أبو بلاش ..........

[The Professor]

زمان , والله يرحم أيام زمان . كان يطلق على نائب البرلمان في مصر , النائب المحترم... فلقب المحترم كان دائما يقترن بكلمة النائب وده كنا نسمع عنه او نقرأه في كتبنا أو حتى نشوفه في أفلامنا ومسلسلاتنا .. وكان النائب دايما صاحب رسالة , رجل مثقف حتى لو كان فلاح أو عامل , يناقش بفكر ووعى دي الصورة اللي وصلت لنا..

والآن , ما نراه من صراع على كرسي البرلمان يصل إلى الرشوة العلنية و التشهير والمقالب السخيفة والتربيطات ووصل حتى إلى محاولات الاغتيال بل و القتل لا ينم عن مدى اهتمام هذا المرشح بخدمة ابناء دائرته ومن ثم خدمة مجتمعه ووطنه فالموضوع كبير وكبير قوي كما تعلمون حضراتكم... فالوصول للكرسي يعني الوصول إلى الهبر والهبش والبلطجة و تهريب المخدرات النفوذ وقائمة اللا اخلاقيات طويلة والأمثلة كثيرة جدا.. إلا من رحم ربي بطبيعة الحال

طبعا كل هذا معروف للجميع لكن لماذا هذه المقدمة؟

الحقيقة انه حدث شيء ما من عضو يفترض انه محترم وهذا الشيء لم يكن ضمن قائمة المخالفات المعروفه التي يرتكبها بعض ممن لا يستحقون الكرسي الذي يجلسون عليه تحت قبة البرلمان لن أخوض فيه وسأترككم تقرأون ما فعله هذا النائب الغير محترم

أبو بلاش!

بقلم :محمد عمر

المفروض ان فيه لجنة من 'كبارات' مجلسنا الموقر حتحقق قريبا مع احد الأعضاء بتهمة ان المجلس واللي براه شافوه في اوضاع 'مخلة' علي شريط سي.دي.. وانا ماليش دعوة بالتحقيق ولا بنتائجه لانه مش موضوعي.. لان موضوعي ليه بقي ده حصل.. اقول لكم.. القصة وما فيها ان فيه بعض نواب وكمان مسئولين عايزين ياخدوا أي حاجة 'بلوشي'، ويعيشوا سفلقة مش فاهمين ان مفيش حاجة في الدنيا 'ببلاش' وهو ده اللي حصل مع صاحبنا.. لقي 'اتنين' من ابوبلاش.. بيلفوا عليه.. الواد افتكر انه الجن.. العفريت.. اللي مدوخ الحريمات، وعليه العين.. ماكدبش خبر.. سحبوه من ياقة قميصه.. وهيء هيء مع كلمتين 'سخنوه' وادوله معاد.. وعلشان يأكدوا له انه واد محصلش قالوا له: ما تشغلش مخك.. الليلة كلها علي حسابنا.. وعندنا.. لا حتدفع ولا حتتكلف حاجة احنا.. اللي عايزينك.. يا ابوالفتاكة واللمعان.. ده كفاية القعدة بقربك.. هوه احنا نطول اننا حتي نقف نتكلم مع العضو 'الغضنفر' اللي بيشخط في اجدعها وزير، وعمال يكيل اتهامات لكل اللي يقرب منه.. احني مستنينك يا امور الساعة 6 في شقة أم نوسة.. عارفها ولا نديك العنوان.. وطبعا ابوالدناوة والطفاسة والعيش سفلقة.. شرب المقلب ما فهمش 'الفولة' ولا كان دريان من كتر نصاحته وألمعيته ان الاتنين مزقوقين عليه.. والعملية كلها كان مدفوع ثمنها مقدما، وماشغلش مخه.. بأمارة ايه وعلشان ايه.. او ايه اللي فيه يخلي حد يبصله.. كده.. من الباب للطاق.. وكمان يعزموه علي نفسهم علشان خاطر جمال شنباته وسحنته.. وما كدبش الزبون خبر.. ضرب له نفسين برضه علي حساب واحد في القهوة.. وراح برجليه.. الي الشقة.. وهناك تم تظبيطه وتصويره.. ثم جاء وقت دفع الحساب.. فتم 'فضحه'، وكشف ستره.. اليس فيما حدث درس لكل من في السلطة.. الذين يعتقدون بعد ان تفتح لهم ابوابها انهم اجمل واذكي رجالة في الدنيا والكل بيتهافت علي خدمتهم.. والكل مستعد ان يقدم لهم ما يريدون لوجه الله.. اتعظوا.. الحكاية مش ناقصة سي.ديهات.