الزمالك يودع دوري أبطال العرب على يد الفيصلي

[DARWEEN]

ودع الزمالك دوري أبطال العرب بعد أن تلقى هزيمة مفاجئة من ضيفه الفيصلي الأردني بهدفين لهدف يوم الثلاثاء في إياب الدور قبل النهائي على ملعب القاهرة الدولي، في لقاء شهد سبابا وهجوما من الجماهير البيضاء على فريقها.

وفقد الزمالك فرصة التأهل للمباراة النهائية للمرة الأولى في تاريخه، فيما صعد الفيصلي لمقابلة الفائز من لقاء وفاق سطيف الجزائري وأهلي جدة السعودي.

وتفوق الفيصلي في مجموع مباراتي الذهاب والإياب بنتيجة 2-1، بعد أن انتهى لقاء الذهاب في الأردن بالتعادل من دون أهداف.

تقدم الفيصلي بهدفين نظيفين عن طريق خالد سعد - المرشح للقب أفضل لاعب في البطولة - في الدقيقة السابعة، وحيدر الأمير في الدقيقة 23، قبل أن يقلص مهاجم الزمالك عمرو زكي الفارق في الدقيقة 80 من ركلة جزاء.

وشهدت المباراة هجوما عاصفا من الجماهير البيضاء على لاعبي فريقها بعد أن فشلوا في تخطي الفيصلي رغم التعادل في الذهاب بدون أهداف، وتذكرت جماهير الزمالك الخروج المرير من دوري أبطال أفريقيا على يد الهلال السوداني في استاد القاهرة قبل شهر كامل.

[النسر المصري]

لاتعليق....واللهم لاشماته....لكني اشفق على جماهير الكرة المصرية عامه..والزمالكويه خاصة....فما حدث بالأمس ماهو إلا استمرار لمسلسل السقوط ...والذي لن ينتهي سوى بارساء روح الاحتراف للاعبين والاداريين...!!!!

[Modest]

وتذكرت جماهير الزمالك الخروج المرير من دوري أبطال أفريقيا على يد الهلال السوداني في استاد القاهرة قبل شهر كامل.

يعني نقدر نقول إن ستاد القاهرة هو سبب الخروج المتوالي من البطولات ;)

[kokowawa1979]

لعيبة المفروض تودع الدنيا مش بطولة أبطال العرب !!!

شوية عيال روحهم ميتة - مفيش فكر أو أساسيات كورة

مدير فني متخلف حتى لو كان عالمي لإن اللي مايعرفش يقرا الملعب ويقعد زيه زي الكرسي اللي قاعد عليه مايستحقش يكون عالمي زي مابيقولوا !!!

عجبني طاهر أبو زيد في تحليله الراقي لما قال اللي بيحصل في الزمالك ده نتيجة اللي بيعمله حسن صقر في النادي - اللي فصل مجلس إدارة على مزاجه - مفيهوش واحد بيفهم كورة - ومش مقتنع بالشرعية .

والجمهور حقيقي كان معذور حينما هتف ضد حسن صقر لإن الجمهور واعي وعارف مين سبب البلاوى وعايز يدمر النادي - !!!

الزمالك بالطبع لايستحق أن يشارك حتى في البطولة بهذا المستوى الهزيل لمجموعة الأرانب المذعورة من أي هجمة تيجي عليهم حتى لو كانت من 18 الخصم !!!

لعيبة ليس لديها أي فكرة عن قتل هجمة الخصم بالضغط عليه - وتركه يجري كما يشاء جوة ال6 أو بره ال6 مش فارقة !!!

فليسقط تنابلة السلطان وليعيش الزمالك !!!!

[se_ Elsyed]

يعني أنا عايز أفهم حاجه

مش في أم باب إسمه أخبار نادي الزمالك ... يا داروين يا مُشرف يا

يا

يا أهلاوي ؟

ولا عايزييني أولع في الزمالك وممدوح عباس ومرتضى منصور في سجنه وفي محمد عبد المنصف :sad: ؟

---------------

كوكو أسمع الطقطوقة دي

تاني تاني تاني

روح المؤامرة تاني

والنار والعذاب .. من تاني .. من تاني

معاكم الاخ كوكو العمارنه من أمام ستاد القاهرة

حسن صُنقر ماله يا كوكو ؟

مش ممدوح عباس كان حبيبكو والممول الاول للزمالك ؟ فاروق يزيدي الممول .. مال الهوا يا أمه

يا سيدي الفاضل نادي الزمالك فيه فيروس غريب أشد فتكاً من فيروس إنفلونزا الفراخ وإسمه " فيروس إنفلونزا الكراسي "

حب وعبادة للكراسي بشكل غريب ..

وعلى رأي حبيبي الله يرحمه مرتضى ابو منصور لما قال : أنا عايز أعرف هو أسماعيل سليم مموت نفسه على كرسي نائب الرئيس ليه .. يكونش عليه سُكر ؟

لأ وشوف الحكمة جايه من مين ؟

عارف يا كوكو من إسبوعين كده سمعت حديث لإسماعيل سليم عن إستعداداته هو وعصابته لخوض الانتخابات اللي قربت تاني ومعاه شلة الأنس .. تاني .. عزمي مجاهد والمندوة الحُسيني ونفس الوشوش الحمضانة اللي جابت الزمالك ورا ...

مجلس إدارة ممدوح بأمانة يعمل إيه أكتر من كده ؟

فلوس .. وكل واحد خد حقه وزيادة ..

أستقرار ... وهو لا بقى فيه مطاوي ولا سنج

مدرب .. بصراحة ازمالك يا جماعة وبامانة بيجيب مدربين من الأخر لكن للأسف ما بيعرفش يستغلهم " فنجادا ، كابرال ، كرول ، اتوفيستر ، حتى جوز الست بوكير أهو عامل شغل هنا في لاسعودية مع فريق مغمور إسمه الوحدة في منطقة مكة المكرمة ودخل به المربع لاذهبي وأصبح مرعب للفرق الكبيرة وبيؤدي أداء عالي قوي "

لكن للاسف مرة أخرى وليست أخيرة

المدرب من دول يعمل شغل عالي وأرقام قياسية .. تبقى مكافأتة تسريحة وخروجه من النادي بفضيحة ونروح ندور على مدرب نص كم من أول وجديد زي كاجودا أو الجدع المجنون بتاع الموسم اللي قبل اللي فات اللي كان بيلعب حارس المرمى راس حربة .. والمدافعين كان بيسرحهم ببطاطا ...

ولنا رجعه والله يسامحكو

[kokowawa1979]

عم س . س أظن أنا قلت إن طاهر أبوزيد اللي قال الكلام ده - وأنا قلت هذا الكلام سابقا قبل طاهر أبو زيد !!!

وطاهر أبو زيد راجل بيفهم كورة - وعارف هو بيقول إيه مش كدة واللا إيه ؟؟ !!!

أما بالنسبة للمدرب الذي لعب بوائل جمعة راس حربة نص الدوري فده أعتقد كان جوزيه مش حد من الزمالك - يعني ماكانش دراجوسلاف !!!

منكم لله ياتنابلة السلطان خلليتوا الأهلوية يشمتوا فينا :sad:

ماوحشكش الزمالك تي في إنت وداروين hypr:

[DARWEEN]

يعني أنا عايز أفهم حاجه

مش في أم باب إسمه أخبار نادي الزمالك ... يا داروين يا مُشرف يا

يا

يا أهلاوي ؟

ولا عايزييني أولع في الزمالك وممدوح عباس ومرتضى منصور في سجنه وفي محمد عبد المنصف :lol: ؟

ياعم والله انت اللي فاهمني غلط ...

بقى ده خبر ينزل في أخبار الزمالك ؟؟؟؟ :sad:

أخبار الزمالك حسب ما اتعلمت بتكون .. واحد ضرب واحد برقبة قزازه .... واحد خبط واحد سنجه في رقبته wst::

وبعدين أوعى تولع في دول ... دول حبايبي ... أو على الأقل أستنى ماتش الأهلي وهما حيولعوا في نفسهم بنفسهم

أهو أنت اللي مشرف و ... و .... و أهلاوي

hypr:

منكم لله ياتنابلة السلطان خلليتوا الأهلوية يشمتوا فينا :lol:

ماوحشكش الزمالك تي في إنت وداروين :lol:

كده برضه يا كوكو ... أنا أشمت فيك ؟؟ دا أنت حبيبي .. اللهم لا شماته أنا كل اللي غايظني أنهم كانوا بيتخانقوا يلعبوا النهائي فين :happy:

وبعدين لمعلوماتك ... الزمالك تي في مغلق من كتر الشتائم وبيقولك مغلق للصيانه :lol: :lol:

[The Professor]

هذا الفريق بلاعبيه وجهازه الفنى وإدارييه اصبح لا يجدي معه إلا شيء واحد فقط وهو الإبادة بس بمبيد حشري قوي وفتاك ... وانا قاعد ابحث عن هذا المبيد الآن واللي هايخلصنا وللأبد من شوية النكدية دول..

[Ahmad Farahat]

بصراحة يا شباب..........

الزمالك بقى حاجة تقرف........

أنا والله العظيم ما مهتم ببطولة السلطانية وأنا هقول عليه السلطانية حتى لو لعب فيها الأهلي..........

بس ما ينفعشي..........

ما ينفعشي الزمالك يتغلب من الفيصلي وفي القاهرة وبالضربة القاضية.........

ووالله أنا ما شمتان.........

بس بصراحة.........

مش عارف أأقلكم إيه..........

[se_ Elsyed]

بمناسبة عودة دكتور هوبه من الاراضي الحجازية ... عايز اهديه المداخلة دي

فنظراً لظروف عائلية خاصة لما استطع متابعة مباراة الزمالك كلها ... وكل شوية العيال صحابي يتصلوا من القهوة ويسئلوني انا فين .... ملحوظة كلنا كنا اهلاوية ورايحين نشجع الزمالك ... من غير مزايدة

المهم قدرت اروح في نهاية الشوط الاول واذ بي اجدهم في حالة هيستيريا من الضحك من النتيجة المخزية

المهم قلت اتفرج على الاهداف بين الشوطين واضرب التحليل بتاع طاهر ابو زيد

والله يا جماعة ما ان انتهى الشوط الاول الا والاقي الواد صاحب القهوة - وهي من ادارة مغربية ومعظم اللي شغالين مغاربة - الواد جه وقفل الصوت بتاع جميع الشاشات الموجودة ... انا قلت يمكن هايتكلم في التليفون او في حاجة طارئة ... ابو زيد بدأ التحليل واعادتة الاهداف والصوت لسه ماجاش ... اخوكو سين سين اتجنن عالواد ورحت مزعق فيه عشان ييجي يشغل الصوت ... لقيت الواد وبشكل تلقائي انفجر في وقالي : عايز تسمع ايه ... جاتهم القرف .. دي فضيحة ؟

فقلت له انا من الاحرار يا كابتن بس جاي اشجع ولاد بلدي

المهم في الترابيزة اللي جنبي طول المباراة جالس واحد زملكاوي بس موتني على نفسي من الضحك ... الولد طول الماتش عمال يشرب بيرة هوليستون من غير كحول طبعاً وعايش في الدو وقدامه شوب قزاز والرغاوي عماله تنزل منه وخلص له ييجي 4 قزايز -يمكن كان عايز ينسى -... ورميت ودن كده وهو بيتكلم في الموبيل وعمال يقول لواحد بصوت باكي : مش هاتصدق ... تخيل مغلوبين 2-0 في الشوط الاولاني بس !!!!

المهم بعد الماتش قلت اواسيه واضحك معاه فروحت قايل له : معليش يا كابتن بيقولوا اللعيبه كان فكرهم مشغول بماتش صن داونز وبرشلونه .. لقيته ضحك وراح قايل الفاظ ياي ياي ياي على الزمالك واللي جابوه واللي بيشجعوه

ولاول مره اجد مشجعي كرة ادرنيين وكانوا طبعاً في منتهى السعادة وسمعونا ما نكره

ولم يسلم الامر من مناغشة اخويا وحبيبي وابن حبيبي موديست .. او رجائي لأخوه الاهلاو ي جداً الاكسلنس في مصر عشان يقف جنب اخوه وينتشله من الحالة المزرية اللي وصل لها

حقيقي جاتهم القرف لعيبه كسر

[drhouba]

حقيقي جاتهم القرف لعيبه كسر

إنت كده لخصت الموضوع و جبت من الآخر الله ينور عليك ... ده أنا حمدت ربنا إنى ما شفتش الماتش لأنى كنت فى الشارع بأحاول أتصل

بواحد صاحبى يدلنى على مكان قريب أشوف فيه الماتش و لكنى فشلت و بأفكر أبعت له بوكيه ورد و بوسه كبيره لأنه كان أحد الأسباب

اللى ما خلتنيش أشوف الماتش ما هو يا سي السيد يا حبيبى الواحد مش بيعمل عمره كل يوم عشان يضيعها بسهوله كده

[أبو محمد]

ألف حمد لله على السلامة يا دكتور هوبا .. وعمرة مقبولة بإذن الله

كده برضه ما يجيش فى بالك وانت بتدعى أمام الكعبة إنك تدعى لأهل بلدك إن ربنا يزيل عنهم الهم .... و ..... قهر الرجال

يا راجل دانا اتقهرت فى ماتش الذهاب بين الأهلى وصن داونز اللى اتعادلوا فيه بعد التقدم بهدفين ... أقوم يحكم علىّ الزمن إنى أشوف هزيمة الزمالك على أرض الكنانة

تعرف إنى افتكرت ماتش الأهلى وبيترو أتليتكو فى بطولة أفريقيا 2001 بتاع 4-2 وقلت أهى بتحصل فى أكبر العائلات .. بس ماتش بترو أتليتكو كان فى بطولة فاز بيها الأهلى فى النهاية .. إنما دى كانت خسارة بتأشيرة خروج بدون عودة

على العموم بيقولوا حيشتروا سبع تمان لعيبة الموسم اللى جاى .. كلام جميل .. بس بدءوا يتكلموا عن "إستعادة بشير" .. مما يعنى العودة إلى المربع رقم واحد اللى بدأ منه مرتضى .. تفتكر فيه أمل ؟

[kokowawa1979]

الكتور هوبا حبيبي

ألف حمدا لله على سلامتك ياغالي - عمرة مقبولة وذنب مغفور بإذن الله .

وأتمنى تكون دعيت لنا ( إخوانك في المحاورات بالستر والمغفرة) وعلى اللي يتشلوا يشوفلهم سكة تانية غير الزمالك - لإنها بحق صعب حتى تقول عليهم إنهم لعيبة كورة !! وماعندكش فكرة الأردنيين عاملين إيه هنا في الإمارات بعد مباراة الزمالك .

لكن افتكرت مقولة الملك بتاعهم عبد الله حينما قال لأولمرت رئيس وزراء إسرائيل :

إن عدونا وعدوكم واحد !!!!!! وفي الآخر اكتشفت إن هذا العدو هو الزمالك وانا مش دريان :P

[رمضان]

انا والله مش حارق دمي في الموضوع ده غير الاردنيين وكلامهم تحس انهم حرروا فلسطين طبعا كلام زي النشامى والابطال ولا تلاعبنا والكلام اللي يحرق الدم ده والله حرام عليكوا انا طول عمري مفيش حاجة ممكن تسعدني قد هزيمة الزمالك الا المرة دي فعلا اول مرة ازعل لما الزمالك يخسر

[drhouba]

على العموم بيقولوا حيشتروا سبع تمان لعيبة الموسم اللى جاى .. كلام جميل .. بس بدءوا يتكلموا عن "إستعادة بشير" .. مما يعنى العودة إلى المربع رقم واحد اللى بدأ منه مرتضى .. تفتكر فيه أمل ؟ mfb:

و الله يا أبو محمد إنت راجل طيب و إبن حلال زى معظم الشعب المصرى .....

الأيام بيننا و لا حيشتروا و لا حيعملوا حاجه هم بس باعوا إسم النادى و جماهيره فى سبيل التجديد سنه كمان لمجلس الإداره و كان

أملهم الفوز بالبطوله العربيه عشان يبقى فيه سبب أو أى إنجاز يغنوا له و لكن ربنا أفشل مخطط رئيس مجلس الشباب و تابعه بيسو على

رأى أخونا سى السيد .... أهو مرتضى اللى كان مبوظ النادى سايبه لهم من مده طوييييييله عملوا إيه .... ناس بتجدد بالملايين للاعبين

إنتهت صلاحيتهم من سنين زى حازم بس عشان العلاقات الجيده بين رئيس النادى ووالده مستنى منهم حاجه ؟

و لسه بتسأل فيه أمل ؟ .... مش بأقول لك إنت راجل طيب :rolleyes:

تم تعديل 23 أبريل 2007 بواسطة drhouba

[DARWEEN]

الأيام بيننا و لا حيشتروا و لا حيعملوا حاجه هم بس باعوا إسم النادى و جماهيره فى سبيل التجديد سنه كمان لمجلس الإداره و كان

لا حول ولا قوة إلا بالله

ليه كده يا طبيب ... بلاش نغمة اليأس دي :rolleyes: mfb:

بس كده ممكن يكون فيه أمل في العلاج بجد ... أصل أول العلاج الصحيح هو التشخيص الصحيح

يبقى الأهلي ( نادي المباديء ) بيشتغل صح وبيفكر يصح وبيخطط صح

معايا

ألحق يا كوكو واوا .... الدكتور هوبا باع القضيه wst:: wst::

[drhouba]

الكتور هوبا حبيبي

ألف حمدا لله على سلامتك ياغالي - عمرة مقبولة وذنب مغفور بإذن الله .

وأتمنى تكون دعيت لنا ( إخوانك في المحاورات بالستر والمغفرة) وعلى اللي يتشلوا يشوفلهم سكة تانية غير الزمالك - لإنها بحق صعب حتى تقول عليهم إنهم لعيبة كورة !! وماعندكش فكرة الأردنيين عاملين إيه هنا في الإمارات بعد مباراة الزمالك .

ربنا يخليك يا كوكو يا رفيق الكفاح و العذاب و عقبالك إنت و كل الناس الحلوه اللى بأموت فيهم هنا لأنها رحله رائعه

طبعا يا كوكو الأردنيين من حقهم يفرحوا و يعملوا اللى هم عاوزينه لأننا إداره و لاعبين و جهه إداريه اللى إدينا لهم الفرصه يمرمطوا بسمعتنا

الأرض .... و أنا شايف إن العقاب الأمثل للكباتن بتوعنا إنهم يتفرجوا على تسجيل لأهم كوارثهم الأخيره مره كل يوم و أعتقد لو فيه شوية

دم هم حيطلبوا من نفسهم يبطلوا كوره بدل ما يعتذروا للجماهير هم و الإداره بعد كل مصيبه .... على رأى اللمبى مفيش أفل

[drhouba]

لا حول ولا قوة إلا بالله

ليه كده يا طبيب ... بلاش نغمة اليأس دي wst:: wst::

بس كده ممكن يكون فيه أمل في العلاج بجد ... أصل أول العلاج الصحيح هو التشخيص الصحيح

يبقى الأهلي ( نادي المباديء ) بيشتغل صح وبيفكر يصح وبيخطط صح

معايا

ألحق يا كوكو واوا .... الدكتور هوبا باع القضيه wst:: wst::

أنا مش يائس من وجود حل لأنه موجود .... اليأس إن اللى فى إيدهم مقاليد الأمور عاوزين الأمور تستمر على نفس المنوال مش عارف ليه

الحل يا كوتش إنهم طالما مش عاوزين مرتضى بلاااااااااااااااش مرتضى يعملوا إنتخابات و اللى ترضى بيه الجمعيه العموميه حتى لو كان

مرتضى من وراء القضبان :rolleyes: يسيبوه يشتغل 4 سنين و الحساب يكون سنوى فى الجمعيه العموميه

الكصه بتاعة بيفكر صح و بيشتغل صح و بيخطط صح دى صح جوه النادى و بره النادى ( واخد لى بالك من بره دى )

أما موضوع المبادئ ده فلينا توبك نقفل علينا بابه و نشوف و نراجع بنود المبادئ المطروحه للمناقشه هناك عشان صوتنا ما يصحيش الناس

اللى فى المنتدى mfb:

[DARWEEN]

الكصه بتاعة بيفكر صح و بيشتغل صح و بيخطط صح دى صح جوه النادى و بره النادى ( واخد لى بالك من بره دى )

تاني نظرية المؤامرة يا دكتره !!!

طيب قولتم الدوري المصري بتاع الحكومه الأهلويه ... قلنا ماشي ... قلتم الأتحاد الأفريقي بتاع الأهلي ... قلنا أوكي ... بس الأتحاد العربي كمان النتيجه كانت فيه صفرررررررررررررر ... طيب نعمل لكم أيه ؟؟

وبعدين سبق وقلنا ... اللي متغاظ مننا ... يعمل زينا mfb: wst::

أما موضوع المبادئ ده فلينا توبك نقفل علينا بابه و نشوف و نراجع بنود المبادئ المطروحه للمناقشه هناك عشان صوتنا ما يصحيش الناس

طيب ما احنا ممكن نعمل لينك هناك .... ونجيبه هنا wst:: wst::

أنا بس بأفكرك بموضوع المباديء ... والله ما تزعل مني ... خلي قلبك أبيض زي فانلتكم يا كابتن wst:: wst::

بالمناسبه ... مش واخج بالك أن باقي أقطاب الزمالك في المحاورات مختفين من هنا .... لا أسكت الله لهم حسا :rolleyes:

[kokowawa1979]

داروين كتب :

ألحق يا كوكو واوا .... الدكتور هوبا باع القضيه

ياعم داروين علشان خاطري ماتحلمش كتير :rolleyes: الظاهر إنك ماعندكش فكرة صحيحة عن الزملكاوية - وإدمانهم لإسم نادي الزمالك !!!

إنت لو لاحظت هاتلاقينا بننقد النادي وبشدة - أكتر من الأهلوية نفسهم - لإن عيب علينا نبقى شايفين الغلط في النادي ونقول عليه صح !!

المشكلة إن الحكومة ( قول زي ما إنت عايز إننا بنؤمن بنظرية المؤامرة) هي اللي وصلت النادي للمرحلة دي لإن التجربة الديموقراطية لم تكتمل باستكمال رئيس منخب شرعي لمدته القانونية كم قال أخونا هوبا - وبعد شهرين بدأ التخبيط فيه - سواء أكان على حق أم على باطل !!!

نرجع لموضوع التوبيك قلنا سابقا أن الزمالك بهذا المستوى الهزيل لايستحق أن يلعب لا في بطولة العرب أو أفريقيا - يعني لم ندافع عن الزمالك ونقول أن الحكام كانوا ضده مثل حكام مصر !!