محاورات المصريين ((( بالبحرين ,,,,,,,,, Bahrain )))

[badroora]

الأخت بدرية .. شكرا علي موضوعاتك الجميلة ومجهوداتك

البحرين فعلا مدينة هادئة وجميلة ومنظمة واحنا هنا من الخبر (جزء من التتار اللي قلتي عليهم ) بنروح فى الويك إند بس عاوز منك نصيحة ، نروح فين تاني فى البحرين (غير مجمع السيف ومطعم مرمريز وجزيرة حوار ؟ لأننا زهقنا منهم انا والولاد ) علما بأن الشوبنج فكرة غير محببة نظرا لغلاء الأسعار مقارنة بالخبر؟

يا الف اهلا وسهلا يعنى بصراحة مش عرفه اشكر حضرتك ازاى انك دخلت .لاا وكمان دخلت فى اليوم اللى اعلنت فيه يأسى

اللهى يجبر بخاطرك ...ويباركلك فى اولادك وعشان الجميل دا وعيون الامامير الصغيرين ...هاقولك كل حاجة :bro:

بحصوص الشوبينج فعلا البحرين مش مكان مناسب لغلاء الاسعار وكمان الموديلات موضتها مش قد كدا .....الشوبنج

فى السعودية ارخص بكتير ومتنوع وكمان الكويت .....كل اصحابي البحرانيات مش بيشتروا اى حاجة من البحرين

غير للضرورة ..لكن ملابس مدارس كسوة صيف شتاء ......ادوات منزلية اى شي كل بينجاب من السعودية

حتى قطع غيار السيارات كمان ارخص بكتير عن هنا ......فيبقي هنا نستبعد البحرين فى الشوبنج....

فى عند حضرتك هنا ...بعد السيف مول ......يعنى وانت جاى من الهاى واى بدل ما تدخل شمال ع السيف

كمل على طول بعد حوالى 500 متر هتلاقي داخلة يمين وبعد ين هيقابلك دوار من الدوار اعمل يوترن على طول هتلاقي

الدانة موووووووول على ايدك اليمين ادخل من اول باب يمين على طول ....

الدانة مول اصغر من السيف مول ولكن اخفهم ......مافيهوش الهجوم الهكسوسي زى السيف وكمان دمه خفيف

فيه هناك اول ما بتطلع ع السلم الكهربائي هايبر بليز اوعى تدخله كله هنود والبضاعة معظمها هندي هتتعقد وتعقد الولاد

على شمالك فى الوش على طول هتلاقي السينيما واعتقد ان دى الميزة الوحيدة اللى بين البحرين والسعودية

وبعدين على يمينك مكان المطاعم هناك مدينة ظريفة للعلب الاطفال تدخلها تحس انك فى عالم تانى احنا كنا بنأجر عيال

اصحابنا عشان نتلكك وندخل بيهم واحنا اللى نلعب وهما يتفرجوا :waf: ....ظريفة اوى واعتقد ان الاولاد هينبسطوا منها ...

لو الاولاد غاوين لعب وبلبطة فى حديقة مائية فتحت عين عذارى ودى الفرد الكبير معرفش الصغير كام التذكرة ب 12 دينار

ونص وبتفتح من 10 صباحا الى 10 مساءا ظريفة جدا وجميلة

ازاى بقي تروحها .....

بعد ما بتخرج من الجوازات البحرينية بتمشي على طول وبعدين بتدخل يمين عشان تروح للسيف صح

لاء بقي ادخل شمال وامشي سيدة ....كله على طول على طول وبعدين اول ماتقرب على لفتات لمدينة حمد والمستشفي

العسكرى ...خليك يسار عشان تطلع فوق الكبرى لا تمشي من تحته وكمل سيدة سيدة ......وبعدين لاء انت كدا هاتوه استنى

لو عندك فى موبايلك جي بي اس ابقي اكتب عين عذارى وامشي حسبوصف الجى بي اس انا اعرف اروحها لكن فى

الوصف هتوهك او لو مش عندك جي بي اس هابقي اخلى حد من الديرة نفسها يكتبلي اسهل طريقة تقدر تروحها بدون توهان

وفى تانى مارينا مول .. فيه لعب اطفال كويس ومطاعم ...والؤلؤ سنتر فى ضهر الدانة .........ووطبعا بوابة البحرين للمدام لو غاوية دهب .

دول اللى فى دماغى حاليا هاحاول افتكر لو افتكرت هاضيفهم هنا ا انت عارف البحرين كبيرة الواحد هيتفكر ايه ولا ايه :aslam:

تم تعديل 18 مايو 2008 بواسطة Badria Mekkawy

[badroora]

شكرا لرفع الموضوع يا اخت بدريه :bro:

جميله قوى البحرين من خلال الصور اللى ضيفتيها فى موضوعك smk:

ربنا يكرمك و المصريين المغتربين بالبحرين يتكعبلوا فى موضوعك

الشكر لزيارتك انت........... :waf:

البحرين بالفعل بلد صغيرة ولكنها جميلة ودافية وعمرك ماتحس انك غريب فيها

بخصوص مصريين البحرين لاااااااااا انسي لو اتكعبلوا هنا هانقل على مغتربين الصومال :aslam:

بقالهم سنة مهوبوش جنب الموضوع ........مافيش امل ...... :cry:

[osaimi]

شكرا أخت بدرية علي ردك الجميل وإنشاء الله هنجرب الأماكن اللي قلتي عليها بس الله يخليكي بلاش موضوع الدهب ده كفاية علينا دهب السعودية

تحياتي

[engmoh]

الاخت بدريه

دى اول مشاركه فى المنتدى احب اطمنك اخيرا هتلاقى حد فى البحرين يشارك معاكى انا هنا من اسبوع ونفسى الاقى اى حد فى البحرين

تم تعديل 12 يونيو 2008 بواسطة engmoh

[nash]

الأخ الكريم engmoh

واضح أنك جديد علي المنتديات ..فلا تعرف الأخبار الجديده...

فالاخت الغاليه بدريه قد أعتزلت المنتديات جميعها من حوالي اربع ايام...وقد اعلنت ذلك...

بما أنك في البحرين...ياريت تدورلنا عليها وترجعهلنا....

...فعلا ليها وحشه غير عاديه...

ربي يحفظها ويوفقها في كل حياتها....

[اسمعلاوى]

السلام عليكم ورحمه الله وبركاته

البحريين اللى عايز يتفسح ويستمتع بيها يروح على طول مجمع السيف يتفسح فيه كله روعه جدا وهيجبه ولما يخلص على طول بدون

تفكير يرجع الدور التانى ويدخل مطعم راندفووووووو طبعا اوبن بوفيه روووووووووعه هوا كمان مش غالى يمكن ب 3.8 دينار بحيرربنى يعنى

ب 38 ريال بس اوعو بدون اى مشروبات وتشتريها من جوه يعنى هتصرفلك كمان 10 بيبسى وميه وتحت توكيل اسبلاش للملابس يجنن

بصراحه احلى حاجه فيها انك تحس انها قريبه اوى لمصر الشعب لابس جينز وتى شيرتات ومربى شعره وعايش حياته والبنات بتبيع فى

المحلات وممكن تزورو مجمع الؤلؤ برده روعه او تاخدو الشوايه ولحمه وتفترشو الخليج كلها اماكن حلوه غير طبعا الاماكن الوحشه بتاعت

الوحشيين

على فكره ممكن اقول لقرايبى اللى فى البحريين ييجو المنتدى بس صعب والله لانهم بيشتغلو 18 ساعه فى اليوم اصل البلد فقيره جدا

ومفيهاش اى مرتبات تملى العين فالرجاله يا حرام بيشتغلو من 6 الصبح لحد 12 بالليل عشان يعرفو يعوضو الارقام اللى بيسمعوها من

باقى الدول طبعا معظمها ارقام وهميه وكله بيضرب فى السما ما هو ا محدش عارف حاجه على فكره خميس وجمعه هناك لو حد نفسه

فى حلاوه البحريين

تم تعديل 15 يونيو 2008 بواسطة اسمعلاوى

[مسافر زاده الخيال]

موضوع جميل مش عارف ليه ماصادفته اللا الليله..........

طبعا انا احد التتار الهكسوسيين اللي كانوا يزورا البحرين (معدل مره كل شهرين ايام ماكنت ساكن الاحساء) ولما رجعت جده صرت بمعدل مره كل 4 شهور...........

ما علينا

انا معرفش في البحرين غير السيف مول عشان السيما -عشان كده الشعب السعودي يدفع اغلى تذاكر في العالم-ويؤسفني ان الافلام المصرية بتجي بعد 7-8 شهور من عرضها في مصر

وكمان بشتري الكتب والمجلات منها

بلد جميل جدا رغم الغلاء

بس احب اسأل و(استفيد من حداقة المصريين) بالنسبة للتاكسيات في موقف السيف مول

اذا طلب المشوار بالعداد يعملولك مناحة و غاغه وكانك مصاص دماء والمشوار من هناك لغاية دوار المنامه (ب5دينار!!!) فهل هذا المبلغ معقول؟؟؟؟؟؟؟؟؟؟ وكيف اتصرف؟؟؟؟؟؟؟؟

وشكرا لكم

[اسمعلاوى]

طبعا المشكه دى فعلا موجوده كتير بخصوص اسعار الليموزين او التاكسى خاصه ان كل السواقيين شيعه واول ما يعرفو انك مصرى يعنى انت سنى وبيزودو علييك حبتيين

كمان اكتر من اللاجره هناك غاليه اصلا فأنت لو مش هتروح بسيارتك يبقى افضل حل انك تستأخر سياره عادى

خالص من السعوديه وعشان تقدر تدخل بيها البحريين بتجيب من المعرض تفويض والتفويض ده متعارف عليه

كلهم بيعمولوه ب 100 ريال ومدته لا تزيد عن اسبوع ولو ليك حد مصرى حبيبك اوى فى معرض تأجير هيعملك ا

لتفويض ب 50 ريال لانه اصلا ورقه من المعرض وعليها بس ختم الغرفه التجاريه ابو 25 ريال يعنى مش بيخترعو الذره فى

التفويض وده يغنييك لقم الشعه فى البحريين وخاصه لانهم محتكريين مهنه السواقه هناك

[النيل حبيبي]

مبروك لمغتربي البحرين

حيشتروا أراضي في تايلاند ويغرقوا البلد رز

[red sea]

السلام عليكم

كنت عايز اعرف تكلفة الحياه الشهرية في البحرين في حدود كام

ايجار استديو أو غرفة وصاله

مواصلات

المصاريف الاخري

ياريت في حالة فرد أعزب أو متزوج

و لكم جزيل الشكر مقدما

[badroora]

انا شوفت الموضوع دا قولت يااااااااه اخيرا حد استجاب واللى شجعنى انى اكتب هو تساؤل الاخوة وقولت حكم الجدعنه والعيش والملح لازم اقدم اللى اقدر عليه .

مبدئيا الاخ العزيز المهندس محمد اهلا وسهلا بحضرتك ...........نورت البحرين والمنتدي

بخصوص التعرف على مصريين .........ممكن حضرتك تروح كوفى شوب على النيل اسمها ليالى زمان

والدولفين جنبها على طول دول ملتقي المصريين هناك هتقابل مصريين كتير وان شاء الله تتعرف على حد منهم .

واذا احتاجت اى خدمة او تساؤول عن شيء معين ممكن تكتبلي ع الخاص وان شاء الله اساعدك فى اللى اقدر عليه .

الاخ مسافر زاده الخيال .

بخصوص التكسيات فى المولات بتبقي سعرها اغلى من العادية وتجنبا الاستغلال جبتلك كذا رقم تليفون للتاكسي تحت الطلب

ممكن حضرتك تتصل به وتقوله على المكان اللى انت موجود فيه بس لازم تراعى انك تتصل قبلها على الاقل بساعة او نص ساعة .

فى عندك بحرين ليمو .........17266266

واسبيد موتور .........17682999

دول اسعارهم مرخصة ومش بيستغلوا خالص .

بخصوص الشيعة فى البحرين السواقين ..........بالعكس دول غلابة جدا وممكن تفاصل معاهم كمان انا قعدت 6

شهور فقط بدون سيارة وتقريبا تعاملت مع معظم السواقين وكلهم كانوا زوق ومحترمين وغلابة .

والافضل طبعا لو تأجر سيارة هيكون افضل بكتير لسهولة الحركة بها فى مناطق مختلفة دون الحاجة للاتصال والانتظار .

الاخ البحر الاحمر .

السكن فى المنامة غالى جدا يعنى ممكن تلاقي شقة صغيرة غرفة وصالة ومطبخ مش اقل من 200 دينار ومش مفروشة طبعا .

عندك الرفاع الشرقي ومدينة حمد ممكن تكون شقة صغيرة مش مفروشة بحوالى 160 دينار كحد ادنى وطبعا الغلا خلى كل حاجة تزيد .

بخصوص المصاريف العامة موصلات واكل وشرب على حسب انت حياتك هتعيشها ازاى .

يعنى مثلا لو خروجة لسينيما عشوة وفيلم مع بوب كورن ومشروب حوالى 10 دينار .

وكمصاريف عامة تختلف على حسب احتياجاتك .

الاحسن ليك انك تسكن فى مكان شعبي لو لسه مش عندك عربية عشان توفر الموصلات وتكون للضرورة فقط .

اكل وشرب وشامبو واريال وفسحة وممكن مواصلات كمان لفرد واحد حوالى من 100 الى 150 دينار فى الشهر لو انت هتعيش مرتاح شوية

ولو عاوز توفر ممكن تمشي امورك بحوالى 60 دينار .

وفى الاول والاخر على حسب طريقة حياتك هتقدر حدد ميزانيتك .

لو محتاج اى استفسار تانى انا تحت امرك .

تحياتى للجميع

تم تعديل 16 يونيو 2008 بواسطة Badria Mekkawy

[~Heba~]

:D

:sad: :blink:

:sad: :sad: :waving:

يا مراحب ببدورة نجفة المحاورات و كل المنتديات المصرية الشقيقة و اللى مش شقيقة

وحشتنيا يا مس نجفة الضب خوشى بقى بينا على غيط البرسيم خلينا نتكيف شوية

تم تعديل 16 يونيو 2008 بواسطة ~Heba~

[badroora]

الابنة الغالية هبة ميغسي بالكووووووووووووم ............. :D

اصيلة طول عمرك يا هوبا .......... :)

ابلتك نجفة n2&( n2&(

[samehelassad]

اخت نجفة انا عاوز اشكرك على اصالتك وجدعنتك والله بنت بلد وبنت مصر اللي مفيز زيها اليومين دول انا ياستي ساكن وعايش في قطر وبشتغل في شركة ادوية اجنبية وجالي عرض احسن في شركة اجنبية تانية في البحرين اية رايك اغير ولا لاء. ولية هنا السكن مصيبة اقل حاجة بما يوازي 400 دينار بحريني. واسعار المدارس اللغات اية كمان لان عندي ولد وبنت وهنا اسعار المدارس بتبتدي من 1000 دينار بحريني في السنة.

[samehelassad]

نسيت حاجة كمان الولاد كدة هيجو على شهر 10 الجاي هقدر الاقلهم مدارس عشان انقلهم من مصر ولا لاء.

[badroora]

سلام عليكم ...........

الاخ العزيز سامح .........بخصوص العرض بصراحة مقدرش اقولك اقبل او لاء ولكن اقدر اقولك ان البحرين بلد جميلة هادية مش تحس انك غريب فيها .

بخصوص السكن ...........ممكن تلاقى اقل من 400 دينار وكمان حضرتك اكيد الشغل هاديك سكن او بدل سكن .

لو مثلا هتسكن فى المنامة وممكن تلاقي شقة كويسة فى حدود 300 دينار غير مفروشة او 250 حد ادنى وطبعا غير مفروش

وانت بقي تبقي تفرشها واحدة واحدة ....................

وبخصوص مدارس الاولاد حضرتك قولى على مراحلهم الدراسية وايه مواصفات المدرسة اللى عاوزها وانا هأسال ورد على حضرتك .

وممكن لو عجبتك ابقي اجبلك بيانات المدرسة وتتعامل معاهم مباشرة .

يا رب اكون قدرت افيد حضرتك ............

سلام عليكم

[samehelassad]

الاخت العزيزة نجفة.

مش هقولك اكتر من ربنا يكرمك ويجعلة في ميزان حسناتك. اهما دول المصريين على حق اللي الواحد يرفع راسة بمجرد ميشوف الجدعنة والاخلاق الجميلة دي ربنا يجعل كل المصريين مع بعض كدة ونبقى احسن شعوب الارض زي ماربنا ميز بلدنا في القران.

شكرا جزيلا على ردك السريع والمفيد.

بالنسبة ليا انا عندي حنين عندها ست سنين يعني اولى ابتدائي ووائل 3 سنين وعاوز اعلمهم في مدارس لغات باللغة الانجليزية نظام امريكي او بريطاني. وتسلمي ياست الكل

[مسافر زاده الخيال]

ش

[مسافر زاده الخيال]

شكرا اخت بدرية على جهدك و بارك الله فيك

[badroora]

استاذ سامح السعد اليك دليل يحتوى على جميع المدارس فى البحرين يا ريت حضرتك تتصفحه كويس

وشوف هتختار انهى مدرسة وقولى وانا ابقي اكلمهم من هنا واستفسر عن كل استفساراتك بالنيابة عنك .

بالتوفيق ان شاء الله

مواقع المدارس بالبحرين