توقعات و مناقشات حول الديربي رقم 99 للأهلي و الزمالك

[Modest]

أبنائي و بناتي الأعزاء

يقام يوم الإثنين الموافق 21 مايو 2007 ، الساعة الثامنة مساءاً بتوقيت القاهرة ، الديربي رقم 99 للأهلي و الزمالك

أذكر توقعك لنتيجة المباراة و لك أن تضيف لماذا توقعت النتيجة التي توقعتها

نرجو أن تكون التوقعات منطقية كفوز الزمالك مثلاً :P لأنه كما قال الشاعر: يا زمالك يا مدرسة لعب و فن و هندسة

[nash]

أكيد بدون مناقشه الاهلي سيفوز كالمعتاد...

وطبعا سيكون الفوز تتويج لإنجازاته العديده

إلا صحيح هوة مش الأهلي فاز بالدوري؟؟؟

[se_ Elsyed]

موديست طلع له صوت ياولاد وبقى يفتح توبيكات خاصة به وعن الكورة كمان !!!!!!!!!!!!!!!!

كنت فين من 3 سنين ياخويا ؟

لعلمك يا موديست أنا بكره " خارج نطاق الخدمة " يعني أرحمني من ميسداتك وشماتاتك

أظن يا معلم ما فيش فرصة ذهبية أكتر من اللي الأهلي أعطهالكم ؟ ... هانعلب بالصف التالت .... وإنتو اللهم صلي عالنبي كاملين الأوصاف - يارب شيكابالا يجيلو بكره إسهال مُزمن ... وعمرو زكي يجي له إمساك برضوا مُزمن وجمال حمزه يبقى مشغول بالإتنين ويتلخبط ويدي شيكابالا شربة زيت خروع وعمرو زكي يديله عصير جوافه بالبذر - أما الباقي فلأهلي كفيل بهم ...

أتوقع فوز الزمالك طبعاً 3-0

ولو الزمالك تحت اي ظروف ما فازش ... يبقى بجد يسرحوا كل اللعيبة وعلى رأسهم الكابتن هنغي ميشيل بقُرص سادة من غير عجوة وكل واحد يقف بصاج قُرص في محطة باب الحديد .

أما الأهلي فكانت ضربة معلم من جوزية إنه يعكنن عالزمالكوية ... ومحاولة لإصلاح ما افسد طوال الموسمين الماضيين في لعبة الأرقام القياسية وأعتماده على لعيبه بعينها على اساس اللي تكسب به إلعب له ... لحد اللعيبه ما جابت جاز وكثرت الإصابات والأرهاق ...

ألف مبروك للزمالك ....

وألف مبروك للأهلي فوزه بالدوري لثالث سنة على التوالي ...

وأتمنى أشوف مباراة نضيفة من غير إسهال أو إمساك

طلعو بقى دكتور هوبا وكوكو واوا من التلاجه خلوهم يفرحوا شويه ..

وإنتي يا دكتورة نانو جهزي الحتة اللي على الحبل عشان هاتتعشي بكره في أرقى مطعم في منطقة السالمية الكويتية بمناسبة فوز الزمالك ...

وطوبى لمن شجع اللعبة الحلوه

[Modest]

أكيد بدون مناقشه الاهلي سيفوز كالمعتاد...

وطبعا سيكون الفوز تتويج لإنجازاته العديده

إلا صحيح هوة مش الأهلي فاز بالدوري؟؟؟

الاخت الفاضلة ناش و الأخوات الفاضلات

رجاءاً الستات تمتنع عن التصويت علشان التوبيك ده هايكون فيه الدم للركب

أقعدوا على جنب و جهزوا الشاش و الميكروكروم علشان سين سين و داروين و أعوانهم من القلة المندسة

تم تعديل 20 مايو 2007 بواسطة Modest

[se_ Elsyed]

تفادياً لجرح مشاعر الإخوة الاهلاوية فسيتم غلق هذا التوبيك مؤقتاً لأسباب فنية .. على وعد بأن يتم فتحه غداً في تمام الساعة العاشرة والنصف مساءً بتوقيت القاهرة الثامنةوالنصف بتوقيت غرينيتش وعلى السادة المقيمين خارج القاهرة وخارج جرينتش مراعاة مشاعر الاهلاوية

محاورات المصريين تتمنى لكم صوماً مقبولاً وإفطاراً شهياً والان مع فوازير " أمال فهمي "

يارب

يارب

يارب

يارب ماتشميتش فينا موديست وشلته

يارب .. أي نعم نانو غلبانه وبقى لها 3 سنين هوبا منشفها عليها وما بتتعشاش بره .. بس ما يبقاش العشا ده من لحم الأهلاوية

يارب .. أنا شايف نظرات التحفز والإشرئاب في عيون كوكو ونفسه يشمت فينا ... لجل حبيبك النبي يطلع الماتش تعادل

[Modest]

الأخ الرفيق سين سين :P

تحية كروية صباحية زمالكاوية

مش ناقص غير إنك تلحق جوزيه في البرتغال علشان تتنصل من نتيجة المباراة قبل بدايتها wst::

لعلمك اللي قالقني هو لعب الأهلي بالأشبال (و على رأسهم الشبل عبد الحميد حسن 34 سنة ) اللي هاتكون فرصة لإثبات انهم ليسوا أقل من الأساسيين.

الأساسيين اللي من زماااان (من قبل برشلونة) و هم حالتهم حالة نتيجة ضغط مستر جوزيه الراجل السكرة اللي طحنهم و ركن باقي اللاعبين اللي اشتراهم طفاسة :FN:

اللعب بالصف الثاني أو الثالث يكون مثل مباراة حسام حسن الشهيرة و اللي كان الوحيد فيها من الأساسيين شوبير .. لكن أغنية الصف التاني و الثالث بتاعت بكرة بتفكرني بأيام الانسحاب من البطولة العربية و لولا إن ماينفعش البطل ينسحب كان مستر جوزيه طلب الانسحاب من الدوري و لكنه المرة دي فضل ينسحب لوحده

و اللعبة اكتملت بإضافة بركات للأساسيين المستريحين .. ماهو برضه لعب بالضبط 3 ماتشات من أول الموسم و من حقه يرتاح yaw:

نهارو أبيييييض :wub:

[se_ Elsyed]

ردي الوحيد عليك يا موديست هايكون في الملعب

ومن حقك تبات يوم فرحان وتمني قلبك بالأفراح .. لكن إن شاء اهل هاترجع وقلبك كله جراح .. وهاترجع موديست بتاع زمان الشهير بـ " مالك الحزين "

[النسر المصري]

طبعا الناس اللي مصوته وراقعه بالصوت بتقول ان الأهلي هيفوز...ده بس عشان وطنيتهم الأهلاويه تمنعهم من إنهم يتوقعوا غير ذلك

لكن كلنا نعلم مسبقاً ان الزمالك هيفوز.... وتحديدا 3/0 ....زي ما قال ريسنا س س........

ماعنديش كلام ازوده على كلام ريسنا ياموديست باشا......بس هو سؤال واحد بس وجاوبني بصراحه

بجد بجد بجد.....هل هتبقى فرحان فعلا لما الزمالك يفوز على الأهلي وهو بيلعب بالأشبال.........أفهم بس ......!!!

[نانو]

رجاءاً الستات تمتنع عن التصويت علشان التوبيك ده هايكون فيه الدم للركب

أقعدوا على جنب و جهزوا الشاش و الميكروكروم علشان سين سين و داروين و أعوانهم من القلة المندسة :P

يارب .. أي نعم نانو غلبانه وبقى لها 3 سنين هوبا منشفها عليها وما بتتعشاش بره .. بس ما يبقاش العشا ده من لحم الأهلاوية

أممممممممممممممم ......مش كل الستات هاتحضر الميكروكروم .....أنا عن نفسي مش هابقي فاضيه هأحضر الحته اللي علي الحبل

علشان العشاء المرتقب والذي طال انتظاره اعوما وسنينا عده

وبييييييييييييييييييب بييييييييييييييييييييييييب زاااااماااااالييييييييييييييييييييييييييييك

[DARWEEN]

لا يا س س انت ونسر .. معلش يعني

ممكن الزمالك يكسب الأهلي أيوه وده احتمال كبير ووارد

لكن الأهلي لو نزل للزمالك 11 فانله فاضيه متطبقه في الملعب برشه مش حيكسبوا 3 صفر

وعلى رأيك يا س س ... حسك طلع يا موديست

[DARWEEN]

أنا عن نفسي مش هابقي فاضيه هأحضر الحته اللي علي الحبل

علشان العشاء المرتقب والذي طال انتظاره اعوما وسنينا عده

كده يا نانو ... كل ده علشان عشوه ؟؟؟ منك لله يا س س انت اللي بتوعد وتخلف

طيب خلي الحته على الحبل .... كده اضمن احسن الأهلي يخلف ظنكم ويكسب .... ويبقى لا منك طولتي العشا ولا الحته فضلت على الحبل

[نانو]

كده يا نانو ... كل ده علشان عشوه ؟؟؟ منك لله يا س س انت اللي بتوعد وتخلف

عادي طبعا لانه أهلاوي ....لكن الزملكاويه غير ......ديه حتي في عزومه وصلت قبل ما الفوز يحصل بشهر كده

[Modest]

ردي الوحيد عليك يا موديست هايكون في الملعب

ومن حقك تبات يوم فرحان وتمني قلبك بالأفراح .. لكن إن شاء اهل هاترجع وقلبك كله جراح .. وهاترجع موديست بتاع زمان الشهير بـ " مالك الحزين "

نتقابل في الملعب يا سين سين تحت شعار "افرح يا قلبي الحزين ... لك نصيب تنكد على سين سين"

يبقى نهار كوبيا لو اتغلبنا بعد الشويتين اللي باعملهم في التوبيك ده

تم تعديل 20 مايو 2007 بواسطة Modest

[Modest]

ماعنديش كلام ازوده على كلام ريسنا ياموديست باشا......بس هو سؤال واحد بس وجاوبني بصراحه

بجد بجد بجد.....هل هتبقى فرحان فعلا لما الزمالك يفوز على الأهلي وهو بيلعب بالأشبال.........أفهم بس ......!!!

برضه بتقول أشبال يا عمّور

خلاص نصدّق بقى ماكينة الإعلام المُوَجَّه و لعبة عمو جوزيه الهربان و نقول على الأسماء التالية أشبال:

عبد الحميد حسن و إسلام الشاطر و أمير عبدالحميد و وائل جمعة .. أشبال :P

أحمد السيد و محمد صديق و طارق السعيد و أحمد شديد قناوي و أنيس بوجلبان .. أشبال :wub:

حسن مصطفي وأحمد حسن وأسامة حسني وأحمد بلال و أكوتي مانساه ... أشبال wst::

نقول كمان و لا كفاية كده؟

15 إسم يعملوا فريق بالاحتياطي و معاهم 1 يلمّ الكور من ورا الجون

[se_ Elsyed]

موديست بيفكرني بالراجل المسلوع بتاع مسرحية " الهمجي "

ما تقدرشششششششششششششششششش

طب وريني أمارة كده للفتونة اللي نطرت في عروقك يا بوديس ؟!!!!

وإن كنت نسيتو اللي جرا .. هاتو الفايلات تنقرى

11 لقاء في ديل بعض

8 فوز للأهلي

واحد تعادل يتيم

2 فوز للزمالك

وكله على يد المُرعب جوزيه

وبأمارة إيه جوزيه خايف وهرب ؟

بامارة إنه فاز بالدوري 3 مواسم ورا بعض ؟

ولا بامارة إنه سكعكو في الدور الأول ؟

ولا بأمارة الستة ؟

نانو ..... اللي بيخاف يروح

والستات ... برضوا تروح

واللي عايز يتعشى واللقمه تمري على جتته برضوا يروح ..

روحي بقى بُصي على حلة البسلة اللي سايباها عالنار أحسن تشيط .. وإبعتيلي الدكتور هوبا لما يخلص العيادة .. عشان عايزين نضحك عليه شويه

[Ahmad Farahat]

لما وجدت الناس وقد اشتد بهم النزاع

أيهم يفوز فريق الأقوياء أم فريق الرعاع

وجدتني مضطرا للمجيء حاملا معي رأيي الجريء

مابين الرئيس س.س

والقائد موديست

فلما كان أرسين بن لوبين معروفا بالصراحة ويدرك ما ألم بموديست ويعرف قدر جراحة

فقد أتى خافضا له جناح الذل من الرحمة حاملا معه صينية فتة باللحمة

قائلا له بصوت حزين على الزمالكاويين

أخيرا طلع ليكم حس

وبتقولوا هنكسب تلاته بس

ماشي كلامك يا معلم

هنشوف شبكة مين هتتكلم

بس ياريت متعيطوش

ومتلبسوش منصف طربوش

وهكذا سكت أرسين عن الكلام المباح والغير مباح أيضا

[Modest]

وعلى رأيك يا س س ... حسك طلع يا موديست

أنا بس شايل الراية على ما ييجي رفقاء السلاح يا كابتن داروين و هارجع تاني ألبد في الدرة

يا جدعان فين هوبا و كوكوواوا .. حد ينده لنا عليهم بدل ما هم سايبينّي لوحدي

ده لا وقت عيادة يا هوبا و لا وقت تطمّن فيه على المزرعة يا كوكو .. اجمع بالخطوة السريعة

تم تعديل 20 مايو 2007 بواسطة Modest

[Modest]

أخيرا طلع ليكم حس

وبتقولوا هنكسب تلاته بس

بمراجعة أقوال المتهمين و مطابقتها على أقوال الشهود اتضح أن الرفيق سين سين هو من ادّعى فوز الزمالك بالثلاثة.

و بذلك ينتفي الغرض من مرافعة الكابتن أرسين لوبين كونها بنيت على أساس غير سليم.

[se_ Elsyed]

حتى لو كسبناكو بالناشئين بكره يا بوديس .. هاتفضل حبيبي .. وهانقعد سوا على القهوة نحتسي الفايف كلوك تي بغض النظر عن إني مُشرف أو ممكن لو الاهلي إتغلب أروح هابدك إنذار أو خلافه ...

[drhouba]

نظره إعلاميه مستقبليه لما بعد المباراه :

فى حالة فوز الزمالك:

*على برنامج"الكرة مع دريم"..الزمالك يفوز على بدلاء الاهلى!!

*كابتن طه اسماعيل.."الاهلى كان يعانى من الاجهاد".. تصريح مسبق فى حالة هزيمة الاهلى فى اى مباراة حتى لو لعب بالبدلاء..وكمالة التصريح"والزمالك يحتاج لتخطيط شامل"..حتى لو قدم مباراة العمر!!

*مشجع اهلاوى فى قهوة بلدى"الاهلى فى اليابان يا كابتن شوبير..بنحبك يا كابتن شوبير"..حتى لو البرنامج على المحور ويقدمه مصطفى عبده!!

*مشجع اهلاوى فى كافيه نضيف"برافو ..مابيفوزوش الا لما نريح لعيبتنا".."هو ده اخركم"!!

*مشجع زمالكاوى"ده اول الطريق..وحناخد كل البطولات"..تصريح لمجرد الفوز بمباراة.

*جوزيه من البرتغال"مش مشكلة شوية صيع يفوزوا علينا..الدور على اوغاد الاسماعيلية"..مع تحيات ترجمة احمد عبده..مترجم النادى الاهلى.

*لاعبى الاهلى"احنا زعلانين من ان الجماهير ماشية زعلانة..بس ده بسبب الاجهاد..انا يا كابتن ماشوفتش مارينا من 3 سنين"..ملحوظة:مارينا ده بنته!!

*عمرو زكى"بهدى الفوز لجماهير ساوثامبتون قبل ما اجيها ب 5 مليون استرلينى"

*جميع لاعبى الزمالك"فيه روح جديده..احنا كل يوم بنصلى العشاء حاضر"

*هنرى ميشيل"عودة البطولات الموسم القادم"

*حسام البدرى" الحقيقة مش عارف اقول ايه عن التحكيم..وبرضك مش عارف ليه جماهير الزمالك بتشتمنى"..تصريح حتى لو الجماهير ما شتمتوش.

*الاهرام المسائى"مجلس ادارة الريموت كنترول يقرر صرف معونه عاجلة بسبب الفوز"

*الصحافة..الاهلى المجهد والاحتياطى..والناشئين والبدلاء الاحياء منهم والاموات يخسر من الزمالك!!

*مواقع الاهلى الاليكترونية..بدلاء و ناشئى الاهلى..ومبادىء حقوق الانسان الاهلاوية لاراحة اللاعبين تخسر من الزمالك بكل لاعبيه..حمل مباراة الستة واحد!!!

*الشريط الجهنمى السفلى لقناتى دريم والمحور.."الزمالك التعبان بيفوز على اهلى اليابان"..سعيد المفش-مركز شباب البركة-جرجا-كوم ابو القفص.."الاهلى فوت الماتش..ليه..عشان يساند الزمالك اللى اتغلب من الفيصلى"..مسعد الجن-امبابة.."يا اهلاوية يا تعبانين..اتفرجوا على شيكابالا" رفعت سيد احمد..الحوامدية.."هو ده اخركم يا زمالكاوية..تفوزا على بدلاء الاهلى..و9 على بنى سويف" بيتر مايكل- مركز ابو شقاف- شربين قبلى!!

فى حالة فوز الاهلى:

*على برنامج"الكرة مع دريم"..بدلاء الاهلى يفوزوا على نجوم الزمالك..مفيش فايدة!!

*كابتن طه اسماعيل.."الاهلى ورغم كل الغيابات..قدر يحافظ على روح الفانلة الحمرا..وقدر بفضل توجيهات جوزيه من البرتغال يحقق نتيجة تثبت انه بطل..وبيلعب باى 11 لاعب!!

*مشجع اهلاوى فى قهوة بلدى"الاهلى هو الاهلى..وصالح سليم فى قلوبنا..بنحبك يا كابتن شوبير"..المرة ده فى برنامج شوبير..وتنتقل الكاميرات ونجد بسمة شوبير وقد خرج فمه من وجهه!!

*مشجع اهلاوى فى كافيه نضيف"صعبان عليه الزمالكاوية".."الاهلى فوق الجميع"!!

*مشجع زمالكاوى"معلش بس لعبنا حلو النهاردة".

*جوزيه من البرتغال"هما الصيع دول مش حيفوزا علينا ابدا..الاسماعيلاوية يخبوا عيالهم"..مع تحيات ترجمة احمد عبده..مترجم النادى الاهلى.

*لاعبى الاهلى"الف مبروك..واى 11 لاعب يا كابتن يقدروا يحققوا تاريخ للاهلى"

*عمرو زكى"النهاردة جيه فاكس من مانشيستر.. بس الزمالك قفل الفاكس فى وشهم"

*جميع لاعبى الزمالك"فيه لعيبة حرام يلعبوا فى الزمالك"..المشكلة التصريح بيبقى على لسان 25 لاعب..مش عارف..هو مين بقى اللى بيقصدوه

*هنرى ميشيل"عودة البطولات الموسم القادم"

*حسام البدرى" انا صرحت..انا خططت..انا جامد..انا حلو اوى..مش عارف ليه جماهير الزمالك بتشتم".

*الاهرام المسائى"مجلس ادارة الريموت كنترول يعاقب لاعبى الزمالك بخصم 250 جنيه!!"

*الصحافة..الاهلى المجهد والاحتياطى..والناشئين والبدلاء الاحياء منهم والاموات يفوز على الزمالك!!

*مواقع الاهلى الاليكترونية..بدلاء و ناشئى الاهلى..ومبادىء حقوق الانسان الاهلاوية لاراحة اللاعبين تفوز على الزمالك بكل لاعبيه وده اقل واجب.. وبرضك حمل مباراة الستة واحد!!!

( منقول )

تم تعديل 20 مايو 2007 بواسطة drhouba