الشيوعية .. هل تعود من جديد

[Bero]

سؤال بسيط ..

هل تتوقع عودة الشيوعية من جديد لمصر

خاصة في الظروف اللي احنا فيها ..

توزيع الشعب بين طبقتين .. طبقة فوووووووووق اوي .. وطبقة المعدومين اوي اوي

[أبو محمد]

الشيوعية انتهت عمليا فى جميع أنحاء العالم .. وإن كانت النظرية لازالت تعشش فى بعض الرءوس

[Bero]

الشيوعية انتهت عمليا فى جميع أنحاء العالم .. وإن كانت النظرية لازالت تعشش فى بعض الرءوس

هو ده السؤال يافندم

ممكن بعد ما انتهت في العالم كله .. تظهر في مصر .. كتيـــــار

بغض النظر عن كونها تعشش في رءوس البعض .. لان ده شئ وارد ان يكون في افراد مقنعين بنظريات .. حتى لو كانت مرفوضة

الفكر الشيوعي منتشر بنسبة مش صغيرة بين الشباب .. سواء مدركين ان ديه مبادئ الشيوعية اللي بتنادي بالمساواه بين افراد الشعب .. الى اخره .. وديه الطبقة المثقفة من الشباب .. اللي بتتطبق عليها القاعدة .. كل مبتفهم كل مبتتعب

او موجود بصورة تانية .. ممكن نقول مستترة .. بين الفئة التانية من الشباب

السؤال

ممكن الشيوعية - في ظل الظروف ديه - ترجع بصورة اقوى .. ويتبناها نسبة كبيرة من الشعب ؟

طيب لو ده حصل

ده هيكون تطور للاوضاع من سئ لاسوأ .. ولا أي حاجة هتكون أفضل من الوضع الحالي؟؟

[abaomar]

السلام عليكم

الاخوه الاعزاء جزاكم الله خيرا

لنحاول توضيح الامر اكثر ان ما يتم محاوله ترويجه بين الشباب الان ما هو الا الكفر و الالحاد و هؤلاء فى الواقع هما اول ما ارتكزت عليه مبادئ الشيوعيه على يد مؤسسيها ماركس و انجلز و صاحب ذلك النظريه الاقتصاديه فى سيطره الدوله و المساواه بين طبقات الشعب ( نظريه الصراع الطبقى بين البروليتاريا و البورجوازيه ) و التى ثبت فشلها تماما و خصوصا فى معقل الشيوعيه العالميه و انهيار النظريه بل و الدوله التى رعتها تماما .

الشيوعيه تنكر وجود الله و كل الغيبيات و يعتبرون الاديان افيون الشعوب و كل نظرتهم ماديه بحته و ان الاخلاق نسبيه و هى انعكاس لحاله الانتاج .

الزميل بيرو قلت (السؤال ممكن الشيوعية - في ظل الظروف ديه - ترجع بصورة اقوى .. ويتبناها نسبة كبيرة من الشعب ؟

طيب لو ده حصل ده هيكون تطور للاوضاع من سئ لاسوأ .. ولا أي حاجة هتكون أفضل من الوضع الحالي؟؟ )

بالطبع هناك حاجه واحده فقط هى التى سوف تكون الحل الناجح الناجع الا و هى العوده الى الاسلام الذى ارتضاه الله عز و جل لنا كمسلمين و كبشر على سطح الارض و الشيوعيه لن تعود بشكل او باخر لان تجربتها ما زالت ماثله للعيان و الكل شاهد فشلها

و كان منظر تحطيم سور برلين اخر مسمار تم دقه فى نعش الشيوعيه و رواسب الشيوعيين الذين ما زالوا فى وهمها لن يفيقهم الا الموت و اكتشافهم عندئذ كيف كان الوهم الذى يعيشون فيه .

[أبو محمد]

سؤال بسيط ..

هل تتوقع عودة الشيوعية من جديد لمصر

خاصة في الظروف اللي احنا فيها ..

توزيع الشعب بين طبقتين .. طبقة فوووووووووق اوي .. وطبقة المعدومين اوي اوي

فى عز عنفوان تبعية مصر للمعسكر الشيوعى ، وفى عز قوة التيار "الاشتراكى" لم تنتشر الشيوعية فى مصر .. لأن الشعب المصرى كان لا يزال على أصالته .. شعب طيب لا يؤمن بحتمية الصراع الطبقى .. شعب متدين بفطرته لا يقبل نظرية النشوء والارتقاء كبديل عن نظرية الخلق .. صحيح أن بعض شباب تلك الفترة اعتنق الأيديولوجية الشيوعية ولكنهم كانوا قلة لا وزن لهم لو جُمعوا كلهم ووضعوا فى أى حى من أى مدينة مصرية

هذا فى الوقت الذى كان أحد قطبى العالم يعتنق الشيوعية .. وفى الوقت الذى كان فيه حلف وارسو يقابل ويوازن حلف الأطلنطى ..

لذلك أستطيع أن أجيب على سؤالك بالنفى وأنا مطمئن ..

أيام زمان كان هناك صاحب مقهى كنا نلتقى فيه .. رجل طول النهار يسمع البرامج الإخبارية فى الراديو ويقرأ الجرائد .. لم يكن متعلما تعليما عاليا أو حتى متوسطا .. ولكنه كان رجل مثقف .. وكان بسيط بساطة ابن البلد ولكنها بساطة فى منتهى العمق .. وكان يحب الجلوس معنا كشباب جامعى نتبادل معه أطراف الحديث ونتناقش فى كل شئ .. وعندما ثار سؤال مثل سؤالك ، رد الرجل بمنتهى التلقائية :آه .. صحيح فيه ناس بتتكلم بالنحوى وكلامهم يخلى الواحد كإنه واخد إبرة بنج .. لكن .. طول ما الراجل مننا بيعرف يعشى عياله بنص جنى لا يمكن يبقى فيه شيوعية ..

ملحوظة : النص جنى "بالاسكندرانى" فى ذلك الوقت كان يكفى عشاء عائلة من خمس أو ست أفراد (فول وفلافل ومخلل وعيش)

[خليفة السلفي]

الفكر الشيوعي منتشر بنسبة مش صغيرة بين الشباب

لا اعتقد بانتشار الفكر بين الشباب

الشيوعية فكر فاشل و نظام افشل و معاه الاشتراكية و الراس المالية هتحصلهم

ولا حل لنا الا الاسلام

[amado]

يا ريت لما نيجى نتكلم عن الشيوعيه كشعب مصرى متدين , نترك البعد الدينى وهو ما لا نريد ان نخوض فيه , ولكن عندما نتحدث عن البعد السياسى فهناك منظور اخر مختلف.

فالفكر الاشتراكى كان هدفه تحقيق العداله الاجتماعيه بين الطبقات المختلفه , فما العيب فى ذلك ؟

ومن منا لا يريد تحقيق العداله الاجتماعيه , وهل هذا يتعارض مع الفكر الدينى سواء الاسلامى او المسيحى ؟!!!

وان كانت الاشتراكيه قد انهارت وفشلت فى وطنها الام روسيا ,

فهذا ليس معناه ان الفكره ذاتها سيئه ولكن تطبيقها هو السىء , فلا احد منا ينكر العنف الذى كانت تستخدمه الحكومه الروسيه الاشتراكيه ضد شعوبها وهذا ما ادى بالتالى الى انهيارها,

والدليل على ذلك ان دوله غنيه جدا جدا مثل السويد تطبق الفكر الاشتراكى وهو ما لا يعرفه الكثير عنها, وسبب نجاحها ( التطبيق السليم ) والبعدعن النقاشات الجدليه حول الدين.

واقول للصديق الذى كان يقول ان الاسلام هو الحل الامثل , وان الاشتراكيه فاشله وان الرأسماليه سوف تفشل ايضا ,ان هناك تطابق كبير بين الفكر الاشتراكى والفكر الاسلامى من حيث مبدأ العداله الاجتماعيه

ومن حيث وجوب مراعاه مشاعر ورعايه الفقراء .

فلا انسى حينما قال الشيخ الجليل ( القرضاوى ) ان هناك اتفاق فى بعض الافكار بين الاشتراكيه والاسلام اذا ما تركنا البعد الدينى على حدى.

وخلاصه الموضوع ان من الممكن ان نأخد ونطبق الفكر الاشتراكى بما يتماشى مع فكرنا الدينى , وبما لا يتعارض مع افكارنا وعاداتنا وتقاليدنا.

وشكرا

[خليفة السلفي]

فالفكر الاشتراكى كان هدفه تحقيق العداله الاجتماعيه بين الطبقات المختلفه , فما العيب فى ذلك ؟

فشل الاشتراكية بانها تخالف الفطرة الانسانية السليمة بحب التملك مع مساوته للناس مساوة غير عادلة

ثم انا عايزك تقارن بين القطاع العام و الخاص

القطاع العام باختصار يساوي فشل اهمال