Otv تعرض منذ قليل فيلماً به مشاهد جنسية صريحة

[autoscriptor]

نفس الفيلم يذاع الآن .... حد سمع عن مصطفى بكري والاستجواب بتاعه ولا لسه؟

[صـــــقـــــر]

فعلا الفيلم ده اتعاد امبارح وانا باقلب بالصدفة لقيته

الفيلم شاهدت منه لقطات .فيلم مقزز ويقرف

ربنا يهدى القائمين على هذا البلد الذى يبدوا انه يتجه نحو الهاوية بسرعة كبيرة

[autoscriptor]

أعادوا ذات الفيلم مرة أخرى اليوم بعد صلاة الجمعة، ولكني لا أعرف هل قاموا بحذف مشاهد العرى أم لا تماشيًا مع الوقت المبكر للبث أم لا.

[رمضان]

انا مش شايف مشكلة

ما كل واحد حر فيه اختراع دلوقتي اسمه ريموت كنترول واللي مش عاجبه يغير المحطة لا بلاش يغيرها يلغي القناة بالمرة من على الريسيفر او فيه حل تاني اني يختار القنوات المحترمة واللي بيتباعها ويحذف باقي القنوات

هوه اعتراض وخلاص

انتوا عارفين من بعد الموضوع ده انا اعتقد ان عدد مشاهدين القناة زاد وانتوا كده عملتوا دعاية كويسة للقناة

[شينكاوي]

يا جماعة انا اول مرة اسمع عن القناة دي وبلاش دعاية غير مقصودة للقناة الفاسدة دي

حد ممكن يقولي الفيلم ده هيتعرض تاني ولا لأ وامتي امتي امتي

انا هدور الريموت عليها علي طول

طبعا بهزر

الاخلاق يا جماعة في انحدار بسبب هؤلاء رجال الاعمال الذين ظهروا في غفلة ولا نعلم مصدر اموالهم يا جماعه ربنا يستر علي مصر

حد يقولي الفيلم هيتعرض امتي تاني :blink:

[صـــــقـــــر]

انا مش شايف مشكلة

ما كل واحد حر فيه اختراع دلوقتي اسمه ريموت كنترول واللي مش عاجبه يغير المحطة لا بلاش يغيرها يلغي القناة بالمرة من على الريسيفر او فيه حل تاني اني يختار القنوات المحترمة واللي بيتباعها ويحذف باقي القنوات

السيد المحترم

المشكلة ان صاحب هذه القناة مصرى والطقم كله مصرى خالص ..وكمان غير مشفرة يعنى متاحة للجميع فى اى وقت غيرالقنوات المشفرة اللى مليا الدش او على الاقل مش على النايل سات اللى معظم الناس مشغلينه

وبعدين سيادتك وصلنا الاختراع اللى اسمه ريموت وكمان الميه والنور دخلت عندنا والحمد لله

هوه اعتراض وخلاص

لأ...سيادتك هو مش اعتراض وخلاص.ااحنا لما بنعترض بنقول ان فيه حاجة غلط دخلت علينا وعلى ثقافتنا وبنوجه رسالة للمسئولين على هذا البلد الذى يتم ذلك تحت مراى ومسمع منهم ولم يكن يحدث ذلك من زمان .وبعدين انا شايف من ردك انك مؤيد مثل هذه الحاجات!!!!

انتوا عارفين من بعد الموضوع ده انا اعتقد ان عدد مشاهدين القناة زاد وانتوا كده عملتوا دعاية كويسة للقناة

هى القناة مشهورة لوحدها وعلى فكرة هى بتقدم برامج كويسة ومفيدة .بس بلاش تستعدى الناس عليك يا نجيب ياساويرس خليك ماشى جنب الحيط

[رمضان]

الاخ صقر

انت بتتكلم عن ثقافتنا هوه ايه اللي فاضل منها

طيب ما النت في كل بيت ومش مشفر

[se_ Elsyed]

بس إنت كده يا رمضان عايز تنسينا أو تنسى إنت الحديث الشريف " من رأى منكم منكراً " ... إلى أخر الحديث

فهل تغيير المنكر يا رمضان بيبقى في الريموت وبالتالي الإستسلام للامر الواقع ؟ أم يجب ان نحاول تغيير المنكر ده حتى لو بالإستهجان والإستنكار ؟

لإن اللي خلاه يعرض حاجه زي كده النهاردة والناس تقبلت وقلبت بالريموت عشان ما تشوفش ... بكره يطلع علينا بقناة أخرى للبورنو زي جاد شويري اللي عمري ما شفت خلقته ما هو عايز يعمل قناة إباحية عربية لكي يكون له السبق في ذلك ويدخل التاريخ من أزبل أبوابه .

[صـــــقـــــر]

الله يفتح عليك استاذى س س

ماشاء الله كملت كلام كنت عايز اقوله بس كان تايه عن بالى

ربنا يزيدك علم وايمان

[Amenemhet]

انا متفق معاك تماما يا رمضان ....... واللى متضايق من موضوع اذيع واعلن عنه قبل عرضه بايام واسابيع عليه ان يشفر القناه والحقيقه بقى انه ينبغى توجيه شكر للقناه لانها راعت حقك كمشاهد فوجهت العديد من التحذيرات قبل عرض الفيلم ..... الذى حدث ليس غريب ....... العديد والعديد من القنوات المحترمه جدا بالعالم يعرض افلام بدون حزف مقاطع اباحيه ولكن هناك مبادئ متعارف عليها مهنيا تحكم كيف يتم تحذير المشاهد ...... وعادة ما يتخلل مقاطع الفيلم مجموعة اعلانات وبالاضافه لعرض التحذير قبل بدء الفيلم ..... ايضا بعد كل فقره اعلانيه يعرض التحذير ....... دعونا نتخيل مشهد اسره بصالة المنزل يشاهدون الفيلم ..... عرض التحذير وانت رب الاسره لم تغير القناه من المسئول هنا ...... شئ فعلا غريب .....

[نبض الابداع]

حسبي الله ونعم الوكيل

كل مالها من سئ لاسوء

[Diab]

بالمناسبة فيلم يعقوبيان بيتذاع دلوقت علي art cinema بس هما عملين حاجتين الأولي أنها عملين لوجو مكتوب عليه للكبار فقط والثانية أنهم قاطعين كل المشاهد

الممنوعة اللي كانوا عاملين عشانها اللوجو

بالمناسبة فيلم الأميريكان باي ليه خمس أجزاء ولاقي رواج كبير في دور العرض الأمريكية بس أنا أساسا بشك في نوايا ساويرس

[se_ Elsyed]

بالمناسبة فيلم يعقوبيان بيتذاع دلوقت علي art cinema بس هما عملين حاجتين الأولي أنها عملين لوجو مكتوب عليه للكبار فقط والثانية أنهم قاطعين كل المشاهد

الممنوعة اللي كانوا عاملين عشانها اللوجو

بالمناسبة فيلم الأميريكان باي ليه خمس أجزاء ولاقي رواج كبير في دور العرض الأمريكية بس أنا أساسا بشك في نوايا ساويرس

عارف يا ديب .. أنا مشترك في الإيه أر تي سنيما .. وشاهدت عمارة يعقوبيان مرة أخرى بعد حذف المشاهدة الزبالة .. وبصراحة السياق الدرامي لم يتأثر ... يبقى ليه الإسفاف أساساً من الأول ؟ ولا هما فاكرين إن ده المحل والفلفل اللي بيظبط طعم البضاعة ؟

[رمضان]

يا جماعة يا ريت لو تتابعوا قنوات الوصلة بما فيها الشو موفي 1 وشوفوا بتجيب ايه

يا جماعة دي بتعرض بالفعل افلام بورنو

وطبعا الوصلة زي ما كلنا عارفين في كل بيت في مصر دلوقتي

[se_ Elsyed]

يا جماعة يا ريت لو تتابعوا قنوات الوصلة بما فيها الشو موفي 1 وشوفوا بتجيب ايه

يا جماعة دي بتعرض بالفعل افلام بورنو

وطبعا الوصلة زي ما كلنا عارفين في كل بيت في مصر دلوقتي

في فرق كبير يا رمضان بين قنوات مفتوحه .. وأخرى مشفرة

القنوات المشفرة انت التي تذهب إليها لتشاهدها بمحض إرادتك وبتبقى عارف فيها إيه وممكن ما تشتركش في الباقات اللي بتعرض حاجات زي دي .. والاكثر من ده كله إنها قنوات أجنبية خالصه ويادوب بتبقى في شركة واخده توكيل التوزيع فقط ... وأقصد هنا أوربت وشو تايم .. لكن بصراحة والحق يُقال .. جميع قنوات ART بعيده كل البعد عن إذاعة أو بث اعمال مثل هذه على أي من قنواتها .

القنوات المفتوحه بتقتحم كل بيت .. وأصحابها يعيشون بيننا .. وبالتالي من حقنا ننتقدهم ونُشعرهم بإن ما يعرضونه يتنافى مع قيمنا وأخلاقنا وقبل ذلك ديننا .

[Amenemhet]

الحقيقه ان الموضوع مالوش علاقه بالاديان لان كل الاديان متفقه على تحريم الموضوع فلا مجال لحشر الدين اصلا ..... الموضوع الاهم والاكبر بكتير والذى يجب مناقشته هنا هو طريقة تعاطى المجتمع المصرى مع الموضوع المحظور لمسه "فى تخيلنا فقط للاسف" وهو موضوع الجنس ....... هذا هو الموضوع الحقيقى الذى لا تريدون لمسه ....... تتكلمون عن صدر مراه عارى ..... ما رايكم فى صدر رجل عارى ..... ماذا تعتقدون تآثيره على المرآه ...... مين فيكم يا حضرات الاباء والامهات جلس مع ابنه او بنته وتكلم معه او معها عن الجنس ...... ايه الاخبار ...... كلامى زعلكوا ولا لسه.

تلومون قناه عرضت صدر مراه عارى ...... افهم من ذلك انكم ناس حساسين تجاه المشاهد الجنسيه ...... طبيعى وحقك مايه بالميه ..... ولكن مش انت وحدك اللى حساس ..... فيه ناس تانيه حساسه من حاجات تانيه ...... فيه ناس يغمى عليها من منظر الدم ..... ومنظر الجثث ..... وناس تانيه تبكى لسماع موسيقى حزينه ....... وناس تانيه حساسه ناحية الشتائم فى الافلام والمسلسلات ...... لهذا اخترع العالم شئ اسمه تحذير المشاهد ....... كم من السباب نسمعه على اقناه الاولى والثانيه للتلفزيون المصرى ولم نرى تحذيرا واحدا ........ ليه صدر واحده عارى عمل كل ده ونور الشريف لما طلع فى اخر جمله فى فيلم سواق الاتوبيس وقال "يا اولاد الكذا" ..... ليه محدش اتكلم ....... تحذير المشاهد اسلوب حضارى والقناه حذرت المشاهد مرارا اكثر مما تحذرنا القنوات الرسميه ....... انا احترم القناه التى تحترم مشاهدها وتحذره اما القناه التى تفترض ان المشاهد متبلد ولا يفرق معه انه يسمع نور الشريف بيشتم هذا هو ما يجب ان يجرحك كمشاهد ...... كمشاهد لك حق وعل القناه ان تحترم حقك فتخبرك قبل عرض الفيلم انه يتضمن منظر عارى او منظر دموى او شتائم ....... نرجع بقى للموضوع الحقيقى الخفى بين السطور وفى العقول الباطنه ....... وهو موضوع الجنس ........ احساسى انه يوجد هنا بعض الاباء وهم يقولون انه لايجب عرض تلك المشاهد لانه انا عندى بنات وعندى زوجه ومحبش انهم يشوفوا حاجه زى كده ....... انا كراجل شرقى اتفق معاكو تماما ...... ولكن سؤالى هو انت كانسان عاقل تتخيل ان بنتك <وابنك بس البنات موضوع مستفز اكتر من الولاد فخلينا فى البنات> تتخيل انها ما تعرفش حاجه عن الجنس ....... معلش بالعقل وبدون زعلى فكروا فى سؤالى المستفز جدا جدا ده.

القصه اكبره من قناه او فيلم او صدر عارى ....... ياجدعان انا كلما قرآت ما كتبتم احس انى عايش مع ملايكه ....... انتوا عاملين زى الحكومه ...... تحرش جنسى=وسط دينا الرقاصه ...... هى السبب وساويرس السبب زى الاخ اللى قالك رجال الاعمال هما السبب ....... طب يا جدعان ما الافلام دى طول عمرها موجوده بره الا عمرى ما سمعت عن حادثة تحرش جنسى جماعى ...... وفى مصر نسمع عن فتاة المعادى وفتاة العتبه وكل حى بقى له فتاه ........ ايه رايوكوا ................ نكمل شتيمه فى ساويرس وصدر المرآه العارى ولا نتكلم بجد.

ولنبداء ....... وآذكركم انكم تحملون اسماء مستعاره يعنى محدش يعرفكوا هنا ولا يوجد داعى للمجامله او النفاق الاجتماعى ......... سؤالى لانى ارغب حقيقة ان اتعلم ....... فبالله عليكم افيدونى بخبرتكم ........ ابنى او ابنتى بلغ او بلغت سن الثانيه عشر ويلاحظ وتلاحظ تغيرات بجسمه وارغب فى شرح هذه الاشياء لهم ........ ماذا فعلت انت مع ابنك او بنتك.

...... افيدونا افادكم الله وارجو مراعاة ان الكلام عن اطفال وياريت تخلونا فى كلام العقل اللى اقدر اقولهم يعنى بلاش كلام من نوعية الكتاب المقدس قال والقرآن الكريم قال والحديث الشريف قال ...... عايز كلام اكلم بيه طفل ...... انا اتصور انى اطرق موضوع هام جدا وحساس جدا ويهم كل واحد فينا ويهم بلدنا كلها لآن لو كل واحد ربى عياله مش حنشوف ولا حنسمع عن المصايب اللى بنشوفها كل يوم ومهما العيال شافوا من مصايب فى تلفزيون او فيديو او عالنت فالتآثير مش حيكون قاتل ....... مش حيجيلى اخطار على يد محضر يقولى الحق ابنك مقبوض عليه بتهمة اغتصاب واحده...... افيدونا ...... عملتوا ايه مع عيالكوا.

وياريت اللى عنده اجابه مفيده يقولها واللى عنده سؤال مفيد برضه يقوله.

واللى عايز يحط راسه فى الرمل خليه وطمنوه ان ولا التلفزيون ولا السينما ولا المسرح ولا الفيديو ولا النت حييجوا ناحية بيتك وعيالك ...... متخافش .... اطمن خالص.

[se_ Elsyed]

يا استاذ Amenemhet

حضرتك قلت

الحقيقه ان الموضوع مالوش علاقه بالاديان لان كل الاديان متفقه على تحريم الموضوع فلا مجال لحشر الدين اصلا

إسمحلي أقولك إن لو كلامنا وأخلاقنا وافعالنا ليس لها أساس ديني أخلاقي يبقى أحنا كده عايشين زي الدواب بالظبط .. ما هي ما عندهاش دين برضو وبتتصرف بالفطرة وأي دابة بتعمل اللي فطرتها تقولها عليه ولا تُحاسب . وإلا فما هو أساس الأخلاق ؟ هل هي العادات والتقاليد والاعراف ؟ ام الدين والعقيدة ؟

بالإضافة إلى إن سيادتك قارنت بين الرجل والمراة ووضعتهم على قدم المساواة وقلت وإيه يعني ما هو الرجل بيمشي وصدره عريان .. ونسيت تمام إذا كنت مسلم أو مسيحي إن في حاجه إسمها عورة ولا تتساوى عورة الرجل مع عورة المرأة ، يا أخي ده حتى بغض النظر عن الدين فدي فطرة في الإنسان السوي .

وكان ناقص في كلامك إنك تقول إني عشان اعلم إبني وبنتي الجنس او أكلمهم عليه لما يبلغوا اعتاب المراهقة يبقى أدعوهم يضربوا فيلمين بورنو في أي قناة وأنا أقعد جنبهم أشرحلهم ايه اللي بيحصل ؟

و حضرتك تستغرب إن الأفلام دي منتشرة في الغرب إنتشار النار في الهشيم من زمان ومع كده ما مسمعتش عن حادث تحرش جنسي واحد ... شوفت سبحان الله يا أخي على الناس الكُمل دول ؟!!

يا عزيزي وهما هايتحرشوا ليه لما كل شيء عندهم مُباح والاطفال اللي في إبتدائي بيتوزع عليهم موانع للحمل .. والبنت اللي عندها 15 سنة ولم تمارس الجنس المجتمع بياكل وشها وبتجيب العار لأهلها ... وكل ده من المواد المتاحه للجميع زي الميه والهوا بدون رابط ولا حاكم وبالتالي الكل عايز يجرب ويشوف الموضوع ده .

فإننا نتحدث مع اولادنا عن الجنس حاجه .. وإني أسيبهم يتعاطوا هذه المواد الإباحيه حاجه تانية ..

لإن كلامي معاهم لازم ينطلق من منظور ديني يحدد هذه العلاقة التي خلقها الله للمحافظة على النسل وليست لقضاء الشهوة فقط كالحيوانات ..

ومع ذلك إذا كنت لا تستهجن أو تستنكر ما يعرضه ساويرس وامثاله فده شيء يرجع لك ولك مطلق الحرية في ذلك .. لكن أعطينا حقنا إننا نشمئز من ذلك يا عزيزي .ويا سيدي إعتبره دفن رؤوس في الرمال او في التراب حتى .

[autoscriptor]

إسمحلي أقولك إن لو كلامنا وأخلاقنا وافعالنا ليس لها أساس ديني أخلاقي يبقى أحنا كده عايشين زي الدواب بالظبط .. ما هي ما عندهاش دين برضو وبتتصرف بالفطرة وأي دابة بتعمل اللي فطرتها تقولها عليه ولا تُحاسب . وإلا فما هو أساس الأخلاق ؟ هل هي العادات والتقاليد والاعراف ؟ ام الدين والعقيدة ؟

على كدة الناس اليونانيين القدماء جابوا منين منظومة الأخلاق في فلسفتهم؟ يمكن علشان هما بشر وبيفكروا ومختلفين عن الحيوانات إللي ما تقدرتش تتحكم في غرائزهم. هل ممكن نقول ان البشر ممكن كدة لوحدهم يوصلوا لمنظومة أخلاقية تتطور عبر الزمن.

بالإضافة إلى إن سيادتك قارنت بين الرجل والمراة ووضعتهم على قدم المساواة وقلت وإيه يعني ما هو الرجل بيمشي وصدره عريان .. ونسيت تمام إذا كنت مسلم أو مسيحي إن في حاجه إسمها عورة ولا تتساوى عورة الرجل مع عورة المرأة ، يا أخي ده حتى بغض النظر عن الدين فدي فطرة في الإنسان السوي .

هل سمعت عن عورة الأمة [رابط - رابط آخر]. الموضوع ليس عدم تساوي الرجل مع المرأة على إطلاقه من الناحية الدينية كما ترى. أما لو غضضنا النظر عن الدين ونبحث عن فطرة ذلك الانسان السوي فسوف ترى ان البشر مختلفون أشد الاختلاف ولا يمكن القول بوجود هذه الفطرة على اطلاقها عند جميع البشر؛ مثل هؤلاء مثلاً.

يعني باختصار لما كانت عورة الأمة عند بعض الفقهاء مثل عورة الرجل وكان ذلك ضروريًا لأغراض "الشراء والتقليب" فإن النهي عن النظر كان للمرأة الحرة المسلمة. ولما كان الممثليين الأجانب في هذه الأفلام الخلاعية غير مسلمين فإنه من الغير الضروري الالتزام بغض النظر مع الكراهة.

أوعى تفتكر اني أدعو إلى النظر إلى صدور العاريات أو أني أتجرأ وأفتي بدول علم. كان ذلك فقط لتذكيرك بأنه من الممكن اللعب على الكلام من الناحية الدينية. وأنا غير مسؤول عن رأيك بعد قرائة المصادر التي أوردتها أعلاه. يعني يا سي السيد الموضوع ممكن من إنه يكون أكثر حساسية لو تناولناه من الجانب الديني. ولا يمكن تناوله من الجانب الانساني الفطري العام أيضًا لعدم وجود قيم وعادات وتقاليد بشرية مطلقة. ويصبح من المناسب جدًأ أن نظل نؤكد على اختلاف المجتمعات وقيمها كحل توفيقي.

أنا رأيي فين بقى من موضوع OTV وعرضها للنوعية دي من الأفلام. فأنا شايف ان القناة أصلاُ قناة بايخة وغلسة وتقيلة الدم ومش مستاهلة أصلاً حد يوشوفها. والراجل ساويرس دة مجرد واحد بيدور على دور مجتمعي ورنيشي. وأن القناة مصيرها عدم المشاهدة من أغلب المصريين. خليني أكلمك عن أبي. أبي رجل متدين محافظ يعيش هو وأمي وأخي الذي مازال في الكلية وأختي انسانة مكافحة محترمة تعمل وتدرس الماجيستير. أبي هو رجل الريموت الأول في البيت يعرف كيف يمسح القنوات غير المرغوبة وهو المتحكم الوحيد في وصلة الطبق الفضائي. لا يوجد في بيت أبي ميلودي أو مزيكا أو أي قناة من هز الأرداف هذه. يعلم أبي تمام العلم بأن أولاده الذين مازالوا يسكنون معه لديهم القدرة على أن يفعلوا ما بدالهم خارج المنزل ولكنه على يقين أن البيت لا بد له من قواعد وأن قاطنيه لابد لهم من احترام هذه القواعد. أبي أخذ زمام المبادرة فهو يعلم كيف يسير الأمور ويتابع أخبار الاعلام ويحدث جهاز الاستقبال كلما ظهرت قناة مشبوهة. أبي ليس كسولاً ويعرف جيدًا كمية التحديات الملقاة الآن عليه في هذا الزمن الذي يختلف كثيرًا عن الزمن الذي قام بتربية أولاده الأكبر سنًا فيه. وهناك أيضًا عمي وخالي ولكنهم كسالى لم يعرفوا قيمة ريموت المستقبل الفضائي مثل أبي. أرجوكم تعرفوا جيدًا على الريموت وأعلموا أنها مسؤوليتكم الأولى قبل أن تأتوا هنا وتشتكوا وتلعنوا الزمن. وليس معنى هذا اطلاقًا اني أبارك عرض الفيلم إياه.

وكان ناقص في كلامك إنك تقول إني عشان اعلم إبني وبنتي الجنس او أكلمهم عليه لما يبلغوا اعتاب المراهقة يبقى أدعوهم يضربوا فيلمين بورنو في أي قناة وأنا أقعد جنبهم أشرحلهم ايه اللي بيحصل ؟

يعني هو ما ينفعش إلا بفيلمين بورنو؟ هناك مصطلح اسمه تعليم جنسي Sex Education متداول في بقاع كثيرة من العالم. تفتكر ليه؟ تقريبًا علشان كل أغلب الناس لما بتكبر بتتجوز وبتبقى عايزة تعيش في تبات ونبات ويجيبوا صبيان وبنات. كمان الناس حست كدة والله أعلم ان دي حاجة وغريزة بشرية لا يمكن قمعها فتوصلوا إلى التعليم الجنسي لتصحيح المفاهيم وإزالة الجهل والممارسات الخاطئة. دي مش شغلتي وخلي علماء الاجتماع يطلعوا بطريقة تناسب عاداتنا وتقاليدنا ورأووسنا المدفونة في الرمال حابب بس أخليك تشوف إزاي الألمان بيعرفوا أولادهم الصغيرين إيه هو الجنس. [شوف هنا] دي مجرد رسومات توضيحية كرتونية ممكن المشرف يشيل الوصلة لو حد حس انها مش مناسبة لأعمار رواد المنتدى.

و حضرتك تستغرب إن الأفلام دي منتشرة في الغرب إنتشار النار في الهشيم من زمان ومع كده ما مسمعتش عن حادث تحرش جنسي واحد ... شوفت سبحان الله يا أخي على الناس الكُمل دول ؟!! يا عزيزي وهما هايتحرشوا ليه لما كل شيء عندهم مُباح والاطفال اللي في إبتدائي بيتوزع عليهم موانع للحمل .. والبنت اللي عندها 15 سنة ولم تمارس الجنس المجتمع بياكل وشها وبتجيب العار لأهلها ... وكل ده من المواد المتاحه للجميع زي الميه والهوا بدون رابط ولا حاكم وبالتالي الكل عايز يجرب ويشوف الموضوع ده .

من الظلم أن أحكم على شعوب العالم الأخرى مستخدمًا منظومة أخلاقي وعاداتي وتقاليدي. يكفى فقط أن نقول أن هذه الثقافة مختلفة عن ثقافتنا. ما يصلح لهم لا يصلح لنا بالضرورة بدون الحاجة إلى مهاجمتهم.

فإننا نتحدث مع اولادنا عن الجنس حاجه .. وإني أسيبهم يتعاطوا هذه المواد الإباحيه حاجه تانية ..

موافق جدًا ... أنا لا يمكن أسمح لأولادي انهم يشوفوا فيلم مشابه للفيلم الذي عرضته قناة OTV وعلى يقين أن هذا هو السائد في مجتمعنا

لإن كلامي معاهم لازم ينطلق من منظور ديني يحدد هذه العلاقة التي خلقها الله للمحافظة على النسل وليست لقضاء الشهوة فقط كالحيوانات ..

مختلف معاك بشدة. الجنس حاجة نفسية وبيولوجية ومن الممكن ممارستها لإشباع هذه الحاجات بجانب أنها وسيلة للتناسل. يعني تفتكر لو في اثنين متجوزين وبيحبوا بعض موت بس مش ممكن يخلفوا لأسباب عضوية. يعني مستحيل يخلفوا، ممكن تكون الست من غير رحم والراجل معندوش حيوانات منوية في السائل المنوي أصلاً. تفتكر الناس دول المفروض يبطلوا جنس علشان خلاص مفيش فايدة ومفيش خلفة؟

ومع ذلك إذا كنت لا تستهجن أو تستنكر ما يعرضه ساويرس وامثاله فده شيء يرجع لك ولك مطلق الحرية في ذلك .. لكن أعطينا حقنا إننا نشمئز من ذلك يا عزيزي .ويا سيدي إعتبره دفن رؤوس في الرمال او في التراب حتى .

عزيزي سي السيد. انا اتفق معك في أن عرض هذا الفيلم خطوة غير موفقة. ولا تحظى بتأييدي ولن أصفق لـ OTV على ذلك. ولك مني أحلى تحية مودة ووردة كمان

[se_ Elsyed]

بما إن الموضوع في ورد وفُل ...

إذن

إستناني أروح أدور على حد يتغدا معايا وأنام لي نص ساعة وأرجع أرد .. ده أنت فصصت مداخلتي بإقتبساتك .

يا إقتبساتك يا أوتو سكريبتور

[الصديق الوفي]

حسبنا الله ونعم الوكيل

والله يا أخوانا مش بس qtv طب شوفو القنوات المفتوحة كلها دي حتي الأعلانات بقت لا تتورع ولا تقل انحطاط عن الافلام دي

ياريت أصحاب القنوات دي يتقوا ربنا شوية ويعرفوا أنهم مش هايخلدوا فيها وأنهم ممكن يكسبوا كتير جدا وبعدين هايسيبوه لغيرهم وهم يتحاسبوا عليه

وممكن يقتضوا بأصحاب القنوات الفاضلة زي الناس والحكمة أو أي قنوات ترفيهية وتثقيفية محترمة وبرضه بيكسبوا كويس