معلومات اكتر عن الشركة وظروف العمل

[بنت من مصر]

السلام عليكم

معلهش يا جماعة انا رجعت كتبت الرد تانى فى موضوع جديد علشان نسيت شوية حاجات

أنا متشكرة جداً لكل الناس اللى ساعدونى بالمعلومات وأنا هكتب لكم كل المعلومات بالتفاصيل علشان تكون الاستفادة أكبر :-

1- أولا أنا عرفت الشركة دى عن طريق موقع توظيف أسمه www.bayt.com

2- صاحب الشركة نزل مصر وعمل معاية مقابلة سريعة جداً قالى فيها انها هتكون تأشيرة زيارة تجارية لمدة 3 شهور وبعد كده إذا أنا كنت شغالة كويس هتتحول الاقامة لعمل وإذا لم يكون خلاص ارجع مصر تانى ( لو ده حصل ممكن احول الاقامة بتاعتى على شركة تانية خلال الفترة القصيرة دى ولا إيه؟)

3- أسم الشركة security zones وهى شركة من مجموعة شركات ( عقارات و نظم معلومات وعلى ما أعتقد حديد أو حاجة زى كده ) وليهم موقع على النت بأسم الشركة الام أسمه www.lajeen.com وبداخل الموقع لينكات على كل شركة

4- المرتب حوالى 200 دينار زائد نسبة من المبيعات ( ده إذا كان فيه مبيعات أصلاً :lol: ) لانى شغلى هيكون

Sales & Tech. Coordinator

5- موضوع نسبة من المبيعات ده صح ولا لاء ؟ والنسبة دى بتكون كام % تقريباً من قيمة الخدمة المباعة لان دى شركة بتقدم خدمات نظم معلومات وليس سلعة ( وده حسب علمى طبعاً ) ؟

6- أنا مؤهل عالى ( كلية تجارة + خبرة أكتر من 10 سنين فى Admin. Assistant ) يا ترى المرتب ده كده معقول ولا إيه ؟

6- الشركة سوف تقوم بأستضافتى لمدة 10 أيام لغاية ما ألاقى سكن مناسب ( السكن من الـ 200 دينار بتوع المرتب يعنى المرتب هيكون حوالى 150 دينار )

7- يا ريت حد يكون عنده معلومات عن الشركة دى يقولى إذا كانت ذات سمعة طيبة وفعلاً شغالة كويس ولا لاء

8- أنا لسة لغاية دلوقتى ما جاليش تأشيرة

9- ممكن ألاقى سكن يكون الشركاء فيه مصريات بسهولة خلال الـ 10 أيام استضافة بتاعة الشركة ولا إيه ؟

10- هو الكفيل بياخد جواز السفر فعلاً ؟ يعنى لوحبيت أسافر فى اى وقت لازم هو يوافق على سفرى ؟

أنا فى أنتظار ردكم

فى رعاية الله

[وائل كيوان]

اختى الكريمة لقد قمت باخذ البيانات التى ذكرتيها وان شاء الله سوف اقوم بالانتقال الى الشركة واجمع عنها كل البيانات التى تهمك وسوف اعرف مدى جدية هذه الشركة من عدمة وان شاء الله افيدك فى الامر وخصوصا وانتى فتاة ولابد من الاهتمام بكى جيدا وانتظرى ردى ان شاء الله قريبا جدا

[elgamal]

النقطة رقم 10

طبعا بياخد الجواز

هنا مثلا فى السعودية لاقامة بتاخديها والجواز متشوفيهوش الا ساعه السفر

[بنت النيل]

الاخت بنت من مصر

شوفى نصيحه منى لاخت خايفه عليكى اقولك لا تحضرى بهذه الطريقة ابدا

بصراحة اكثر طريقة حضورك غريبه شوية وكمان لما قلتى على صاحب العمل ،، هو ايه اللى تيجى زيارة يشوف شغلك والكلام ده مش مظبوط

وكمان بالنسبة لانك تحولى اقامتك على شركة تانيه ده مش ممكن يحصل قبل مرور على الاقل سنتين على اقامتك لهذه الشركة وممكن كمان ما يقبلش يحولك وده من حقه لانه هو اللى احضرك فى بدايه الامر

اللى عوزة اقوله لكى ان طريقة حضورك هذه بالزيارة غلط جدا ده غير ان تجديد الزيارات دلوقت اصبح صعب

ده غير انك هتيجى زيارة تضمنى منين انه يديكى راتب فى الفتره دى وخصوصا انك قانونا ملكيش حاجه عنده

متزعليش منى انا بقولك كدا لانك بنت وبنت بلدى كمان يعنى لابد انى اكون خايفه عليكى يعنى الافضل انك تكونى جايه بفيزا عمل على طول مش زيارة واذا كان على الـ 10 ايام والله وبدون مجامله انا مستعده استضيفك ياستى عندى لغايه متلاقى سكن على الاقل تكونى فى امان تبلغينى بس انتى جايه امته

وعموما استنى برده رد وائل وشوفى هيقولك ايه

مع تحياتى

تم تعديل 29 مارس 2007 بواسطة بنت النيل

[بنت من مصر]

الأخ وائل والأخت بنت من مصر

أنا متشكرة جداً على النصيحة وعلى حرص الأخ وائل على السؤال عن الشركة أما بخصوص الحضور بتأشيرة عمل ده صعب عليا خصوصاً انى كنت ببشتغل فى جهة حكومية وأخدت منها أجازة بدون مرتب من فترة طويلة علشان أشتغل فى القطاع الخاص هنا فى مصر و الشركة دى اتحولت لقطاع أعمال عام يعنى اللائحة بتاعة العاملين أتغيرت لازم علشان أسافر الشركة توافق لى على السفر وتختم لى ترخيص العمل ولائحة الشركة الجديدة بترفض الاجازة للسفر للعمل بالخارج يعنى لازم أستقيل وانا مش ضامنة أنى ممكن ربنا يوفقنى فى أى مكان تانى يعنى أهى وظيفة محفوظة للزمن ومحادش ضامن الظروف علشان كده أنا وافقت على تأشيرة الزيارة على أساس انها مش محتاجة موافقة الشركة الحكومية .... والله يا جماعة أنا مش قادرة أخد قرار ومش عارفة اعمل إيه ساعات اكون متفاءلة وأقول يمكن أقدر أغير الوظيفة بوظيفة أحسن أو أحصل على وظيفة فى بلد تانية خالص على أساس أن أغلب الشركات اللى بعت لهم قالولى لازم أكون عايشة فى الخليج ( مش عارفة إيه الحكمة من كده ) وساعات أتشائم وأحس أن الامور مش هتمشى كويس ... يعنى فكروا معايا وقولولى أعمل إيه ؟

طيب أنا عاوزة أسأل هو لو طلبت منهم صورة من العقد بالانترنت موقعة من المسئولين بالشركة قبل ما أوصل الصورة دى ممكن تكون إلزام قانونى عليهم ... أنا معرفش قوى فى قوانين العمل والحاجات دى

أنا فى أنتظار ردكم

[برو]

بصراحة العرض مش كويس بالمرة لانك هتصرفي سكن واكل وشرب يعني لو ماسكة على نفسك هيطير نص المرتب ومش متناسب مع خبرتك خالص ففكري الف مرة وتحويل الاقامة مفيش لانك هتيجي كرت زيارة على الشركة فهتحولي اقامة ازاي وهيا مش موجودة من الاثاث