بتكتب لمين .. في محاورات المصريين

[se_ Elsyed]

ده سؤال موجه للإخوة الكتبانجية في المحاورات

عمرك سألت نفسك : إنت بتكتب لمين ؟

يعني في فئة او شريحة مُعينة عايز توصل لها افكارك وكلامك ؟

-----------

انا مابحبش اطرح اساله واستثني نفسي من الاجابة

- أنا بأكتب لنفسي .. لأن ما اكتبه هو صرخات بداخلي .. بالبلدي كده بأكتب لنفسي عشان مافرقعش من الغيظ

وبالتأكيد بأكون سعيد عندما اجد تفاعلاً من القراء

لكنني لا أحزن لعدم التفاعل .. والتمس كثيرًِ من الاعذار لمن يقرأ ولا يُعلق

يعني دي حاجه سريعة كده عالماشي

[إبن مصر]

والله يا سى السيد يا اخويا انت جبت المفيد..

انا عن نفسى بكتب فعلا تنفيث عما بداخلى ليتحول الكام الى تساؤلات للمحيطين اذا تجاوب معى الناس استفيد وازيد من خبراتى ..

واذا لم يستجيبوا اكون نفثت عما بداخلى..

الا القلييييييييييييل من المواضيع المتخصصه والتى اخاطب فيها اساتذتى فى هذا المكان او ممن يشاركونى البعد الفلسفى فى منطوق حروفى ومكنون كلماتها.

[The Professor]

اقول لسعادتك...

انا شخصيا لا اضع موضوع أو حتى اساهم بالرد على موضوع إلا إذا شعرت بأنه يمثل قيمة ويستحق ان يعلم به الجميع ... اما مسالة الردود والتعليقات فبلا شك تضفي على الموضوع اهمية وتعلي من قيمته وانا شخصيا اسعد لذلك , لكن ليس العكس , بمعنى اني لا احزن اذا لم ينل الموضوع الاهتمام المتوقع وبالتالي لا يحظى بردود معقولة .. فكما تفضلت هناك من الأسباب ما قد يجعل الكثيرين من قراء الموضوع لا يشاركون بالتعليق وانا شخصيا التمس الأعذار للآخرين لأن هذا يحدث معي شخصيا.

وموضوعك جميل وفكرته جديدة ومبتكرة وهذا ما نتمنى ان نراه دائما في محاورات المصريين.

[bentmasria]

يا سى السيد

هو يحنى ايه

الكتبانجية في المحاورات

اذا كنت تقصد فئة الادب والشعر فانا ممكن ارد بالجزئية اللى تخصنى وانا واثقة ان الكل حيلاقى الموضوع ده رائع وحيشاركوا فيه

سيدى الفاضل

الكتابنجية اللى غاويين يعيشوا فى الاحلام زى حالاتى يعنى اللى اتجاهاتهم ادبية واحلامهم يوتوبيا غير واقعية غالبا ما بتكون الكتابة مهربهم من واقع ما او تعبير منهم بلا قيود عن ذواتهم المكبوتة

بمعنى

كل منا يحيا بوجه يمارس حياته العادية بقيودها وهمومها والتزاماتها اليومية ومسئولياتها المجهدة وكلنا فى طاحونة الرزق ندور بلا هوادة ونحتاج الى لحظات لنلتقط فيها انفاسنا او لنمارس هواية قديمة اهملناها فى خضم السعى الطويل وراء اشيائنا الاخرى

نأتى هنا لنكتب

فى ركن هادىء حيث يتمنى الجميع الاستمتاع الراقى بلا قيد او شرط

حيث يكتب كل منا جزءا من احلامه بالصيغة التى يحبها وما اجمل ان يجد ان سواه يستمتع بها بل ويشاركه احساسة بالحروف ويرددها معه وربما نال استحسانا لم يكن ليتوقعه ولا تتخيل سيدى الكريم كم يزيد هذا من رضاه عن نفسه وثقته بذاته رغم انه يحيى جزءا ضئيلا ربما تخيل انه قد مات او اختفى فيه

وهكذا ايضا رأينا سى السيد ومواضيعه وقصصه الرائعة خفيفة الظل وغيره من المشاركين بكل الموضوعات الرائعة واللطيفه فى كل الابواب

اذن

انا اكتب لاستحسان جميل بين صفحات منتداى وايضا لهواية قديمة تسكننى ربما لم يتح لى فرصة نشرها الا بين ضفاف المنتديات وهدفى الاول هو رضاى وممارستى لهوايتى وما اجمل ان يزين هذا استحسان زملائى وتشجيعهم :wub:

شكرا للموضوع الجميل اخى الفاضل

[nora]

والله يا س س انت جيت على الجرح انا اغلب كتاباتي مش بيترد عليها بس عامة انا بكتب زي محضرتك قلت لنفسي علشان اطلع شحنه جوايا مهو مش يبقى قعده طول اليوم مع الاطفال لوحدي وكمان ملقاش حد اتكلم معاه فبتكلم عادي معاكم والله حد رد يبقى خير وبركه محدش رد خلاص اهو اسمو اتكلمت وطلعت الي جوايا والانسان بطبعو بيحب يتكلم ويحكي يحاور ويناقش فانا عن نفسي بتكلم معاكم انتي لان معنديش تيلفون :wub: وفاتورة الموبيل كل شهر بتبقى كارثه :wub:

والحاجه الاخيره بخفف كمية الكلام والمواضيع الي ممكن ازن بيها على جوزي :wub:

فجوزي نفسو يعملكم جواب شكر وامتنان :waving:

[أحمد رشاد شلبى]

السلام عليكم

موضوع حلو

بس أنا باأكتب علشان أنفس عن اللى جواى

الواحد منا بيعيش اليوم فى صراع دائم

الى أن يحين الوقت ويجلس أمام الكومبيوتر

زمان كنت باكتب فى أجنده أو كشكول

نقلتهم مع الجديد وأحاول أشترك بهم فى المحاورات

وأهو كله تنفيس ياسى السيد

لكن أنا ممكن أقولك على أطرف المواقف

التى صادفتنى فى المحاورات

يمكن حضرتك تتذكر ان توقيعى

فى بدايه إشتراكى كان

أحمد رشاد شلبى

رجل فى زمن الأنوثه

وبعدين لقيت الدنيا قامت والعواصف قامت

والزلازل والبراكين والثوره العربيه

والردود لقيتها كلها شتيمه من اللى قلبك يحبها

الواد ده شيعى 000

واللى يقول ده شنقيط من الكفار 000

واللى يقول لازم يطرد من المحاورات 000

وكثرت الأقاويل وأنا ساكت مش عارف أرد 000

أصلى خفت لتقوم ثوره فى مصر أو إنقلاب لاقدر الله

وأكون أنا السبب 000

وبعدين أنا قعدت أشرب قرفه بالجنزبيل 0000

وأنتظر الفرج 000

الى أن قام الأخوه الأفاضل مشرفى المحاورات بالرد

نيابه عن العبد الغلبان

المهم بدأت أتشجع وجلست والرعب يتملكنى أن

أقترب من الكومبيوتر وبقيت خايف وأرتعش أصل ممكن

واحد من اللى هاجمونى يعرف مكانى

ويفجر الجهاز عن طريق القمر الصناعى

ويتخلص من الراجل الشيعى ده

المهم بعد التقفيل على الموضوع

شميت نفسى وهات ياكتابه

وقلت أحلى رد عليهم إنى أكتب

بس ربنا مايوريك على اللى شفته أيامها

بقيت ماشى فى الشارع أتلفت حوالى شمال ويمين

ليكون فيه حد مراقبنى

والحمد لله إنكشفت الغمه

وباأكتب دلوقت براحتى ياسى السيد

بس فيه أمنيه لى ياريت تتحقق فى

المولد النبوى الكريم

وتكون انت الواسطه ياسى السيد

والنبى ياعم الله يخليك خليهم يرجعوا توقيعى تانى

وأنا مش هاأقول لحد خالص

ماشى ياعم

ولك تحياتى

أحمد رشاد شلبى

مصرى مسلم - لاينتمى للشيعه

تم تعديل 23 مارس 2007 بواسطة أحمد رشاد شلبى

[نانو]

هو الواحد يا س س بيكتب لعشارتاشر سبب كده

اولهم المشاركه ...اجمل احساس انك تلاقي حد بيشاركك فكرك احزانك همومك افراحك مشاكلك .... الاحساس ده في حد ذاته جميل

علشان كده التفاعل بيبقي مهم اوي...وحتي لو كان من اشخاص اعتباريه ما تربطش بينك وبينهم رابط حقيقي

تاني حاجه وديه الاهم ...احيانا الكتابه بالنسبه لي بتكون علاج خطير جدا وفريد من نوعه و هو الحل الاوحد كمان

زي ما تقول كده انقاذ حياه .....بأكون في حاله من الاكتئاب الشديد ومجرد ما اكتب وانشر ما أكتبه هنا تتحول حالتي

180 درجه .....لحاله من الهدوء والاتزان النفسي

واحيانا كتير اوي بتكتب وانت قاصد تفيد الناس بمعلومه او نصيحه ...عارف احساس انك معاك حاجه حلوه اوي وعايز تخلي اهلك يشاركوك فيها....ساعتها بتحسها بقت لها طعم احلي ...وتحس لو احتفظت بيها لنفسك تبقي بخيل ....

وانا للاسف اليومين دول مش عارفه اكتب.....و ديه اسوء حاله مرت عليا من يوم ما دخلت المحاورات

[inas]

والله الواحد بيكتب في الحاجه الي بيحس انه ممكن يقول فيها شيء

واوقات بفضل الصمت

خوفا من اشياء كثير

بس فعلا هو تنفيس عن مابداخلنا

هيبقى كبت في كل حته يعني :wub:

[أبو زياد]

أستاذى الجميل س س

ياريتك كنت سألت : بتقرا لمين ..

علشان كنت قلت : لحبيبى و أخويا سين سين

أول شىء وأعوذ بالله من قول أنا بادخل المنتدى علشان أقرأ و أستفيد ..دة أول شىء

أما لو كتبت ..بيبقى برضه علشان أقرا و أستفيد من الردود و المشاركات فى كل موضوع .

يعنى ممكن أسأل سؤال أو أثير نقطة و أستفيد من الإجابات عليها ..من الصغير و الكبير

ياريت ماحدش يقول على أنانى ..لكن إحنا مطلوب منا التعلم و التعلم حتى النهاية ..

وعلى فكرة ( حسب ردودكم السابقة ) شكلى أنا بس اللى بازعل لما ألاقى اللى كتبته كأنه مش مكتوب ..

كأنه هواء و ليس كلمات .. مع إنى عارف إن مافيش تجاهل لا سمح الله ..

بس يعنى بلاش أزعل والا إيه رأيكم ؟ شكرا لكم !!

[أسد]

أنا شخصياً أكتب .. معبراً عن نفسي ..... وعن أرائي ..

موجهاً كل كلامي لكل الناس ..

لمن يستطيع أن يستفيد من رأي .. أو وجهة نظر ..

[بنت النيل]

ده سؤال موجه للإخوة الكتبانجية في المحاورات

عمرك سألت نفسك : إنت بتكتب لمين ؟

يعني في فئة او شريحة مُعينة عايز توصل لها افكارك وكلامك ؟

-----------

انا مابحبش اطرح اساله واستثني نفسي من الاجابة

- أنا بأكتب لنفسي .. لأن ما اكتبه هو صرخات بداخلي .. بالبلدي كده بأكتب لنفسي عشان مافرقعش من الغيظ

وبالتأكيد بأكون سعيد عندما اجد تفاعلاً من القراء

لكنني لا أحزن لعدم التفاعل .. والتمس كثيرًِ من الاعذار لمن يقرأ ولا يُعلق

يعني دي حاجه سريعة كده عالماشي

اولا تحياتى لعمو سين سين :) :Al:

شوف ياسين سين انا بكتب لاعبر عما بداخلى من فرح من حزن من الم من فساد طاغى على الناس

وذى ما قلت انت كدا بالبلدى عشان مافرقعش من الغيظ

وايضا لعلا وعسى اقدر انى افيد الناس من ارأى وايضا اقدر استفيد من غيرى ومن وجهات النظر المختلفه

[Alshiekh]

بالنسبة لى ، فأنا أكتب كى أخرج مابداخلى من أفكار أو تعليقات على موضوعات الساعة أو موضوعات لى فيها رؤى شخصية ،

وأحيانا أكتب كى أبدى اعجابا بموضوع قرأته هنا، أو اذا كانت لى وجهة نظر أو تحفظ على بعض الآراء أو على الموضوع نفسه ،

أحيانا اكتب لأنقل موضوعا قرأته فى مكان آخر وأحببت أن تشاركونى فيه.

وأحيانا أكتب لاسداء النصيحة.

وأخيرا وبلاشك ، فكلنا يستفيد بشكل أو بآخر من المشاركة بالكتابة حيث يشاركه الآخرون تبادل الأفكار والمعلومات.

[Folana]

السلام عليكم ورحمة الله ....

والله يا سيد سى السيد انا عن نفسى مريت بمرحلتين مختلفتين وانا باكتب هنا...اول ما اشتركت هنا كنت بأكتب لنفسى فعلا...

وان كان نشاطى كله مركز فى المطبخ....بس كنت انا عايزة اكتب..وانا عايزة ابتسم فاكتب اللى يضحكنى انا وهكذا....

لكن دلوقت بأكتب لانى باحب اشارك الاخوة كلهم ارائهم ...واحب جدا استفيد ...وافيد ..وان كنت باستفيد اكتر...باحب وجودى معاكم

وباحس اننا فى صالون ثقافى ...نتبادل فيه الاراء ونسمع فيه كل الوان الطيف من المعرفه السياسيه والاجتماعيه حتى الفكاهيه بيبقى

ليها مذاق خاص سواء لما نكتبها او نقراها او حتى تكون فى كلامنا...

وربنا يجمعنا فى الخير دايما ...

:Al:

[عبده بيه]

العزيز سي السيد الجميل والكبير دايما

انا اول مرة اشارك في منتدي منذ ما لمست النت في عام 1997 ولاول مرة حسيت اني اعرفكم واحد واحد واننا دايما قريبين رغم الغربة والبعد لكن جوايا اننا قربيبن من بعض

انا بكتب لان حاسس اننا في نفس المستوي الفكري والثقافي والحضري وفعلا ممكن تكون تنفيس وممكن تكون لحب ربنا رزقني بيكم

تحياتي

[عادل أبوزيد]

هذا الموضوع أكبر و أهم من أن يوضع تحت الموضوعات الخفيفة.

عند كتابتى أمارس حقى و واجبى كمواطن أشعر أننى مقصر لو تأخرت فى الكتابة أكتب و أخاطب مجموعة من خيرة مثقفى مصر أعضاء محاورات المصريين و زوار محاورات المصريين.

أشعر أنى مسكون بنشر ثقافة النزاهة بنشر ثقافة النجاح و أشعر أن تفعيل ثقافة النزاهة هى الهم الأكبر للوطن و المواطن ، و أشعر أن هناك تقصيرا كبيرا فى نشر ثقافة النجاح.

و أؤمن أن الكتابة هى جزء من ممارسة المواطنة ... و أكاد أجزم أن كل من قال أنه يكتب لنفسه إنما يكتب من أجل الوطن.

فى مناسبات عدة شعرت أن كتابتنا هنا ليست مجرد صرخات فى وادى و لكنها تصل بصورة أو أخرى لمن يهمه الأمر ...أحيانا.

فى نفس الوقت لا أشعر أنى فى خصام مع النظام و لكنى و النظام و كل المصريين فى مواجهة شرسة مع ثقافة عدم النزاهة ....

لا أرى نفسى حالما و لكننى أرانى أحمل عبء المواطنة حيثما أسير ... و أرى أن ما يربطنى بالوطن شيء أكبر بكثير من العشق.

[khedr]

الكتابه والقرأه

...........................

...........................

الهواء والماء

..........................

.........................

بكل اشكال الهواء

وكل انواع الماء

[ابو محمود]

اما انا يووة نسيت ازيك ياسى السيد كلامك جميل زيك ومواضيعك دائما مشوقة وهادفة ودة اقل ما توصف بة

انا بكتب من غلبى اى واللة كلما اسير فى شوارع المحروسة اكتشف كبر المشكلة الناس مش عارفة تمشى ومتنكدين وعلشان كدة بالمختصر الحياة بقت كلها مشاكل وانعكست على سلوك الناس واصبحو مش طايقين بعض وانا زيهم مش طايق الكل يلهث فلا حلول ولاكن عندما اكتب فى المحاورات احس بانفراج فى صدرى وتقلص الضيق ويذهب عنى وكمان لما اطلع على مواضيع تهمنا نحن امة محمد اكون مندهش ارى حلول ولاكنى انزل فأرى انها لن تحل مادامت الكراسى يلزق بها جالسيها ربنا يفك عنهم كراسيهم ويجعلها بدون رجول الكتابةوالثقافة رئتان يتنفس بهم كل عاقل فى زماننا هذا يحارب العلم وتضمحل الثقافة ويحل مكانهم الفهلوة والفساد

[Ahmad Farahat]

لم أعد أدري لمن أكتب..........

هل أكتب من أجل نفسي؟

أم أكتب من أجل الآخرين؟

أم أكتب لأفجر طاقات حاولت مرارا كبتها؟؟؟؟

لكنني أكتب وأنتم تقرأون..........

ولازلت كاتبا............

مادمتم قارئين..........

,اشكر صبركم.........

[duha]

السلام عليكم ورحمه الله وبركاته

سؤال جميل

انا حتى الان لم اكتب ولم اشارك لاني لسه جديدة في المنتدى الجميل ده

تعرفو اننا في العراق النت كان ممنوع مثل اشياء اخرى كثيرة يعني انا حديثه العهد بالنت

وبصراحه هذا المنتدى سجلت فيه لاني كل ما احتاج شئ الاقي الاخ الكريم موديست منزله هنا

وبعد ما مررت باروقه المنتدى لقيته منتدى رائع فعلا والناس اللي فيه كلهم وبلا استثناء على قدر كبير من الوعي والثقافه

نجاوب على السؤال

انا لو كتبت هنا يبقى لاني احب ان اشارك اخواني في مصر واحس اني جزء منهم استفاد ويا رب افيد

لانكم بالفعل ناس رائعين

شكري واحترامي

[se_ Elsyed]

انا لو كتبت هنا يبقى لاني احب ان اشارك اخواني في مصر واحس اني جزء منهم استفاد ويا رب افيد

شكراً لمرورك يا ضُحى

بس الكلام مش كفاية

يعني مطلوب منك شوية مواضيع حلوه كده عن الاوضاع في العراق .... إوعي تقوليلي إنهم بيراقبو النت كمان دلوقت