أميبـا فــي بيتــي الأخيرة

[shahd]

***************************************************************************

الأخ العزيز : دياب

مين قال أن الأحياء وحشه وليه بس بتكره العلم الجميل ده

ده ربنا سبحانه وتعالى خلق الكون كله وأساسه العلاقة بين الأحياء

جميل أننا ندرس علم الأحياء اللى فيه تشعبات كثيرة ياعم دياب

********************************************************************

الأخت العزيزة : شهد المبدعة

أولا : مبروك على النيولوك الجديد بس بنوته بتبكي برضه زي بعضه جميل وبلاش الوجه اللة بيخوف مع العيون دي

ثانيا : أيه موضوع تيته شهد ده وكمان سنة 1900 قبل الميلاد ده العصر الكربوني ولا الأردوفيشي ولا أيه ...؟؟

جميلة جدا الحلقة السابعة عشر للأميبات الجميلات وأفعالهم الجميلة

سلمت أناملك يا شهد هانم وفي إنتظار المزيد من إبداعاتك

الله يبارك فيك يااستاذ ابو احمد .. ونشيل الوجه اللي بيخوف حااااضر ..

موضوع تيتا شهد ده يا استاذنا .. اللقب اللي سميت بيه نفسي.. بما اني التيتا الروحيه من ورحيه دي :blink:

اما العصر فممكن نطلق عليه العصر الشهدي :closedeyes:

اشكرك على متابعتك المستمرة وتشجيعك الدائم.. ولك خالص تقديري واحترامي :)

علي أساس أن مفيش حد بيدخل الموضوع غيرنا أحنا بس فبنحاول نرفع روحك المعنوية ولا أزاي :happy:

أنا بهزر يا تيتة

عارفة انك بتهزر اخي الغالي .. عموما اشكرك يادياب على رفع ر وحي المعنوية.. وخالص امتناني لمرورك الكريم :) ......

تم تعديل 15 أغسطس 2007 بواسطة شهد

[shahd]

الحلقة الثامنة عشرة

المكان: في المستشفى

الأشخاص: الأنتاميبا الهربانة.. الأنتاميبا الدكتورة.. الأنتاميبا كبيرة الممرضات

المنظر: الأنتاميبا الدكتورة حاطة السماعة وبتكشف على الهربانة..

الهربانة بتشد في البالطو بتاع الأنتاميبا الدكتورة .. وبتتحايل عليها ابوس ايدك بلاش حقن

الدكتورة: ما تخافيش ياماما هما 4 حقن بس .. حتديهملك الممرضة العسولة دي .. وتسيبهم وتمشي

الهربانة: نظرة اندهاش وازبهلال .. مخلوطة برعب وارتعاش.. عايزة تهرب .. الأنتاميبا العسكري تكتفها.........

وبكل قسوه .. وبطريقة عمنا الجزار ... تديها الحقنة

الأنتاميبا: اااااااااااااااااااااي يامفترييييييييييييييه... ويغمى عليها ....

الأنتاميبا كبيرة الممرضات تتخض : الحقيني يادكتورة دي باين عليها ماتت..

الأنتاميبا الدكتورة: يخرب بيتك عملتي فيها ايه؟؟؟

الأنتاميبا كبيرة الممرضات: حعمل ايه يعني مش حضرتك قولتي اديها 4 حقن

شفتها مرعوبة اديتها مقاس الأربعه في حقنة واحده

الأنتاميبا الدكتورة: افندم ؟؟ هببتي ايه حضرتك!! وريني الحقنة ياعبقرية عصرك واوانك..

الأنتاميبا كبيرة الممرضات: اهيه يا دكتورة

الأنتاميبا الدكتورة: جبتيها منين الحقنة الكبيرة دي؟؟؟

الأنتاميبا كبيرة الممرضات: من عند الدكتور البيطري اللي جمبنا

الأنتاميبا الدكتورة: غوري من وشيييييييييي

جهزولي اوضة العمليات بسرررررررررعه

الأنتاميبا كبيرة الممرضات: حاضر يا دكتورة

الأنتاميبا الدكتورة: مش انتِ ... شيلو الهبابة دي من قدامي..

الأنتاميبا العسكري: تطلع الأنتاميبا الممرضة بره أوضة الكشف...

اوضة العمليات تجهز ... الأنتاميبا الهربانة في اوضة العمليات.. الدكاترة حواليها ...

حتبتدي العملية..

الأنتاميبا الدكتورة: فين الأنتاميبا بتاعة التخدير؟؟

انتاميبا ممرضة: عيانة قوي يا دكتورة

الأنتاميبا الدكتور: ليه عندها ايه هي كمان؟؟

انتاميبا ممرضه: راحت تستحما في الترعه جتلها بلهارسيا يا دكتورة...

الأنتاميبا الدكتورة: و احنا من امتى بنستحما اصلاً ..

انتاميبا دكتورة خايبة: ما تزعليش نفسك يامامي .. انا اللي حديها الحقنة ....

الأنتاميبا الدكتورة: اتفضلي يا بنتي ورينا شطارتك

الأنتاميبا الممرضه: ايوة يا دكتورة بس!!! حضرتك عمرك ما ضربتي حقن؟؟؟

الأنتاميبا الدكتورة الخايبة: حتعلميني شغلي.. ده انتِ حتة ممرضة ولا تسوى

الأنتاميبا الممرضة: وانت ساقطة سنة اولى خمس مرات.. وداخلة ثانية واسطة..

الأنتاميبا الدكتورة الكبيرة: انت بتقلي ادبك على بنتي ؟؟ انت مرفودة ..

الأنتاميبا الممرضة: بس يا دكتورة انااااا....

الأنتاميبا الدكتورة الكبيرة: براااااااا... امشي اطلعي براااااا

الأنتاميبا الخايبة: ميرسي يامامي .. اموووووووووواه...

الأنتاميبا الدكتورة: خلاص ياعنيا انا حسيبلك العمليه دي تدربي فيها ...

الأنتاميبا الهربانة تبتدي تفوق شوية شوية ..

تجربوا في مين ؟؟ الله يخرب بيتكو... هو انا فااااااار يا اخووووواتي ..

الأنتاميبا الخايبة: هو انت فقتي .. طب تعاليلي يا حلوة خليني ا عرف اشيلك اللوز ..

الأنتاميبا الهربانة: لوز ايه دي انا شلتها من زمان عند الحلاق ..

الأنتاميبا الدكتورة الخايبة: طب خلاص نشيلك الأعور...

الأنتاميبا الهربانة : اعور.. اعور ايه .. الهي تنطسي في نظرك .. الحقني يا دكتور كلاوييييييي

ويدخل الدكتور كلاوي اوضة العمليات...

دكتور كلاوي: هو في ايه ؟؟ ايه اللي عامل فيكي كده يا هربانة

الهربانة: الأنتاميبا القرشانة دي يادكتور عايزة تشيلي الأعور.. ععععععععععععع

دكتور كلاوي: ومين ده اللي يقدر يمس شعرة منك وانا على وش الأمعاء الغليظة

الأنتاميبا الدكتورة الخايبة: وتطلع مين حضرتك ؟؟؟

الدكتورة كلاوي: صدق مين قال عليكي خايبة

انا :الانتاميبا كولاي:

تلاقيني في الجزء العلوي من الأمعاء الغليظة للإنسان وبتغذى على البكتيريا وبواقي المواد الغذائية

ومش مضر وممكن اكون مفيد عشان بتغذى على البكتيريا.

الهربانة: والعلاقة بين الطفيل والعائل اسمها المعاشر الغذائية ولو خرجت مع البراز تموت وعشان كده تفرز حواليها غلافا صلب (حوصلة)

انتاميبا كولاي: شاطرة يا هربانة ..وتنقسم النواة جواه إلى 8 وتفضل الحوصلة حية طول ماهي في حته طريه

لحد ما توصل إلى أمعاء عائل جديدا ترجع للحياة فيذوب الغلاف وتطلع منه

الأنتاميبا الخايبة: طب وانا مالي بالكلام ده .. انا قلت حشيلك الأعور يعني حشيلك الأعور..

انتاميبا كولاي: وانا خبرة اكثر منك و بقول الأعور سليم.. و المرارة هيا اللي لازم تتشال..

الأنتاميبا الخايبة: انا بنت صاحبة المستشفى ولما اقول الأعور يبقى الأعور...

كولاي تشد من ناحية والأنتاميبا الخايبة تشد من الناحيه الثانية

الهربانة : سيبووووووووووووووني ... انا عايزرة ارجع بيتنااااااااااااااااااا

تعاليلي يااااااااااااااااااااااااااااامه

يتبع.......

تم تعديل 3 سبتمبر 2007 بواسطة شهد

[Ahmad Farahat]

حلوة بجد يا شهد

أنا وشي تعبني من كتر الضحك

بس آه لو نجفة قرت الحته دي

هتتعبي معاها قوي

الأنتاميبا كبيرة الممرضات تتخض : الحقيني يادكتورة دي باين عليها ماتت..

الأنتاميبا الدكتورة: يخرب بيتك عملتي فيها ايه؟؟؟

الأنتاميبا كبيرة الممرضات: حعمل ايه يعني مش حضرتك قولتي اديها 4 حقن

شفتها مرعوبة اديتها مقاس الأربعه في حقنة واحده

الأنتاميبا الدكتورة: افندم ؟؟ هببتي ايه حضرتك!! وريني الحقنة ياعبقرية عصرك واوانك..

الأنتاميبا كبيرة الممرضات: اهيه يا دكتورة

الأنتاميبا الدكتورة: جبتيها منين الحقنة الكبيرة دي؟؟؟

الأنتاميبا كبيرة الممرضات: من عند الدكتور البيطري اللي جمبنا

الأنتاميبا الدكتورة: غوري من وشيييييييييي

بعدين مش ممكن نكتفي بجزء واحد

إحنا عايزين 5 أجزاء زي ليالي الحلمية

بالمناسبة الراجل المتخلف عمال بيزن على وداني وشكله قرب يطلع

إدعيله ربنا يفك سجنه

[shahd]

حلوة بجد يا شهد

أنا وشي تعبني من كتر الضحك

بس آه لو نجفة قرت الحته دي

هتتعبي معاها قوي

الأنتاميبا كبيرة الممرضات تتخض : الحقيني يادكتورة دي باين عليها ماتت..

الأنتاميبا الدكتورة: يخرب بيتك عملتي فيها ايه؟؟؟

الأنتاميبا كبيرة الممرضات: حعمل ايه يعني مش حضرتك قولتي اديها 4 حقن

شفتها مرعوبة اديتها مقاس الأربعه في حقنة واحده

الأنتاميبا الدكتورة: افندم ؟؟ هببتي ايه حضرتك!! وريني الحقنة ياعبقرية عصرك واوانك..

الأنتاميبا كبيرة الممرضات: اهيه يا دكتورة

الأنتاميبا الدكتورة: جبتيها منين الحقنة الكبيرة دي؟؟؟

الأنتاميبا كبيرة الممرضات: من عند الدكتور البيطري اللي جمبنا

الأنتاميبا الدكتورة: غوري من وشيييييييييي

ياسيدي يارب يخلي ايامك كلها ضحك وسعادة :)

الحته دي لنوعيه معينه من الممرضات مش الكل طبعا .. نوعيه تحس انها شوية وتضربك

نوعيه صعب حتى انك تطلق عليها ملاك رحمه......

اما نجفه على حسب احساسي انها ملاك رحمة وممرضة جميلة .....

عقلي المستخبي

شكلي حضرب... انا بح انا مش هنااااااااااااا ....

بعدين مش ممكن نكتفي بجزء واحد

إحنا عايزين 5 أجزاء زي ليالي الحلمية

بالمناسبة الراجل المتخلف عمال بيزن على وداني وشكله قرب يطلع

إدعيله ربنا يفك سجنه

5 اجزاء ؟؟؟؟؟ ده على كده نخش في البلهارسيا , والدودة الشريطيه ..........والخخخخخخ

لاياعم انا يادوب اخلص الشوية الباقين وخلاااااااااص wst::....

ومستنيه موضوعك الجميل الراجل المتخلف على احر من الجمر

تم تعديل 5 سبتمبر 2007 بواسطة شهد

[shahd]

الحلقة التاسعه عشرة

المكان: المستشفى غرفة العناية المركزة

الشخصيات: الأنتاميبا الهربانة, الزحرور الكبير, الأنتاميبا الأم الأنتاميبا الهربانة,

الأنتاميبا الدكتورة الخايبة.. الأنتاميبا كولاي.

الأنتاميبا الهربانة راقده في غرفة الأنعاش.. الأنتاميبا كولاي والأنتاميبا الهربانة بيتخانقوا

انتاميبا كولاي: منك لله يا بعيده .. اهو جالها تمزق كبدي ...

الأنتاميبا الخايبة: طب وحنعمل ايه دلوقتي في المصيبة السودة دي؟؟؟

انتاميبا كولاي: بتسأليني انا .. انا حتت دكتور على قدي.. مش انت بنت صاحبة السلخانة !!!!

الدكتورة الخايبة: سلخانه امايدبحوك فيها عـ العيد الكبيييير..

انتاميبا كولاي: ان شالله أنت ومامي الدكتورة ........

الأنتاميبا الخايبة: بتقول ايه.؟؟

كولاي: قلت شوفيلك صرفة في الهبابة اللي راقدة دي لحسن قربت تعفن

الأنتاميبا الهربانة: مفروسة ونفسها ترد.. ومش عارفة بسبب الأجهزة اللي عليها..

الأنتاميبا الهربانة بتبرطم : انا قربة اعفن ياعرة الكلاوي ..

الخايبة: اعملها ايه يعني اهي يومين وتتكل

الهربانة:مش حموت قاعده على قرابيزك... هه

الدكتورة كولاي : انا عندي الحل..

الخايبة: ماتقول وتخلصنا .. بدل ما احنا محتاسين كده!!

كولاي: شايفة لأنتاميبا بنت وزيرة صحة الأنتاميبات..

الأنتاميبا الخايبة: عايز تعمل فيها ايه دي كمان؟؟

كولاي: حنركبلها قطع غيار

الخايبة: نهارك اسوووووود.. بتقول اييييييييييه؟؟ حتودينا في داهيه..

كولاي: لا داهيه ولا حاجه.. انا حخليها تخف وتبقى زي الفل

الأنتاميبا الخايبة: كلااااااااااااااوي نهارك مطين بطين.. انت ناوي على ايييييييييه؟؟؟؟

كولاي: ولا حاجه.. مناخير على عنين .. على حتت كبده .. وشوية مصارين

الأنتميبا الهربانة: والله واترقيتي يا هربانة وبقيتي خرووووووووف ... الحقيني ياااااااااامه...

الأنتاميبا الأم: انا جيت يا كبد امك... عملوا فيكي أيه يا عصارة مصاريني..

وتشيل الأجهزة اللي عليها .. والخايبة وكولاي يستخبوا ....

الأنتاميبا الهربانة: ا نت جيتي يا ماما.. سمعتي صوتي ازاي؟؟ عرفتي مكاني منين.. شفتي كانوا عايزين يعملوني قطع غيار ..

الأنتاميبا الأم: لا عاشو ولا كانو يا ضنايا ده أنتِ من ساعة ما سبتي تجويف الأمعاء الدقيقة وانا لافة على كعوب رجليا ادور عليكي.. انا

وخالك زحرورو

الأنتاميبا الهربانة: خالي زحرور ؟؟ ايوة يامامي كنت بشوفه وهو ماسلكي العصاية وانا بهرب منه..اصل ريحته وحشه ....

الأنتاميبا الأم: بت انت اسم الله على ريحتك ..

الزحرور: سيبيها يا اختي .. لما تجوز الواد ابني حيلمها

الأنتاميبا الهربانه: ليه شايفني متبعترة .. ومين قالك اني حتجوزر ابنك ابو عين زايغه ده

الأنتاميبا الأم: يابت بطلي قنزحه فارغه .. على الله بس يرضى بيكي ...

الأنتاميبا الهربانة: انتوا بتكلمو في ايه انا اتجوز من العيله اخييييييييييي.. وبعدين الواد ده مش التيب بتاعي ..انا ناوية احسن النسل ....

الزحرور يشمر ويمسك العصاية..

الأنتاميبا الأم: لا يا اخويا هدى انت نفسك بس وانا اجيبهالك لحد عندك

الأنتاميبا الهربانة: تجيبيلو مين هوانا شوال رز ..

الأنتاميبا الأم: جتك ستين نيلللللللللة .. يا بت ده لسه حيدفع مصاريف علاجك .. ولا انت عاجباك رقدتك دي...

الأنتاميبا الهربانة: وهو ماله انا عايزة ارقد في المستشفى الفايف ستار..

الأنتاميبا الأم: بس كده من عنيا ...

وتنده على الدكتور كلاوي..

يادكتور كلاااااااااااااااااااوي.. انت يا دكتوووووووووووور

دكتور كولاي يطلع من تحت السرير اللي كان مستخبي فيه : كولاي يا افندم..

الأنتاميبا الأم: يا اخي كولاي لحمة راس مش فارقه

بقلك ايه مش انت كنت عايز تبيعها قطع غيار .. انا امها وبقلك ..اعمل فيها اللي انت عايزة

كولاي: ابقي اكتبيلي ورقة تنازل.. وانا حعمل العمليه لما المستشفى تفضى...

الأنتاميبا الهربانه مرعوبة.. وبتعيط...

بقى كده ياماما .. تهون عليك بنتك...

الأنتاميبا الأم: تستاهلي .. قال مش عايزة تجوز ابن خالها قال..

الأنتاميبا الهربانة: ياماما ده واد جربان وحيرجعني للعيلة..لألأ مش ممكن ارجع المكان ده المقرف ده تاني

الأنتاميبا الأم : ماشي يا ست الحسن والجمال.. خليكي هنا.. لحد ما يوزعوا لحمك على غلابة الأنتاميبات.. واهو العيد قرب اهو.....

الأنتاميبا الهربانه: يارتها تيجي على كده.. دول حيعملوني قطع غياااااااااار.. عارفة لمين!!

لبنت عدوتك اللي غششتيها في امتحان الحساب.. وهيا بقت وزيرة صحة الأنتاميبات .. وانت بتخدمي في البيوت ياااااااااااامه...

الأنتاميبا الأم: نعممممممممم.. انا بنتي تتعمل قطع غيار لبنت الولية الغشااااااشة دي.. ده لايمكن ابدااااااا..طول ما فيا نفس......

الأنتاميبا الهربانة: تسلميلي يا امه ... هكذا المهمات والا فلا...

الأنتاميبا الأم: انت يا دكتور منبااااااار... انتوا يا دكاترة يالي هناااااااا

الدكتور كولاي: كلاوي حضرتك .. يووووووه .. كولاااااااااااي

الأنتاميبا الأم: انا بنتي .. تقطعوها وتدو عنيها ومناخيرها لبنت الوليه الجربانه دي..

ده انا ادبحها واوزع لحمها للقطط والكلاب اهم يتقوتوا .......

الأنتاميبا الهربانه: قطط وكلاب.. وغلابة انتاميبات.. هو انا حتوزع على مين ولا مين ياعااااااااالم...

الأنتاميبا الأم: يلا يا بت لمي هدومك وتعالي معايا.. وانا ليا صرفه مع دكاترة المعييز دول ....

الأنتاميبا الهربانة: لا يا ستي دكاترة المعيز ارحم.. سيبيني هنا انا مش رايحه معاكي

الزحرور يطلع العصاية تاني ويرن الأنتاميبا حتة علقة انمااا ا يه

ويشد الأنتاميبا الهربانة من شعرها وهيلا بيلا يحطها في شوال ..... ويسد بقها

الأنتاميبا الأم: بس يا اخويا حرام البت صغيرة مش حمل ايدك اللي عاملة زي مضرب البينج بونج دي...

الزحرو ر: مش كنت عايزة تدبحيها .. ومش عارف ايه .. ولا هو كلام والسلام

الأنتاميبا الأم: بخوفها يا اخويا .. بلاش اخوف بنتي.. وبعدين انا ادعي على ولدي واكره من يقول امين.........

الزحرور: هااااااااا عايزاني اسيبهم .. يشرحوها ويقطعوها ........ ..

الأنتاميبا الأم: لا ياخويا ابوس راسك .. دي بنتي ضنايا

الزحرور: طب اتكتمي ومش عايز اسمعلك صوت لحد ما نرجع للأمعاء الدقيقه..

وفي صمت رهيييييييب .. تمشي الأنتاميبا الأم والزحرور... في طريقهم للأمعاء....

يتبع.........

[kokomen]

مساء الخير للمبدعة : شهد هانم

قصة جميلة ورائعة وخيال مبدع

وهي قصة مرحة جميلة في جوانب علمية خفيفة ومرحة

سلمت أناملك .. وننتظر المزيد

مع خالص تحياتي القلبية

md2: :flr1: :flr1:

[shahd]

مساء الخير للمبدعة : شهد هانم

قصة جميلة ورائعة وخيال مبدع

وهي قصة مرحة جميلة في جوانب علمية خفيفة ومرحة

سلمت أناملك .. وننتظر المزيد

مع خالص تحياتي القلبية

استاذ ابو احمد الف شكر لأهتمامك ومتابعتك الجميلة ..

خالص احترامي وتقديري لتشجيعك استاذي الفاضل

[shahd]

اميبا في بيتي الأخيرة

المكان : في الطريق الى الأمعاء الدقيقة

المنظر: الأنتاميبا اللي كانت هربانة مربوطة بحبل جوا شوال بتخبط بأديها ورجليها ..الزحرور شاددها وراه .. الأنتاميبا الأم ماشية وراهم في صمت والدمعه حتفر من عنيها..

الحوار: الأنتاميبا الأم: ما تفتحلها الرباط شوية يا اخويا ... الهي يفتحلك بطن كل بني ادم تخش في امعاءه الدقيقة تبلبط فيها زي ما يعجبك .. ولا يوقف في وشك ايد مغسولة.. ولا خضار نظيفة ...........

الزحرور: اكتمي خالص ياوليه لااقطع خبرك...

الأنتاميبا الأم: لا خلاص حكتم خالص .. اهووو...

وفي سرها( الهي يوعدك بحمة شوكيه تجيب اجلك يامفتري )

الأنتاميبا المحبوسة: ياااااامة عصافير بطني بتصوصو كلمي اخوكي.. عايزة عصير جوافة وساندوكتش همبرجر.. ومافيش مانع لو في كاتشب وهوت صوص..

الأنتاميبا الأم: يابت اسكتي خلي ليتك تعدي على خير

الزحرور: من عنيا يابنت اختي ده انا حأكلك بـأديا

الأنتاميبا المحبوسة: الا ايه طقم الحنيه اللي نازل على اخوكي ده ياماما..

الأنتاميبا الأم: حنية السل الرئوي على البني ادمين ..

الزحرور: ادينا وصلنا .. انزلي من تحت عقب الباب وافتحيلنا

الأنتاميبا الأم: حاضر يا اخويا.. بس قلي ناوي على ايه .. ليطمئن قلبي

الزحرور: جاك خابط في قلبك .. افتحييييييييي

الأنتاميبا الأم : سنانها بتخبط في بعض وصوابعها بتترعش...

طيب طيب.. بس ما تزعلش نفسك

تخش الأنتاميبا الأم من تحت عقب الباب وتفتح....

المكان :شقة بني ادمين( مطبخ واسع.. ثلاجة.. سلة خضار .. سلة فاكهه... عيل صغير.. اب وام..)

الأكل يتحط على السفرة.. سلطة خضرا بترابها.. شوية جرير.. على سلطة بقدونس .. مش مغسوله كويس.. وشوية فول وطحينة .... تفاحه مطينة بطين

العيل طالع من الحمام وايديه وسخه يمسك خساية ويقزقز فيها .. الأم تقطع اللحمة بسكينه معفنه وشوية تلعب في مناخيرها .. تطلع تفاحه من جيب مريلة المطبخ تقرقش فيها.. الأب جاي من الشغل داخل على المطبخ عـ الأكل من غير ما يغسل ايديه ...

الأنتاميبا المحبوسه بتبصلهم بقرف من خرم صغير في الشوال

الأنتاميبا المحبوسة: ياي دي عيله مقرفة.. افففف..

الزحرور: سكتي بنتك لحسن بضهر ايدي على وشها عدل...

الأنتاميبا الأم: تكتم نفس الأنتاميبا البنت ......

الزحرور: العيلة الجربنانة دي ياشاطرة هيا اللي حترجعك لبيتك اللي هربتي منه....

الأنتاميبا البنت تعض أيد الأم: ومين قالك اني عايزة ارجع يازحرور الهم ...

الزحرور: وبتقلي ادبك كمان... ان ما وريتك اما نخش بس

الأنتاميبا الأم: قلبك ابيض يااخويا.. هيا حرمت خلاص مش كده يابت؟؟

الأنتاميبا البنت: لأ مش كده .. وبعدين حيعمل ايه يعني حيموتني.. احسن ما ارجع للبيئه العرة بتاعتكم

الزحرور: تبقى في ايدي ومحبوسة في شوالي وتقلي ادبك عليا ...

وينزل فيها ضرب .. اقلام على بوكسات .. .. الأم تحاول تحوشة عنها فينوبها من الحب جانب...

الأنتاميبا البنت:برضه ولا يهمني.. قال عايزني ارجع عشان يجوزني ابنه المعفن.. وياخد ورثي من دادي... مش داخله

الزحرور: حتخشي يعني حتخشي...

ويروح مطلعها من الشوال ولازقها في ورقة جرجير ماسكها الولد الصغير

تروح الآنتاميبا موشوشة الواد:

يلا ورايا

هات صابونايه

وادعكها في ايدك

ميه نظيفه

حلوة ظريفة

تلاقيها في بيتك

الواد يطنش وياكل الجرجير من غير ما يغسل ايده!!

الأنتاميبا تنط من ورقة الجرجير .. يمسكها الزحرور.. يلزقها في التفاحه..

تمسك ودان الأم:عاملة وليمة فول وطحينة

مش غاسلة ايدك

كم خساية وبقدونساية

وتفاحة في جيبك

كل بطينه مش غاسلينه

ولا فارقة معاكي

الأم (ست البيت)

ترد بعصبية وجليطه..

سيبوني في حالي

عـ الـ في بالي وحربي عيالي

تجيلي اميبا..يوة بلا خيبة

ولا تيجي في بالي

الأب مقموص من الحشرية بتاعة الأنتاميبا وامها:

سيبونا في حالنا

ولا على بالنا

وحتربي عيالنا

تجيلنا اميبا

تبقى مصيبة

لينا ولعيالنا

الأنتاميبا الأم والبنت مزبهلين من القذارة الرهيبة في العيلة دي!!!!

حاجة عجيبة

عيلة غريبة

لابيغسلوا ايدهم

ولا فاكهتهم ولا خضرتهم

حتى في يوم عيدهم.....

الزحرور: وانت مالك يا حشرية انت وهيا .. ويمسك الانتاميبا الام فـ ايد والبنت ف ايد ويلزقوا هما الثلاثه في سلطة البقدونس ..

الانتاميبا البنت تحاول تهرب .. لكن مافيش فايده..

الزحرور مسكها جااااااامد.. الاب ياخد بقدونس على شوية جرجير.. تدخل الانتاميبا الام في بطنه

العيل ياخد سلطه خضرا.. ينط الزحرور ومعاه الانتاميبا البنت .. فـ السلطه ... وهمممممممممم.. يدخلوا الاثنين في بطن الواد....

الأميبات والأنتاميبات : يكونوا مجهزين حفل استقبال كبيييييييير للأنتاميبا الصغنونة الهربانة...

معلقين الزينه .. ومالين الدنيا زغاريد.....

الأنتاميبا مكشرة وقرفانه منهم

الزحرور يشدها من شعرها: خشي يا بت سلمي على حماتك..

الأنتاميبا الصغنونة: حماتي؟؟ الأميبا العجوزة دي حماتي انا.... نو نو نو موش من مستوياااااااا ....

الزحرور: البت دي باين عليها مش حتجيبها البر

الأنتاميبا الحماة: سيبهالي يا زرزورتي .. وما تحملش هم

الأنتاميبا الحماة تاخد الأنتاميبا الصغنونة.. وتشيكها وتأنتكها وتلبسها فستان الفرح .. وياعيني الأنتاميبا الصغنونة حتموت نفسها من العياط والمكياج يبوظ..

الأنتاميبا الحماة: ما تهمدي يا بت .. خليني اعرف اجهزك لعريسك.. لحسن اخلي خالك يحبسك انفرادي.. وانت عارفه الباقي...

الأنتاميبا الصغنونة: لا يا حماتي بلاش انفرادي الهي ما يحبسلك جته..

بس انا عايزة اقول حاجة..

الأنتاميبا الصغنونة: هيا العروسة ليلة زفتها مش بتبقى محتاجه ماماتها تبقى معاها.. انا عايزة مامااااااااااااااااميييييييي..

الأنتاميبا الحماه: وانا اجيبلك مامي منين دلوقتي؟؟ يا زحرورو.. البت عايزة امها...

الزحرور: تفكير عميق :اممممممممم .. امك في بطن الراجل .. يعني اشق بطنه واجيبهالك..

الأنتاميبا الصغنونة: ماليش دعوه مش حتجوز ابنك .. عايزة مامي .. عايزة مامي وتخبط برجليها...

الزحرور : بسسسسسسسس... هششششششش انا حتصرف .. اخرسي

ويروح الزحرور لبق الواد ...... وينط منه لبق الراجل ويخش بطنه.. ومن الأمعاء الدقيقة .. يلاقي الأم قاعدة ورابطه دماغها وبتولول على بنتها

الأنتاميبا الأم: ضاعت مني تااااااني يااخواااااااتي..

اه يااااااااني يا بنتي .. اشوف فيك يوم يازحرور...

منك لله يا بعيد.. هاتولي بنتيييييييييييييي

الزحرور: يطبطب عليها .. بنتك معايا يا ختي.. تعالي معايا وانت تشوفيها .. وتحضري زفتها كمان...

الأنتاميبا الأم: بجد يا اخويا .. حشوف بنتي .. ايوة ياوليه .. يلا بسرعه ما فيش وقت قبل ما الراجل ما يقفل بقه...

وياخد الأم ويطلع من بق الراجل ويخش فـ بطن الواد.....

الزحرور: انا جبتلها امها.. خلصونا عايزين الفرح يعدي على خير....

الأنتاميبا الحماه رجليها مكسوره وعنيها حمرا.. وهدومها متقطعه..

الأنتاميبا الأم: ايه اللي عامل فيكي كده يا حمات بنتي؟؟

الأنتاميبا الحماه: حماة بنتك.. حمى الدبب.. انا اجوز الفك المفترس ده لأبني.. ده بعدكوووووووو....

الأنتاميبا الأم: قال يعني روميوا .. بلا خيبة.. اشحال لو ما كنتوش طمعانين في ورث البت

الأنتاميبا الحماه: ورث ايه يا ا م ورث ..اللي في علب التحاليل.. ولا اللي بيتشد عليه السيفون...

ويمسكوا في شعر بعض .. وبالأطباق والحلل .. الزحرور مش عارف يحوشهم عن بعض....

العروسة عايزة تهرب ..... يجي العريس اخر وسامه وضارب بدله سالفها من عند المكوجي .. يلحق العروسة.. ومن كثر الشياكة الأنتاميبا

ما تعرفش هو مين .؟؟

العريس: انت مش عارفاني ياست الأميبات انا عريسك ....

الأنتاميبا الصغنونة:.انت ابن خالي؟؟؟ من امتى الشياكه دي يا واد؟؟

العريس: من يوم ما شفتك ياقمري... تجوزيني؟؟؟

الأنتاميبا الصغنونة مكسوفة ووشها احمر : حتعيشني في الساحل الشمالي

العريس: من عنيا يا نور عنيا

الأنتاميبا الصغنونة اطلب ايدي من مامي...

العريس يروح لعمته ماسك عروسته في ايده..و ف وسط الخناقه..

العريس: عمتي انا طالب القرب منك.. في ميمي

الأنتاميبا الأم : عمتي؟؟! تطلع مين حضرتك؟؟

الأنتاميبا البنت:.. ده ابن اخوكي.. بعد التعديل يامامي

الأنتاميبا الأم: انعم واكرم.. طيب سيبوني افكر

الأنتاميبا العروسة والعريس: وافقي يا عمتي.. عشان خاطري ياماماااااااا

ويتحايلوا عليها لحد ما توافق..

الأنتاميبا الأم : شفتي العيال يا ختي .. طلعوا عنينا . وهما اللي بيتحايلوا علينا دلوقتي...

الأنتاميبا الحماه:ابتسامه صفراء.. ايوه يا اختي شايفة .. جيل الدوش والعنكبوتر...

ينفض الفرح كله يروح بيته .. والعروسة للعريس...

العروسة: انت حتوديني الساحل الشمالي امتى؟؟

البدله الجربانة تطلع من الدولاب .. المكوجي يخبط على الباب ياخد بدلة الفرح ... الريحه المعفنة ماليه البيت

العروسة : ايه الريحه دي .يععععععععع ؟؟ هو انت سالف البدله كمان؟؟

العريس: اذا كان عاجبك .. قال عايزة تروح الساحل الشمالي؟؟ هو انا قادر على مصاريف الساحل الجواني !!! امشي انجري اعمليلي العشا انا جعان.. وامي وحماتي وابويا جايين

العروسه : بنظرة لئيمه تحب تاكل ايه يا سبعي .. ( ان ما جبتلكو تلبك معوي)

العريس: عايز لحمة راس.. صنية بطاطس.. و محشي ورق عنب.. ور زبالخلطة ..والحلو بسبوبسة بالقشطة والمسكرات.. وطبق كنافه ... ولا ما بتعرفيش تطبخي؟؟

العروسة: لا يا اخويا بعرف ... ثواني والأكل يجهز

العروسة تخش المطبخ تلبس المريلة .. تحضر الأكل حاجة خلطبيطه لاليها طعم ولا لون...

بالهنا والشفا ياسيد الأنتاميبات.... بالهنا والشفا ليكم جميعا...

العريس يجيله تسمم.. هو والمعزومين توصل عربية الأسعاف...تاخدهم

العروسة تقف قدام باب بيت الزوجيه... يا معشر العرسااااااااااااان...

هل من مبارز؟؟؟؟ حد عايز يطلبني من امي ؟؟؟؟؟

كل العرسان تهرب مذغورة .. مرعوبة..

الأنتاميبا الصغنونة: اللي عايزة تصيف في الساحل الشمالي تيجي ورايا؟؟

الأنتاميبات الجميلات يجروا ورا الأنتاميبا الصغنونة.. وكله يقطع تذاكر .. ويقضوا اجازة العيد في الساحل الشمالي ...

تمت

تم تعديل 25 أكتوبر 2007 بواسطة شهد

[Ahmad Farahat]

ألف مبروك يا شهد نهاية المسلسل الرائع ده

بصراحة واحدة من علاماتك هنا بتؤكد قدرتك على الكتابة الساخرة

أتمنى أن نرى قريبا لكي أعمالا على نفس القدر إن لم يكن أفضل

وأنتي قادرة على هذا

دائما

[shahd]

ألف مبروك يا شهد نهاية المسلسل الرائع ده

بصراحة واحدة من علاماتك هنا بتؤكد قدرتك على الكتابة الساخرة

أتمنى أن نرى قريبا لكي أعمالا على نفس القدر إن لم يكن أفضل

وأنتي قادرة على هذا

دائما

لغات الدنيا مجتمعه لا تعبر عن مدى شكري وتقديري لك

اخي الغالي .. شكرا لأنك نثرت عطر كلماتك في صفحتي..

اتمنى ان اكون عند حسن الظن ...

لك خالص احترامي يا صاحب الذوق الرفيع

[kokomen]

مساء الخير للمبدعة والقصصية الرائعة : شهد

حلقات جميلة يتضح فيها خيال قصصي رائع وتمكن وإبداع

سلمت أناملك التي أمتعتنا طوال هذه الحلقات الممتعة

استفدنا منها من الناحية العلمية ومن الخيال الرائع

وضحكنا من قلوبنا على الأميبات الجميلات وعائلة الأميبا

أسعدك الله كما أسعدتينا طوال هذه الحلقات الرائعة

وكنا نتمنى أن نرى الأميبات في الساحل الشمالي في مارينا أو القرى الأخرى rs: :lol:

في إنتظار إبداعاتك القادمة بإذن الله

md2: B) :flr1: h):

تم تعديل 25 أكتوبر 2007 بواسطة kokomen

[امانى]

الرائعة دائما شهد

قرات الحلقة الاخيرة اكثر من مرة من جمال السخريه فيها 0 كتاباتك رائعة يا شهدفى كل المجالات 0 تتمتعيبن

بكم من المشاعر المرهفه وتملكين مواهب كثيرة اللهم لا حسد ربنا يزيدك من نعيمه وتمتعينا كمان وكمان

ومنتظرين القصة الجديدة 0 سلمت اناملك وفى الانتظار

امانى

[shahd]

مساء الخير للمبدعة والقصصية الرائعة : شهد

حلقات جميلة يتضح فيها خيال قصصي رائع وتمكن وإبداع

سلمت أناملك التي أمتعتنا طوال هذه الحلقات الممتعة

استفدنا منها من الناحية العلمية ومن الخيال الرائع

وضحكنا من قلوبنا على الأميبات الجميلات وعائلة الأميبا

أسعدك الله كما أسعدتينا طوال هذه الحلقات الرائعة

وكنا نتمنى أن نرى الأميبات في الساحل الشمالي في مارينا أو القرى الأخرى :D :lol:

في إنتظار إبداعاتك القادمة بإذن الله

:P :D :D :D

استاذي الفاضل ابو أحمد.. اسعدتني بمتابعتك المستمرة لموضوعي الطويل....

رفعت معنوياتي بمداحلاتك الطيبة القيمة وتشجيعك

ارجوا ا ن تعذر عجز كلماتي فهي متواضعة لاتملك ان تصف لك مدى شكري وعظيم تقديري

اتمنى دائما ان اكون عند حسن ظنكم بي..

شكراااااااااااااا بكل المعاني السامية...

[shahd]

الرائعة دائما شهد

قرات الحلقة الاخيرة اكثر من مرة من جمال السخريه فيها 0 كتاباتك رائعة يا شهدفى كل المجالات 0 تتمتعيبن

بكم من المشاعر المرهفه وتملكين مواهب كثيرة اللهم لا حسد ربنا يزيدك من نعيمه وتمتعينا كمان وكمان

ومنتظرين القصة الجديدة 0 سلمت اناملك وفى الانتظار

امانى

اختي الغاليه اماني...

اعتذر على تأخري في الرد.. شكرا لك عزيزتي على الرد الجميل والكلمات الطيبة الرقيقة ..

خالص احترامي وعظيم ودي وامتناني