بتكتب لمين .. في محاورات المصريين

[deemuck]

سؤال مباشر

من له أولوية الرد عندك في موضوع جديد:

المشرفون-الإدارة-الأعضاء القديمة-الأعضاء الجديدة؟

[se_ Elsyed]

سؤال مباشر

من له أولوية الرد عندك في موضوع جديد:

المشرفون-الإدارة-الأعضاء القديمة-الأعضاء الجديدة؟

بكل صراحة

لا أنظر لرُتبة من يرد ولكن اهتم بما يكتبه وأستفيد منه .

[se_ Elsyed]

طب هاسأل سؤال لولبي تاني في سياق الموضوع :

س : يا ترى إيه الطريقة اللي بتتبعها في الكتابة ؟ ( إختر من بين الأقواس .. أو تشوز بيتوين شو إسمه )

1- طريقة الجوهري ( 8-0-2 ) أي تأمين الدفاعات والاكتفاء بالمرتدات .. يعني اكتفي بإدراج مداخلات فقط على الموضوعات التي تروق لي .

2- طريقة مانويل جوزية ( 3-5-2 ) يعني أملا خط الوسط وأأمن دفاعاتي وهجوماتي وألعب بخطة متوازنة ... وبالتالي ساعات أكتب مواضيع خاصة بي وإن ماكانش تبقى مداخلات ...

3- طريقة هنري ميشيل ( 0-8-2 ) على أساس إن بعد عبد الواحد السيد ما أتصاب ما بقاش في حارس مرمى ولا دفاع ... وبالتالي أنا قليل لما أعمل مداخلات ولكن بادرمغها موضوعات مستقلة خاصة بي إنشالله لو منقولات .

4- طريقة الحاج حليم ( متفرجون لا مشاركون ) أنا يابا كافي خيري شري وبأشجع اللعبة الحلوه ولا لي مواضيع ولا مداخلات والمنتدى اللي يجيلك منه الريح ... شمعُه بالضبا والمفتاح وأستريح .

5- أنا لسه شبل وباحاول أنضم للفريق الأول ويبقىلي موضوعات ومداخلات وفلنات وشربات

[Ahmad Farahat]

أولا يا أستاذي الحبيب س.س..........

جوزيه بيلعب 3-4-3............

والخطة دي وسط ما بين 4-4-2 و3-5-2

هيه فيها الباكات بتاخد الخط كله يعني بتجري في مسافة 180 ياردة عكس 3-5-2 الباكات تسيعين والأجنحة تسعين..........

و4-4-2 برضه فيها باكات وأجنحة بس الباكات لازم يبقى ليها دور هجومي..............

ميزة خطة جوزيه إن فيها صانع ألعاب واضح زي 3-5-2

القصد...........

بالتأكيد أنا أفضل خطة جوزية ولهذا تجد مواضيعي في حدود المعقول ومشاركاتي في اللا معقول..........

بس بحاول على قد ما اقدر تبقى مشاركات مفيدة..........

مش شرط أقول فيها حاجة جديدة برضه..........

ممكن تبقى مشاركة لتشجيع عضو جديد مثلا...........

أهم حاجة إني على قد ما اقدر مبحبش حد يزعل مني.............

وبس يا سيدي

[لولا]

يا سى السيد

هو يحنى ايه

الكتبانجية في المحاورات

اذا كنت تقصد فئة الادب والشعر فانا ممكن ارد بالجزئية اللى تخصنى وانا واثقة ان الكل حيلاقى الموضوع ده رائع وحيشاركوا فيه

سيدى الفاضل

الكتابنجية اللى غاويين يعيشوا فى الاحلام زى حالاتى يعنى اللى اتجاهاتهم ادبية واحلامهم يوتوبيا غير واقعية غالبا ما بتكون الكتابة مهربهم من واقع ما او تعبير منهم بلا قيود عن ذواتهم المكبوتة

بمعنى

كل منا يحيا بوجه يمارس حياته العادية بقيودها وهمومها والتزاماتها اليومية ومسئولياتها المجهدة وكلنا فى طاحونة الرزق ندور بلا هوادة ونحتاج الى لحظات لنلتقط فيها انفاسنا او لنمارس هواية قديمة اهملناها فى خضم السعى الطويل وراء اشيائنا الاخرى

نأتى هنا لنكتب

فى ركن هادىء حيث يتمنى الجميع الاستمتاع الراقى بلا قيد او شرط

حيث يكتب كل منا جزءا من احلامه بالصيغة التى يحبها وما اجمل ان يجد ان سواه يستمتع بها بل ويشاركه احساسة بالحروف ويرددها معه وربما نال استحسانا لم يكن ليتوقعه ولا تتخيل سيدى الكريم كم يزيد هذا من رضاه عن نفسه وثقته بذاته رغم انه يحيى جزءا ضئيلا ربما تخيل انه قد مات او اختفى فيه

وهكذا ايضا رأينا سى السيد ومواضيعه وقصصه الرائعة خفيفة الظل وغيره من المشاركين بكل الموضوعات الرائعة واللطيفه فى كل الابواب

اذن

انا اكتب لاستحسان جميل بين صفحات منتداى وايضا لهواية قديمة تسكننى ربما لم يتح لى فرصة نشرها الا بين ضفاف المنتديات وهدفى الاول هو رضاى وممارستى لهوايتى وما اجمل ان يزين هذا استحسان زملائى وتشجيعهم

شكرا للموضوع الجميل اخى الفاضل

:angry: bngn:: bsh:)

[Dr Ayman Kamel]

السلام عليكم ورحمه الله وبركاته

سؤال جميل

انا حتى الان لم اكتب ولم اشارك لاني لسه جديدة في المنتدى الجميل ده

تعرفو اننا في العراق النت كان ممنوع مثل اشياء اخرى كثيرة يعني انا حديثه العهد بالنت

وبصراحه هذا المنتدى سجلت فيه لاني كل ما احتاج شئ الاقي الاخ الكريم موديست منزله هنا

وبعد ما مررت باروقه المنتدى لقيته منتدى رائع فعلا والناس اللي فيه كلهم وبلا استثناء على قدر كبير من الوعي والثقافه

نجاوب على السؤال

انا لو كتبت هنا يبقى لاني احب ان اشارك اخواني في مصر واحس اني جزء منهم استفاد ويا رب افيد

لانكم بالفعل ناس رائعين

شكري واحترامي

الاخوان والاخوات

اسجل اعجابى بالموضوع ونحن نكتب فقط من اجل مساعدة الاخرين ليكون فى ميزان حسناتنا ومن مصر قلبى مع اخوان واخوات العراق الشقيق الصبور ارسل لهم كل التحية من مصر التى فى خاطرى

[miramikhail]

موضوع حلو جدا...

أنا جديدة فى المنتدى و بيتهيألى زى ما قريت فى موضوع قبل كده أن لسة مش من حقى عمل موضوع و عامتا أنا عادتا مش بفتح مواضيع لكن بكتب لية:

1- عشان أقول رأى فى حاجات و مواضيع مهمه.

2- ساعات عشان أسأل فى حاجات.

3- ساعات بحس أن فية أمانة لازم الواحد ينقل خبراته ( يعنى على قدى كده ) للناس التانية.

4- لو حسيت أن فية مغالطة فى موضوع و مافيش حيدية .

و على رأى والدتى الله يرحمها أنتى ما تعرفيش تسكتى أبدا أنتى مالك بالموضوع الفلانى. :blush2:

[عبير يونس]

موضوع جميل كالعادة يا سين سين باشا

أنا باكتب للتواصل

يهمني الناس يشاركوني

و مش شرط انهم يوافقوني

بالعكس

باحب أشوف وجهات النظر المختلفة عن رأيي

بأحسها زوايا أخرى من الصورة

الكتابة بالنسبة لي نافذة على الحياة

الكتابة... ترتيب لأفكاري

الكتابة ... تنفس

الكتابة ... حياة

[hanzalah]

باكتب لله

يمكن يرضى عن ويغفر لي ذنوبي

يمكن تكتب حاجة تاخد بيها دعوة حلوة مستجابة

يمكن يكون لي صديق تلتقي منا الارواح والطباع

يمكن الاقي سطرين في كتابي يوم الدين ينفعوني

يمكن ينفعوا عيالي من بعدي

يمكن مصر تبقى احسن لو كتبت وقريت ما يكتبه اهل مصر

[الدكتور ياسر]

أكتب لله محتسبا ما أكتبه لوجهه الكريم

أبلغ عنه سبحانه ولو آية قد أنتفع بها يوم الدين

أبلغ عن رسوله صلى الله عليه وسلم راجيا أن تصيبنى دعوته لمن بلغ عنه ان ينضر الله وجهه.

أتواصل مع إخوانى في المنتدى فاستفيد من أفكارهم و خبراتهم.

أدافع عن الحق و أهله بأخلاق و ادب و كلام طيب .

أحاول ان أحسن صورة المسلمين التى أفسدها المفسدون .

أشكر الاستاذ س س على هذا الموضوع الجميل

تم تعديل 15 سبتمبر 2011 بواسطة الدكتور ياسر

[ام محمد]

موضوع جميل ولو انه قديم من اربع سنوات ..انا قليلة الكتابة في المنتدى ..مع اني كثيرة القراءة ...كتاباتي تعليق وابداء رأي ..معلومات ..بحب الناس تستفيد ..منها ..كلمة طيبة ..واحيانا دعاء لصاحب الموضوع ..احس بالراحة والانسجام ..عندما اتابع امور الناس في مصر ..انا بحب مصر جدا وحاسة اني اعرف اشياء كتيرة عنها ...مع اني لم ادخلها في حياتي ..بس بتمنى زيارتها ..المحاورات تحسسني اني عايشة بين اهلها ..و عاشت مصر في امان ...لانها ببساطة قائدة الامة العربية ولا يختلف على ريادتها للعرب اثنين

تم تعديل 15 سبتمبر 2011 بواسطة ام محمد