دستور المرور

[تيتو]

دستور المرور : من خرج من داره اتقل مقداره !

لو عربيتك كبيرة أو قديمة أستخدم المبدأ القانونى : اللى خايف على عربيته يوسع !

ملحوظة : ابعد عن سكة العربيات المخرشمة بيسوقوا بنظرية ضربوا الاعور على عينه !

البوز بيز Booze Base : اللى يدخل ببوز عربيته الاول للتقاطع هو صاحب أولوية المرور !

احرص على ان تكون صاحب أول بوز .

ملحوظة : لاتطبق البوز بيز مع أى لورى أو اتوبيس ، حرصا على بوزك لامؤاخذة

الإشارات تكشف نواياك للاعداء ، إياك أن تستخدمها !

لاتترك مسافة للامان بينك وبين السيارة التى امامك فهذا له عدة مخاطر :

أولا : عربية تانية حتملا الفراغ فى ثوانى وبرضه مايبقاش فى مسافة بينك وبين اللى قدامك ، كل اللى كسبته انك إتأخرت لورا شويه

ثانيا : حتدى فرصة للعيال يعملوا غرز قدامك

ثالثا : كل المشاه حيغمضوا عينيهم ويعدوا من الحتة دى

رابعا : اللى وراك حيقعد يزمر – لو كان مؤدب – أو تسمع شوية اسامى حيوانات لو كان سواق تاكسى – مؤدب - أو حيخبطك من وراء لو كان سواق ميكروباص

الإشارات مش معمولة علشان تنظم المرور ، معمولة علشان شكل الباد يبقى متحضر بس !

اعتمد على العساكر ( مع تحملك كامل المسئولية لو واحد منهم شاور لك تعدى وبلدياته الناحية التانية فتح السكة للورى ) أو يفضل أن تستعمل البوز بيز

اذا كنت مش واقف فى الصف الاول فى الاشارة اعمل حسابك تزمر بشكل متواصل وهستيرى أول ما الاشارة تفتح ، لأن الناس اللى قدام بيبقوا واقفين فى الاشارة من زمان وجايز جدا يكونوا ناموا

معظم الحوادث تحدث فى التقاطعات أول الاشارة ماتحمر ، كل ماعديت الاشارة الحمراء اسرع كل ما قلت فرصة انك تتخبط !

الشارع مكان مقرف ، سوق بأسرع ما يمكن حتى تتخلص من هذا الهم بسرعة ، الناس اللى ماشيين بالراحة مرضى نفسيين بيستمتعوا بالعذاب ، يستاهلوا اللى يجرى لهم .

من حقوقك الدستورية أن تركن امام باب المحل الذى تريد ان تشترى منه ، واذا سبقك واحد وركن قدام الباب فمن حقك أن تقفل عليه وتركن صف تانى او ثالث ، ومش مهم لو الشارع اتقفل ، ايه يعنى أما الناس تعطل عشر دقائق علشان سيادتك تستمتع بحقوقك الدستورية ! هى يعنى الدنيا طارت ولا كان وراهم الديوان ؟

من حقك ايضا أن تخرج من مكان انتظارك فى أى لحظة تشاء ، اكسر الدركسيون شمال واطلع ، أى حد ماشى فى الشارع لازم يقف لك فورا ، راجع البند السابق

إحترس من 3 أنواع من السائقين بيسوقوا وكأنهم مش ممكن يموتوا :

1 – العيال الروشين اللى بيلعبوا computer games وفاكرين إن ممكن يكسبوا life زيادة لو ساقوا أسرع .

2 – موتوسيكلات توصيل الطلبات Home delivery

3 – سواقين الميكروباص

ملحوظة : إوعى تحاول تثبت لحد منهم إن فكرته غلط . فاهمنى ؟

لما تشوف حادثة لازم تهدى وتتفرج - مش مهم تساعد – الحاجات دى دمها أخف من الاخبار المملة بتاعة التليفزيون ، وبعدين لما الطريق وراك يقف تحمى المجتمع من حادثة تانية .

منقـــــــــــــــــــــــــــــــول

تم تعديل 2 أبريل 2007 بواسطة folana

[Doofy]

==============================================================================

انت نسيت حاجة مهمه جدا يا اخ تيتو

ان بعد منتصف الليل الشوارع لا تخضع لأي نوع من انواع القانون وكل سائق حر في طريقة استخدامه لها

بس يا ريت الناس تتعظ :lol:

[وليد صفوت]

الموضوع منقول .... مش كده ؟

[تيتو]

بس مكنتش اعرف