فى بيتنا " أسبيكو "

[achnaton]

بسم الله الرحمن الرحيم

أول أمس كتبت عن الصرصار الذى أزعج " حماتى " .. والذى زحف اليها اثناء استمتاعها بزهور الحديقة الصغيرة خلف المنزل .. وتوقعت فرارها من المنزل كله وليس من التراس فقط .. ولكنى أكتشفت أن اليوم - الاحد - هو عيد الأم فى المانيا .. والمطبخ زحمه بحماتى وابنتها وحفيدتها وهن يعددن غذاء العيد .. وسمير افندى "حفيدى " بيقلدنى أيام طفولتى فى الاصرار على لحس اداوات اعداد " الكريمة " والقدر الفاضى بعد تجميل التورته .. صورة جميلة .. نسى الجميع اثنائها حكاية الصرصار ..

كان الجميج يتسامرون .. وأغانى الاعتزاز بالام تملأ الكون .. خرجت منى غصب عنى صرخه حيانى .. ولا صرخة الست حماتى .. وكانت صرختى عالية جذبت على الفور " رئيسة الحكومة المنزلية " .. وهى ترفع فى يمينها فردة شبشب قديمه .. معتقده أن الصرصار ظهر من تانى .. وخطفت علبة دواء من يمينى والقت بها على الفور فى صندوق الزباله .. حيث القت من كام يوم .. جثة الصرصار المعدوم .. العلبة دى كنت اشتريتها من اجزخانه فى مصر اثناء اجازتى من شهرين .. مكتوب عليها .. " أسبيكو .. استيل ساليسليك 81 مجم " .. 30 قرص ذو كسوة معوية .. ولمن يريد ان يعرف عشان ايه الاقراص دى .. نقول له دى اسمها بالبلدى " اسبرين اطفال " .. درجة تركيزة بسيطة ويستخدمها مرضى الاوعية الدموية .. وامراض القلب للحفاظ على سيولة الدم .. وعادة أستخدم " اسبرو باير 100ملجرام " ولكنه نفذ منى فى القاهرة .. وسألت فى الاخزخانه فعرض على " اسبوسيد " انتاج شركة قطاع عام .. واسبيكو انتاج شركة " يونيفارما " قطاع خاص .. وفضلت الا آخذ حق فقراء الشعب فى انتاج القطاع العام الرخيص وفضلت الغالى الغير مدعوم .. واستخدمت الشريط الاول فى حذر .. وربنا ستر .. واحتجت اليوم قرصا .. مع دواء الصباح .. ومن باب المفخرة امام حماتى واولادى مددت يدى .. على العلبة انتاج بلدى .. ووجدت أنها مازالت سارية المفعول .. وللمسئولين عن صحة الشعب الغلبان .. ومعاهم العاملين بهذه الشركة .. اليهم البيانات .. :

التركيبة رقم 721 سارية المفعلول حتى 07/6/04 .. تحولت الحبوب داخل الشرائط الى بودرة .. يزكم رائحة ما يشبه الخل انف من يحاول استخراج قرص من الشريط .. لم أجد قرصا واحدا شادد حيلة ومتماسك .. وكانه اصابه الخوف من الصرصار اياه .. فصرخت صرخه حيانى .. أقوى من صرخة حماتى .. لما اصاب الصناعة فى بلادى ...

وعليكى العوض يا مصر .. اللى بيحصل فيكى يعصر القلب عصر ..

فيه حد يبلغ الشركة دى بالحكاية .. او حتى وزير الصحة اللى مالى الدنيا تصريحات وردية .. ولما يحتاج مسئول لدواء معين ..يبعت يجيبه له من الخارج ؟؟؟ إنتى فين ياأمه .. تغطينى وتصوتى .. وكفاية كده .

تم تعديل 13 مايو 2007 بواسطة achnaton

[Salwa]

صباح الخير استاذنا الفاضل اخناتون ..

اول شئ...كل سنة وكل الامهات بخير ...( عيد الأم هنا كان الأحد الماضى لأنه بيكون اول احد من شهر مايو ) .

بالنسبة للأدوية فى مصر ...

لانها سبق وحصلت معايا فأنا بصراحة اول شئ افعله انظر لتاريخ الصلاحية ...ومن كام سنة نبهت الصيدلية ان تاريخ الصلاحية منتهى للدواء ....واخذوا العلبة وقالوا نأسف بشدة كنا على وشك عمل جرد ...فقلت لهم طيب ابسط شئ انظروا للتاريخ قبل البيع ...!

زمان....سمعت من احد اصحاب معامل الادوية ( بعد خروجه على المعاش ) قوله .....ان المعامل فى مصر بدأت فى غش الاسبرين بوضع النشا ...عليه العوض !!!..اى الغش للدواء ..((( لست ادرى لماذا تذكرت مقولته الآن ؟؟ ربما لقول حضرتك ان الاقراص بقت بودرة !!)))..

اليس الافضل ان تتناول حضرتك ( سينتروم ؟)...مع المتابعة والتحليل للدم بصفة منتظمة ؟؟..مجرد اقتراح ..

سلامة حضرتك وسلامة كل مريض ..

تحياتى ...