نحييكم من إستاد القاهره ( سابقا )

[drhouba]

إحترت و الله أكتب الموضوع ده فين .... فى محاربة الفساد و اللا فى الرياضه !!!!!!

الموضوع ببساطه هو ما كان يسمى بإستاد القاهره سابقاً و أقترح الآن على الأعضاء عمل مسابقه لتسميته أى شئ تانى غير إستاد !!

القصه ببساطه إن هذا المكان تم إنفاق حوالى 150 مليون جنيه لتجديده قبل كأس الأمم الأفريقيه فقاموا بتركيب كراسى من المصانع الحربيه ( مش مشكله ) ... و إختاروا لون سئ للتراك ( برضه مش مشكله .. أذواق )

الكارثه القوميه و الفضيحه اللى بجلاجل و الجرسه اللى بحناجل هى أرضية ما يسمى ( مجازاً ) بإستاد القاهره ... مفيش مباراه فى كرة القدم تقام عليه حاليا إلا و تتحول بقدرة قادر إلى مباراه فى التزحلق على النجيل ( إذا جاز لى أن أطلق عليه نجيل ) يتبارى فيها ال 22 لاعب بلا إستثناء فى الزحلقه و مين يقتلع كتله أكبر من الجرجير ( قصدى النجيل ) من أرض الغيط أو الملعب مع أقل حركه أو فرمله ... كل هذا يتم أمام أعين الجميع من مسئولين و جماهير سواء أمام شاشات التلفزيون أو فى الملعب .

و عندما يحدث ( نادراً ) كل 100 مباراه همهمات بسيطه من إعلامى واحد أو إتنين يطلع لنا سيادة اللواء المهيب قائد الإستاد بحجج كلها تموت من الضحك ... فخلال كأس الأمم و عندما كانت أرضية الملعب فضيحه عالميه و على عينك يا تاجر و كل ده و كان لسه فاتحين الملعب قال لك إيييييه ؟ : قال أصل إحنا فى شهر يناير و الدنيا برد و النجيل مش بينمو خصوصا بعد حفل الإفتتاح ....

طبعا الكلام ده من منطلق إننا فى مصر بنقع قرب القطب الشمالى و من منطلق إن المصريين لسه ما وصلهمش إختراع الدش و مش بيشوفوا ملاعب إنجلترا و فرنسا و أسبانيا و إيطاليا اللى بيقعوا على خط الإستواء و اللا حنروح بعيد ليه ملاعب السعوديه و الإمارات اللى عملت إفتتاح دورة الخليج أكبر 10 مرات من اللى عملناه فى إستاد القاهره و لم نشاهد هذه المسخره

و يطلع تانى يقول لك أصل المباريات كتير للأهلى و الزمالك و مفيش صيانه .... إذا كان الغيط إفتتحوه أساسا كده

و الكارثه إن كل ده أمام عين الجميع و مفيش حد من أكبر رأس فى الرياضه و الإعلام مكلف خاطره و يحس إن كده عيب فى حق شعب مصر اللى دفع من قوته و دمه 150 مليون جنيه و مفيش أى مردود فعلى ملموس قدامه بالعكس اللى قدامه مبررات تجيب ضغط الدم و السكر و البواسير .

و الواضح جدا إن مفيش حد حيتحرك و لا حتى حيتكلم لأن مفيش حد فاضى للمحافظه على المال العام أو سمعة بلد و منظرها أمام العالم الكل متفرغ لحروب شخصيه بحته و تصفية حسابات على الساحه الرياضيه و اللى مش عاجبه يضرب دماغه فى الحيط .

إحنا وصلنا لمرحلة إن مفيش حد حتى عايز يقول : :blink:

وحسبى الله و نعم الوكيل

تم تعديل 25 مارس 2007 بواسطة drhouba

[Ahmad Farahat]

أهي دي المواضيع اللي بجد.............

أحييك يا دكتور...........

[الحازم حسن]

المصيبة السودة ان برشلونة جاي يلاعب الاهلي يوم 24 ابريل

يعني الفضيحة حتبقى بالقمر الصناعي :blink:

[kokowawa1979]

حبيبنا الدكتور هوبا ( خللي بالك ياعم داروين باقول هوبا اهوه) - طبعا بالإضافة لموضوع الماس الكهربائي الذي حدث قبل مباراة الزمالك وحرس الحدود والذي كاد أن يؤدي إلى كارثة لولا لطف الله سبحانه وتعالى .

ده يوريك قد إيه الفساد منخور في البلد ومفيش حد بيحاسب حد لإن كله في الهوا سوا .

طبعا الملاعب في الخارج تعتمد على أحد أصناف بذور الحشائش حسب علمي التي يتم تشتيلها بطريقة معينة حتى تصبح على شكل بلاطة مساحتها مترا مربعا - ثم يتم نقلها إلى أرض الملعب المزمع إنشاؤه ويتم لصقها بالأرض مثل السيراميك - (لكن ليس بمادة لاصقة) ولكن يتم تجهيز الأرض بخلط السماد العضوي والرمل أو التربة بطريقة معينة - ثم دكها وتسويتها تماما ثم وضع البلاطات الطبيعية بالفعل ( وليست نجيل صناعي ) - ثم تبدأ الصيانة منذ لحظة الانتهاء من التركيب .

فهل هذا النوع يتم في مصر ؟؟ أغلب الظن أنه يتم في ملاعب جولف القاهرة الجديدة التي تتبع العائلة المالكة فقط .

وأغلب الظن أيضا أننا نقوم بزراعة أرض استاد القاهرة بالنجيل البلدي وليس ببذور البرمودا - لإن النجيل البلدى هو الذي يظهر في الشتاء مثل الرأس الصلعاء .

وأغلب الظن أننا نستخدم الأغنام والماعز في قص حشيش الملعب بدلا من المكائن لهذا تظهر أرضية الملعب منقرة ومحفرة !!!

[DARWEEN]

كوكوواوا كتب

حبيبنا الدكتور هوبا ( خللي بالك ياعم داروين باقول هوبا اهوه)

طيب أخدن بالي ... بس مش بعد ما صلحتهالك :blink:

نرجع لموضوعنا ...

من فترة طويلة وأنا أشاهد أرضيات الملاعب الأوربية وأنا أتعجب ماهو السبب الذي من أجله تكون ملاعبهم بهذا الجمال في الوقت التي تبدو ملاعبنا فيها وكأن قطيع معيز أو حمير خارج من الملعب بعد ما أكل الأخضر واليابس

[drhouba]

أهي دي المواضيع اللي بجد.............

أحييك يا دكتور...........

المشكله يا صديقى إن المواضيع دى ضاره جدا بالصحه و لا ينصح بها لذوى الأمراض المزمنه و مهما إتكلمنا و زعقنا و لطمنا ليل و نهار إيه الفايده مين حيرد علينا أنا نفسى أى مسئول من نوعية السيد اللواء القائد المهيب رئيس غيط القاهره الدولى يقع تحت إيدى و أوعدك إنى حأفرج عليه أمة لا إله إلا الله .... معلش أحلام يقظه .... شكرا يا أرسين على ردك المختصر و الجميل فى نفس الوقت

[drhouba]

المصيبة السودة ان برشلونة جاي يلاعب الاهلي يوم 24 ابريل

يعني الفضيحة حتبقى بالقمر الصناعي :blink:

المصيبه الأكثر سواداً إن من 5 سنوات لما ريال مدريد حضر للعب مع الأهلى و شاهد اللاعبون أرضية إستاد القاهره رفضوا النزول لأرض الملعب لأداء المباراه لأنهم لو تذكر حضروا مباشرة يوم المباراه و كادت المباراه ألا تقام بسبب هذه المهزله و نزلوا الملعب بعد ما إتحايلوا عليهم و نزلوا و لعبوا المباراه على مضض و رعب من حفر و مطبات الإستاد ....

و تمر السنين ....

و الحمد لله قمنا بصرف 150 مليون جنيه لتطوير غيط القاهره عشان كأس الأمم و خرج بهذا الشكل المخزى من تراك و مدرجات و لكن اللى زاد و غطَى أرض غيط الجرجير اللى زارعنها فى الأرض و حييجى برشلونه يشوف الخيبه التقيله اللى بمنتهى البجاحه بيوجدوا لها مبررات ....

أنا عاوز أسأل سؤال هى الناس دى مش بتتكسف على دمها ؟

[drhouba]

طبعا بالإضافة لموضوع الماس الكهربائي الذي حدث قبل مباراة الزمالك وحرس الحدود والذي كاد أن يؤدي إلى كارثة لولا لطف الله سبحانه وتعالى .

ده يوريك قد إيه الفساد منخور في البلد ومفيش حد بيحاسب حد لإن كله في الهوا سوا .

طبعا الملاعب في الخارج تعتمد على أحد أصناف بذور الحشائش حسب علمي التي يتم تشتيلها بطريقة معينة حتى تصبح على شكل بلاطة مساحتها مترا مربعا - ثم يتم نقلها إلى أرض الملعب المزمع إنشاؤه ويتم لصقها بالأرض مثل السيراميك - (لكن ليس بمادة لاصقة) ولكن يتم تجهيز الأرض بخلط السماد العضوي والرمل أو التربة بطريقة معينة - ثم دكها وتسويتها تماما ثم وضع البلاطات الطبيعية بالفعل ( وليست نجيل صناعي ) - ثم تبدأ الصيانة منذ لحظة الانتهاء من التركيب .

فهل هذا النوع يتم في مصر ؟؟ أغلب الظن أنه يتم في ملاعب جولف القاهرة الجديدة التي تتبع العائلة المالكة فقط .

وأغلب الظن أيضا أننا نقوم بزراعة أرض استاد القاهرة بالنجيل البلدي وليس ببذور البرمودا - لإن النجيل البلدى هو الذي يظهر في الشتاء مثل الرأس الصلعاء .

وأغلب الظن أننا نستخدم الأغنام والماعز في قص حشيش الملعب بدلا من المكائن لهذا تظهر أرضية الملعب منقرة ومحفرة !!!

إيه ده يا سيادة المشير يعنى موضوع النجيل ده مش سر حربى و لا حاجه ؟ ....

يعنى ممكن نبقى بنى آدمين زى بقية خلق الله و الموضوع مافيهوش إختراع ذرَه و لا حاجه

رحمتك يا رب

[drhouba]

من فترة طويلة وأنا أشاهد أرضيات الملاعب الأوربية وأنا أتعجب ماهو السبب الذي من أجله تكون ملاعبهم بهذا الجمال في الوقت التي تبدو ملاعبنا فيها وكأن قطيع معيز أو حمير خارج من الملعب بعد ما أكل الأخضر واليابس

و الله إنت طيب و إبن حلال يا داروين

كل ده و لسه بتسأل ما هو السبب فى الفرق بين ملاعب كل كوكب الأرض و إستادات المجرَه و حقول كرة القدم فى مصر

حأقول إيه أصل لو الواحد إتكلم حيقول كلام عيب ما يصحش .... الظاهر الواحد لازم يفضل ساكت و يخليه فى الزمالك و نادى القرن و خلاص أهو نفشُ غلنا فى أى حاجه و السلام

و السلام ختام

[النسر المصري]

خليني ساكت يادكتور والنبي لحسن اولع الاستاد باللي فيه فيهم والله..........هو فيه حاجة مش بايظة ف مصر....النجيلة ..والزرع...والماشيه....والنيل...والاهرامات...والسياحة...والتعليم.....والصحة.....والدستووووووووووور......

دستور ياخوانا....ياشيخ بلا قرف!!

[البحري]

عزيزي هوبا

هل فقط استاد القاهرة سابقا هو الذي في حالة يرسى لها وليس به اي منظر حضاري

ما هي اخر مرة ذهبت فيها للعلاج داخل مستشفى عام في مصر

وايهما اولى ان نحتج عليه شويه لعيبة يتنططوا في الملعب وياخدوا ملاين ام غلابة البلد الذين يموتون لعدم وجود دواء كافي

عجبي على الامة

[drhouba]

عزيزي هوبا

هل فقط استاد القاهرة سابقا هو الذي في حالة يرثى لها وليس به اي منظر حضاري

ما هي اخر مرة ذهبت فيها للعلاج داخل مستشفى عام في مصر

وايهما اولى ان نحتج عليه شويه لعيبة يتنططوا في الملعب وياخدوا ملاين ام غلابة البلد الذين يموتون لعدم وجود دواء كافي

عزيزى بحرى أولا أنا أساسا مغروس فى مستشفيات مصر لمدة 13 سنه قبل ما أطفش ( قصدى أسافر ) ....

الفكره إن غيط القاهره الدولى عملوا عليه بروباجندا قبل ما يفتحوه و البجاحه إن أى مذيع بيطلع فى التلفزيون بيتغنى و

يقول شعر فى جمال الإستاد من منطلق إننا كلنا محتاجين نروح لدكتور عيون .

الخدمات اللى بتحكى عنها زى المستشفيات و الذى منه حالها عدم من زمان و الكل معترف بكده و لكن الكارثه إنهم بيستعموك و

يوهموك بحاجه زى الزفت إنها تحفه و فخر لمصر و شغالين غناء و طرب على عظمة هذا الصرح الكبير اللى بيقرف

( قصدى بيشرُف ) كل مصر bnd5::

بالذمه مش حاجه تجيب شلل

تم تعديل 27 مارس 2007 بواسطة drhouba

[kokowawa1979]

الدكتور هوبا كتب :

بالذمه مش حاجه تجيب شلل

ألف سلامة عليك ياباشا .

ده احنا ننسف استاد القاهرة ده نسف علشان خاطرك - ونعمل الأرضية سيراميك على طريقة انسف حمامك بتاعة أبو العينين .

تجهيز الملاعب أصبح الآن يتم بطريقة علمية وغير مكلفة لإنك بتشتغل مرة واحدة وبعدين تنسى !!! المهم الصيانة الخفيفة الدورية - مثل عملية القص في موعدها - الري في المواعيد- التسميد وقت راحة الملعب من اللعب عليه - كلها حاجات روتينية - لكن احنا اتعودنا يادكتور نعمل الشغلة 20 مرة - خد عندك بطن الشارع يحفروه علشان خط المياه - وبعدين الأهالي تردم الحفر علشان الحكومة عليها الحفر بس - وبعدين يحفروه تاني علشان المجاري - ثم علشان التليفونات - ثم علشان ... وهكذا - باب السبابيب إذا اتفتح مايتقفلش bnd5:: وهذا مايحدث الآن مع استاد القاهرة !! مين اللي استلمه بعد الصيانة ماحدش عارف ( دخل المغارة بالسبوبة)

إديني ياعم الدكتور 100 مليون جنيه وسلمني ملاعب استاد القاهرة كلها واللي حواليها وهافرجك عليها هايبقى شكلها هايبقى إزاي - وبرضه هاسمسرلي ييجي 50 مليون جنيه - باتكلم جد :lol:

[النسر المصري]

عندي ليكم ياجماعة مفاجأة مدويه صاروخية قنبلية نووية متفجرية عنقوديه نسراويه أهلاوية دولية عالمية.....المافجأه تتعلق بموضوع الاستادات.....وبصراحة ماقدرش اقولكم عليها إلا بعد مرور ثلالثة ايام.........

(طبعا دكتور هوبا حبيب قلبي و عارف الحكاية دي من زمان.....بس ياريت مايفضحش الحكاية قبل ماكشف انا بنفسي القصه ايه)

فوتكم بعافية ياشباب

[drhouba]

عندي ليكم ياجماعة مفاجأة مدويه صاروخية قنبلية نووية متفجرية عنقوديه نسراويه أهلاوية دولية عالمية.....المفاجئه تتعلق بموضوع الاستادات.....وبصراحة ماقدرش اقولكم عليها إلا بعد مرور ثلالثة ايام.....

يا خوفى يا بدران يطلع زى إخواته :unsure:

(طبعا دكتور هوبا حبيب قلبي و عارف الحكاية دي من زمان.....بس ياريت مايفضحش الحكاية قبل ماكشف انا بنفسي القصه ايه)

أنا حأسكت بس بشرط عاوز صور كإثبات و دليل قاطع و ربنا يسهل لك و يوقفها لهم

[عبده بيه]

يا دكتور هوبه الموضوع فساد ولا نجيبلة الاستاد بسلامته

انا اري ان الموضوع زي كل المواضيع الحاليه مولد وصاحبه غايب اموال من قوت الشعب بتهدر في الجيوب الخربنة

بصراحه يا دكتور احنا الله يكون في عونا لاننا بتتفرجوا علي المباريات التي تقام علي ارض الاستاد سابقا

تحياتي للكباتن

[kokowawa1979]

عبده بيه كتب :

يا دكتور هوبه

صحصح ياعم داروين - قصدي صحح ياعم داروين :unsure:

[drhouba]

عندي ليكم ياجماعة مفاجأة مدويه صاروخية قنبلية نووية متفجرية عنقوديه نسراويه أهلاوية دولية عالمية.....المافجأه تتعلق بموضوع الاستادات.....وبصراحة ماقدرش اقولكم عليها إلا بعد مرور ثلالثة ايام.........

(طبعا دكتور هوبا حبيب قلبي و عارف الحكاية دي من زمان.....بس ياريت مايفضحش الحكاية قبل ماكشف انا بنفسي القصه ايه)

إلى النسر المصرى الثلاثة أيام مهله مرت و لم تظهر أى صور على المنتدى سلم نفسك مفيش داعى للمقاومه ....

الظاهر مكتوب علينا غيط القاهره الدولى للأبد و لا حول و لا قوة إلا بالله ..... لأ و إيه فرحانين قوى بكأس العالم للشباب ... هى العمليه ناقصه فضايح !!!

[drhouba]

يااااااااااااااه ..... الحمد لله عشت لغاية ما شفت غيط ينافس غيط القاهره الدولى .... غيط عمَان الدولى بيناطح غيطنا العظيم إن لم يتفوق

عليه بس هناك ميزه فيه إنه وصل للمرحله دى بالمجهودات الذاتيه دون صرف 150 مليون جنيه و خلاف و بذلك بالنيه الحلوه قدروا يحصلونا و

أظن ( و بعض الظن إثم ) إننا سنظل فى هذه المرتبه معهم لفتره طويله و ربما يدخل فى المنافسه قريبا ( إذا لم يكن قد دخل بالفعل )

إستاد مقديشيو

[ayman74]

السلام عليكم

الأخوة الكرام

موضوع الإستاد أو ما نعرفه بغيط القاهرة الدولي في بالي من سنين و كنت فكرت أبعث للصحفي الشهم إبراهيم حجازي لثلاثة ملاحظات

1- كراسي بلاستيك بدل الخرسانة الأسمنتية القديمة و دي نوعا ما تم حلها

2- الأرضية أو النجيلة و دي اللي تفضلتم بالكلام عنها

3- الإضاءة و دي نفسي أشوفها إضاءة موزعة دائريا بدل من أبراج الحمام عفوا قصدي أبراج الإنارة الأربع المركب فيها ييجي مليون لمبة !!!!

مرة سألت زميل لي كان يعمل مهندس كهرباء في الإستاد قبل ما يطفش يووووه قصدي يسافر و قاللي مينفعش يعملوا إضاءة موزعة دائريا زي بقية استادات العالم المتحضر و إن كنت أشك في إجابته !!!!

تونس الدولة الشقيقة عندها استاد رادس الدولي تحفة أوروبية!!!!!!! شوفوا النجيلة شوفوا الإضاءة الموزعة دائريا حول الملعب بدل أبراج الحمام الأربعة المسببة لأربع ظلال سوداء حول كل لاعب !!!!

إن شاء الله سأرسل إيميل للأستاذ إبراهيم حجازي و نرى ماذا يحدث

ممكن نعمل حملة إلكترونية لصيانة الغيط

لعل و عسى!!!!

ملحوظة: دا حتى لعبة الفيفا ملاعبها أحسن من غيط القاهرة الدولي :ninja: