يا ترى كنت بتاخد مصروف كام؟؟

[عصام أبوالفتح]

دارلنج كتيت

فاضطريت اشغلهم 00 اللي عايز زياده ينزل يلمع سياره بباه 00 او ينشر الغسيل 00 او يعمل اي عمل شريف ياكل بيه لقمه عيش 00 و ساعات اشغلهم جليسه اطفال لاختهم الصغيره 00المهم ان الولاد لازم يعرفو قيمه الفلوس و ميحسسوش انهم بياخدوها بسهوله

الله عليكي يا درالنج ... الفكرة دي نغششت في نافوخي وهاطبقها من النهاردة وأشغل الواد عمر مع البواب يغسل عربيات ويشيل قوارير ميه لما كتفه يقع .. واهو يساعد في الدخل القومي شويه .

بيتهيألى رغم ما فى الفكرة من اثارة .. انها غير تربوية .. يعنى الافضل انه الولاد يساعدوا من نفسهم و ليس بالطلب و لو شغلناهم فى اللى بنطلبه منهم لن نترك لهم المجال ليفكروا فى طرقهم الخاصة .. يعنى مثلا فى ابتدائى انا كنت بألف قصص قصيرة جدا .. قد كف اليد كده وكنت ببيعها بربع جنيه .. وكانت مخطوطة يعنى حاجة نادرة جدا من عيل فى ابتدائى .. وياما اشتغلت قى بيع وشراء وتاجير القصص والرويات وكان دخلى منها ممتاز وكان موجه بالكامل للمزيد من القراءة والتجارة وشوية تاجير عجل .

بيتهيألى تنمية السنس التجارى للطفل ممكن وسهل باعطائة وهو صغير الفكة الى نحاسب بها البقال او الماركت ليعطيها للبائع و هو يتعلم ان لكل شئ مقابل .. و ممكن تخليه يستعمل معاك الصراف ( مرة وانت بتحط الفلوس ومرة وانت بتسحب منها .. ضرورى )

ومرة فى البنزبنه و هكذا .. هايحس ان فى مقابل لكل شئ و لما يعرف انه اكل شارب نايم قايم ببلاش :unsure: .. هيعرف انك بتروح وتيجى الشغل ويتجيب الحاجات دى كلها علشانه وعلشان بتحبه ومش مستنى منه حاجة .. هتلاقيه يساعدك من نفسه وكمان مستقبلا هاينجح ان شاء الله

[أبو محمد]

أنا بصراحة بقى مش عايز أخضّكم .. باقترح أنا والاستاذ عادل نستنى للآخر خااااااااالص ...

بس فيه سؤال .. فين مواليد السبعينات والتمانينات ؟ ...

خش يابنى انت وهو .. بس لازم تقولولنا كنتم بتصرفوا المصروف فى إيه .. علشان ده سؤال محيرنى لغاية دلوقتى ، ومش عارف ولادى كانوا بيودوا فلوسى فين :unsure:

[badroora]

أنا بصراحة بقى مش عايز أخضّكم .. باقترح أنا والاستاذ عادل نستنى للآخر خااااااااالص .

اكيد هتقولونا على عملات اثرية عمرنا ماسمعنا عنها !!..

بس فيه سؤال .. فين مواليد السبعينات والتمانينات ؟ .

محسوبتك مواليد 77..

خش يابنى انت وهو .. بس لازم تقولولنا كنتم بتصرفوا المصروف فى إيه .. علشان ده سؤال محيرنى لغاية دلوقتى ، ومش عارف ولادى كانوا بيودوا فلوسى فين :sad:

بص يا سيدي عندك غز البنات,بومب,دولسي,دووم :unsure: كنت بانضرب بسبب الدوم دا حاجة كدا بسكر كان اسمها فرولة ,براغيت الست,والصواريخ اللى بتفرقع دى

وبلي انا كنت شاطرة فى البلي اوى وكنت باشترى واكسب وابيع كمان ياه يا ريتنى ارجع عيلة من تانى

يلا بقي ليت الشباب يعود يوما

نجفة :sad:

[badroora]

بتدى كام !!!

انفورشنيتلي معنديش ولاد!!

بس اول ملاقي ابوهم واجيب ولاد ان شاء الله ولسه كنت بصحتى

هاديهم المصروف ياليورو والواد ولا البنت لازم يكون عنده لابتوب فى كجي وان

وعربية هامر توديهم وتجبهم من الحضانه

ولما العيال تكبر شوية يعنى قول ابتدائي كدا

طبعا ميصحش اجرح احساسهم كل شوية يطلبوا منى المصروف

كل واحد هيكون عندة فيزا كارد هو حر فيها وانا اضع لهم المصروف فيها او اخليها على حساب ابوهم الخاص

طبعا مش حسابي

امال ايه نحن بنشقي من اجل مستوى افضل لاولادنا

واهو كلة ليهم فى الاخر

تحياتى

نجف

تم تعديل 17 مايو 2007 بواسطة نجفة المغرورة

[drhouba]

الإخوه س س و موديست فرسان العهد البائد نسيتم السباتس أم تلات تعريفه و الشياطين التلاتاشر و ألغاز المغامرين الخمسه كل شهر

و بسكوت بيمبو أبو قرشين ساغ ( بالسين ) و بسكوت كورونا أبو ورقه زرقا مخططه بالطول و دوم لزوم لعب الكوره و حرنكش من على

عربية اللب .... إييييييييييييييييييه .... قلبتوا علينا المواجع منكم لله :sad:

[Alshiekh]

:sad: :sad: يعنى أيه مصروف؟؟ wst:: :sad:

الخزنة كانت بتبقى مفتوحة على طول بس النفس اللى تصرف :sad: mfb:

لكن احيانا لو اتقفلت الخزنة بطريق الخطأ كان والدى يعطينى قرش صاغ !!

ولكن كانت هناك عيون راصدة لتحركاتى ، زوجة أبى حاتلهف القرش صاغ علشان عايزة فكة ..... مسكينة :sad:

لكن لو اقدرت افلسع ، اروح اشرب سينالكو من ابو قرش صاغ ، ويبقى آخر تمام ، متهيألى اقدرت اعملها تلات او اربع مرات خلال فترة طفولتى المعذبة.

لكن لما كانت جدتى لوالدتى بتزورنا ، اهو كانت بتفرج ، وفى الاعياد برضه كانت بتفرج.

المضحك فى الموضوع انى مرة من المرات التى اقتنصت فيها القرش صاغ ، قررت الذهاب الى المقهى وقعدت على الكرسى وحطيت رجل على رجل ( ساق على ساق ) ( 9 سنوات من العمر )

حضر القهوجى ..... عايز ايه ياوله؟

من أولها كده مافيش احترام ..... معلهش اهو راجل كبير ... نستحمله

هات لى واحد شاى مظبوط وآدى الصاغ اهوه

شوية وجه القهوجى .... راح رامى كوباية الشاى على الترابيزة ولسه حايمشى

انت رايح فين ؟ فين المياه ؟ واخدها تانى ليه؟ وماحطيطش الصينية بتاعة الشاى ليه؟ انا مش دافع لك صاغ؟

راح القهوجى باصص لى بغيظ ..... خد ياخويا المياه اهيه ..... ماعرفش انك عطشان ..... بس اوعى تكسرها mfb:

و

[yasovinas]

بدانا المصروف في سنة 1969 بتعريفة يوميا مع سندوتش في المدرسة والتعريفة كانت في اغلب الاحيان من نصيب عم عشماوي صاحب عربية العلسة وصندوق البخت امام مدرسة هدى شعراوي الابتدائية المشتركة ،، من خمسة ابتدائي ولان اختي الكبيرة اصبحت في اعدادي اصبح المصروف اليومي قرش صاغ بحاله وبرضه كان في الغالب عسلية او دوم او لب سوري ،،، العيديه كانت شلن كل يوم في العيد اؤجر {كرنك } من عم حديده بقرش صاغ ساعه بحالها

المشروبات كانت سينالكو وسباتس والبسكويت كان كورونا الغواله الازرق وبسكو مصر ومدهش اللي كان ويفر بالكريمة دا افتكر كان بتلاته تعريفة ،في الاعدادي المصروف كان بريزة في الاسبوع وكانت المشروبات بيبسي وكوكا كولا وكان سندوتش الفول من عند البشندي ب قرش صاغ وكنت للتوفير اروح اشتري رغيف فينو بتعريفه واروح للبشندي يعبيه فول بالخلطه بتعريفة واغلس واخد كيس طرشي كمان

في ثانوي المصروف وصل الى ربع جنية في اليوم

اما في الجامعه فكنت فجرت وباخد جنية بحاااله في اليوم

محمد بياخد خمسه جنية في اليوم يالاضافه الى 3 جنية مواصلات (في اولى ثانوي )اخته في ابتدائية بتاخد 3 جنية في اليوم

والكابتن عمر 4 سنوالت مصروفه في اليوم لا يقل عن خمسة جنية

زمان راجل عجوووز وقف في التروماي وفضل يعدد الخيرات بتاعة ايام زمان والاهوال بتاعه ايامنا وقال في اخر كلامه انتم ايامكم سودا ،،، فرد عليه واحد :ninja: وقال له انت اللي اخرتك سودا ،،، تفتكروا ممكن نقول ايه عن الوقت الحالي