موقف محرج جدا

[semsema]

بسم الله الرحمن الرحيم

اعزائي اعضاء المنتدى

السلام عليكم ورحمة الله وبركاته

حصلي موقف صعب جدا وحبيت انكم تقرأوه لان اعضاء المنتدى هم السببب في اللي حصلي ده، هتقولولي ازاي؟

اقلكم اقراوا وهتعرفوا

وادي اللي حصل:

من كام يوم كده وانا في المدرسه كان عندنا حصه تقيله اوي ومعلمه اتقل

وكالعاده المعلمه المسكينه قاعده تشرح لنفسها فقلت في عقلي الباطن:(بدل مانتي قاعده كدا يابت ياسمسمه لا شغله ولا مشغله امسكيلك ورقه وقلم واكتبي اللي تفتكريه من مواضيع مضحكه وردود(مضحكه بردو) قرأتيها في منتدياكي الجميل بدل الحصه الممله دي)

وفعلا بدأت بالتنفيذ

مسكت الورقه والقلم وحاولت افتكر ردود الاعضاء الجميله في مبادئ موديل 2007 وتوبيكات الرياضه بالذات وكتبت ردود الاساتذه سي السيد وكوكو واوا وارسين لوبين ود/ هوبا وداروين وسيوه وغيرهم

خلصت من الموضوع ده ودخلت على موضوع تاني كتبه الفاضل س س بعنوان(عكاويك وديتني في داهيه) وكتبت اللي افتكرته من الموضوع ده وانا في قمة الفرح والسعاده والضحك

خلصت الموضوع دا كمان وقلت لنفسي ايه رايك تكتبي اسماء الاعضاء وتعليقك على كل عضو وبالطريقه دي كتبت:

س س: ..................

داروين : .................

كوكو واوا .......................

ميدو و فلانه و ارسين و فيروز وتيتو ونجفه ......................

ولسه وانا باكمل الا و الاقي شخص واقف قدامي من غير احم ولا دستور

ميييييين؟ مصيبه........ معلمتي الحبيبه........ يا ترى ايه اللي هيحصل؟ الله يستر

مسكت اعصابي وجيت اعمل نفسي مش شايفاها سبقتني بصوتها العالي (أي والله عالي):

ايش جالسه تكتبي ياست هانم وناسيه انو عندك حصه ؟

انا(مرتبكه) :ووووووو ولا شئ يا ابله انا بس جالسه اكتب اللي تقوليه عشان يسهل عليا المذاكره

هيا : مذاكره؟ اعطيني الورقه اشوف

انا: بلاش احسن

هيا(بتشخط): قلت اعطيني الورقه

وبدوري اديتها الورقه ووشي بقى عباره عن طمطمايه فريش

قرأت الورقه بصوت عالي والبنات نازلين ضحك على اخرهم (على ايه؟ الله اعلم)

مين هاذوله( دولة)اللي تتكلمي عنهم واسماؤهم تضحك؟

وبدأت تقرا من جديد تيتو ميدو ارسين (الاسماء اللي فيا دلع من سوء حظي)

ومين يطلع ارسين لوبين دا كمان تتعرفي على ناس غرب (بفتح الغين (اجانب يعني))

انا في عقلي الباطن : ايه الخيبه التقيله دي حد ما يعرفش اللص الظريف ارسين لوبين

هيا: خدي الورقه وروحي عند المديره تتصرف معاكي

انا: مديرة ايه الله يخليكي هذا كله عشان جالسه االف كلام فاضي

هيا: اجل ايش هذا المكتوب مستحيل يكون تاليف اشرحيلي الكلام المكتوب

انا: انا بس كنت جالسه اكتب أي كلام في أي كلام ولو سمحتي لا تقولي على اسماؤهم تضحك ما اسمح لاحد انه يقول كدا لانها من تاليفي وما احب احد يقول على مؤلفاتي كدا

هيا : يعني ما تبغي تتكلمي وتقولي ايش دا الكلام الغريب

انا: يس اوف كورس

هيا: ايش؟

انا : اااااقصدي ما ابغى اقول

حصلت مشكله كبيره ورحت عند المديره(كل ده عشان مش فاهمه ايه المكتوب)

رحت عند المديره اخدت طبعا دش جميل اوي من التهزئ خلاني اعيط في النهايه

وقالتلي لا عاد تسوي كدا في الحصه (مع ان البنات بيعملوا بلاوي زرقا في المعلمات ايش معنا انا يعني)

انا: اخر مره

وطبعا الحصه كلها راحت وانا والمعلمه عند المديره رن الجرس وانتهت الحصه وانا داخله الفصل الا والاقي جيوش التتار(بنات فصلي ) هاجمين عليا ونازلين بوس قال ايه ريحتهم من الحصه

قالولي: مرررررررره شكرا يا سمسم يا عسل انت والله سكر فكيتينا من الحصه البايخه هذي

انا باحمد ربنا ان قانون المدرسه ينص على الطالبات عدم وضع احمر الشفاه والا كنت بقيت سمسمه الحمرا من كتر البوس

تاني يوم لقيت وحده بتقولي: هاي سوسو بالله عليكي سلميلي على كو كا ايش اسمه؟

انا :قصدك كوكو واوا

هيا: ايوااااااااااااااااه هذا هوه اسمه مره حلو تصدقي

حرمت بعدها اني افتكر المحاورات وانا في المدرسه

ياريت توروني تعليقاتكم الجميله وما تسيبوش الموضوع يجيلو حول من كتر ماهو بيلف فوق و مش لاقي حد يعبره ...

سلام

[yasovinas]

موضوع لذيذ وقصه ظريفة اييييه فكرتينا بايام الشقاوة يا سمسمه

بس عجبني قوي تعليقك ودفاعك المستمين عن اصدقائك المحاورتين

المرة القادمه لما يحصل هذا الموقف انصحك بحل ممتاز وهو ما يطلق عليه في القانون الجنائي {حالات الجنون اللحظي} يعني تعملي منونه وطبعا اللي هيقرا مواضيع المحاورات وتسماء اهلها من غير ما يعرفهم هيوافق وهيتاكد من حالة الجنون هذه

تحياتي يا سمسمه وياريت بلاش تسرحي في الحصة مرة تانية

[semsema]

شكرا لك اخ ياسو على المرور وتعليقك الجميل ده

والله السرحان ده بيبقا غصب عني يعني لو الحصه تستاهل اني انتبهلها انتبه ولو ماتستاهلش ما انتبهش

بس فعلا انا بحاول ما اسرحش وانشاء الله ربنا هيساعدني وشكرا مره تانيه

ياترى الاخوه ما عجبهمش الموضوع والا ايه

والا الكلام مش واضح

هو فعلا اللهجه السعوديه معقده شويه

سلامي

[kokomen]

قصة جميلة يا سمسمة

عملية السرحان دي بنعاني منها مع كثير من الطلاب .. بس بختلفوا عن البنات في أنهم بيسهروا طول الليل ويناموا طول النهار أو يسرحوا أثناء الدراسة

لكن انتى ما قلتيش كنتى سرحانة في حصة أيه المملة دي والمعلمة مش حاسه بيكي ... وعماله تذاكرى في المحاورات .. والله ده شئ جميل ويشجع

على المشاركة الفعالة علشان نقضى على المجاميع العالية والمعدلات الكبيرة .. ويبقى دخول كليات الطب بمجاميع أقل .. فكرة جيدة .. نشكرك عليها

ونتمنى لكي التوفيق في المدرسة .. وكمان في المحاورات بمواضيع حلوة وشيقة .. مع خالص احترامى

أبو أحمد الأسكندراني

:amb: po:: gt: bv:-

[Folana]

السلام عليكم ورحمة الله ...

اختى العزيزة او ابنتى بقى ..خلينى صريحة :unsure:.........تعرفى كان احسن حل للخروج من الورطة دى انك توصفى لها طريق المحاورات والاتوبيسات اللى بتيجى هنا وكدهوت يعنى...هى زيارة واحدة لنا وكانت حتفضل معانا على طول..

وانتم ترتاحوا طول السنة من الحصص بتاعتها....

صباحك جميل.......... :unsure:

[ليالي الغربة]

يا خوفي ما يكون هذا الموضوع كمان كتبتيه في الحصة عند المعلمة نفسها

بصراحة ايام الدراسة ايام جميلة فكرتيني بالذي مضى كانت اياااااااااام بس نصيحة اخوية من اختك في الله دراستك اهم حاجة وربنا يوفقك وتنجحي يا رب والسلام عليك

تم تعديل 21 أبريل 2007 بواسطة ليالي الغربة

[kokowawa1979]

سمسمة كتبت :

مسكت الورقه والقلم وحاولت افتكر ردود الاعضاء الجميله في مبادئ موديل 2007 وتوبيكات الرياضه بالذات وكتبت ردود الاساتذه سي السيد وكوكو واوا وارسين لوبين ود/ هوبا وداروين وسيوه وغيرهم

خلصت من الموضوع ده ودخلت على موضوع تاني كتبه الفاضل س س بعنوان(عكاويك وديتني في داهيه) وكتبت اللي افتكرته من الموضوع ده وانا في قمة الفرح والسعاده والضحك

واضح إن الحصة كانت ممله جدا يا ست سمسمة - بس واضح إنك اندمجت في الابتسام زيادة عن اللزوم - فده جعل المدرسة تشعر إنك بتكتبي عن شيئ يخصها - لكن بصراحة ياسمسمة إنت رهيبة بجد - إزاي قدرت تلخصى توبيك زي توبيك المبادئ في حصة واحدة بس ده فطاحل الرياضة أخدوا ييجي شهرين على ماكتبوا - ولسة التوبيك ماخلصش لحد دلوقت .

صدقيني ياسمسمة قصتك الواقعية دي بقدر ما أضحكتني من أعماق القلب إلا أنني بصراحة خفت عليك كإبنتي تماما - لإنني لاأريد أن أكون مع باقي إخواننا بالمنتدى أحد أسباب أن تضعك المدرسة في رأسها فتناوشك كل حين وآخر .

حاولي لفت نظر المدرسة بتفوقك دائما وأن ماحدث كان مجرد خاطرة فقط جاءت على بالك .

تاني يوم لقيت وحده بتقولي: هاي سوسو بالله عليكي سلميلي على كو كا ايش اسمه؟

انا :قصدك كوكو واوا

والله ياكوكو واوا على آخر الزمن وبقى لك معجبات وفين ؟ في السعودية :blink: بس ياترى ياسمسمة قلت لهم إني راجل عجوز ومكحكح

مع أطيب أمنياتي لك بالتوفيق

[Modest]

تاني يوم لقيت وحده بتقولي: هاي سوسو بالله عليكي سلميلي على كو كا ايش اسمه؟

انا :قصدك كوكو واوا

والله ياكوكو واوا على آخر الزمن وبقى لك معجبات وفين ؟ في السعودية

هنيالك يا عم كوكو .. أرزاق :blink: