Otv تعرض منذ قليل فيلماً به مشاهد جنسية صريحة

[Amenemhet]

الاستاذ سين سين ....للتوضيح...... انا كلامى يركز على التالى

1- الديانات كلها تحرم الاباحيه ...... ولكنها واقع موجود فى حياتنا لا يمكن لعاقل انكاره او تجاهله.

2- اين الداء واين الدواء ...... الاباحيه موجوده والغريزه موجوده ..... هل انا وانت وكل من قراء فعل ما يكفى لتجنيب اولادنا وبناتنا كوارث قد يواجهونها فى حياتهم.

3- انا شايف ان كل الكلام هنا لا يتعدى التركيز على احد الاعراض ...... قناه عرضت لقطه بفيلم ...... طب ما القنوات كتير والوسائل الاخرى كتير ايضا ...... لا ادافع عن القناه لانهم لا يحتاجون دفاع لانهم تصرفوا بشكل مهنى محترف مثل اى قناه بالعالم عدا قنواتنا الرسميه كما كتبت سابقا وانما اقول ان ما حدث عادى جدا ...... باى مقياس هو شئ عادى لانه حدث من قبل وسيحدث من بعد ولانه فى متناول الجميع وبلاش الكلام بتاع ..... بس دى قناه مصريه ....لانها قناه على دش ...... والقنوات التى تعرض اشياء افظع ايضا على الدش والمشاهد يستطيع منع اى قناه لا يريدها بغض النظر عن جنسيتها ........... المشكله ابعد واخطر من قناه وفيلم.

4- سيادتك اخترت تجاهل سؤالى ....... وتهكمت عليه وقلت يعنى انا حاقعد معاهم اضرب فيلمين بورنو ...... كلام جميل ..... يعنى انت بالعربى بتقول انك سلت ايدك من الموضوع ويمكن شايف ان تربية العيال دى حاجه ستاتى حاجه حريمى يعنى ..... دى مش شغلتى ...... دى شغلت المدام ...... مالى انا ...... اكلمهم ليه وافهمهم ليه ...... ويمكن تكون بالفعل كلمتهم وفهمتهم ومش عايز تفيدنا بالمعلومه.

5- كلنا اباء وامهات يعلم علم اليقين ان ابنه او بنته مش ممكن يعمل حاجه وحشه ...... بس السؤال هو انت جبت منين علم اليقين ده ..... هل هو فعلا علم يقين ولا مجرد امنيه بداخلنا. انا ربيت عيالى على مكارم الاخلاق والتمسك بالدين ........ عباره جميله ....... ولكن هل هذه هى الحقيقه كامله ....... طب ما تقلنا عملت ايه فى الموضوع ده ..... هوه ده مش جزء من التربيه.

6- تستطيع التهكم على كلامى كما تشاء ...... انا سآلت السؤال اللى فى رائى كان لازم يسآل ...... وهو سؤال حقيقى وهام من وجهة نظرى تستطيع ان تحاول الهروب منه كما تشاء ولكنه سيلاحقك فى صحوك ونومك وفى غرفة نومك ....... عارف ليه ...... لانه يتعلق باعز ما نملك وهم اولادنا.

7- الموضوع مش استعراض للقدرات البلاغيه ولمعلوماتنا فى اللغه العربيه .....مافيش منطق منتصر ومنطق مهزوم هنا ....... ما فيش حد مجند للدفاع عن مكارم الاخلاق وما فيش حد بيدافع عن الاباحيه ....... انا وانت نعرف انه محرم ....... ولكننا ايضا نعرف انه موجود شئنا ام ابينا ....ولو ما كانش موجود او متاح فسنبحث عنه والدليل هى المجلات التى تتداو بالمدارس وشرائط الفيديو وهى موجوده منذ عقود وكلنا يعلم ... سنبحث عنه ليه ...... لانها غريزه ...... الموضوع بسيط ....... سؤال وعايز اجابه وانا مش طالب حاجه غير انكم تعلمونى ...... عملتوا ايه مع ولادكو ...... او ........ نتعلم كلنا ...... انا وانتوا من ردود ناس تانيه. واللى خايف على وضعه الاجتماعى فى المنتدى يعمله اسم مستعار تانى ....... ويبقى السؤال وتبقى حاجتنا لنتعلم من خبرات الناس العقلاء.

8- اللى لسه مقتنع ان المشكله فى لقطة الفيلم دى وقناة التلفزيون دى وفى ساويرس ........ ارجوك تجاهل كل ما كتبته انا واستمر فى الى عايز تعمله ...... شوف حتشتم ساويرس ولا رجال الاعمال ولا الزمن ولا الحكومه واعتبر انى ما قلتش حاجه.

تم تعديل 14 أغسطس 2007 بواسطة Amenemhet

[Amenemhet]

بالإضافة إلى إن سيادتك قارنت بين الرجل والمراة ووضعتهم على قدم المساواة وقلت وإيه يعني ما هو الرجل بيمشي وصدره عريان .. ونسيت تمام إذا كنت مسلم أو مسيحي إن في حاجه إسمها عورة ولا تتساوى عورة الرجل مع عورة المرأة ، يا أخي ده حتى بغض النظر عن الدين فدي فطرة في الإنسان السوي .

يعنى صدر الرجل لا تآثير له على المراه ..... ??????

وهل تتساوى فطرة وغريزة الرجل مع المراه <السويين طبعا>

ام انك بصفتك رجل تستطيع ان تحكم بمشاعر المراه فى ادق ما يخصها

ومسلم ايه ومسيحى ايه ويهودى ايه .... احنا بنتكلم عن غريزه فى المرآه .... تانى .... الاديان حللت وحرمت ولكننا نتكلم كناس كبار عقلاء ...نتكلم عن الحياه والواقع ......... ايه علاقة الدين بتآثير صدر الرجل على المراه ..... هوه مش من حق الست ان قناة التلفزيون تحذرها قبل عرض منظر لرجل صدره عارى ..... يمكن انا كرب اسره شرقى نخوتى لا تقبل ان يعرض على الشاشه صدر رجل عارى وانا قاعد جنب مراتى وبنتى ....

مشكله على صدر مراه فى لقطه فى فيلم ...... طب وصدر الرجل الذى يفرض على اعين النساء فى الشبابيك والبلكونات والشارع ... مش بقلك نت ودش وفيديو ........ عادى ..... ولا احنا اللى اتعودنا لان ده سلو بلدنا

انا مش بقول وايه يعنى .... انا بقول ان حساسيات الناس بتختلف وفيه قواعد مهنيه تتعامل بها القنوات المحترمه لتحذير المشاهد لانها تحترم المشاهد .... ثار الجميع على لقطه لصدر امراه طب والباقى ... الا يحق لى كمشاهد ان تحذرنى القناه مما سبق وكتبت لعدم التكرار.

فإننا نتحدث مع اولادنا عن الجنس حاجه .. وإني أسيبهم يتعاطوا هذه المواد الإباحيه حاجه تانية ..

بالتاكيد احنا متفقين ...... وانا لم اسمع ان فيه اب او ام اشتركوا لابنائه فى حاجه زى كده ....وانا ماقلتش روح جيبلهم .... والموضوع مش محتاج تدخل من اب آو ام فهذه الاشياء متوفره مجانا للعالم كله على النت.

و حضرتك تستغرب إن الأفلام دي منتشرة في الغرب إنتشار النار في الهشيم من زمان ومع كده ما مسمعتش عن حادث تحرش جنسي واحد ... شوفت سبحان الله يا أخي على الناس الكُمل دول ؟!!

يا عزيزي وهما هايتحرشوا ليه لما كل شيء عندهم مُباح والاطفال اللي في إبتدائي بيتوزع عليهم موانع للحمل .. والبنت اللي عندها 15 سنة ولم تمارس الجنس المجتمع بياكل وشها وبتجيب العار لأهلها ... وكل ده من المواد المتاحه للجميع زي الميه والهوا بدون رابط ولا حاكم وبالتالي الكل عايز يجرب ويشوف الموضوع ده .

احدى الاصطمبات المحفوره بعقولنا .... احدى الحوائط السميكه التى نفرضها حول نفسنا لنستمر فى دفن رئوسنا بالرمال .... احنا احسن ناس .... هذه هى المدينه الفاضله وما عدا ذلك ..... زى ما تفضلت وقلت ....

يعنى هما مبيحصلش عندهم الكلام ده لانهم كل حاجه متوفره اصلا .... كل حاجه متاحه .... اما احنا فده بيحصل عندنا لاننا بلاد الالتزام والوقار ولا توجد عندنا هذه الاشياء .... فطبيعى ....... ده معنى الكلام اللى فوق مش كده

على كده بقى دى السياحه العربيه اللى بتيجى مصر بييجوا علشان يتبركوا ببيوت اولياء الله الصالحين ... والا كانوا رحوا للغرب اللى فيه كل اللى حضرتك قلت عليه ...

اعتقد ان دى مش وجهة نظر جزء كبير جدا من السياحه العربيه.... فلا داعى للتعميم ونقول غرب وشرق ........والموضوع يعتمد على الشخص نفسه واخلاقه وتربيته .... العالم كله مليان مصايب.

وربنا يستر على الكل

على فكره انا ما قلتش حالة تحرش جنسى واحده ... انا قلت حالة تحرش جنسى جماعى .... فرق كبير قوى ..... حالة تحرش جنسى جماعى اشترك فيها مئات الشباب والادهى ان تشترك فيها دوله بكاملها بالسكوت والطرمخه حكومه وشعبا ... .... الموضوع زفت متزفت فى زفت يا باشا .... موضه جديد .... اختراع مصرى صميم .... والسبب وسط دينا ...... انما العيال دى مالهاش ذنب .... ده وسط دينا يا باشا .... العيال دى متربيه احسن تربيه .... بس حنعمل ايه بقى .... وسط دينا يا باشا ......... وكله تمام . شى مزعج ومحبط ومقرف ومقزز ... حاجات عجيبه تحزن وتجنن.

تانى .... اعتقد ان هدفنا واحد .... انا مش عايز افتح الباب الاقى محضر بقولى الحق ابنك مقبوض عليه بتهمة اغتصاب واحده .... الحل لا يكمن فى تجاهل الواقع .... الحل هو تهذيب الابناء وتعليمهم .... وبالنهايه لو كل واحد علم عياله مش حيفرق معاهم ولا الف مليون قناه او دش او فيديو.

تم تعديل 14 أغسطس 2007 بواسطة Amenemhet

[فــيــروز]

القنوات المفتوحه بتقتحم كل بيت .. وأصحابها يعيشون بيننا .. وبالتالي من حقنا ننتقدهم ونُشعرهم بإن ما يعرضونه يتنافى مع قيمنا وأخلاقنا وقبل ذلك ديننا .

بتقتحمه إزّاى يعنى يا ريّس !! :closedeyes:

بتجيب خمسه عصبجيه يقفوا فوق التليفزيون و يدخلوه بالقوه يعرضوا البضاعه المضروبه !!

وبعدين يعنى مالفتش نظرك أن قناه تقتحم كل البيوت ببرنامج يقتحم كل الأسر مثل "العاشره مساء" تذيع إعلان سمج عن المقويّات الجنسيه فى كل فواصلها الاعلانيه ولم يفتح أحد بقّه ولا قال لك مش بفلوسى و باقى الاسطوانات المشروخه دى !!

الناس بتعمل إيه مع المواقع الإباحيه على النت؟

بتتعب نفسها شويه عشان خاطر ولادها .. بتمارس رقابه .. بتعمل توعيه .. بتنزّل برامج حمايه و فلتره .. محدّش بيقول نعمل حمله لإغلاق الموقع الأبيح ده .. بس المشكله الناس عندنا عايزه تسيب التليفزيون مفتوح ع البحرى عشان هو اللىّ بيربّى العيال و همّا معندهمش خلق ولا دماغ ولا مزاج يربّوا ..

كتبت ردّى قبل قراءة رد autoscriptor .. جميل والله

تم تعديل 15 أغسطس 2007 بواسطة فــيــروز

[kookoo]

أنا عن نفسي خدت خطوة إيجابية جداً

أول ما شركة إتصالات نزلت للسوق المصرية غيرت خطي فوراً ورميت شريحة موبينيل في الزبالة

وقناة أو تي في هحاول أراسلهم وأراسل الشركات اللي بتعلن عندهم للضغط عليهم

وهحاربه في كل مكان أقدر عليه لحد ما يبطل سفالة ويحترم نفسه وشعبه

[ابو محمود]

زمان ومن كام سنة كان الفيديو اختراع جديد ومن الترف وكان ضعيفى الأرادة كانو يستخدمونة فى عرض الأفلام المخلة وكانت تهرب الأفلام كالمخدرات وتقدمت الدنيا وكانت الريسيفر ذلك المعجزة العصرية وهلما جرة أصبح للعرب قنوات تعرض الأغانى الساقطة بأسماء رنانة فمنها روتانا ومنها مزيكا وسلملى على الأحترام

وبعدين كان هناك فى الماضى اناس يمتلكون الفيديو وكانو يشاهدون علية مناظرات دينية وحلقات علم وكل ماهو مفيدويتم تسجيل الأفراح والليالى الملاح وكانت الناس تعلم انة من الممكن ان تشاهد علية ايضآ بورنو وسكس ولاكن من يريد ان يشرب ويأكل من حلال فعلية الا يسرق او يغضب اللة وهذا هو لب الموضوع يعنى ياسادة من الممكن ان تحولو ترددات اى قناة مش عجباكم وبلاش دوشة دماغ ولا علشان الراجل دةمش أمير ممكن يكون ذنديق وممكن يكون ضد الأسلام طب أزاى احنا نقف أمامة ليس بالتعصب ولاكن بالتعقل والفهم القويم وتعريف ابنائنا ان ذلك حرام وكفاية ان الشارع المصرى اليوم يوجد بة صدور عارية وأكثر من ذلك اذا أمعنتم النظر اصبح لحم بنات مصر رخيص وممكن تشاهدونة على كورنيش النيل وشوارع العاصمة جمعاء وبلاش أمور التلاكيك وبعدين لو الجزار دة لحمتة وحشة هات من جزار تانى والنبى انا شايف ان الحوار مش مقصود بية ان القناة بتعرض بورنو ولا يحزنون الموضوع بس حوار وتسجيل نقط هل لايوجدسلبيات لدى المصريين الا ذلك ياريت ندور فى علاج المشاكل بسرعة ردوننا على ما لا يرضينا :)

[ssamir]

امبارح بالصدفة اتفرجت على اخر جزء من فيلم the Devil Avocato

بطولة ال باتشينو و كيانو ريف و تشالز ثيرون

الفيلم دة اتفرحت علية من 10 سنين و كان ممنوع عرضة فى مصر بسبب قصتة

المهم انة كان مقصوص منة حاجات

يعنى القناة اتعدلت و صوت الناس وصلها

كان فى تصويت على www.PetitionOnline.com بغلق القناة و انا صوت برغم ان لية صديق بيعمل بالقناة يعنى غلقها هيازى ناس كتير

م شريف سمير