إستشارة فى الثانوية العامة

[خديجة]

السلام عليكم ورحمة الله وبركاته

أنا عندى اخت فى الثانوية العامة وعاوزة تختار ادبي، ممكن اعرف كم مادة ادبي تختارها فى سنة ثانية وكم مادة ادبي تختارها فى سنة ثالثة -- وياريت اعرف اى مواد اسهل ممكن تختارها واى مواد الاصعب

ارجو من اى حد يكون فى ثانوية عامة جديد او حد يعرف طالب قريب منه فى ثانية عامة علشان نعرف تختار ايه وتجيب مجموع على ان شاء الله تعالى

ياريت بسرعه بعد إذنكم

السلام عليكم

[بنت الشاطئ1]

عزيزتى خديجة

فى سنة تانية المواد الأساسية كالتالى

عربى انجليزى فرنسى رياضة

فى سنة ثالثة المواد كالتالى

عربى انجليزى جيولوجيا

فى ثلاث مواد ادبية .....فلسفة.. علم نفس ..تاريخ

بتختار منهم واحدة فى سنة تانية واثنتين فى تالتة

اذن سيكون فى تانية خمس مواد وكذلك تالتة خمس مواد

اذن نختار اى مادة فى تانية من هذه الثلاث واى مادتين فى تالتة

الكل يؤجل التاريخ فى تالتة لأنه طويل ومحتاج مذاكرة وسنة تانية يكفيها الرياضيات ومسائلها

فممكن نختار التاريخ مثلا مع الفلسفة فى تالتة ونجعل علم النفس فى تانية

او تختار التاريخ مع علم النفس فى تالتة ونجعل الفلسفة فى تانية مش هتفرق لأن الفلسفة وعلم النفس كلاهما سهل لكن كل المشكلة فى التاريخ

هذا من ضمن الاراء

اتمنى ان نجد اراء اخرى وافكار جديدة لأن فعلا الموضوع مهم

وبالتوفيق والنجاح مقدما

[خديجة]

لسلام عليكم ورحمة الله وبركاته

اشكرك جدا يا بنت الشاطىء 1 وربنا يجزيكى كل خير على ردك ليا

انا معظم اللى اعرفهم خدوا تاريخ فى تانية مش عارفة لية ؟ انا برده من رايك لان الرياضة والفرنساوى محتاجين وقت طويل فالتاريخ مش هياخد حقه .

[بنت الشاطئ1]

طب يا ريت يا خديخة تسأليهم ايه هى وجهة نظرهم فى كدا

لأن احدى قريباتى سألتنى نفس السؤال

وهى محتارة جدا ايضا

[ahmed_tito91]

بما انى فى ثانويه عامه

انا عن نفسى اختارت فى تانيه

عربى رياضه انجليزى فرنسى تاريخ

تالته

عربى انجليزى علم نفس جيولوجيا (فلسفه اواقتصاد)

[خديجة]

السلام عليكم ورحمة الله وبركاته

ممكن سؤال يا احمد انت لية اختارت التاريخ فى تانية مع وجود الفرنساوى والرياضة ودول عايزين وقت طويل ومجهود والتاريخ طويل اوى بده

ممكن اعرف لسبب؟

[بنت الشاطئ1]

يا رب يكرمك ويوفقك يا اخينا احمد

لكن ايه الفكرة فى اختيارك التاريخ فى تانيه

يا ريت تقولنا

وفعلا الموضوع مهم

[ahmed_tito91]

اقول لحضرتك

بعض اصحابى اخدوا علم نفس فى تانيه وفى تالته اخدوا اقتصاد وجى الجدول فى صفهم (طبعا فى المشمش)

بقى امتحان الاقتصاد يوم الاحد والتاريخ يوم الثلاثاء

يبقوا يرجعوا 13 فصل تاريخ فى يوم هل يعقل

احمد تيتو

[بنت الشاطئ1]

يا أخى احمد

ما هو ممكن ايضا فى سنة تانية يكون امتحان الرياضة يوم الأحد والتاريخ يوم الثلاثاء...بعد الشر يعنى

بس انا حبيت اقولك انه مش على حسب الجدول نختار المواد

انا هقولك على حاجة حصلت معى وانا فى الثانوية العامة

انا كنت علمى

وكان من حقنا ايامها نختار مادتين مستوى رفيع

انا اخترت عربى وانجليزى

وصديقتى اختارت عربى ورياضة

وعندما سألتها لماذا الرياضة مع انها صعبة جدا فى المستوى الرفيع . قالت لأنها اخر يوم فى الجدول وسأتفرغ لها

المهم انا اخترت الحاجة اللى انا حاسة انى هنجح فيها وفعلا انا نجحت فى المستويين اللى انا اخترتهم

وهى رسبت فى الرياضة

اهم حاجة انك تكون مذاكر المادة كويس اللى مختارها وساعة المراجعة طبعا بتكون منظم المنهج وملخصه وهتراجع الحاجات اللى انت حاسس انك محتاج تراجعها فعلا

لأنه على حسب علمى انه التاريخ يعتمد على الحفظ طبعا مع الفهم والحفظ والمذاكرة بيكون على مدار السنة واول بأول حتى لا يتراكم ومش لازم تراجع ال13 فصل قبل الامتحان بيوم

[lobnah]

اقول لحضرتك

بعض اصحابى اخدوا علم نفس فى تانيه وفى تالته اخدوا اقتصاد وجى الجدول فى صفهم (طبعا فى المشمش)

بقى امتحان الاقتصاد يوم الاحد والتاريخ يوم الثلاثاء

يبقوا يرجعوا 13 فصل تاريخ فى يوم هل يعقل

احمد تيتو

تقصد يا احمد ان الجدول ثابت كل عام كما هو لا يتغير

لو الموضوع كدا قلنا الجدول ايه فى سنة تانية

خصوصا يوم التاريخ قبله كام يوم اجازة

[بنت الشاطئ1]

عزيزتى لبنى فعلا الجدول غير ثابت

انا سألت احدى قريباتى وقالت ان الجدول بتغير كل عام

يعنى معنى كدا انه حتى لو اختار الطالب التاريخ فى سنة تانية ممكن ايضا يكون قبله يوم واحد فقط للمراجعة

معنى كدا انه مش هتفرق ان الواحد يختار التاريخ فى تانية او تالتة؟ يا ريت لو مدرس يفهمنا ايه الحكاية وايه الفائده اصلا من وضع اختيار المواد امام الطالب