قانون ساكسونيا (موقف مؤثر حزنت لأجله كثيراً)

[GoldenTiger]

أنا جاتني الرسالة دي على الإيميل النهاردة وبصراحة زعلت قوي لما قرتها

وللأسف هوه ده اللي بيحصل في مصر

للأسف

وللأسف كمان كان ممكن أنا أو أنت أو أي حد نكون الضحية بدل الراجل الغلبان ده

أسيبكوا تقروا اللي حصل

قــانــون سـاكســونيـا

انا معظم أصحابي فى كلية الشرطة أو الكليات العسكرية.. "واحد منهم" بيحكيلي موقف حصل معاه

الموقف ده أثّر فيّا جامد

كان راكب عربيته هوّ واتنين من أصحابه وزمايله فى الكلية وماشي " مخالف " في شارع

وسوّاق عربيّة نقل طالع من شارع جانبى داخل الشارع " داخل سليم فى اتجاه الشارع " السواق ماتخيّلش ان فيه حد جاي مخالف وبالتالي كان هايخبطهم بس ربنا ستر.. السواق بيزعق لصاحبى وبيقوله مش تفتّح.. طبعاً صاحبنا دمه فار .. إزاي يقول للباشا كده وهو ظابط شرطة باعتبار ماسيكون في المستقبل

نزل هو وأصحابه من العربية ونزّلوا السواق وهاتك يا ضرب.. وشتايم إيه بقى.. مش طلبة كلية شرطة

السواق طبعاً قعد يعيّط ويقول هاروح القسم.. هاكتب بلاغ.. فواحد فيهم قاله : روح يابن**** قولّه فلان بيه ضربني

صاحبي بيحكيلي وبيقول بالنّص

" كان فاكر إن المركز هيحميه "

********

السوّاق طلع على القسم وهمّ وراه.. قابلوا ملازم واقف فى الجنينة بتاعة القسم فالسواق قعد يعيّط ويقول ضربوني يابيه.. دول لما شافوه بيعيط مااكتفوش ونِزلوا فوقه ضرب تاني لحد ما المخبرين جم وخدوه .. وهمّ طلعوا على نائب المأمور " راجل محترم برتبة عقيد " .. بيحكوا للضابط اللي حصل الاّ والمخبرين داخلين بالسواق

السواق قعد يعيّط ويقول

ضربونى يابيه

وقالولى يابن ****.. انا امي **** يابيه ؟؟ انا امي **** ؟؟

العقيد قاله دول مش ضباط ؟؟ قاله آه يابيه.. قاله يبقى امك **** !!.. ونزل فوقه ضرب يمكن أشد من الضرب اللى ضربوهوله

!!

********

طبعاً "صاحبي" جاي يحكيلي وهو فرحان بالانتصار على السواق الشرير الوحش

بس انا لما سمعت الحكاية دى حسيت ان فيه حاجة انكسرت جوايا

حسيت بنفس الشعور بالذل والقهر والضعـف اللي حس بيه السواق علشان مالوش ظهر

حسيت بشي بيعصـر قلبي لما سمعت صاحبي وهو بيقول ويكـرّر

" كان فاكر إنّ المركز هيحميه "

********

لو القسم مايحميش الغلابة .. مين يحميهم ؟؟؟؟

ولما سألتـه: هل من حقكم قانوناً انكم تعملوا كده؟؟

قالي: ربنا يخليلنا قانون الطوارئ

ساعتها مقدرتش أقول غير: حسبي الله ونعم الوكيل

********

قال الله تعالى

"وسيعلم الذين ظلموا اي منقلب ينقلبون"

صدق الله العظيم

سورة الشعراء - آية 227

********

[فــيــروز]

أرجو أن توصّل لصديقك الفخور جمله سمعتها على لسان المذيعه / ليلى رستم فى حلقة "العاشره مساء" التى استضافتها من فتره .. كانت تحكى عن صديقه لها صادرت ثورة يوليو أملاك أسرتها بالكامل و تركتهم معوزين و تقول : لا تظنّوا أن الظلم سيقف عند طبقه أو درجه ولن يتجاوزها إلى ما يليها .. لا تفرحوا كثيرا و أنت تشاهدون غيركم يظلم -بضم الياء- و تعتقدوا أن الظلم بعيد عنكم .. و قد صدقت نبوءة هذه السيّده بعد كل هذه السنين ..

[عبدالله عكاشه]

اخى العزيز : السلام عليكم

انا متاكد ان هذه الرواية التى حكاها لك صديقك ليست صادقة كل الصدق وانها ان كانت صادقة فى شق منها

فلان السائق رجل جاهل بحقوقة سلبى فى الحصول عليها ولو انة تمسك بحقه وتوجة الى مكتب محامى او جمعيات حقوق الانسان لكان صديقك الفخور بنفسة ظل يبكى ويبكى نادما على ما اقترفت ياه طوال عمره واليك بيانات جمعية حقوقيه تعمل بهدف مناصرة المطالبين بالعدالة .

( جمعية انصار العدالة للمساعدات القضائية وحقوق الانسان) 10ممر احمد خلف المتفرع من شارع رايل بحلوان

ت\ف: 025599353

اميل| anssar_eladalla@yahoo,com

[Ghost]

للاسف ما قولته يحتمل الصدق من عده وجوه

فالشرطة في مصر من اصغر امين شرطة الى اكبر لواء يتجاوز كل الحدود باعتماده على قانون الطوارئ المحترم ( هذا لا ينفي ان هناك من الشرطة من هو ممتاز و يمكن بيندم على اليوم الي شاف فيه الشرطة و قرفها - هناك على ما اتذكر صف ضابط رفض الخدمة و عوقب بالحبس لان خدمته كانت هي حماية السفارة الاسرائلية )

فمثلا في المرور تجد كل المخالفات الخاصة بالضباط و الهيئة القضائية للاسف يتم رفعها بمجرد ان يعرف ان صاحبها من الداخليه و تجاوز الاشارات فعلا من اكثرهم تاتي دون خوف لانهم عارفين نهايتها

لي ابن خاله باع سيارته بمبلغ معين + 2000 جنيه مكسب زيادة علشان نمرة العربية مسجلة باسم واحد من اصحاب المعالي ( يعني مفيش مخالفات)

يا عم روح و شوف المترو , هتلاقي كل الي بينط من فوق الحوجز ( مش بيدفع تذاكر ) هم من الشرطة سواء العاملين في المترو او لا

اي تاكسي هو عربية خاصة لشرطة المرور و عربيات الاجرة كمان ...... وده انا و غيري بيشفوه كتير

وجعت دماغكم

سلام

[GoldenTiger]

أولاً الرسالة دي لم تأتيني من صديق وإنما جائتني من مجموعة بريدية

ولكن أنا أصدق كل حرف فيها لعلمي بإمكانية حدوث كل هذا وأكثر منه كمان

ولإني بشوف حجات زي دي كتير وبسمع عنها وبسمع عن حجات أكتر من كدة كمان

للأسف

وجزاك الله خيراً يا أستاذ عبد الله على تنبيهك بخصوص جمعية حقوق الإنسان بس تعتقد هتعمل إيه مع ظباط الشرطة اللي قانون الطوارئ في صفهم واللي زاد وغطى التعديل الدستوري الجديد

أنا بس بقول حسبنا الله ونعم الوكيل فيهم

وأنا معاك يا أستاذ جوست في إن فيه ناس منهم محترمين جداً ومنهم اللي بيندم على اليوم اللي شاف فيه الشرطة

وأنا أعرف ناس محترمين زي دول كتير مستشارين وشرطة

بس للأسف الأكثرية للجزء الثاني

حسبي الله ونعم الوكيل فيهم وفي اللي بيعملوه في الناس