سؤال مجنني , هو الواحد لما يكون عاتب على بلده, هل يعتبر ذلك جلدا لذاته

[Ghost]

سؤال بسيط و عاوز اجابة بسيطة وموضوعية , تتكامل اركانها بالادلة الحسية و التاريخية :rolleyes:

سؤال حيرني و الامني كثيرا , هو الواحد لما يكون عاتب على بلده و واخد على خاطره منها, هل يعتبر ذلك جلدا لذاته أو نقصا في سلوكه

B)

تم تعديل 17 مايو 2007 بواسطة Ghost

[Gihan]

اعصابك بسسسسسس

لا مش كده يا ghost انت كده خوفت الناس ومحدش حيرد B)

انت وطنى ..وطنى..وطنى ..بس هدى نفسك كده :rolleyes:

[Ghost]

اعصابك بسسسسسس

لا مش كده يا ghost انت كده خوفت الناس ومحدش حيرد

انت وطنى ..وطنى..وطنى ..بس هدى نفسك كده

يا جيهان سيبيني كدة ............... ما تمسكنيش ............. ما حدش يحوشنييييييييييييي

[Ahmad Farahat]

ثق أن من سيحدثك الآن هو شخص يحلم بإنهاء دراسته والهجرة للعمل خارج البلد ما استطاع إلى هذا سبيلا.............

لكننا يا عزيزي ولا أنت نفسك تكره بلدك........

أنت غاضب لما يحدث فيها.......

أو غاضب عليها......

تتمنى لو رأيت فيها ما تتمناه ولكن ما كل ما يتمنى المرء يدركه..........

صدقني.........

في كثير من الأحيان أشعر بنقمة شديدة على العيش والعيشة واللي عايشينها..........

لكن باكتشف إن عروقي بتجري فيها ميتها رغم إنها ملوثة.......

ولحم كتافي من أكلها المسرطن........

ده غير منظر شوارعها اللي مش نضيفة.....

صدقني وأقسم بالله بحبها رغم ده كله..........

وأنا واثق إني مش غلطان.......

[Ghost]

انا اخذت العهد على نفسي ان احاول كل يوم اقول حكاية واقعية من الي انا اشوفة مش من كلام الجرائد او شئ من هذا القبيل

انا اعيش في مدينة كبيرة و جميلة ممكن تقول في downtown و هى في نفس الوقت عاصمة لأحدى محافظات الوجة البحري

يعني مش عايش بقرية علشان محدش يقول انت بتقول و بتحكي عن بلاد الهنالولوووو

باليل ضربت ماسورة المياة في نفس الشارع الذي اعيش فيه للمرة الثانية , بس بصراحة مش في نفس المكان الاول . و عيشنا ليلة ظريفة قوييييييييييييييي و كل ما نتصل باالمجلس يقولوا ايه يا عالم هو احنا ما وراناش غيركم و لا ايه ؟ ما فيه كذا ماسورة بتضرب كل يوم .. محدش بيعمل زي الي انتم بتعملوه دة!!!!!!!!!!!!!

و فين لما الناس و العمال جم , و يبدوا ان التاخير سببه الورديات بحيث ان كل ورديه عاوزة ترمي الحمل على الاخرى , و الوردية بتاعة بليل عاوزرة تدلع في الشغل حتى منتصف الليل علشان يصرفوا حاجة اسمها بدل سهر

العمال طبعا عاوزين الشاي و اللمبة و الجردل علشان يزيحوا المياة الى الشارع الذي اصبح بركة من الطين و المياة الضحلة

و الغريبة اني شفتهم مهتمين قوي بالشمعة , يضئوا شمعة في الحفرة - ما كناش اتصرفنا في الكشاف بعد - علشان ينشلوا المياة , و بصراحة فكرة شيطانيةةةةةةةةةةةةة و الشمعة مش بتطفي علشان ما فيش تيار هواء تحت في الحفرة و بيشوفوا الشغل كويس

مش عاوز اطول . بعد ما طلعوا روحنا في البرد و طلع روحهم كمان . سدوا الحفرة بما تيسر من الطين و التراب و بعدين الحفرة لسة عاوزة ردم و تراب تاني

هنا نادى احدهم ..... العصاية ..؟؟ عصاية ايه دية كمان - فكرني ببوجي و طمطم أو بفلم اسماعيل يس لما كان راكب الطيارة مع الشاويش عطية و مش عارف يسوق الطيارة -

عاوزين يا سيدي عصاية علشان يغرسوها في الحفرة و يحطوا عليها كيس علشان محدش يقع في الحفرة

و في النهاية اخدوا المعلوم و الي فية النصيب و الى اللقاء في حكاية اخرى

[kokomen]

سؤال بسيط و عاوز اجابة بسيطة علشان ما ازهقش .......... مش كفاية البلد مزهانييييييييي wst::

سؤال مجنني بجد و الله , هو الواحد لما يكرة البلد بالي فيها يعتبر ذلك نقصا في الوطنية ....... هو صحيح احنا كلنا و لا شربنا اية بالوطنية ديه

wst::

الأخ Ghost

هو فيه حد يكره البلد باللى فيها .. على مهلك علينا يا أخى .. أخنا كلنا وطنية والحمد لله .. مصر بخير مهما حصل .. يعنى أي مشكلة تحصل نلعن كل

شئ ؟؟؟ يا أخي بلدنا بخير بحمد الله وسوف تحل كل المشاكل وسيعم الرخاء مصر الحبيبة بأذن الله .. كن متفائل .. تفائلوا بالخير تجدوه

والوطنية يا أخى مزروعة فينا .... مصر هي أمي نيلها هو دمي ... عمار يا مصر .. يا أرض الكنانة .. الخير فيكي الى يوم القيامة بأذن الله

أبو أحمد الأسكندراني

wst::

wst:: :happy:

[Ghost]

والوطنية يا أخى مزروعة فينا .... مصر هي أمي نيلها هو دمي

اسكت يا ابو احمد يا حبيبي wst::

مش مصر مطلعتش أمي ............ طلعت مراة ابوييييييييي wst::

بقول لها مش انت امي حبيبتي طلعت لسانها و تقولي امك ديه ايه يا اض

روح دور على امك يا ابني بعيد عني ,, ده ايه يا خوي تلقيح الجتت دي

[Ghost]

من الحكايات المصرية بتعتي

يا جماعة حد يديني اي تفسير عن الزحمة الي في كل حتة

اروح اشتر رغفين عيش ... بجنية يعني , و الله بقالي اكتر من شهرين ما اشتريت .. اروح اشوف الزحمة و اقوم مندس زي العيال علشان اقف قدام الشباك و اقول " خمس ترغفة بربع جنية الله يخليك " و على دة الحال

اروح ادفع فاتورة التليفون .. تطلع روحي الى بارئها حتى اخرج من السنترال .. زحمة و عرق و مفيش air conditioner اوههههه نووووووو

طوابير علشان اجيب اي حاجة ؟؟؟ اروح المستشفى , الناس المرضى بالطابور و الله على غرفة العمليات . و الله شفت بعينى في عمليات الرمد الناس لبسة حاجة خضراء غير مناسبة للادامين فضلا عن البهائم و مفترشين الارض و كل شويه واحد خارج من حجرة العمليات - في ايدة كوباية الشاي اي و الله - ينادي على الي عليه الدور

سالت عن مكان الواحد يرتاح فيه . قالوا حديقة الحيوان . روحت في اجازة عيد العمال لاجد الزحمة و كل شوية ربع و نص جنية للسايس علشان ناكل الحيونات يمكن نكسب فيها ثواب

طب الواحد يروح فين . ده حتى بيقولوا السجون مكتظة بالسجناء اليومين دول و اليومين الي جاين هيكون اكتر فلازم تحجز من الان

لو عاوز تدخل بسرعة - وبدون واسطة- يبقى عليك و على المظاهرات و اللافتات المنددة بحكم مبارك و تكون في ميدان عام

حد يرد علي قبل ما اتجنن

[Ghost]

التلوث السمعي مش دية مشكلة بتحس بيها ؟

مش ديه مسئولية البلد و الناس ... اقصد ان الحكومة تعملك صداع في دماغك و الناس تعمل الي هيه عوزاة علشان تبسط نفسها و تروح انت في الف داهية

النهاردة الواحد يصحى على و احد مشغل دي جي علشان عندة قراءة فاتحة و التاني علشان بيفتح محل احذيه

كل ساعة و التانية عربية كارو بحمار و ميكروفون يسمع الي على بعد 10 ك ينادي و يقول اي حاجة قديمة للبيع اي حديد زهر للبيع اي غسالة تلاجة المونيا للبيع .......... مش ممكن

لو واقف في الشارع يجيلك صرع من الكلاكسيات بتاعه العربيات

الافراح و الليالي الملاح

و تركب عربية اجرة و تلاقي نطع مشغل شريط لجورج ووسوف يخلى الواحد هيرجع الي في بطنة

مش كل دة سياسة ناس و بلد ؟؟؟ و لسه بتقولوا الوطنية و مصر هي امي ده مصر الي هتجيب للواحد الكافيه ؟؟؟؟؟؟؟؟؟؟؟؟؟ بعيد عنكم

[Ghost]

يا جماعة انا فعلا عاوز مشاركة منكم , بلاش الفرجة و بس :lol:

هو الي انا بقوله دة غلط :lol:

كلامي اليوم عن التعليم بمناسبة ان في واحد بيكلمني النهاردة واخد دبلوم و يقول يا ريتهم كانوا سقطوني في الانجليزي علشان كنت افهم و اذاكر

باختصار الباشا ده بتقدم للسفر علشان يشتغل في دولة خليجية . كلة تمام smk:

بس الانجليزي مفيش خالصصصصصصصصصصصصصصصصصصصصصصصصصصصصصصصص

كانوا محتاجين حتى لو يعرف يتهته بالانجليزي .......... مفيشششششششششش

قال و الله انا بنجح في الانجليزي بطريقة حادي بادي كرنب زبادي :lol:

علشان متكلمش كتير عن قضية التعليم في مصر المحروسة ( الموضوع عاوز منتدي لوحده ) ساضع صورة واحد و عاوز كبل واحد يقول بجد رايه فيها ( نخلي عندنا همه عالية و ناقش بعض يمكن اكون غلطان )

[مهيب]

مع احترامى الشديد .. أنت لا تريد نقاشا .. راجع الأسلوب الذى كتبت به تعليقك على الموضوع

"بتوع الوطنية و الفزلكة ما يدخلوش علشان ما تجننش عليهم"

ودعنى أسر لك هامسا .. كل أعضاء المنتدى - ربما باستثنائك - من (بتوع الوطنية و الفزلكة) .. ولا يغرنك انتقادهم أحيانا فهذا من باب الاصلاح و ليس الأمر كراهية كما قد يتوهم البعض ..

أما من يكرهها باللى فيها .. فلا حاجة بنا لجعله يحبها أو يحب من فيها .. ذلك شأنه الخاص .. كما أننى حقا لا أعرف ماذا تريد مناقشته .. ذلك لأنك لم تفصح عنه .. فقط أنت تريد أن تسرد أشياء عن ماسورة المياه فى شارعكم و صديقك الذى كان ينجح فى امتحان الانجليزية بالحظ ثم فوجىء أنه لا يعرف شيئا و أشياءا من هذا القبيل ..

لكنى و الكثير هنا لم نصادف هذا .. لقد درست فى مدارس حكومية تماما .. و تخرجت و من كلية حكومية و ليست جامعة خاصة .. و سافرت و عملت .. و لغتى الانجليزية مثار اعجاب زملائى .. لذلك - واسمح لى - لا أتعاطف مع ما تراه أنت انهيارا .. و لا أكره بلدى بأى حال من الأحوال

مهيب

[Ghost]

شكرا يا مهيب على المشاركة و ارجو ان يتسع صدرك للرد :lol:

تم تعديل 5 مايو 2007 بواسطة Ghost

[Ghost]

مع احترامى الشديد .. أنت لا تريد نقاشا .. راجع الأسلوب الذى كتبت به تعليقك على الموضوع

ده الموضوع كدة دخل في الجد .... على فكرة . انا ما قصدت الحجر على الاخوة او اي مشترك ان يدخل ليشارك و يرد ربما يعود ذلك لظاهر الجملة التعليقية

"بتوع الوطنية و الفزلكة ما يدخلوش علشان ما تجننش عليهم"

انا قصدت من التخفيف و الضحك و كذلك مناقشة الموضوع ببساطة و بدون مطولات

اسف قد اكون اسات اختيار الجملة التعليقية لكن اظن ان هناك من فهم قصدي

ولا يغرنك انتقادهم أحيانا فهذا من باب الاصلاح و ليس الأمر كراهية كما قد يتوهم البعض

على فكرة انا مصري و مسلم ولا أخون وطني او اسلامي ابدا واتمنى ان اكون على الحق و اموت عليه

ثانيا . انت هنا ممكن بتتكلم على نسبة من المشاركين و اكيد مش كل المشاركين او الشعب في مصر المحروسة !!! بيتكلم من باب الاصلاح و فقط

انا يا اخي عايش في البلد دية و وسط الناس و مش قاعد في قصر التين او في الهلتون و عارف و شايف الناس . ممكن واحد - بعد ما وصل بة الياس و القلق - يبيع اي حاجة حتى اسرار بلده و يخرج من مصر المحروسة

ممكن ادلل على المئات الي ماتوا غرقا في هجرة غير شرعية

موضوع التجسس

الشباب الي على القهوة , روح كلمهم و شوف هيقولك اية و ابقى تعالى احكي لي

العمال الي عاملة اضرابات كل يوم قلهم سؤال واحد : تقعد في مصر المحروسة و تسعى فى الاصلاح و تمشي في مسيرة التقويم و الاحتمال و لا عقد في الخليج ؟؟؟

خلي بالك من كلامة ,,, و تعالى احكي .... بس بلاش تقول السباب الي هيقوله في البلد و الي فيها

و خلي بالك انا بقول انا مصري و مسلم و مش ممكن اخون علشان متفكرش اني اسرائيلى و لا امريكي و لا ايه حاجة

لكنى و الكثير هنا لم نصادف هذا .. لقد درست فى مدارس حكومية تماما .. و تخرجت و من كلية حكومية و ليست جامعة خاصة .. و سافرت و عملت .. و لغتى الانجليزية مثار اعجاب زملائى .. لذلك - واسمح لى - لا أتعاطف مع ما تراه أنت انهيارا .. و لا أكره بلدى بأى حال من الأحوال

معلش في الحته ديه انت خسرت كل رصيدك

انت عاوز تقنعني انك تخرجت من عند الحكومة و بتتكلم انجليزي fluent

بص اللي بيكلمك دة متخرج من كليات القمة - كما يدعون - و اشتغلت مع امركين في يوم من الايام و مش عاوز اقولك و اطول اني اضطرت الغي كل ما تعلمته من الغة وبدات من اول و جديد بس مش من مناهج التربية و التعليم

من منهاج كمبردج

انا سيب الماجيستر و مش راضي اكمل فية علشان الدكتور مش بس مبيعرفششششششش - طبعا دة مش حال كل الدكاترة - لا دة المعاملة بين الطالب و الاستاذ هى معاملة العبد للسيد . وركاكة الابحاث و كل واحد بيشوف بحث من الخارج و يلقط منه + التزوير في النتائج بتاعة التجارب علشان تمشي مع الLogic ديه حاجة معروفه و مشهورة و انا شفتها بدل المرة ستين مرة

انا اطلعت على ابحاث بالخارج و مواقع الجامعات الامريكية و البرطانية و الكندية وشفت الفرق

ابقى روح شوف الفرق .. على فكرة جامعة القاهرة طالعةفي حدود 4000 على جامعات العالم و اسرائيل فيها 3 -4 جامعات و كذلك جنوب افرقيا من احسن 500 على العالم

انا لي تجربه شخصية من خلال الاحتكاك بدكاترة كندا خلاصاتنا ان احنا مناهجنغ متخلفة جدا و ان الي احنا بندرسه ده ينفع للسبيعنيات القرن الماضى

جاي تتكلم عن التعليم ؟؟؟ وفي مصر ؟؟ طب شوف حل للدروس الخصوصية و فساد ذمم المدرسين

طب شوف الاخطاء التاريخية في كتب التاريخ

طب الاخطاء العلمية في العلوم

و لغتى الانجليزية مثار اعجاب زملائى

بجد اما انك فعلا ممتاز في الانجليزي .,, اما انك مش واخد بالك انك مش كويس لان اصاحبك برضة مش اد كده

انا كنت مفكر نفسي باشا في الانجليزي , مفكر اني لما جبت نمرة حلوة في الثانوية العامة . و كنت في الجامعة بتكلم فرانكواربيك من كتر الانجليزي الي بندرسه

لكن في الاخر عرفت اني اجهل من الجهول و الاعتراف بداية التصحيح و روحت ادرس من اول و جديد علشان اعرف امشي صح

اعرض نفسك على التوفيل الدولي و قولي النتيجه لو سمحت

مش قلت انا حطيت الصورة علشان متكلمش . اديك نكشتني و خلتني اتكلم

و سلام ........ مفيش زعل احنا في مناقشة

تم تعديل 5 مايو 2007 بواسطة Ghost

[مهيب]

الحقيقة زى ما قلتلك .. هذا الموضوع قد تم بحثه فى موضوع جلد الذات .. يمكنك مراجعته اذا أردت ..

ثانيا فيم يتعلق بموضوع اللغة الانجليزية .. فزملائى الذين تحدثت معهم هم - فى معظمهم - بريطانيين و أمريكان و أسترالين .. أى أن (الحال ليس من بعضه) ان كان هذا ما قصدته ... الرجاء عدم الحكم الفورى على من تحادثهم عن طريق الانترنت أو المنتديات لأنك لا تعرف شيئا عن حياتهم الحقيقية ..

أنا أردت فقط تسجيل اعتراضى على اللهجة و أسلوب الحديث - و أعتقد أن هذا من حقى - دون اهانة أو تجريح .. و كما قلت آنفا .. فان من يكره بلده بمن فيها .. فهذا شأنه الخاص .. و لا تتعشم كثيرا فى وجود من سيحاول اقناعك بالعكس لسببين ..

السبب الأول .. أن الآخرين لا يهمه مقدرا حبك أو كرهك لبلدك على أساس أن هذا ينعكس على حياتك أنت فقط ..

و السبب الثانى .. أنك منذ البداية قد أظهرت منهجك فى الاعتراض على أى كلام (يبدو وطنيا أو شعاراتيا) من وجهة نظرك

مهيب

[badroora]

Dear. Ghost

هدى اعصابك دا اولا :lol:

ثانيا انت كتبت عنوان يوحى لى بانك تكره البلد وتتسأل اهل نقصا فى الوطنية ؟ انت الوحيد الذى تستطيع تحديد متى قوة وصلابة وانتمائك لوطنك.

ثالثا

هنا فرق بين اوضاع داخل البلد انت وانا وكلنا غير راضين عنها ولكننا على الجانب الاخر لا نكره البلد ككل انظر الى الايجابيات ومش كل حاجة فى البلد وحشة ممكن يكون الوحش كتير ولكن كل بلد وكل مجتمع فيه اهمال وناس مش بشوف شغلها كويس وصدقنى بلدنا افضل من غيرها بكتير.

هدى اعصابك وان شاء الله نناشد بتوع المجلس يصلحوا المصورة ونكلم بتاع الفرن يبعتلك عيش لحد البيت وابقي طمنى عالاخبار بعد كدا

:lol: دى بقي وردى بلدى من مصر الجميلة يلا عيب حب على راس البلد اللى بتكرهها :lol:

حياتى نجفة

[Ghost]

شكرا مهيب

انا قرات موضوع جلد الذات و لي ملاحظات

انك اقررت انك متعصب لمصر و هذا لا يليق لاحد على حسب وجه نظري و الصحيح ان تكو ن متعصب للحق ...............هناك فرق يتضح من خلال هذا المثال ...... لو اعتدت مثلا مصر على لبيا - و هذا حصل بالطائرات ايام السادات - و كان اعتداء سافر و لا مبرر لة

القران يقول ( فقاتلوا التي تبغي) و مصر تقولك ( انت ابني حبيبي الي شربت من نيلي و عشت على ترابي و تظللت بسمائي ... الخ كلام الانشاء الي بنسمعة في الاعياد زي 7 اكتوبر) هتعمل ايه ؟؟ سؤال صعب مش كده

انك شوفت عينه من المصرين و من المشاركين على ما اقول , و انت يبدو عايش خارج مصر , و ممكن اقولك ما شوفتش الايام الي ااناس بتشوفها اليومين دول ....... طب هجيلك زهق من البلد و الي فيها ازاي ؟؟؟؟؟؟؟؟؟؟؟

فيم يتعلق بموضوع اللغة الانجليزية .. فزملائى الذين تحدثت معهم هم - فى معظمهم - بريطانيين و أمريكان و أسترالين .. أى أن (الحال ليس من بعضه) ان كان هذا ما قصدته ... الرجاء عدم الحكم الفورى على من تحادثهم عن طريق الانترنت أو المنتديات لأنك لا تعرف شيئا عن حياتهم الحقيقية ..

لو راجعت كلامي هتلاقي اني ما حكمتش عليك او على اي احد ......... انا قلت

اما انك فعلا ممتاز في الانجليزي .,, اما انك مش واخد بالك انك مش كويس لان اصاحبك برضة مش اد كده

لكن الاعتراض هو انك بتستخدم الانجليزي بتاع الحكومه و تروح تكلم به الاجانب ؟؟

فيه فرق بين ال governmental study and english practice

أنا أردت فقط تسجيل اعتراضى على اللهجة و أسلوب الحديث - و أعتقد أن هذا من حقى - دون اهانة أو تجريح .. و كما قلت آنفا .. فان من يكره بلده بمن فيها .. فهذا شأنه الخاص

انا فعلا استخدم لهجه قاسية جدا لكن في حدود الادب و التقويم ( زي الاب الي بيضرب ابنه علشان ما بيصليش او بيذاكر)

عاوز اقولك حاجة بجد فعلا و ما تزعلش علشان ديه حقيقة

انا كان لي صديق زيك بالضبط منذ حوالي 3 سنوات ... و معلش كان عايش في الدور قوي قوي ( للعلم ده كان متربي في الكويت و راح بلاد اوربية زي اسبانيا و كان ممتاز في الانجليزي , من الاخر مقعدش في مصر المحروسة طيلة عمره) لو حبيت تشوفة دلوقتي قولي علشان تعرف من كان يهيم عشقا في مصر

سؤال اخير . انت عارف عدد العلماء الهاربين من مصر و مش عاوزين يرجعوا ( هجرة العقول) ؟ طب عارف عدد الباحثين العلمين الي برده مش عاوزين يرجعوا ؟

ممكن ترجع و تسال يرجعوا؟؟؟؟؟؟ ليه؟؟؟؟؟؟؟؟

اقولك كان واخدين منح تعليميه على حساب الدولة و المفروض يرجعوا علشان يفيدوا مصر المحروسة

باتظار ردك

[Ghost]

نرجو من المشرفين و جميع الاخوة المشاركة في هذا الحوار الهام

و ذلك لمعرفه ارائهم و تصحيح الخطئ من اقوالنا :lol: :lol:

تم تعديل 5 مايو 2007 بواسطة Ghost

[Ghost]

اريد هنا ان اترك القلم للاستاذ خيري رمضان المحرر بالمصري اليوم و انقل له هذا الكلام

اختلطت المفاهيم، فلم يعد لدينا تعريف لرجل الأعمال، أصبح السمسار، التاجر، المهرب، وغيرهم ممن لا يقدمون لهذا المجتمع أي قيمة مضافة، يطلق عليهم رجال أعمال، كما اختلطت الأدوار، فأصبح رجل الأعمال عضوا في مجلس الشعب ووزيرا، فاختفت الشفافية وأصبحنا نسمع ونقرأ كل يوم عن رجل أعمال سياسي متهم بالفساد، ولم ينج وزراء - كانت سمعتهم طيبة قبل العمل السياسي- من الاتهامات باستغلال نفوذهم لتحقيق مصالح شخصية.

أما إذا رصدنا واقع الانفجار العمالي في مصر خلال الشهور الفائتة، لأيقنا غياب دور «اتحاد العمال» فبعد أن كان صوتا للعمال، ارتمي في فراش الحكومة، وأصبح سوطا علي العمال، ولو كان هناك اتحاد حقيقي يقوم بدور المفاوض مع الحكومة باسم من يمثلهم ما شهدنا هذه الإضرابات والاعتصامات وأنقذنا مليارات الجنيهات التي أهدرناها، وبعد أن تعلم العمال أسلوب الضغط المباشر علي الحكومة للحصول علي حقوقهم.

أما المزارعون في مصر -البلد الزراعي- فحالهم يرثي له وحال زراعتنا أصبح مخجلا، انظروا إلي تدهور إنتاجنا من الأرز والقمح والقطن، ولم نسمع يوما عن دور لاتحاد المزارعين أو نقابة الزرارعيين وسنفيق يوما علي ثورة هؤلاء المزارعين الذين يصرخون من غياب السماد وسوئه.

إن أحد روافد الديمقراطية في مصر، هو السماح والحرص والتشجيع لدعم قيام جمعيات واتحادات، يمكنها التعبير عن جموع أعضائها، تدير الحوار مع الحكومة للحصول علي حقوقهم للتواصل مع القوي السياسية دون التحالف معها ودون البحث عن مكاسب خاصة تصب في جيوب أفراد معدودين، وتكون النتيجة هي مزيداً من التخلف والظلم والثورة.

[ايهاب سالم]

سؤال مجنني بجد و الله , هو الواحد لما يكرة البلد بالي فيها يعتبر ذلك نقصا في الوطنية

:blink:

أبدا أبدا

إنت كده تبقى طبيعي خالص

الوطن مش المكان اللي إتولدت و عشت فيه بدون إختيار منك

الوطن هو المكان اللي تعيش فيه سعيد و ناجح و مطمئن على كرامتك وواخد حقك ...... الخ

يعني باختصار كل الحاجات اللي مش هتلاقيها في الوطن حاليا

تم تعديل 6 مايو 2007 بواسطة ايهاب سالم

[Doofy]

===============================================================================

سؤال مجنني بجد و الله , هو الواحد لما يكرة البلد بالي فيها يعتبر ذلك نقصا في الوطنية ....... هو صحيح احنا كلنا و لا شربنا اية بالوطنية ديه

الأخ Ghost

واضح من كلامك انك لسه شاب زايي وواضح كمان انك زعلان من البلد واللي فيها...

أخي الفاضل الحالة اللي انت فيها دي كتير مننا حس بيها وكانت النتيجة ان كتير منا هاجروا خارج البلاد واختاروا انهم يعيشوا في

بيئه نظيفة ويحصلوا على وظيفة مستقرة ويتعامل مع بنآدمين مرتاحيين ذهنيا وماديا ودول القسم الإيجابي...وفيه قسم تاني أختار

الجريمة والخروج على القانون والمتاجرة في الحرام ...

أنت جبت من الآخر ووصلت لحالة اليأس اللتي يتمناها من أراد لنا أن نصل إلى تلك الحالة اللي المفروض تكون حالة شاذة لتصبح بكل أسف حالة عامة من عدم الإنتماء وكره للبلاد والعباد وتمني الخلاص من كل شئ يربطنا بهم ...

ان مش هقول متفكرش انت هتاخد أيه من مصر وفكر انت هتديلها أيه ولكن هسألك

هل مصر كبلد ونيل وارض أغلبيته شعب طيب ومعطاء ومتسامح يستحقان منا تلك القسوة واليأس ...؟؟؟