ملاحظات بسيطة حول احداث خطيرة

[mohamed saad]

كانت الملاحظة الاولى لى فى حدث غرق قارب تستخدمه عصابات تهريب البشر بالقرب من السواحل الليبية وكان على متنه عدد من المصريين الهاربين من جنة لجنة السياسات الغير مقدرين طبعا لاهمية التعديلات الدستورية التى وضعها السيد نجل الرئيس واقرها السيد الرئيس نفسه وبما انهم مش عارفين مصلحتهم قرروا قال ايه الهرب الى ايطاليا . غرق القارب وانتشلتهم سفينة كانت عابرة بالمصادفة وتم ترحيلهم لمصر. تعرفوا قالوا ايه لما رجعوا وبعد ما شافوا الموت بعينيهم .. قالوا انهم على استعداد كامل الى معاودة المحاولة مرة اخرى واهى مرة تصيب ومرة تخيب....

الملاحظة الثانية فى التحقيقات مع المهندس المصري المتهم بالتخابر لصالح اسرائيل حينما اقر فى التحقيقات ان عملاء الموساد قد اجروا عليه اختبار ما يعرف بكشف الكذب ولما سالوه انت بتكره مصر ؟ قال تذكرت كل ما حدث معى فى مصر واجبت وانا مطمئن تماما (ايوا باكره مصر)... يعنى الرجل المفترى نسى الميه اللى شربها (معلش هى كانت شوية ملوثة ) ونسى الاكل اللى كان بيكلوه( معلش هوكان شوية مسرطن) ونسى التعليم اللى اتعلمه ( معلش هو كان شوية منهار) وافتكر بس حادثة بسيطة رفضوا فيها انهم ياخدوا رسالة الدكتوراه بتاعته علشان واحد تانى اذكى منه وانبه منه( معلش هو قريب العميد.. ) كان مقدم على الرسالة فى نفس الوقت ما العين بردوا ما تعلاش على الحاجب.

الملاحظة الثالثة محاولة مئات من شباب بدو سيناء خاصة قبيلة السواركة الهروب لاسرائيل يوم احتفالات تحرير سيناء بعد الاضطهاد الذى تعرضوا له من الامن المصري والذى اسفر عن مصرع شابين من نفس القبيلة بعد ان اطلق ضابط شرطة النار على سيارتهم فانقلبت .....( طيب هو يعنى ايه اللى حصل؟ ده حتى ضرب الحبيب زى اكل الزبيب)

الملاحظات الثلاثة بالاضافة الى شهادات عدد من ضحايا التعذيب فى فيلم الجزيرة الوثائقى وراء الشمس والتى ذهب فيها الضحايا ان( مصر مش بتاعتنا خلاص) ..كلها مؤشرات لتحلل مفهوم الوطن فى العقلية المصرية .... ذلك المفهوم الذى تأسس طوال الفترة السابقة على ان حب الوطن عقد اذعان يعنى حب من طرف واحد يعنى نحب الوطن بالعافية كده وان كان عجبك ...يموتنا الوطن يخنقنا الوطن يعذبنا الوطن يطلق علينا النار الوطن مش مهم ( متقولش ايه اديتنا مصر وقول هندى ايه لمصر) . وطبعا بما ان الوطن مش كاتب علينا كمبيالات ولا وصولات امانة ، لذا فلا توجد قوة فى الدنيا تجبر احد ان يحب وطن لا يحبه بل يستمتع بتجريده من صفاته البشرية ..... الوطن الذى يحب لجنة السياسات ويحب جمال وعز وصفوت وسوزان وطبعا فوق كل دول صاحب الضربة الفوقية التحتية لشعب مصر سيادة الرئيس مبارك العمر (مبارك) هذا الوطن الذى يحب كل هؤلاء لا يمكن ابدا ان يجمعنا معاهم فى حبه ....

وللحديث بقية

محمد سعد

عضو الحركة الليبرالية المصرية - حلم-

[darlengs]

الاحداث اللي ذكرتها 00دي جزء من بعض الاحداث المعلنه او غير المعلنه00 اللي حصلت فعلااو لسا هتحصل 00 الانتماء للبلد موجود لكن الغضب موجود برضو و بشكل اكبر 00طبعا مش من البلد لكن من اللي بيحصل فيها 00تقدر تسمي كل الاحداث دي ردودفعل ناس غضبانه جدا ووصل غضبها لذروته و قررو اما* الهروب من سبب غضبهم سواء كان ظلم او قهر او حرمان و انعدام املهم في تصليح احوالهم بفرصه عمل شريف تتيحلهم الزواج و هو مطلب طبيعي لأي شاب او تطوير حياتهم بشكل طبيعي في تدرج وظيفي و الشعور بنجاحهم عمليا 00او الحصول علي ابسط متطلباتهم 00 خصوصا و وسائل الاعلام تتحفهم كل يوم برؤيه الشابات الخلابات الفاتنات 00 و الشبان المسبسبين اللي لابسين اخر موضه و عايراكبين افخر سيارات 00 و ما يرونه بأم اعينهم علي ابواب النوادي الهاي كلاس و الجامعات الخاصه من ظواهربذخ و غني مستفزه جدا( الفروق الطبقيه بقت بعد السما عن الارض)00 *او الانتقام من اللي اخد حقه و سابه تايه و معدم 00 و يبدا يسأل كل واحد نفسه لامتي هفضل كدا 00يا اهرب و ابقي غني يا الموت افضل منا عايش ميت 00 ( انا مش ببررلهم لكن بتخيل ظروفهم علشان احكم بحيادو بدون تعصب ) 00 لكن للأسف الناس الغضبانه دي صبت غضبها علي الجانب الخطأ 00 فواحد انتقم من بلده كلها 00و خانها 00 و اللي هيموتو نفسهم عشان يهربو ويسافرو و كأن حالهم هيبقا احسن00 الحياه بقت صعبه اوي ومفهوم الوطن اختلط دلوقتي بالحكم00 و الحكومه 00 اختلط بالظلم و و القهر و طالما مش باخد حقي يبقا دا مش وطني 00 لكن لو كل واحد عمل كدا يبقي فين وطنك اللي بيقبضك مرتبك ؟؟ 00 الوطن اكبر من كدا بكتير 00مش ممكن نلخصه في موقف وحش حصلنا او امل مش عرفين نحققه 00لازم في كل بيت و مهما كانت ظروفنا نزرع الضمير و الحب بدل التعصب و الانانيه و الكره في نفوس اولادنا 00 ربنا يستر من اللي جاي 00بس اكيد الظلم مش هيستمربلدنا حلوا اوي و غنيه بولادها و ثرواتها و و في الاخر لا يصح الا الصحيح 00