راجع و لا مش ناوي و لا مش قادر ؟!!!!

[hooba]

يا تري يا اخي الفاضل حققت اهدافك من السفر و العمل بره مصر ؟

و يا تري راجع مصر و لا مش ناوي و لا مش عايز ....و لا مش قادر ؟!!!!!!

كتيير من اللي سافر يشتغل بره علي اختلاف احتياجاته و متطلباته ....

**في اللي سافر علشان يكون مبلغ يقدر يبدأ بيه حياته في مصر ...سواء بتجارة أو مشروع معين او خلافه ...

** و في اللي سافر علشان يجيب شقة و يفرشها و مصاريف جواز ....و يا سلااام لو عربيه و بعدين في مصر يبقي يحلها ربنا في موضوع الشغل ..

و ناس سافرت علشان تاخد خبرات كويسه في ظل الامكانيات العاليه اللي للاسف لسه ما شوفناهاش في مصر ....

و في بقي ناس ريحت دماغها وظبطت امورها و بلا عوده ....و بلدي اللي فيها اكل عييشي ...

و لكن ...............هل بعد ما حققت أهدافك الاساسه من السفر و العمل بره مصر ....قررت ما هي الخطوه القادمه.......و لا العيشه سهله و حلوه و مريحه فا ما فيش داعي لوجع دماغ.......و لا لازم ترجع غصب عنك لظروف اولادك و لا الجامعه ولا ...ولا..... ولا......

كتييير من الناس مش هايحب يكمل الكلام اللي مالوش لازمه ده .....بس انا شفت ان لازم الواحد بقف واقفه مع نفسه و لو حتي لدقائق و بعدييين كل واحد يرجع يشوف شغله .......!!!!

فهل يا ساده مصر أولي بيينا ؟ و يا تري المجهود الرهيب اللي بنعمله براها ده لو إتعمل زيه في مصر ممكن يكون مُجدي؟؟

[بنت الشاطئ1]

اللى بيسافر علشان يعمل شقة بيقول كمان سنة بس اجيب عربية

والسنة اللى بعديها يقول سنة كمان ابنى الفيلا

واللى بعديها اعمل سنة كمان واحوش مبلغ واخليه فى البنك

كل ده خايف يرجع مش لعدم الاكتفاء بما عنده لأ بس لأنه مش حاسس بالامان فى بلده وحاجة كمان ممكن لأنه اتعود على الغربة وخايف ياخد قرار بالرجوع لحسن يندم عليه

وانا رأيي ان الانسان لما ينوى يرجع بلده لازم يكون عامل حسابه انه ممكن يرجع للغربة تانى يعنى مثلا على سبيل المثال لو كان مشترى بيت فى الغربة وده حصل مع اصدقاء لنا لو كان مشترى بيت بلاش يبيعه ممكن يأجره ويشوف كدا بعد سنة او سنتين الوضع هيكون عامل ايه لو مقدرش يعيش فى بلده يرجع تانى للغربة حتى يتحسن الوضع بس المهم يكون مأقلم نفسه على ان الرجوع للغربة ممكن

وفى ناس صحابنا هنا باعو كل حاجة البيت ورموا الملابس وقالو كفايه غربة واحنا هنستقر فى البلد الفلانى وفعلا سافروا وبعد ثلاث سنوات رجعوا تانى وبيقولولى احنا كل اللى حوشناه صرفناه

يعنى الواحد لازم يضع اكثر من احتمال عند الشروع فى الهجرة

[عبده بيه]

في كلمتين وضع البلد مقلق للغاية ولا يسمح ان اعيش في مثل هذا الكرنفال يوميا

[shawshank]

و يا تري المجهود الرهيب اللي بنعمله براها ده لو إتعمل زيه في مصر ممكن يكون مُجدي؟؟

لأ مش هيكون مُجدي . لأنه فعلا فيه جوة مصر ناس كتير جدًا أفضل من اللي براها ولكن النظام الفاسد همّشهم .

لسان حال النظام يقول : "لا للكفاءات داخل مصر . نعم للمفسدين الإمّعات أنصاف الرجال" .

تم تعديل 17 مايو 2007 بواسطة shawshank

[badroora]

الموضوع دا مهم جدا

انا هتكلم عن نفسي للاسف انا بدأت غربة عشان غربة تانية يعنى حين قررت السفر والعمل خارج مصر مكنش هدفى كام سنه ولا هاحوش ايه

انا سافرت بلد تساعدنى على السقر لبلد اخر (انا عرفة محدش هيفهم حاجة )مش مشكلة المهم

انا اهدافي

اسافر اخد على الشهادات فى مجالى وجنسية اخرى

وارجع الى مصر الحبيبة

عشان اقدر اغير واعلم الناس اللى فى مهنتى بالعلم اللى اتعلمته وعشان زى ماحنا كلنا عارفين اى حد مصري بيحب يصلح بيكون كانه بيجادف عكس الطيار وممكن يخنقوه لكن لما تكون للاسف اجنبي او معاك جنسية تانيه اى كلام بتقولة كانه نازل من السماء الناس بتسمعه ومش بتفاصل فيه تبقي ساعدتها تاية هى الناس بتقدر :sad: العلم ولا الجنسيات

انا كل يوم كل مناسبة تمر على اتمنى انى اكون فى مصر برغم كل سلبياتها بحبها ومعنديش مانع اعيش فيها بس بعد تحقيق اهدافى واحلامى اللى هافيدها بها بردة

شكرا على الموضوع

:sad: :sad: نجفة

[drhusseinali]

بصراحة الموضوع ده بيثير شجون في النفس

بالنسبة لي الموضوع معقد جدا

و لا يبدا من الان بل يبدأ من يوم التخرج من كلية طب القصر العيني

ما زلت اتذكر يوم النتيجة و ما زلت اتذكر زميلي و هو يبكي بجانبي

لان مجموعه اقل و يغبطني على مجموعي و يقول لي طبعا انت متطمن. :sad:

و تمر فترة الامتياز و تاتي النيابات وتقوم زميلة فاضلة ممن يسبقوني في الترتيب باخذ النيابة في القصر العيني و اصبح المكان شاغرا لي للحصول علي النيابة في طب بني سويف. ثم فجاة تقوم نفس الزميلة اخذ النيابة ايضا في بني سويف لانهم اشاعوا لها ان القسم لا يقبل بتثبيت النائبات الاناث بعد النيابة.؟؟؟؟؟؟؟ :sad:

و يبدأ التكليف. و تبدأ مواجهتي للحياة خارج الجامعة.

و تبدأ المعاناة.

اولا تقدم الزمائل الاعزاء ممن هم اقل مني في التقدير الى مستشفيات في القاهرة مثل الشرطة للهروب من الخدمة في الريف و التكليف.

و طبعا لم استطع لسبب بسيط و هو اني معنديش واسطة.

حيث اكتشفت ان الواسطة هي سر النجاح ولا يهم اي شئ اخر

تقديرك او علمك ده صفر لا يساوي اي شئ جنب حضرة جلالة الواسطة.

و اذهب الى الريف و اصبح المسؤل عن الوحدة الصحية لقرية فانوس مركز طامية بالفيوم (لسه فاكرها) وحدة فارغة (كانت لا اعلم وضعها الحالي) من اي شئ الا الفئران. لا يوجد كهرباء او ماء

و طبعا علشان معنديش حبيبتي الواسطة كان لا بد من البيات فيها

و الا التحقيق.

المهم عدت شهور و اذا بالواسطة تاتي متغندرة الى منزلنا و يتم نقلي بعد شهور الى مستشفى بالدقي.

طبعا طول المدة دي اخوكم اول ما كان ينزل اي اعلان في الجرائد كان بيقدم. تيودور بلهارس, معهد الليزر,طبيب ثالث في القصر العيني,....

و كل مرة رايح و انا في بطني مليون بطيخة لان مجموعي يؤهلني

وكله فشل علشان كلها اعلانات مفبركة لاشخاص معينيين معاهم واسطة.

حتى التسجيل للماجستير كان ممنوع حسب اوامر الوزير.

طبعا اللي ممنوع انا مش زمايلي اللي سجلوا من غير اي مشاكل.

ربنا ستر و وجدت احد افراد العائلة على علاقة سطحية باحد مديرين

المعاهد و حكى له قصتي فاصر الرجل على ندبي الى معهده.

و دي كانت اول مرة الاقي واحد في مصر بيساعد بس علشان يساعد.

هذا المعهد هو محل وظيفتي الحالية في مصر و طبعا مش هقولكم على عدد مرات تقدمي للتثبيت و فشلي علشان الواسطة برده. الى ان سافرت للخارج و اثبت نفسي فاضطروا ان يمنحوني الدرجة مؤخرا.

فاكرين بقه صاحبي اللي كان بيعيط و يحسدني

طبعا قبل طبيب تالت في القصر حيث فشلت

و من محاسن الصدف في نفس التخصص.

و عدينا الماجستير مع بعض انا نجحت و هو سقط

و بعد سنوات وبعد ما خلص مجستير اصبح هو حاليا مدرس مساعد

من طبيب تالت لمدرس مساعد ازاي معرفش.

حاليا بحمد الله حصلت على الدكتوراة من جامعة من اول 23 جامعة على مستوى العالم.

و بالسؤال في المجلس الاعلى للجامعات قالوا لي انهم سيعادلون الرسالة

و انني لا بد من خوض امتحان اكلينيكي في مصر لمعادلة الدرجة.

بقي ده بالذمة كلام يعني بعد مااخدت الدكتوراة لسة همتحن تاني علشان اخدها. علشان يسقطوا في 10 مرات الى ان يتعطفوا علي و يمنحوها لي. فالدكتوراة في الطب في مصر تمنح و لا تكتسب.

و طبعاانت و واسطتك كل ما تتقل كل مايقل السقوط. wst::

بعد كل ما تقدم ممكن تقولولي ليه ارجع مصر؟

انا سايب امي في مصر في سن كبيرة و في حاجة لمن يرعاها

و لكني لا استطيع النزول لان نزولي هو تحطيم لكل ما بنيته و هدم لمستقبلي العلمي و المهني.

الحمد لله تقدمت لوظيفة بالكدر الاكديمي في واحدة من احسن الجامعات على مستوى العالم. و تمت الموافقة و قال لي الاستاذ لان الCV و الخبرة و ابحاثي تؤهلني للوظيفة. و لم اسمع كلمة واسطة لاول مرة في حيثيات القبول. :sad:

و ان شاء الله اقدر اجيب والدتي معي.

انا مش هربان من مصر علشان فلوس او شقة

الحمد لله الامور المادية موزونة.

و لكني هربان من المجتمع ككل. من مجتمع يخنق و يقتل كفائاته.

من مجتمع يقتل الطموح و يدفن الامل.

حسين

تم تعديل 18 مايو 2007 بواسطة drhusseinali

[badroora]

دكتور حسين : ربنا يوفقك يا رب وتحقق كل اللى تمناه !!!

انا فى يوم من الايام حزنت جدا انى متعينتش معيدة فى الكلية على الرغم انى كنت من الاوائل

ولما اشتكبت وطبعا ماليش حد يساندنى الموضوع انتهى ومحدش لا سمعلى ولا فكر يبحث فى الموضوع انا بقي رفضتهم ورفضت اشتغل حتى فى مسشتفي الجامعة اللى تككليفي جالى فيها

احنا بقي عشان تكلفنا غيركم او الوضع بيختلف

مستلمتش التكليف ورافعين على قضيه ولا سالت فيهم ولا اعرف عنها حاجة وبالفلوس طلعت تصريح عمل ومحدش سالنى انتى خلصتى تكليفك ولا لاء وترخصيص مش مطلعاه من مكتب العمل العادى لا مطلعاة من هيئة التنظبم والادارة بموافقة مجموعة 13 عشان كنت هاشتغل فى مستشفي وزراة دفاع ولازم المخابرات العامة توافق على التصريح سلام للمخابرات العاملة

وللاسف هى دى النظم فى بلدنا المحسوبية ثم المحسوبية ثم المحسوبية

فلا تحزن اخى دى مشكلتنا كلنا ومعظم اللى سايبيين مصر

نجفة

تم تعديل 29 أغسطس 2007 بواسطة se_ Elsyed

[عطاء بلا حدود]

هتخلوني اعيط بجد ...

ده ذنبنا اننا مصريين !!!!!!!!!!!!!

ولا ده ذنب شخص بعينه اسمه حسني مبارك ... بس معقولة شخص واحد يبوظ حياة 60 مليون شخص ... !!!

ما علينا مش هندخل في السياسة ...

ومش هحكي قصة سفري عشان منقلبش المواجع ونخليها قعدة كلها عياط في عياط ...

بس هدخل في الموضوع على طول ...

ان شاء الله انا سافرت وناوي بس اجيب تمن الشقة وياسلام لو عربية صغيورة 128 او مازدا الفاسدة وارجع اتجوز واشتغل اي حاجة في اي حاجة .. والارزاق على الله .. ده طبعا لو معرفتش اجيب مراتي في الغربة

بس لو قدرت اجيب مراتي في الغربة ... يبقة الحمد لله

المهم مقدرش اتجوز واعيش انا في وادي ومراتي وولادي لو في نصيب يبقو في وادي تاني ... ده يبقة حرام ...

[hooba]

..... بس رفعت الموضوع للاستماع الي ارائكم !!!

و لكم الشكر .....

ايهاب

[hooba]

الف شكر للفاضل سيين علي نقل الموضوع ..........كنت عايز انقله من زمان بس ما كنتش عارف ....... :lol:

لك الشكر ....

ايهاب

[سكندريه]

يا ما وقفنا مع نفسنا وقفات فادت بأيه ؟؟؟؟؟؟؟؟

للأسف سنه بتجر سنه والعمر يفضل يعدي بيك بتلاقي نفسك أندمجت مع المجتمع ولما تروح بلدك أنت غريب؟؟؟؟؟؟؟؟

كل يوم المسؤليات بتكبر

بلدك مش مستعده ترحب بيك

حتروح بس حيزيد عدد العواطليه واحد؟؟

مع أحترامي لك ولموضوعك

شكرا

[mesryforever]

أنا متغرب من 1999 وحتى الآن

وأنا نفسي أنزل مصر وأعمل ليه أي مشروع

بس بصراحة ناس كتير نصحتي بعدم المجازفة بالنزول في هذا الوقت لأن البلد مش مستقره

الحمد لله أنا ممكن أجيب شقة كويسة وعربية ومشروع وأتجوز كمان بس أنا خايف قرشين الغربة يروحوا وأقعد يا مولاي كما خلقتني

الغربه خدت مني أحلي سنين عمري ولو أني كنت مبسوط مرتاح جداً جدا بس البعد عن الأهل والأصدقاء

الواحد مش عارف يعمل إيه كل ما أفكر أنزل ناس ينصحوني بلاش فأتراجع عن هذا القرار

لأن مشاكل مصر مبتخلصشي وأنتم عارفين

يارب أملي أن مصر ينعدل حالها علشان الواحد ينزل وكفاية غربه

وسلام بقه قلبتوا على الواحد المواجع

[afreet]

اخوانى الاعزاء

هنا يجب ان نفرق بين من قرر الهجرة الدائمة الى بلد جديد واخذ جنسيته وتحويلة الى موطن دائم له وبين من قرر ترك مصر مؤقتا لسبب علمى او مادى او اسباب اخرى

ان من ترك مصر لسبب مادى كتحسين احواله المعيشية بصفة عامة او شراء اصول كشقة او سياره او خلافه لا تكون عودته سهله ابدا والوقفة مع النفس لاتجدى فهى وقفه منقوصه باتخاذ القرار وهى مجرد تنفيس عن الم فراق الوطن وعادة تنتهى قبل ان تبدأ بان الحياه فى مصر مستحيله مع الوضع فى مصر والمستوى الاجتماعى الجديد للمغترب

ما اريد قوله هنا بعد سنوات الغربه الطويله فى الخليج انه لم يعد شخص سافر لاسباب مادية الا لاحد الاسباب التاليه

1 ـ تخلى رب عمله عنه والزامه بالعودة

2ـ وجود مشاكل فى بلد الغربه كتعليم الاولاد او الجامعات او مشاكل قانونيه تحول دون استمراره

3ـ وجود مشاكل فى مصر تستلزم عودته

4ـ وفاته وعودته جثه هامدة

5ـ اصابته بمرض عضال بحيث ينتهى امله فى تحقيق مزيد من الدخل

اى ان العودة غالبا ماتكون اضطراريه الا من رحم ربى

اسباب ذلك

اولا : ضعف الايمان بالله وان الله هو الرازق

ثانيا : طمع الانسان ورغبته فى الاستزاده والتى غالبا ماتكون مواد رفاهيه وليست اساسيه

ثالثا : مع طول الغربه تعود الانسان على المكان والوضع بحيث يفتقد لحافز العودة

رابعا : تصديق الاشاعات بان الوضع فى مصر متردى للغايه وعدم قدرته على رؤية الحقيقه

ثم يصل المغترب الى قناعة بان العودة مستحيله ليبدأ فى الدخول باحلام اليقظه بانه لايريد الاستمرار فى الغربة وعليه الرجوع وللرجوع يلزمه مصدر دخل وعليه اقامة مشروع ما يحقق له الحد الادنى من الحياة الكريمة فيبدأ بالاحلام والتخطيط والتى تنتهى الى لا شىء عادة لانه ليس على علم بواقع سوق مصر وغير متواجد فى هذا السوق الذى يخطط لاقتحامه مهما بدى مشروعه صغيرا او يجازف ويبدأ مشروعه وينتهى نهايه اليمه ويعاود التفكير فى الغربه مره اخرى بعد تبخر مدخراته وانكسار عزيمته ويعود ساخطا لاعنا كما بدا

ايها الساده اعلنت الحومات المصرية المتعاقبة صراحة وفى اكثر من مناسبه ان العمالة المصرية سلعة يتم تصديرها للخارج لتحقيق عائد يساهم فى نمو الوطن ولتحقيق مزيد من العملات الاجنبيه تمكن الدوله من اقامة مشاريعها الاستراتيجية

ولما كان هذا حال الدوله وهذا تفكير المغترب نفسه فكما سبق وكتبت فى رد سابق ان للعودة شروط وطرق يجب اتباعها حتى تكون باقل قدر من الخسائر المادية والنفسية

هذا رايى الشخصى الذى كونته على مدار اعوام الغربه والذى بدات باحلام المشاريع ورؤية الاصدقاء والزملاء يتساقطون فى الطريق والذى لم ينتهى بعد

[justtrying]

أنا متغرب من 1999 وحتى الآن

وأنا نفسي أنزل مصر وأعمل ليه أي مشروع

بس بصراحة ناس كتير نصحتي بعدم المجازفة بالنزول في هذا الوقت لأن البلد مش مستقره

الحمد لله أنا ممكن أجيب شقة كويسة وعربية ومشروع وأتجوز كمان بس أنا خايف قرشين الغربة يروحوا وأقعد يا مولاي كما خلقتني

الغربه خدت مني أحلي سنين عمري ولو أني كنت مبسوط مرتاح جداً جدا بس البعد عن الأهل والأصدقاء

الواحد مش عارف يعمل إيه كل ما أفكر أنزل ناس ينصحوني بلاش فأتراجع عن هذا القرار

لأن مشاكل مصر مبتخلصشي وأنتم عارفين

يارب أملي أن مصر ينعدل حالها علشان الواحد ينزل وكفاية غربه

وسلام بقه قلبتوا على الواحد المواجع

سلام عليكم

نصيحتي مترجعشي مصر وتسيب شغلك برة اوعه ترجع فيه ناس هنا والله بيلعنو اليوم الي سابو فيه شغلهم برة ورجعو مصر

البلد منهارة من كله .. وصدقني انا مش بكبر المواضيع .. فعلا البلد منهارة من كل النواحي

الحياه في مصر بءت لا تطاق ..

ربنا يسهلي واسبها .. انا على وشك بإذن الله