العرب قادمون .... قادمون في سوق العقارات المصري

[felfel]

إلا بالمناسبة مين توتو اللى على كابوتو - انا بجد مقدرتش أمسك نفسى من الضحك الهيستيرى لما أريت الجملة

........سؤال هو توتو بية دة لية أى علاقة بحوار المليارت ...... دة حد مهم يعنى ؟

[عصام أبوالفتح]

اللذيد ان كل الناس اصبحت تقيم شققها بالاسعار الجديدة وبعضهم فرحان انه بقى مليونير

والكثيرين سيفكرون جديا فى البيع بهذه الاسعار .. سيزداد المعروض ليزاحم السماسرة

المهم من يبيع قبل الاخر ( راجع نظرية ماسك الجمرة - ابجديات البورصة ) - لان الجميع مقتنعين ان ما فى ايديهم لا يستحق فعليا هذا السعر

----------------------------

بس رجاء يا اخى الفاضل س س وباقى الاخوة لو عندكم معلومة عن ثمن الارض اللى خدها طلعت مصطفى ( 8 الاف فدان )

او الارض اللى خدها بحق الانتفاع الامير الوليد فى توشكى وهى كما بكتابه _الوليد- ومتتخضش 10 الاف هكتار .. يعنى 100 مليون مترمربع

علما بانه لم تعلن اى معلومات عن الامور المالية للمشروعين !!!!!!!!!

تم تعديل 20 مايو 2007 بواسطة عصام أبوالفتح

[عصام أبوالفتح]

محدش يفهم انى ضد توشكى بالعكس انا عايز كل تجارب شركات العقارات الاجنبية ومنها العربية تكون زى الوليد

حق انتفاع وامتيازات لمدة محددة وبس .. زى رخصة الجوال وزى مترو الانفاق

انما تطلع مدينتى كده من تحت الارض فجاة فده اللى استعجب له و استعجب ان الوليد مشارك فى المشروع حسب علمى مع طلعت مصطفى

طيب خدوا الارض دى ازاى وبكام ؟!

[se_ Elsyed]

لسه ما كملناش كلامنا وإذ بمصر تاخد حتة قفا

إنما إيه متكلف غالي قوي

والموضوع كان معروف من أيام عاطف بك عبيد اللي كان سلسلة في مسلسل الخراب

بإختصار كانت هناك أرض في مكان مميز في قلب شرم الشيخ معروضة للبيع

تقدم للمزاد 3 رجال اعمال إيطاليين من أصل مصري ويحملون الجنسية اللبنانية أيضاً ومعهم رجل أعمال قطري وماحدش قدر يقف قصادهم وكسبوا المزاد

وفي هذه الأثناء الفار لعب في عب الحوكمة فتدخل جهاز الأمنالقومي - المخابرات - وسألوا وإتطقسوا وعرفوا ان حبايبنا دول ممثلين لمجموعة يهود ودورهم كان التمثيل فقط زي تجار البهايم بتوع زمان لما بيبعتوا عيال هلافيت يزودوا على البيعة وهما يبقوا واقفين خلف الستار

تدخل ساعتها الأخ الزعيم القائد وأصدر قرار بقصر بيع أراضي سيناء السياحية للمصريين فقط ..

راحت الحكومة راميه العربون للأندال دول

وطبعاً اليهود بني صهيون جريوا على محكمة التحيكم التجارية الدولي ورفعوا قضية تعويض على مصر وكسبوها الإسبوع الماضي وحكمت لهم بـ 50 كليون دولار

وإشرب يا مبارك

وإدفع من جيب اللي جابونا

---------------

تعالوا اعلمكوا لعبه ظريفة هاتحبوها

إنزل المكتبة كده وأشتري نموذج للكورة الأرضية ..

وخدها البيت

وأقعد دور دور دور دور فيها لحد ما تدوخها

وبعدين ضع إصبعك على اي دولة على كوكب الأرض وشوف كده وإسأل هل في دولة في الكون بتبيع أرضها بهذه الطريقة البشعة مثلما يفعل مبارك الأن ؟!!!!!!!!!!!!!!!!!!!!!

مزادات لبيع لألاف الأفدنة لأشخاص غير معلومي الهوية حتى ولو كانوا عرب ... وفلوس بالمليارات مش عارفين بتروح فين

في حين أن مدينة زي دُبي عقاراتها بتُباع بالسنتيميتر ... وبملايين الدولارات

أما إحنا فبالرخيص بيبعنا مبارك

يا خسار يا مصر

[عصام أبوالفتح]

تدخل ساعتها الأخ الزعيم القائد وأصدر قرار بقصر بيع أراضي سيناء السياحية للمصريين فقط ..

طيب وبقية البلد ... :) عادى يعنى يشتروها اليهود وغيرهم .. ماشاء الله على نباهة سيادته .. ده بدو سيناء مش طايقين العيشة فيها من كتر الكماين والتفتيش وحياتهم جحيم من ساعة تفجيرات شرم واخرتها قطعوا صورة مبارك امام الكاميرات فى عيد سيناء ( وطبعا كل الكاميرات اتاخدت فى ساعتها :blush2: )

يبقى سيناء للمصريين اللى مش عارفين يعيشوا فيها وهايوسخو منتجعاتها ويكدروا صفوها وهدوئها ...

وباقى البلد للاجانب بالمزاد العلنى .. دى مسخرة ..

دلوقتى اليهود هايعدوا فى سيناء تقولهم رايحين فين ؟ يقلولك لارضنا فى القاهرة

مش ملاحظين ان من النيل الى الفرات اتحققت

دلوقتى اليهودى يقدر يتمشى من ضفة الفرات الى ضفة النيل لايخشى اى أحد ..

مزادات لبيع لألاف الأفدنة لأشخاص غير معلومي الهوية حتى ولو كانوا عرب ... وفلوس بالمليارات مش عارفين بتروح فين

في حين أن مدينة زي دُبي عقاراتها بتُباع بالسنتيميتر ... وبملايين الدولارات

أما إحنا فبالرخيص بيبعنا مبارك

يا خسار يا مصر

دبى حق انتقاع يا س س .. يعنى 99 سنة واللى اشترى ينتهى حق انتفاعه .. بيبيعوا العمر الافتراضى للمبانى فقط .. وقع المبنى فى تامين ياخد حقه ويروح والا يشترى مبانى تانية ..

كل مشروعات السعودية والخليج بنفس الطريقة .. مبانى فقط ..ومحدش له حصة من الارض

وطبعا لو مقيم لك انك تتملك سكن وارض لكن هاتبيعها غصب لما تنتهى اقامتك

مشاريع الجيش فى مصر واسكان الضباط كله بنفس الطريقة ميانى وحق انتفاع دون ملكية فى الارض .. وغلو اسعار العقارات دى بالذات فى مصر نكته كبيرة جدا لان اللى بيشترى أكنه بالضبط خد شقة ايجار قديم ودفع فيها قيمة التمليك .. ومالوش حصة فى الارض .. ولو زلزال حصل ووقع المبنى مفيش انظمة تامين زى اللى فى دبى تديله حقه .. يعنى مصيرة بالكتير مساكن الايواء

مهزلة بكل تأكيد

[عصام أبوالفتح]

لو المتر بمليار دولار يبقى الاجنبى كسبان برضو .. لازم المزادات دى تتلغى مهما كانت النتائج

[Eemaan]

إزاى كسبوا التعويض لما أصلا مصر ماوقعتش على الإتفاقيه؟

حد فاهم حاجه!!!

:sad:

ممدوح البلتاجي: الحكومة لم توقع اتفاقية البيع حتي «تلغيها»

كتب بليغ أبوعايد ٣/٦/٢٠٠٧

أكد الدكتور ممدوح البلتاجي، وزير السياحة الأسبق، أن الحكومة المصرية لم توقع اتفاقية بيع الأرض للمجموعة القطرية حتي تلغيها من الأساس، وقال: إنه لا يحق للقضاء الأمريكي أو غيره أن ينظر مثل تلك القضية، التي تتعلق بالسيادة المصرية.

وشدد البلتاجي في تصريحات خاصة لـ«المصري اليوم» علي كذب تلك الادعاءات، مشيراً إلي أنه أكثر الناس علماً بالأمر.

وتساءل البلتاجي: كيف يتم توقيع اتفاق بيع الأرض دون علمي، وكنت أشغل وقتها وزير السياحة المسؤول عن الصفقة؟!

وقال البلتاجي: إن القضية بدأت عندما حضر إليه مجموعة من رجال أعمال مصريين، وكشفوا له عن عرض مجموعة مستثمرين قطريين مشاركتهم في تأسيس شركة مساهمة لشراء أراض في شرم الشيخ بغرض إنشاء سلسلة قري سياحية وفنادق.

وقال: إن رجال الأعمال المصريين فطنوا إلي أن المستثمرين القطريين كانوا واجهة لمجموعة رجال أعمال إسرائيليين يسعون لشراء أراضي سيناء، ولذلك رفضوا المشروع وحذروني منه.

وأضاف أنه بعد فترة تلقي طلباً من رجال أعمال قطريين لشراء الأرض فرفض الأمر، لكنه تلقي بعد فترة أخري خطاباً من عاطف عبيد، رئيس الوزراء في ذلك الوقت، يقول له فيه: «لماذا لا نستفيد من تدفقات رأس المال الأجنبي في تعمير سيناء»، وبمجرد رؤية الخطاب أشرت بالرفض والحفظ، لأن الأمر يتعلق بالأمن القومي وحماية مصر وسلامتها.

وأشار البلتاجي إلي أن الرئيس مبارك بمجرد علمه بالواقعة أصدر قراراً بحظر بيع الأراضي في سيناء لغير المصريين.

وقال البلتاجي: إن مصر بحكم تاريخها الطويل وريادتها في المنطقة، مازالت مستهدفة، مؤكداً أنه رغم تشجيعه الاستثمار الأجنبي، فإنه يرفضه بشدة في سيناء.

ردود فعل واسعة تجاه تغريم مصر ٣٠٠ مليون جنيه لصالح رجال أعمال إسرائيليين وقطريين

[se_ Elsyed]

تعودنا الكذب دائماً من المسئولين في الحكومة المصرية

عدم اللامؤخذه هو لما يكون في قضية مش بيبقى في مُدعي ومُدعى عليه

والكل بيقدم أرواقه ؟

وإذا كان الصهاينة ما معهمش ورق وما فيش إتفاقية إتوقعت زي البلتاجي ما بيقول .. يبقى قدموا للمحكمة إيه ؟ يعني أكتفى المشتري الصهيوني إنه قال للمحكمة : علي الطلاق أنا كنت ناوي أشتري الأرض والمصريين ما رضيوش .. فراحوا حاكمين له بالمبلغ الخرافي ده كتعويض على اساس الوليه ما تطلقش ويبر بحلفانه ؟

وبعدين حاجه تاني .. إزاي يتحكم على مصر غيابي من غير ما يحضر الأستاذ دسوقي المحامي ويتقدم أوراقه ودفوعه ؟

إوعى حد يقولي أصل الحكومة أول ما عرفت إن في قضية راحت هربانه وطالعه الجبل تستخبى مع المطاريد .. أو سابت البلد وراحت استخبت عند حكومة تانية قريبتها ؟

بصوا بقى الحته دي على لسان البلتاجي

حتت لسان إنما إيه ... تستاهل بؤكو

قال البلتاجي: إن مصر بحكم تاريخها الطويل وريادتها في المنطقة، مازالت مستهدفة، مؤكداً أنه رغم تشجيعه الاستثمار الأجنبي، فإنه يرفضه بشدة في سيناء.

وبما إن الصهاينة يصنفون على إنهم أجانب يبقى دعوني أغير عنوان الموضوع إلى

" الصهاينة قادمون قادمون "

بالمناسبة يا مبارك

تقدر تشتري أو تأجر ولو ميكروسنتيمتر في تل أبيب ؟

منتظر منك رد

وخد راحتك وجاوب

[MOOOM]

السلام عليكم ورحمة الله وبركاته

باختصار شديد .. عندي سؤال ياريت لو أحد الأخوة يجاوبني عليه

الحكومة التي أقرت بنفسها أن مصر مطمع للكثير من الخارج .. وأيضاً رفضوا بيع أرض سيناء لما عرفوا أن المشتري يهودي .. بس غير اليهودي فممكن يشتري زي مهوه عايز .. بدل هيدفع كثير .. ماشي ..

طيب دلوقتي مثلاً لو الأرض بتاعة القاهرة الجديدة أو زايد أو برج العرب أو غيرها .. أحنا قلنا إن شركات مصرية وخليجية قامت بشرائها .. وطبعاً على سبيل الاستثمار .. مش هتكون شايلا فلوسها في أرض بدل متحطهم في بنك طبعاً ..

طيب لو بعد يوم أو شهر أو سنة أو أكثر .. طبعاً هيزيد سعر الأرض دي .. فلو قامت الشركات دي ببيعها لشركات يهودية .. أو حتى بيع جزء منها .. هنقدر نقلهم .. لأة .. أستوب هنا ؟؟ ولا طبعاً مش هنقدر نفتح فمنا .. لأننا قابضين الثمن من بدري

فهل هناك لوائح وتشريعات بعدم بيع تلك الأراضي مرة ثانية ؟؟ ولو فكروا في بيعها .. يبقى تعود ملكيتها لمصر مرة ثانية ؟؟

لأنهم لو فكرو في بيعها .. فطبعاً هيكون للي يدفع أكثر سواء يهودي أو حتى مجوسي .. وكدة كأننا عملنا بالمثل [ ودنك منين يا جحا ]

ياريت حد يفيدني علشان أرتاح .. وإلا هنكون بنكرر قضية فلسطين مرة ثانية .. نبيعها وبعدين نقعد نعيط عليها

[se_ Elsyed]

يا Moom ماهو ده اللي بيحصل

ناس بتدخل الصفقة على إنها واجهة

واليهود وأمثالهم من وراهم

ترسي الصفقة على الناس الأولانيين يروحوا فضين الشركة أو عاملين حاجه إسمها " تخارج " يعني إنسحاب

وتعود الشركة لأصحابها الصهاينة الحلوين

والدولة ما تقدرش تتكلم إلا لو اممت القناة .. قصدي الممتلكات دي

وساعتها هاتكل ضرب من كل حته .. إيشي أمم متحد على ولايات متحدة على المملكة المتحدة

وسلم لي على جو الإستثمار

[MOOOM]

السلام عليكم ورحمة الله وبركاته

الأستاذ عصام أبو الفتح ..

لقد قرات لك الرسالة التي كتبتها إلى الوزير .. والتي تضمنت بعض الاقتراحات

وكانت فكرة توزيع الأراضي على الأفراد .. فكرة ممتازة وأتمنى ان تنشرها او تكون لها صدى

وياريت أعضاء المنتدى يقولوا رأيهم فيها ..

وقد علقت على رسالتك .. لكنني أرى كثير من يشاهدها .. لكن أحداً لم يعلق عليها

فياريت لو أحداً يتبنى هذه الفكرة وينقحها

ونحن لا نقول .. وزعوا الأرض على الشعب .. رغم إن ده مش عيب .. بس احنا بنقول إن الأراضي التي يرغبون في عرضها في أي مزاد .. ياريت لو يعرضوها على الشعب أولاً .. حتى ولو حتى كانت بنفس السعر التي هتتباع به في المزاد .. بس تكون في إطار حدود معينة تضعها الحكومة .. ولو الشعب مشترهاش ,, تبقى تفكر في عرضها للأجانب

متهيألي بالطريقة دي هنحل مشكلة تضخم أسعار الأراضي .. وفي نفس الوقت هيزيد ارتباط المواطن بموطنه .. والأهم من كدة إن نفس المبلغ هيدخل للحكومة سواء من الشعب او من الاجنبي

ياريت تعطونا أرائكم في هذا

[عصام أبوالفتح]

مع إنها أرض مش مترخصة ولسه لم تأخذ قرار تحويلها لمباني .. لكن تزامن هذا الأرتفاع مع حدثين :

1- زي ما قلت الهجوم اللي عملوا العرب واخدوا متر الأرض من ضمن مئات الأفدنة على 1200 ج .. يعني بالقطاعي هايعدي 2000 ولو إتبنى المتر هايعدي 4000 ج سواء شقق أما لو مكاتب فهايعدي 5000 ج ... وده مبلغ خرافي في تلك المناطق الجديدة ...

لازم نأكد على حاجة يا أخ س س ... الموضوع فعلا محتاج تغيير عنوانه للصهاينة قادمون .. او ... الصهاينة وصلوا

الحاجة الاهم ان سعر الارض ده ولو 4000 ج بالنسبة للاجنبى هو سعر زهيد جدا جدا جدا

ازاى

لانه فى الطبيعى المفروض يخصص له ارض للاستثمار لمدة 99 سنة بس .. متزيدش يوم

شوف هو اشترى كام 99 سنة بقى .. الارض ملكه للابد ..

وتمنها بعد 99 سنة الله اعلم هايكون كام ؟

اتصالات دفعت حق استغلال رخصة ثالثة لمدة 99 سنة برضو .. حوالى 16 مليار جنيه... ليس للابد

والارض موضوع اهم لانه يعنى السيادة ويعنى الوطن ويعنى كل شئ .. ازاى الدستور يسمج بكده !!!!!!!

[بنت الشاطئ1]

السلام عليكم ورحمة الله وبركاته

ونحن لا نقول .. وزعوا الأرض على الشعب .. رغم إن ده مش عيب .. بس احنا بنقول إن الأراضي التي يرغبون في عرضها في أي مزاد .. ياريت لو يعرضوها على الشعب أولاً .. حتى ولو حتى كانت بنفس السعر التي هتتباع به في المزاد .. بس تكون في إطار حدود معينة تضعها الحكومة .. ولو الشعب مشترهاش ,, تبقى تفكر في عرضها للأجانب

متهيألي بالطريقة دي هنحل مشكلة تضخم أسعار الأراضي .. وفي نفس الوقت هيزيد ارتباط المواطن بموطنه .. والأهم من كدة إن نفس المبلغ هيدخل للحكومة سواء من الشعب او من الاجنبي

ياريت تعطونا أرائكم في هذا

يعنى لما الأراضى تتباع بمليارات سواء الشعب اللى اشترى او الأجنبى

هو فى فائدة اصلا بتعود على الشعب !

المرتبات غير مناسبة بالمرة للدخل والله ده ظلم

ومرة واحدة من اقاربى قالت لى انه لها زيادة فى المرتب لأنها عندها طفل

سألتها كام يعنى قالتلى جنيه ونصف زيادة فى الشهر

طيب خلوها 30 جنيه فى الشهر كأن جنيه فى اليوم يعنى كوب زبادى كل يوم

[بنت الشاطئ1]

قصدى ان المرتبات مش مناسبة للأسعار

[MOOOM]

السلام عليكم ورحمة الله وبركاته

ونحن لا نقول .. وزعوا الأرض على الشعب .. رغم إن ده مش عيب .. بس احنا بنقول إن الأراضي التي يرغبون في عرضها في أي مزاد .. ياريت لو يعرضوها على الشعب أولاً .. حتى ولو حتى كانت بنفس السعر التي هتتباع به في المزاد .. بس تكون في إطار حدود معينة تضعها الحكومة .. ولو الشعب مشترهاش ,, تبقى تفكر في عرضها للأجانب

متهيألي بالطريقة دي هنحل مشكلة تضخم أسعار الأراضي .. وفي نفس الوقت هيزيد ارتباط المواطن بموطنه .. والأهم من كدة إن نفس المبلغ هيدخل للحكومة سواء من الشعب او من الاجنبي

ياريت تعطونا أرائكم في هذا

يعنى لما الأراضى تتباع بمليارات سواء الشعب اللى اشترى او الأجنبى

هو فى فائدة اصلا بتعود على الشعب !

المرتبات غير مناسبة بالمرة للدخل والله ده ظلم

ومرة واحدة من اقاربى قالت لى انه لها زيادة فى المرتب لأنها عندها طفل

سألتها كام يعنى قالتلى جنيه ونصف زيادة فى الشهر

طيب خلوها 30 جنيه فى الشهر كأن جنيه فى اليوم يعنى كوب زبادى كل يوم

أنا بتكلم على أساس إن الأرض هتتباع هتتباع .. فبدل متتباع للأجنبي .. تتباع للمواطن افضل ..

وتفضلتي وقلتي إن المرتبات لا تناسب أسعار الأراضي .. لا أحد يختلف معكي في ذلك .. لكن الفكرة إن الأراضي لما أنا وانتي وغيرنا نشتريها .. وقتها مش هيكون فيه طلب كثير عليها لأني هكون عارف إني لو مختش المرة دي يبقى المرة الجاية وبنفس السعر [ مش السنة دي المتر بـ180 جنيه والسنة الجاية بـ 1800 جنيه ] .. وكدة هينخفض سعرها .. ويمكن أيضاً إقامة مجمعات سكنية فخمة عن طريق تخطيط ورسومات يحددها جهاز كل مدينة ويلتزم صاحب الأرض بتنفيذه مثل نظام المباني في المدن الجديدة .

وحاجة أساسية تانية .. هنخف الضغط على القاهرة الكبرى والناس تخرج لمدن جديدة مثل ما بيقولوا ..

صحيح .. [ منين عايزين الناس تخف الضغط عن القاهرة وتخرج للمدن الجديدة .. ومنين الأسعار الجنونية دي في الأسعار - بدل كدة كدة هدفع كثير .. يبقى أدفعها في حتة عمرانة وفيها مولات وفنادق وحيوية أحسن لي ] معلش طلعت عن الموضوع ..

بس متهيألي بأي شكل من الأشكال هيكون أفيد وأفضل من الوضع الحالي .. لأن الأرض هتتباع كدة كدة وأيضاً المليارات كدة كدة داخلة للحكومة .. وكدة كدة برضو احنا مش بنطول حاجة منها .. يبقى بدل ميبقى موت وخراب ديار .. كفاية الموت !!!

[بنت الشاطئ1]

انا لم اقل ان المرتبات لا تناسب اسعار الأراضى فحسب بل اسعار كل شئ حتى المأكل والمشرب والملبس والدواء ده كشف الدكتور 150 جنيه ده غير الأدوية والاشعة والتحاليل ده لو عايز تحاليل سليمه وتشخيص سليم اما لو كنت فقير فاذهب لمستشفى حكومى واتفرج على البهدله

انا فاكرة مرة ذهبت لطبيب وهو استاذ فى الجامعة وحصل لى هبوط شديد ونمت على الكنبة اللى فى حجرة الانتظار ووالدتى قالت للسكرتيرة ان المفروض الأولوية لنا نظرا لحالتى ردت عليها قائلة بالدور يا حاجة

وقامت احدى الأخوات وقالت انها متنازلة لى عن دورها وفعلا دخلت مكانها ولما دخلت عند الدكتور كنت اشرح له حالتى وقلت له انى عندى احتقان فى الزور رد على قائلا معنديش وقت للكشف احنا فى عرض دقيقة وهذا من ضمن المواقف الكثيرة التى عقدتنى من مصر

[se_ Elsyed]

خبر عالماشي يتفق مع ما نتحدث عنه منذ فترة ولا عزاء للفقراء في مصر

صدمة لراغبي حجز أراضي الإسكان العائلي بالمدن الجديدة

50% زيادة في الأسعار عن المراحل الثلاث السابقة

كتب - جمال العليمي:

فاجأت وزارة الإسكان والمرافق والتنمية العمرانية الراغبين في حجز أراضي الإسكان العائلي "المدعم" بالمدن الجديدة في المرحلة الرابعة للمشروع بزيادة كبيرة في الأسعار تراوحت ما بين 30 إلي 50% للمتر عن المراحل الثلاث السابقة.. وفي نفس الوقت زادت أسعار هذه المرحلة عن الأسعار الخاصة بأراضي شركات الاستثمار التي حصلت عليها في المزاد العلني الأخير.

أكد مصدر مسئول بوزارة الإسكان أنه تقرر طرح 14 ألف قطعة أرض إسكان عائلي بنظام القرعة العلنية في 21 مدينة جديدة خلال الأسبوع القادم وهي كالتالي: في مدينة القاهرة الجديدة 1500 قطعة بسعر يتراوح من ألف إلي 1500 جنيه للمتر..

والشيخ زايد 50 قطعة بسعر من 800 إلي 850 جنيهاً للمتر.. والسادس من أكتوبر 247 قطعة ب800 جنيه للمتر.. والعبور 256 قطعة بسعر يتراوح من 600 إلي 900 جنيه للمتر.. والشروق 864 قطعة بسعر 450 إلي 750 جنيهاً للمتر.. والصالحية الجديدة 215 قطعة بسعر يتراوح من 200 إلي 220 جنيهاً للمتر.. ومدينة بدر ألف و500 قطعة بسعر يتراوح من 200 إلي 280 جنيها للمتر.. والسادات 824 قطعة بسعر يبدأ من 200 وحتي 350 جنيها للمتر.. وطيبة بالأقصر 120 قطعة بسعر يبدأ من 250 إلي 350 جنيهاً للمتر.. وأسوان الجديدة 424 قطعة بسعر يبدأ من 240 إلي 260 جنيهاً للمتر.. والفيوم الجديدة 698 قطعة بسعر يبدأ من 250 إلي 350 جنيهاً للمتر.. وبني سويف الجديدة 1092 قطعة بسعر 300 جنيه للمتر والمنيا الجديدة 255 قطعة بسعر 300 إلي 350 جنيها للمتر وبرج العرب الجديدة 1880 قطعة بسعر 200 إلي 260 جنيها للمتر و15 مايو 632 قطعة بسعر 600 إلي 800 جنيه للمتر.. وسوهاج الجديدة 45 قطعة بسعر 250 جنيها للمتر.. ودمياط الجديدة 115 قطعة بسعر 700 إلي 800 جنيه للمتر والنوبارية الجديدة 60 قطعة بسعر 250 إلي 350 جنيها للمتر وقنا الجديدة 638 قطعة بسعر 330 جنيها للمتر. الغريب أن أسعار هذه القطع بمدن القاهرة الجديدة والشيخ زايد زادت عن أسعار أراضي شركات الاستثمار التي حصلت عليها في المزاد العلني الأخير والتي تم تخصيصها للاستثمار التجاري والعقاري حيث حصلت شركة "دماك" الإماراتية علي قطعة أرض بسعر 752 جنيها للمتر وشركة "بروة" القطرية بسعر 733 جنيها للمتر وشركة سعودية حصلت علي قطعة أرض مساحتها 410 أفدنة بسعر 852 جنيها للمتر.

[عصام أبوالفتح]

مصدر الكلام ده منين يا س س .. انا دوخت عليه فى النت لم اجد شيئاً يفيد بما ذكرته والان وجدت خبر القرعة الجديدة على موقع الهيئة

الجديد انهم لغوا دور السماسرة تماما و سيلغى موضوع الأوفر نهائيا لانه غير مسموح باى نوع من التصرف خلال فترة السماح والانشاء حتى انتهائه .. و كمان الاسعار نفس الاسعار بالقرعة السابقة .. ولكن .....

لا توجد اراضى بالقاهرة الجديدة ... بح !!!!!!!!!!!!

هذا الرابط

القرعة الجديدة

انت عارف انا حاسس بإيه .. والله احساسى ما بيخبش ... على 2010 هاتكون البلد متباعة بالكامل و صاحبنا هايعلن انه كبر ويسيب المعجنة وراه ويطلع يأنتخ فى سويسرا وولاده ومحاسيبه فى ديله واحكموا نفسكم زى مانتوا عايزين .. ساعتها فعلا هانختار بعد ان فقدنا حاجتين مهمين .. القدرة على الاختيار ... والحاجة التانية ... بلدنا مصر

البلد اتباعت وهما فى الحكم ومفيش جهاز محاسبات يحاسب ولا قضاء يلاحقهم .. واللى بيحصل تخلى تدريجى عن المسئولية .. وفى وجهة نظرى ان كل مسئول عن اللى بيحصل ده لازم يحاكم بتهمة الخيانة العظمى ...

على حجم وعدد المخدوعين تكون قوة الخديعة وحجمها .. اللى بيحصل فى مصر ليس قدوم عرب وانما الخديعة الكبرى

كل اللى فى الاعلام ده والزيطة دى احساسى انها نظام غروش غروش .

[MABELGABRY]

الأخ العزيز عصام ،

أقرأ دائما ما تقرأه بتقدير شديد ولكنني أختلف معك :sad: لماذا ننظر إلى الجزء الفارغ من الكوب -- نعم لا يوجد أراضي في التجمع في هذه القرعة لكن يوجد في العبور والشروق وبدر واكتوبر و مدن أخرى -- طبعا عدد القطع صغير لكن يظل هذا خيرا من لا شيء وخاصة أن هذه المدن يتم توزيع قطع الاراضي فيها من فترة طويلة جدا ، ربما أنظر للأشياء بتسامح أكثر من اللازم وربما لا أرى بوضوح ولكن احب ان اقول كلمة حق ان القرعة عادلة -- اعرف شخصيا عددا من الاشخاص الذين فازوا بقطعة أرض في القرعة الأخيرة بدون واسطة وكان هذا نقطة تغير في حياتهم --- بالنسبة لموضوع بيع الأراضي للمستثمرين ، تظل هذه نقطة خلاف أعتقد لا يمكن الحكم عليها الأن

[عصام أبوالفتح]

الاخ الفاضل MABELGABRY

اولا اسمك ده معناه ايه .. حسسنى انى مبعرفش اتكلم انجليش

ثانيا : القرعة قد تكون عادلة فى اجرائها ولكنها غير عادلة كفكرة من الاساس .. الارض ملك للشعب .. ويفترض بيع الارض للمواطن المحتاج لها ومنع التلاعب والاوفر والسمسرة .. مش يجى طلعت بيه مصطفى ياخد لوحده 8 الاف فدان من غير لا حس ولاخبر ومن غير منعرف بكام حتى ؟

الرحاب كانت بكام .. و دريم لاند بكام .. بتكلم عن الارض اللى هى ملكى وملكك .. ملايين يتنافسوا فى قرعة ... ويلهونا بايه .. نعملها يدوى ولا كومبيوتر .. واحاد من الناس يقشوا الملايين بل المليارات .. هل دى العدالة الاجتماعية وتكافؤ الفرص اللى فى الدستور .. ايه رايك !!!

عزيزى عملية غسيل مخ وإلهاء منظم بتمارس على الشعب ده من عشرات السنين .. وده النص المليان من الكوب

وخلينا فى موضوعنا .. النقط اللى اشرت لها جعلت من كل من اشترى بأوفر over على ثمن القرعة اللى فاتت يحوز لقب معروف فى عالم الاعمال اسمه ( المغفل الاكبر ) لان السعر اتثبت على القديم وهايفضل كده كما اتوقع لفترة بعدها هاينزل عندما يبدا بناء الاراضى الاستثمارية ومعاها اسعار الشقق .

واتوقع قريبا فتح باب الاستيراد للحديد والاسمنت لان الشركات الاجنبية اللى اشترت اراضى لن تسمح للدولة ان تسلم رقبتها لاحمد عز محتكر الحديد وغيره من عصابات الاسمنت .. وطبعا هايزيد المعروض من الوحدات وستنخفض الاسعار عما نراه الان