركت ..وفى محلات الخضر فى الاماكن الراقية...منها معبأ..ومنها بالكيلو

والجديد ان فيه طماطم صفيرة فى حجم وشكل البلح الاصفر السمانى..اسمها طماطم كابريزى

هذا للعلم وشكرا:flr1:

[kokowawa1979]

سي السيد كتب :

لازم يكون هناك ترتيبات معينة للتصدير عشان الحاجات دي مش هاتمشي في مصر ...

ماهو أنا كلامي كله إن الزراعة للتصدير وإنك مابتقومش بأي زراعة إلا بعد عمل عقود للتصدير - زأكبر دوله يتم التصدير لها هي أسبانيا - ولي صديق عزيز -يقوم بالتصدير للعام الثاني على التوالي .

على فكرة الطماطم مابتستخدمش للعصير - لكن الناس الهاي فاي ( حلوة قوي دي ) بيستخدموها مع التوست .

... الكيلو بـ 30 ريال يابا ... اغلى من اللحمه

يعني لما قلنا إن الكيلو ب 1,2 يورو ماغلطناش .

على فكرة ياسي السيد إنت لو اتفرجت على السي دي هاتنبسط بجد ويمكن تفكر تستثمر ال5 مليون ريال اللي معاك في العملية دي :flr1:

موضوع الحليب والسكر دي بجد مش بهزار - لكن لازم يكون حليب طبيعى مش يودرة سيراميك !!!

[kokowawa1979]

سؤالي للأخت الفاضلة فولانه :

كيف يتم استخدام هذا الصنف في مصر ؟ لإن في مداخلتي السابقة ذكرت كيفية استخدامه مع الخبز التوست بدلا من الجبن ,

وهل عليه إقبال ؟

[Folana]

السلام عليكم ورحمة الله...

الحقيقة هو بيستخدم فى حاجات كتير...وغالبا فى السلاطات...الخضرا او انواع السلطات الاخرى...وممكن يستخدم فى الطواجن ..بتضاف الطماطم كده سليمة ....وممكن تتخلل برضه...

وبتستخدم لتزين الاطباق ...لها كل استخدام الاكل العادى...حسب الحاجة يعنى...لكن طبعا لانها صغيرة الحجم فبيكون صعب استخدامها للطبيخ لكن مافيش ما يمنع..

طبعا ناس كتير بتستخدمها......وطالما هى متوفرة يبقى اكيد عليها اقبال..مع الوضع فى الاعتبار طبعا ان مش كل طبقات الشعب حتقبل عليها ....

لكن لها سوقها برضه...

[نانو]

ولها استخدام مهم ومفيد جدا

وهو انه لما يكون فيه حد من الاطفال مش بيحب الطماطم .....بيجذبه جدا شكل الطماطم الصوغنونه ديه

وبيعجب بيها وياكلها بنهم شديد لمجرد فكره صغر حجمها clwn:

[kokowawa1979]

ردودكم أسعدتني وادتني أمل إني ممكن أستثمر في 3 فدانين على الأقل - نخللي منها فدان للغلابة ونبيع الكيلو بربع جنيه علشان الفرا يحسوا إنهم عايشين وبياكلوا طماطم شيري زي الطبقة الهاي

ودي بعض الصور عن الموضوع

http://wawa79.jeeran.com/photos/180359_s.jpg

دي المزرعة في البداية

http://wawa79.jeeran.com/photos/180372_s.jpg

ودي أول طرحة

http://wawa79.jeeran.com/photos/180380_s.jpg

وده الشباب اللي يفرح اللي بيعمل علشان خاطر التصدير مش تقولوا الشباب الخنافس

http://wawa79.jeeran.com/photos/180382_s.jpg

ودي في الإعداد النهائي للتصدير

طبعا هاتقولوا دي مش شيري - لأ هي شيري بس الأرض عفية شويه . والكاميرا زووووم

والله الزراعة دي بركة وقرشها حلال على الآخر .

[نانو]

كوكو واوا

تسمحلي احيك تحيه كبيره جدا :wub:

انا لما شوفت الصور للمشروع ده وحسيت اني فخوره بيك كشاب مصري مجتهد وناجح بتوفيق ربنا وبتعمل حاجه صح لنفسك وبلدك

حقيقي ربنا يباركلك ....وكفايه انك زملكاوي وقلبك ابيض

[kokowawa1979]

أختنا الفاضلة نانو - شكرا لحضرتك على كلماتك الجميلة .

بس فيه ملحوظة صغيرة - الصور اللي حضرتك شفتيها دي لمزرعة صديق عزيز جدا لي - وهو الذي قام بالزراعة عامين متتليين - وهو يطلب منى كخدمة لي أن أقوم بزراعة 3 فدادين بالتعاون مع نفس الشركة الأسبانية التي تقوم بالإشراف على الزراعة والتصدير في نفس الوقت ( صداقة حقيقية بالفعل وعشرة عمر).

الصيف الماضي كانت أول زرعة - وظلت الطماطم بعد جمعها أكثر من شهرين بالحقل ( الطماطم المتبقية بعد الحصاد النهائي) وفي أشد درجات الحرارة ولم تتعرض للإنكماش أو الذبول نهائيا - وأخذت منها جزء لمنزلي استمرت مدة 3 أسابيع حتى أخذت جزء منها معي للإمارات .

طبعا موضوع الصلابة في الثمار وطول مدته هو ده سر تركيبة المادة المغذية ) ( الطبيعية ) .

المشكلة أنني متواجد خارج مصر ولابد من التواجد بصفة دائمة في حالة الزراعة بالحليب والسكر وهذا قد يحدث هذا الصيف إن شاء الله .

هناك فيلم فيديو كامل يشرح طريقة الزراعة خطوة بخطوة ولكن لإن الكاميرا من النوع الديجيتال فحجم الفيلم كبير ولا يمكن تحميله .

أحلى حاجة في المشروع ده إنك بتشوفي شباب يشرح القلب - مؤهلين علميا ومع ذلك لاييستحيون أن يقوموا بأي عمل يطلب منهم في المشروع - شباب يجعلك تشعرين أن المستقبل في مصر إن شاء الله بخير .

إن شاء الله سوف يتم توزيع صندوق من هذه النوعية على كل فرد من الزملكاوية بالمنتدى - ودي بجد مش بهزار - لأنه ستكون هناك عروة أخرى بمزرعة صديقي سيكون إنتاجها في بداية يوليو . بس سيبوا عناوينكم - وإن شاء الله نوصلها لحد عندكم هوم ديليفري :sad:

[Folana]

السلام عليكم ورحمة الله...

فعلا شىء مفرح ومشرف....ربنا يبارك لكم ويسدد خطاكم ...

الملاحظ فعلا ان الطماطم دى لا تفسد بسرعة...ممكن تفضل بالثلاجة فترات طويلة بدون تلف...

اسأل حضرتك انا بقى ....ياترى ممكن زراعتها فى جزء من حديقة منزلية؟...لان احدى السيدات الفاضلات سالتنى وقلت ارجع لك الاول

شكرا لك ...وبالتوفيق ان شاء الله

[se_ Elsyed]

إن شاء الله سوف يتم توزيع صندوق من هذه النوعية على كل فرد من الزملكاوية بالمنتدى - ودي بجد مش بهزار -

بيبببببببب بيبببببببببببب زمالك .... بيييييييييب بيببببببببببببب زمالك

يا زمالك يا هندسة .. طماطم من الصغيرة ولعب وهندسة

أخي العزيز كوكو ... محسوبك زملكاوي يكتم إيمانه لظروف امنية ... وعندي برضوا عمر إبني إسم الله عليه طالع لله في لله بيحب الزمالك ويا سلام عليه لما يقولي : يا بابي أنا باحب اونكل عبد المنصف وآبيه عبد الحليم علي لله في لله .. أما الولا علي فدماغه عامله زي الجزمة وما يحلالوش إلا لبس الأبيض في أبيض

( الحمد لله أعتقد كده كوكو هايقتنع وينفحني 6 صناديق * 20 كيلو * 30 ريال ونبيع ونعدي بقى بلا أهلي بلا وجع دماغ )

[kokowawa1979]

الأخت الفاضلة فولانه :

بالطبع يمكن زراعة هذا النوع في حديقة منزلية صغيرة - لكن الاختلاف في هذه الحالة سيكون في عدم استخدام الحليب والسكر لعدم وجود مادة الكومبليكس توب التي تخلط مع الحليب والسكر - ولكن سيتم الزراعة بطريقة تقليدية- ويمكن عدم استخدام الأسمدة الكيماوية - والاستعاضة بالسماد العضوي فقط - ويمكن زراعة الطماطم مثل الزراعة العادية - لكن يفضل عمل شبكة سلكية على 3 صفوف بين قائمين لتربية النبات عليها وهذه العملية تتحكم فيها المساحة المتوافرة للزراعة وهي تؤدي إلى زيادة الإنتاج .

يراعى شتل الطماطم أولا بوضع البذرة في في بوتس صغيرة بعد وضع البوتنج سويل في البوتس - ثم رعاية البوتس بعد الإنبات في منطقة شبه مظلله ( وليست مظلمة) حتى عمر 5 أسابيع ثم نقلها إلى الأرض المستديمة - لمدة 10 أسابيع وفي خلالها يتم جمع الثمار . وهي تظهر الحديقة المنزليه بشكل جميل أيضا عند ظهور الثمار .

في حالة عدم وجود بوتس ( كوب بلاستيكي صغير قطر 6 سم يقوم بنفس العملية لكن عند نقل الشتلات للأرض المستديمة يجب نقل الشتلة بالتربة فقط بدون الكوب .

معلهش صدعتك شوية) يمكن زراعة البذرة في الحديقة مباشرة لكن نجاحها غير مضمون مثل الطريقة التي ذكرتها ( طريقة الشتل ) خاصة في حالة وجود العصافير التي ستؤكل البدار أولا بأول !! ويمكن أن تحصلي على ثمار أيضا بدون أن تقومي بعمل الشبكة السلكية ولكن سيكون العدد محدود.

أعتقد أن بذور الطماطم الشيري تباع في كارفور - وقد تكون غالية قليلا - لكن يكفي عدد قليل من البذور للحديقة المنزلية حيث تكون المسافة بين النبات والآخر في حدود نصف متر إلى متر حسب المساحة المتوافرة .

سي السيد كتب :

أخي العزيز كوكو ... محسوبك زملكاوي يكتم إيمانه لظروف امنية ... وعندي برضوا عمر إبني إسم الله عليه طالع لله في لله بيحب الزمالك ويا سلام عليه لما يقولي : يا بابي أنا باحب اونكل عبد المنصف وآبيه عبد الحليم علي لله في لله .. أما الولا علي فدماغه عامله زي الجزمة وما يحلالوش إلا لبس الأبيض في أبيض

كلامك يا س . س بيموت الواحد من الضحك - اليوم النهاردة كان مشحون على آخره بالشغل وصدقني دي أول مرة أضحك النهاردة بجد . :sad:

عموما ياعم انت واخونا النسر المصري و داروين وأرسين وسحس ووائل ومحمد ميدو وتيتو - وبالطبع أخونا الاتحاداوي الكبير قلبا والأهلاوي قلبا وقالبا أبو محمد استثنا - وكل واحد فيكم برضه له صندوق .

(إن شا الله ماحد حوش هو من جيبنا ماهو كله هايكون من عند صديقي العزيز)

وكمان ماتنساش لك صندوق باباظ ده من مزرعتي بقى شخصيا لكن المشكلة أنا جايب صنف قلبه أبيض من جوة - ولما أزرع بطيخ أجيب بذرة البطيخ الاقرع لإن البطيخ الاحمر بيعمل لي حساسية .

الأخت الفاضلة فولانه - إذا كان لصديقتك مساحة معقولة داخل الحديقة فلتقم بزرع عدد من شجرات الباباظ فهو ناجح جدا وسريع الإنتاج وشكل الشجرة جميل جدا كشجرة زينه أيضا - علاوة على أن الباباظ مخفض للسكر والضغط - وثمرته ذات طعم جميل أيضا - وبذوره متوافره .

ودي شكل شجرة الباباظ المثمرة ( دي عندي بقى شخصيا .

http://wawa79.jeeran.com/photos/116298_l.jpg

تم تعديل 19 مارس 2007 بواسطة kokowawa1979

[se_ Elsyed]

تُشكر يا كوكو يابو الذوق ( اتاريك بقى هاتسرق لنا الكراتين دي من الجنينة اللي جنبك ... لكن وماله طالما صاحبك عارف يبقى خليهم 3 صنادديق )

وعلى هامش هذا الموضوع فلقد أصدرت الإدارة القرار الديكتاتوري رقم 320 لسنة ألفان وسبعمائة بعد المئة

" بهذا قررنا تعيين الأخو كوكو أبو واوا مستشاراً زراعياً أول بالمُنتدى .... وستكون أول مهامه هي فتح مواضيع تهتم بالزراعة في الأماكن المحدودة مثل حدائق الفلل أو اسطح العماير او البلكونات "

رُفعت الجلسة

[kokowawa1979]

سي السيد كتب :

أخي العزيز كوكو ... محسوبك زملكاوي يكتم إيمانه لظروف امنية ... وعندي برضوا عمر إبني إسم الله عليه طالع لله في لله بيحب الزمالك ويا سلام عليه لما يقولي : يا بابي أنا باحب اونكل عبد المنصف وآبيه عبد الحليم علي لله في لله .. أما الولا علي فدماغه عامله زي الجزمة وما يحلالوش إلا لبس الأبيض في أبيض

ربنا يبارك لك فيهم ويخلليهم لك وتفرح بعيال عيالهم إن شاء الله .

" بهذا قررنا تعيين الأخو كوكو أبو واوا مستشاراً زراعياً أول بالمُنتدى .... وستكون أول مهامه هي فتح مواضيع تهتم بالزراعة في الأماكن المحدودة مثل حدائق الفلل أو اسطح العماير او البلكونات "

اوعى تكون فاكر إنك بالمنصب ده ها تفرحني وأسيب لك إنت والأهلوية توبيكات الرياضة تستفردوا فيها بحبايبي الزمالكاوية ماهو منصب مستشار ده منصب زحلقة :sad:

لكن بجد فكرة جميلة ياسي السيد إننا كلنا نفتح توبيك لموضوع الزراعة المنزليه - موضوع بسيط جدا وسهل التنفيذ وأعتقد إن الأخوات الفاضلات هايكون لهم النصيب الأكبر في المداخلات بحكم اهتمامهن باللمسات الجمالية في المنزل .

ويكفي أنه لو لديك نباتات بالبلكونة وكنت متنرفز شوية في البيت ودخلت البلكونة المملوءة بالنباتات ( الزينة الحقيقية مش البلاستيك ) سوف تشعر بانسيابية وهدوء تعيد لك توازنك .

شاهدت برنامج منذ فترة على قناة العربية على ماأذكر وكان فيه خبر عن اهتمام المصريين بزراعة الحدائق المنزلية والبلكونات لتقليل تلوث البيئة - وفركت عيني أكثر من مرة من روعة ماشاهدت - لكن التركيز بالطبع كان على مناطق الطبقة الهاي لكن حاجة كانت تفرح القلب منظر الخضرة على جدران المنازل والبلكونات .

ترقبوا قريبا : زراعة الأسطح المنزلية بالفواكه والخضر بدلا من دكور البط

تم تعديل 19 مارس 2007 بواسطة kokowawa1979

[Folana]

السلام عليكم ورحمة الله ..

ياسيدى ربنا يبارك فيك ويكرمك..متشكرة جدا...حنشوف موضوع الطماطم وابلغك بالنتيجة...

نيجى لنقطة مهمة...شجرة الباباظ...فيه فعلا شجرة باباظ...بس بقالها سنة ولسه ماطرحتش ..كده يبقى عادى...بيقولوا علشان لسه ما اخدتش على الارض..

هل ده فعلا حقيقى...ولا يكون فيه عيب معين اخر ظهور الثمرة

سؤال تانى لو مش حاضايقك...حضرتك عارف شجرة المانوليا؟....بتطرح زهرة بيضا جميلة اسمها المانوليا...دى برضه بعد ما اتنقلت الارض بدأت تذبل...هل فيه طريقة معينة لريها..يعنى ميه كتير ولا مية قليلة؟

شكرا على وقتك وتعبك معانا

[kokowawa1979]

فولانه كتبت :

نيجى لنقطة مهمة...شجرة الباباظ...فيه فعلا شجرة باباظ...بس بقالها سنة ولسه ماطرحتش ..كده يبقى عادى...بيقولوا علشان لسه ما اخدتش على الارض..

هذه فترة طويله لشجرة الباباظ للإثمار - وأغلب الظن أنها شجرة مذكرة. لأن الباباظ يمكن أن يثمر قبل مرور سنه من زراعة البذرة .

وهناك طريقة بسيطة لمن يرغب في زراعة الباباظ عن طريق البذور وهو نقع البذور في وعاء به ماء - فالبذور التي تطفو على السطح تكون مذكرة - بينما التي تغطس في الماء تعطي أشجار مؤنثة عند زراعتها .

كذلك يمكنك ملاحظة ذلك في نوعية الأزهار التي تخرج من أبط الأوراق إذا كانت مؤنثة - وإذا خرجت بصورة واضحة في حوامل زهريه بعيده عن أبط الورقة تكون مذكرة ( الشجرة) .

سؤال تانى لو مش حاضايقك...حضرتك عارف شجرة المانوليا؟....بتطرح زهرة بيضا جميلة اسمها المانوليا...دى برضه بعد ما اتنقلت الارض بدأت تذبل...هل فيه طريقة معينة لريها..يعنى ميه كتير ولا مية قليلة؟

حضرتك تؤمري وسأرد وفق معلوماتي المتواضعة بالفعل - أعتقد أن موضوع نقل الأشجار أو النباتات من مكان لآخر يؤدي إلى حدوث خلل فسيولوجي مؤقت في النبات وهذا قد يظهر في صورة ذبول أو اصفرار بعض الأوراق وسقوطها وهذا راجع إلى نقل النبات من بيئة إلى أخرى - فإذا أضفنا غلى ذلك فترة الصقيع التي كانت موجودة بالفعل والتى تؤثر على نشاط النبات فيكون في شبه سكون - والنمو بطبئ - إلا أن كل هذه الظروف ستتلاشى مع الارتفاع التدريجي في درجة الحرارة وانطلاق موسم النموات الجديدة في آواخر مارس وطوال شهر أبريل .

كثرة الماء قد تؤذي النبات - لهذا ينصح بالري الخفيف شتاءا - وزيادة الري نسبيا في الصيف ويراعى الري في فترة المساء - لاستفادة النبات أكثر .

بقيت نقطة أختي الفاضلة - إجابتي تلاحطين محدودة لأن لنباتات الزينه أخصائيوها - بينما درست أنا علوم الأراضي .

لكن إجاباتي بالنسبة للشق الثاني هو المتعارف عليه في علم النبات -وأرجو من أحد الإخوة المتخصصين أكثر الإفادة بالمزيد

إذا استمر الوضع على ماهو عليه في موسم النمو فيمكن أخذ عينه من النبات وعرضها على أحد المختصين - فربما يكون النبات مصابا بأحد الحشرات مثل العناكب التي تؤدي لالتفاف الأوراق حول نفسها وكرمشتها - أو المن الذي يحول النبات أيضا للون الأصفر .

ليتك أخت فولانه تعطينا ملاحظات أكتر عما تشاهدينه من مظاهر على الأوراق .

لكن أغلب الظن أن الحالة هي حالة خلل فسيولوجي تحدث عادة للنبات عند نقله من مكان لآخر - وغالبا ماسيسترد عافيته أيضا سريعا .

[Folana]

السلام عليكم ورحمة الله ...

اخى الفاضل كوكوواوا..اتأخرت فى الرد سامحنى بس مشغوليات الحياة بقى....

كذلك يمكنك ملاحظة ذلك في نوعية الأزهار التي تخرج من أبط الأوراق إذا كانت مؤنثة - وإذا خرجت بصورة واضحة في حوامل زهريه بعيده عن أبط الورقة تكون مذكرة ( الشجرة)

كده اتضحت الرؤية...الشجرة مذكرة فعلا....بس السؤال هنا...هل فعلا شجرة البابظ المذكرة بتطرح؟...بيقولوا انها بتطرح بس ثمرة صغيرة من غير بذر...وبتاخد وقت اطول شوية الى ان تطرح....ارجو ان تفيدنى فى هذا الموضوع لو مافيهاش ازعاج لحضرتك...

بالنسبة لشجرة المانوليا..هى مش شجر زينة...دى بتعتبر من الاشجار المعمرة...والورقة كان عليها بقع بيضاء ناشفة...على اى حال انا عندى صورة لها حاحاول ارفقها لاحقا...

شكرا لاهتمامك...وياريت فعلا لو معانا احد الاخوة المختصين فى نباتات الزينة يفيدنا بأرائه لان هناك سئلة كتير جدا بتتعلق بهذا الموضوع...

[kokowawa1979]

فولانة كتبت :

كده اتضحت الرؤية...الشجرة مذكرة فعلا....بس السؤال هنا...هل فعلا شجرة البابظ المذكرة بتطرح؟

نعم أختي الفاضلة - الشجرة المذكرة تطرح ولكن في العام الثاني وليس الأول مثل الشجرة المؤنثة - وثمرتها تكون عادية مثل المؤنثة - إلا أن الشجرة المذكرة تموت في عمر 3- 4 سنوات - بينما يمكن قرط الشجرة المؤنثة بعد 4 سنوات على ارتفاع متر ووقتها سوف يظهر بجوارها 4-6 خلفات جديدة تعطى أشجار مشابهة للأم .

[kokomen]

مساء الخير كوكوواوا

فكرة جميلة زراعة الطماطم دي ..طبعا تتصدر لأوروبا لأنها مكلفة جدا جدا .. وهي زراعة علمية وبنسب معينة

مش عايزة عشوائية زي اللى عندنا زي ما انت فاهم .. اليابان طبقت الفكرة دي من زمان بطريقة مختلفة

وهي زرع النبات بوضع جذور النبات في أنابيب يمر فيها محلول مغذي بدلا من التربة ويتم ضبط نسب العناصر

المغذية عن طريق الكومبيوتر طبعا وتعتبر هذه الزراعة رائعة ومكلفة جدا ولكنها نظيفة بالطبع... شكرا

على موضوعك الرائع وياريت يطبق في مصر بدل عشوائيات الزراعة

أخوك أبو أحمد الاسكندراني :sad: :unsure: :unsure: