عاش الزعيم المفدى أبو إيد فِرطه

[se_ Elsyed]

يا جماعة ماهو لازم نقعد مع بعض قعدة رجالة - الستات يمتنعون - ونشوف حل في الشعب المصري اللي بقى عامل زي القطط ياكل وينكر وبعد ما يتمرمط في خير الزعيم يقوم مهاجمه وعاضض الإيد اللي إتمدت له بالحنان والرعاية والهدايا

في خلال إسبوع قرات خبرين - اسود من بعض - يبعثوا الأم وبيبعتوا لنا رسالة من تحت الماء تدل على مدى ذوبان الزعيم المفدى في حب مصر وأبناء مصر ومحطة مصر - على فكرة ده فيلم ظريف بطولة كريم عبد العزيز عايزكو تتفرجوا عليه -

الخبر الإسود الأولاني وبعد إحتراق 300 منزل وتشريد لامئات من أهالي قلعة الكبش بالسيدة زينب تم على لافور نقل الأهالي لمساكن جديدة وكإن الدولة مكشوف عنها الحجاب وعارفه المصيبة التي ستحل بهؤلاء القوم الثكالى - على فكرة لازلت مُصر إن الأمر تم بفعل فاعل للإستيلاء على تلك الأراضي - وبما إن المساكن جديدة وعالزيرو فقد أمر السيد الرئيس المبجل بصرف تليفزيون ملون وبوتاجاز وثلاجة لكل أسرة وده طبعاص كادوه منه .

الخبر الإسود الثاني هانقله زي الجمهورية ما كتبته

-

مزرعة ومطار دولي .. هدية مبارك لأبناء أسيوط

أسيوط أحمد عمر :

قدم الرئيس حسني مبارك خلال زيارته لمحافظة أسيوط هديتين ثمينتين.. الأولي مزرعة وادي الشيح بالبداري علي مساحة 10 آلاف فدان تديرها شركة مساهمة بالاضافة الي مزرعة جاموس واغنام بطاقة 800 رأس. والثانية 34 مليون جنيه لتطوير مطار أسيوط الدولي تخصص لعمل مهابط جديدة ومبان إدارية.

أعرب المحافظ اللواء نبيل العزبي عن سعادته البالغة وتقديره العظيم للزيارة.. ووجه المحافظ الشكر للرئيس مبارك علي هديته لاهالي المحافظة.

شوفوا إنتو بقى مطار وجواميس وعجول لباني وخرفان بقرون وليه .. كل ده هايكلف الزعيم المفدى كام يا عالم يا جاحدة للنعمة ؟

الراجل قرب يبيع هدومه عشاننا وبقى يندين للي يسوى واللي ما يسواش والبنك الدولي واقف لنا عالباب بوصلات الأمانة اللي ماضية الريس على نفسه ومش عارف يسددها من كتر بلاويكو

فوقوا بقى وإصحوا وكل واحد يطس وشه بشويه ميه ويورح يوافق على الدستور ويقول نعم لمبارك ولأولاده من بعده ... ولا تهون علينا العِشرة والهدايا والعز ده كله وندي الراجل بمبه وندور على حد غيره ؟

صحيح صدق جدي سين الكبير لما قال " إحنا شعب ما نستحقش حكامنا .. والمفروض يغوروا من وشنا ويسافروا بره يدوروا على رزقهم بعيد عن وشنا العِكر "

[أبو زياد]

الخبر الإسود الثاني هانقله زي الجمهورية ما كتبته

-

مزرعة ومطار دولي .. هدية مبارك لأبناء أسيوط

أسيوط أحمد عمر :

قدم الرئيس حسني مبارك خلال زيارته لمحافظة أسيوط هديتين ثمينتين.. الأولي مزرعة وادي الشيح بالبداري علي مساحة 10 آلاف فدان تديرها شركة مساهمة بالاضافة الي مزرعة جاموس واغنام بطاقة 800 رأس. والثانية 34 مليون جنيه لتطوير مطار أسيوط الدولي تخصص لعمل مهابط جديدة ومبان إدارية.

أعرب المحافظ اللواء نبيل العزبي عن سعادته البالغة وتقديره العظيم للزيارة.. ووجه المحافظ الشكر للرئيس مبارك علي هديته لاهالي المحافظة.

والله أنا مازعلنى فى الخبر غير أسلوب كتابته المضحك ..

إنت متأكد إنه كان فى جريدة الجمهورية بتاعتنا .. يعنى اللى كانوا بيغنولها أخبار أهرام جامهوريا ؟

[Eemaan]

بما انها قعده رجاله ممكن بس يا س س ---لو سمحت من فضلك--- أعلق بسرعه وامشى؟

طيب

شكرا

se_ Elsyed كتب:

أمر السيد الرئيس المبجل بصرف تليفزيون ملون وبوتاجاز وثلاجة لكل أسرة وده طبعا كادوه منه

و مافيش غساله؟ يعنى الناس دى هتعيش ازاى من غيرها؟

شفت بأه انها غلطته.

se_ Elsyed كتب:

قدم الرئيس حسني مبارك خلال زيارته لمحافظة أسيوط هديتين ثمينتين

لا فعلا كرم ما بعده كرم...

كأنه بيصرف من جيبه علينا...

سؤال فى السريع كده...كان فى زمان قانون اسمه "من أين لك هذا" يا ترى لسه موجود و لا راح فى الوبا؟

اظرف حاجه سمعتها منه فى الحوار التليفزيونى اللى اتعمل له وهو فى اسيوط...

المذيع لما سأله عن رأيه فى الصعيد الأن و يا ترى من وجهه نظره في تغير حصله؟

رد عليه بأه فال ايه...

قال الصعيد دلوقتى ما فيش بعد كده بأه حاجه حلوه خالص...

يعنى زمان اللى كان يتعاقب يقوموا يودوه قنا ولا سوهاج لكن دلوقتى الكل يتمنى يروح قنا!!!

صحيح الكلام ده يا أهل قنا؟!

:blink:

[se_ Elsyed]

ده سؤال وردنا من بنتنا إيمان القاطنة بمحافظة جنا بتقول فيه

كان فى زمان قانون اسمه "من أين لك هذا" يا ترى لسه موجود و لا راح فى الوبا؟

وبإحالة السؤال اللولبي إلى السيد المسئول فأجاب طال عمره وقال :

ج : إبنتنا إيمان .. القانون لسه موجود يا ماما .. نامي وإطمني .. بل قامت الدولة مشكورة وبتوجيهات صاحب المقام العالي والبرج العاجي السيد الرئيس أبو علاء حفظه الله ورعاه وربنا ياخد عدوينه واللي بيكرهوه .. قام طال عمره بإضافة إرهاصات لهذا القنون في التعديل الجديد كالتالي "

مادة واحدة : إضافة قانون هانسمية " على فين يالا ؟ "

مادة إثنين : قانون إسم النبي حرصوا وهانسميه " إيه اللي جابك هنا يابن الـ ... توووووووت "

يبقى كده وفي عهده أطال الله عمره عندنا الكوليكشن كاملة وبقى عندنا قوانين " مين أين لك هذا وعلى فين يالا وإيه اللي جابك هنا يابن الـ "

وشكراً للمواطنة إيمان اللي معانا دلوقت تفاصيلها كاملة وسنقوم بإستدعاءها شخصياً لتوضيح روح القانون لها .. وإحتمال تطول عندنا شويه .

كان معكم محدثكم سين سين من امام مبنى أمن الدولة - لاظوغلي - أقليم الفتاح .

[واحد تاني]

الخبر الإسود الأولاني وبعد إحتراق 300 منزل وتشريد لامئات من أهالي قلعة الكبش بالسيدة زينب تم على لافور نقل الأهالي لمساكن جديدة وكإن الدولة مكشوف عنها الحجاب وعارفه المصيبة التي ستحل بهؤلاء القوم الثكالى - على فكرة لازلت مُصر إن الأمر تم بفعل فاعل للإستيلاء على تلك الأراضي - وبما إن المساكن جديدة وعالزيرو فقد أمر السيد الرئيس المبجل بصرف تليفزيون ملون وبوتاجاز وثلاجة لكل أسرة وده طبعاص كادوه منه .

عزيزي بابا ضياء ...

بس حبيت اعرف هي المساكن دي كانوا هيعملوا بيها ايه لو مكانش الناس بيوتهم ولعت؟

يعني دي كانت معدة لمساعدة الشباب الباحث عن فرصة للسكن لا سمح الله؟

والا مثلا اوعوزو بالله كانت مساكن شعبية هتتفرق على الغلابة الهوم-لس ؟

والشق التاني من سؤالي بعد ما تاووا فيها الناس اللي ولعت دي ... في خطة باك اب والا ايه الحياة؟

[kokowawa1979]

واحد تاني كتب :

عزيزي بابا ضياء ...

بس حبيت اعرف هي المساكن دي كانوا هيعملوا بيها ايه لو مكانش الناس بيوتهم ولعت؟

يعني دي كانت معدة لمساعدة الشباب الباحث عن فرصة للسكن لا سمح الله؟

والا مثلا اوعوزو بالله كانت مساكن شعبية هتتفرق على الغلابة الهوم-لس

المساكن دي دايما ماتظهرش إلا في وقت انتخابات - استفتاءات- زيارات للسيدة فيرست كلاس- أو زيارة لدولة الرئيس - وبعد مايخلص الغرض يتم طرد السكان شر طردة - علشان يرجعوا للصفيح مرة تانية !!!

بس طبعا ممكن يكون تساؤل سي السيد في محله - اشمعنى مكان قلعة الكبش اللي اتحرق !!

ممكن يكون فيه نية إن الإسم ماكانش عاجب الريس علشان بيفكره بحاجة معينة :blink: أو إن الابراج هاتبقى على ودنه !!!

وبعدين الراجل إذا رحرح إيده نزعل - وإذا عصرها نكون مبسوطين - هو احنا عاملين زي الشريك المخالف :friends:

[hassan777]

انتو فعلا مابتحمدوش ربنا انتو عاوزين اية الراجل بيعمل فيكو كل حاجة انتو بتشتكو من اية الغلاء يعنى دى ارزاق من الدروس الخصوصية انتو اللى مش بتفهموا انتو وولادكم من الامراض اللة هو الشافى علشان المياة ملوثة اشربوا ببس الهواء ملوث اكتم نفس اللى جابنا الاراضى الزراعية ملوثة بالمواد المسرطنة يااخى جوعوا ونام خفيف بطالة ماهى راحة لكم علشان ماتتعبش

[hassan777]

وانها فعلا شر البلية مايضحك

[se_ Elsyed]

بالمناسبة قرات خبر صغنننننننننننننننننون قوي أول إمبارح

حريقة تاني حصلت في نفس المنطقة ودمرت كذا بيت

إيه يا جدعان هو عتريس بتاع شيء من الخوف رجع تاني ولا إيه ؟

وبعدين رياح إيه اللي ما بتحرقش غير المنطقة دي بالذات ؟

إيه هي السيدة زيبن وقلعة الكبش أصبحت تقع في طريق رياح الخماسين المُحملة شعاليل النار ؟

وبعدين فين دور سيادة نائب دائرة السيدة زينب اللي بينجح بالتزكية ولا احد يجرؤ إنه يحلم ينزل الغنتخابات قدامه السيد اللواء الدكتور الترزي / فتحي بك سرور ؟

أنا خايف بيته يكون إتحرق هو كمان ؟

--------------

ورداً على سؤال الطالب واحد إبن تاني

بس حبيت اعرف هي المساكن دي كانوا هيعملوا بيها ايه لو مكانش الناس بيوتهم ولعت؟

يعني دي كانت معدة لمساعدة الشباب الباحث عن فرصة للسكن لا سمح الله؟

والا مثلا اوعوزو بالله كانت مساكن شعبية هتتفرق على الغلابة الهوم-لس ؟

والشق التاني من سؤالي بعد ما تاووا فيها الناس اللي ولعت دي ... في خطة باك اب والا ايه الحياة؟

ج : إبننا الغالي واحد تاني اللي بييجي الرياض وبيحلق لي ... ماهو لو إنت بتذاكر وبيتحرق دمك زينا وبتتفرج على نشرة تسعة عشان تخلص وتلحق تشوف أحداث 24 ساعة وبتشوف زيارات السيد الرئيس القائد المفدى يارب إحنا يموت عشان هو يعيش .. كنت شوفت زيارته إمبارح لقرية كلابشة بأسوان وهو قاعد بيشرب شاي مع مواطن أسواناني في بيته اللي الدولة مديهوله ومساحتة 200 م ولا مؤخذه زريبة ملحقه به وحاجة ولا في الأحلام وكله بلوشي من جيب القائد ..

أنا بأفكر أروح أسوان بدل الأوضه وصالة اللي مخنوق فهم أنا والعيال

عاش السيد الرئيس القائد غصبٍ عن سين سين وواحد تاني وكوكو واوا وإيمان وكل اللي يتشدد لهم

------------

بالمناسبة الأخت إيمان سألت : هو القائد ما صرفش غسالة ليه لولاد الكــــــ بش ؟

ج : إيمان يابنتي ... ليكي حق .. مانتي جيتي أيام الرُخص والسبهللة .. إنما لو كنتي عاصرتي زيينا طشت الغسيل بتاع نانسي عجرم وقعدتي عليه لما سلسلة ضهرك تطرقع ماكنتيش سألتي السؤال ده .. يا ماما ما هم صرفوا لكل واحد طشت غسيل وصفيحة يطلع فيها الغسيل اللي إتغسل ..

قوليلي بقى طب القائد ليه ماصرفش ديش ووشر أو على الأقل كيشتن ماشين أو حتى روب دي شامبر لكل واحد إبن كبــــ ش ؟

إيمان من فضلك إسألي أسألة تهم المواطن وترسيخ مبدا المواطنة وإلا هازعل منك

[أبو محمد]

موضوع مُغرض ، ومشاركات مُغرضة .. الهدف واضح وهو التشكيك فى الذمة المالية للكبير أبو ذمة أبيض من البفتة البيضة

لقد تحركت جميع الأجهزة المركزية (الجهاز المركزى ، والبنك المركزى ، والأمن المركزى ، والدش المركزى) للتحقيق فى الادعاءات الباطلة والهمز واللمز على الكبير .. وقامت بفحص إقرار الذمة المالية له .. والإقرارات الضريبية بتاعته ، وملف التأمينات كمان لمعرفة مصدر تمويل هداياه القيمة لأولاد الكبش وأولاد هريدى ...

ولقد وجدت كووووووووول الأجهزة المركزية إن الراجل عشان يقدم هذه الهدايا المتواضعة قام باستبدال خمسة جنيه من معاشه ... وإن التلاجة والبوتاجاز والتليفزيون والبهايم جايبهم بالقسط من شركة السعد ..

إهبطوا بقى وبلاش نق على رجل البر والإحسان

[Modest]

قلت ألحق أفكرك يا سين سين إن الزعيم المُفَدَّى أبو إيد فِرطة هايكون عندك في الرياض النهاردة الضهر علشان مؤتمر الإمة

عايزينك توَجِّب معاه واجب حلو كده علشان يعرف إن مش هو بس اللي إيده فرطة .. أه أمّال

صينية كبسة حلوة كده مشكّلة فراخ على لحمة و شوب عصير قصب على مزاجك

و أهم حاجة كرتونة حليب المراعي .. انت عارف الراجل معدته نشفت من لبن السيراميك bnd5::

و لو حبيت تقدم له وثيقة موقّعة بالدم بالموافقة على التعديلات الدستورية من المصريين المغتربين بالسعودية ، أنا جاهز بالفوتو شوب أضرب لك أحلى وثيقة :lol:

[se_ Elsyed]

يا أخ موديست حاسب على كلامك

وثيقة إيه اللي هاطرطشها بالدم دي؟

يابني طيلة الـ 26 عاماً ونيف لم يجعل الزعيم لدينا نقطة دم واحده .. والمواطن اللي كان مستخبي هنا أو هنا دمه بقى ملوث بما لذ وطاب من المسرطنات والمكبدات ( من فيروس الكبد الوبائي ) والمكللات ( دي مش مخللات ولكنها جايه من أمراض الكُلى )

صينية كبسة حلوة كده مشكّلة فراخ على لحمة

ما هو في واحد صاحبي كنت احسبه سيقف جانبي ويشيلني في تلك المحنة ويبعت لي قد 5 طلبات بيك وكنت زماني رافع راسي وسط مؤتمر القمة وانا اشايل صواني الأكل على راسي وداخل على ريسنا عشان يرم عضمه إللي يا عين امه هايفتقد الكوارع والعكاوي اللي بيضربها بالليل كل يوم قبل ما ينام .. إنما يا خسارة يا موديست طلعت عميل للأسرة السادسة بتاعت اخيناتون

أخونا أبو محمد

إهبطوا بقى وبلاش نق على رجل البر والإحسان

هو ده بينفع معاه نق ولا قر ... ده صنف جديد يابا مش لاقيي له حل ولا علاج ..

الأقيش عندك رجل زحلفه يتيمة او فردة صندل بتاعت عيل مولود بتلات رجول يمكن العمل المرة دي يحوق ؟

[Eemaan]

من جنا وسط غيطان الدره cld: ... نحب نوشكر سيادت المسئول الكبير أوى …اللى اكد وجود جانون 'منين لك كل ديه' ونجول لسيادته اننا فريحنا اوى باخواته و ربنا يزيد و يبارك ...

ما سبق كان استهلالا ملهوش لازمه

se_ Elsyed كتب:

مادة واحدة : إضافة قانون هانسمية " على فين يالا ؟ "

مادة إثنين : قانون إسم النبي حرصوا وهانسميه " إيه اللي جابك هنا يابن الـ ... توووووووت "

بالنوسبه للإرهاصات دى يا س س ....

بخبرتك الكبيره فى الملاعب هل تعتقد سيادتك --- مثلا يعنى مثلا--- واحد صاحى قبل الفجر من نومه وداخل الحمام يغسل و شه وبعدين عدى على المطبخ يعمل كوبايه شاى من غير سكر(عشان رخص طبعا) وراح نازل طوالى على شغله ...ياترى يجع تحت طائله إرهاصات التووووت و البييييب دى ولا؟ bsh:)

اهو سؤال يأكد مبدأ المواطنه عشان خاطر توجيهات سعادتك يا فندم ومايخلصناش زعلك خالص خالص :wub:

se_ Elsyed كتب :

بالمناسبة الأخت إيمان سألت : هو القائد ما صرفش غسالة ليه لولاد الكــــــ بش ؟

ج : إيمان يابنتي ... ليكي حق .. مانتي جيتي أيام الرُخص والسبهللة .. إنما لو كنتي عاصرتي زيينا طشت الغسيل بتاع نانسي عجرم وقعدتي عليه لما سلسلة ضهرك تطرقع ماكنتيش سألتي السؤال ده .. يا ماما ما هم صرفوا لكل واحد طشت غسيل وصفيحة يطلع فيها الغسيل اللي إتغسل ..

أوبببببس....لا كده عداهم العيب وأزح...

خلاص تنزل المره دى بناء على –- رغم ان الحديد غالى— توجيهات سعدتك يا فندن ;)

se_ Elsyed كتب :

قوليلي بقى طب القائد ليه ماصرفش ديش ووشر أو على الأقل كيشتن ماشين أو حتى روب دي شامبر لكل واحد إبن كبــــ ش ؟

يعنى ايه ديش ووشر وكيشتن ماشين دول يا أبيه ؟ شتومه دى و لا أيه؟

اللى اعرفه انه اتصرف ليهم روب دى طشت لزوم الغسيل …

و يجعل كلامنا خفيف عليهم :unsure:

[Eemaan]

واحد تاني كتب:

عزيزي بابا ضياء ...

بس حبيت اعرف هي المساكن دي كانوا هيعملوا بيها ايه لو مكانش الناس بيوتهم ولعت؟

يعني دي كانت معدة لمساعدة الشباب الباحث عن فرصة للسكن لا سمح الله؟

والا مثلا اوعوزو بالله كانت مساكن شعبية هتتفرق على الغلابة الهوم-لس ؟

والشق التاني من سؤالي بعد ما تاووا فيها الناس اللي ولعت دي ... في خطة باك اب والا ايه الحياة؟

اسمحلى يا بابا ضياء نطمن الأخ واحد تاني على الشباب الهوم-لس دول...

هما جالوا البلد مش هتعمل كل حادجه لوحديها... يعنى كل واحد يولع شمعه تجوم الدنيا تولع ونخلص...

وللإجابه على الشج التانى من سؤالك نحب نجولك انهم بيلموا من بعض عشان يشتروا جيراطين أرض يزرعوهم دره يتاويهم...

و يجعل كلامنا خفيف عليهم :wub:

[zedan]

اما أمركم غريب والله العظيم ، يا أخوانا كل واحد حر في بلده ، الراجل طلبت معاه يوزع فلوس ( فلوسة ) راج ماوزع ، طلبت معاه يغير الدستور ( دستوره براحته) هو حر.

[se_ Elsyed]

ياخوفي يا زيدان احسن يتعشى عشوة عكاوي تقيلة تقوم تطلب معاه يغير الشعب .. نصبح الصبح نلاقي هدومنا مرميه في الشارع وجايب بدالنا هنود -حُمر -

[واحد تاني]

اما أمركم غريب والله العظيم ، يا أخوانا كل واحد حر في بلده ، الراجل طلبت معاه يوزع فلوس ( فلوسة ) راج ماوزع ، طلبت معاه يغير الدستور ( دستوره براحته) هو حر.

ياخوفي يا زيدان احسن يتعشى عشوة عكاوي تقيلة تقوم تطلب معاه يغير الشعب .. نصبح الصبح نلاقي هدومنا مرميه في الشارع وجايب بدالنا هنود -حُمر -

ومالو يا اخي ... (شعبه) وهو حر فيه ... كان شعبك؟ :wub:

[zedan]

ياخوفي يا زيدان احسن يتعشى عشوة عكاوي تقيلة تقوم تطلب معاه يغير الشعب .. نصبح الصبح نلاقي هدومنا مرميه في الشارع وجايب بدالنا هنود -حُمر -

شوف بردة مافيش فايدة من الكلام ، اي شعب اللي بتتكلم عنه الشعب بتاع يوم الاستفتاء دة ، هههههه بتقول نعم علي اية ياحج قالهم انا لا اعرف دستور ولا أم الخلول حتي.... ال شعب ال إحنا عال عالبلد............. براحتك ايها الزعيم المفدي وافرطها كمان وكمان

تحياتي،،

[عبده بيه]

والله حرام اللي بيحصل في الناس ده

يعني مساكن وزرايب وجواميس واغنام وكمان مطارات هدية وبيوت وزريبة عز يا اخونا ومولد وصاحبه غايب انا عايز اعرف من سين سين هوه مين اللي بيفرق الخير ده كله

الهي يعمر بيته

ونور حياته

ويركب ،،،،،،،،،،،، زي الجواميس ولا مؤاخذة