السادات .. زعيما - و شهيدا

[freefreer]

شكرا  لأخى الحبيب خالد أحمد .. على هديته الرائعة .. موقع موسوعة مقاتل من الصحراء ..

http://www.moqatel.com/mokatel/data/mokatel-m.htm

و الموقع يبدو كموسوعة سياسية .. و تاريخية .. هائلة .. جازاهم الله خيرا

[freefreer]

مفاجأة رديئة .. الموقع غير قابل لنقل اجزاء منه ..

عموما هذه الوصلة .. التى تحكى عن السادات رحمة الله علية .. و كيف انهم اطلقوا علية النار على عنقة .. ثم على صدرة .. ثم وصلوا اليه و طعنوة بالسونكى .. و نحن اخر من يعلم .. هذا حالنا ..

http://www.moqatel.com/mokatel....aet.htm

[ragab2]

السادات صحح  فشل  الملهم وأخطائه

Edited By ragab2 on April 24 2002 11:31pm

[zigzag]

السادات ثعلب سياسي

جبهة الصمود والتصدي ، مازالت موجودة بعد 25 سنة ، تمارس عملها كما كانت عن طريق الميكروفونات .

[ragab2]

جبهة الجمود والصدأ

هم تلاميذ مخلصين للملهم

[egypianity]

الاعلام بدأنا نتابعه من الخليج

حتى تاريخنا نأخذه من الخليج ؟؟؟

عجبي ,, وعمار يا مصر ( المباركة )

[Cleo]

للرفع...

[Cleo]

الاعلام بدأنا نتابعه من الخليج

حتى تاريخنا نأخذه من الخليج ؟؟؟

طبعا...!!!!

مصر الريادة.... :angry:

[kfaya]

الاعلام بدأنا نتابعه من الخليج

حتى تاريخنا نأخذه من الخليج ؟؟؟

الأعلام بنتابعة من الخليج .. مفهومة ... من قناة الجزيرة و العربية ....

لكن تاريخنا بنأخذة من الخليج ازاى ؟؟؟؟!!!!

[Cleo]

الاعلام بدأنا نتابعه من الخليج

حتى تاريخنا نأخذه من الخليج ؟؟؟

الأعلام بنتابعة من الخليج .. مفهومة ... من قناة الجزيرة و العربية ....

لكن تاريخنا بنأخذة من الخليج ازاى ؟؟؟؟!!!!

لأ الموقع اللى فرى فرير جاب منه المعلومات دى موقع خليجىى

[theblackpirate2005]

سلملى على الرياده me0:

[without mask]

السلام عليكم و رحمة الله و بركاته,

تحية طيبة للقائمين على المنتدى و لأعضائه الكرام , أرجو المعذرة على اسلوبى فى الكتابة لعدم تعودى بعد على الكتابة فى المنتديات عبر الانترنت فهذه أول مرة اشارك فيها.

أما ما أردت التعليق عليه هو ما أراه على المنتدى من شباب مصر و رجالها الذين يمدحون السادات و كأنه بطل كما يطلق اعلامنا دائما على الزعماء القاب و مسميات ليس لهم منها الا الأسم فهو بطل الحرب و السلام و رب العائلة المصرية كما كان يخاطب شعب مصر بأولادى و هو الذى يظهر بالبذة العسكرية مقلدا باوسمة و النياشين و يحمل فى يده الصولجان كانه فرعون, و فى حقيقة الأمر ليس الأسف فيما فعله السادات إنما الأسف كل الأسف أنه مازال هناك من شعب مصر من يحمل لهذا الرجل بعض الإعزاز و التقدير برغم ما فعله بمصر و بشعب مصر, و لكى لا يكون كلامى معتمدا على العاطفة و يظن بى من يقرأ هذه الكلمات أنى احمل على الرجل بسبب تعلقى بمن سبقه أو لحقه فأقول لا يكن فى صدوركم شك من هذا الأمر فكلهم عندى سواء و ربما كان السادات هو حسب التعبير العامى ,, أحسن الوحشين,,

إنما لا يعنى هذا ان نغض الطرف عن ما ارتكب هذا الرجل من جرائم بحق الأمة الاسلامية و العربية و بمصر تحديدا ,نبدأ من سبتمبر سبعين حيث التقى السفير الاميركى فى عزاء عبد الناصر و قدم فروض الطاعة و الولاء لسيده الجديد؟ ام نبدأ مسرحية حرب اكتوبر التى اختلقها لا لتحرير ارض مصر كما كان يطمح شعب مصر إنما لتحريك المفاوضات مع إسرائيل و ليصل فى نهاية الأمر بعد التحية بخمسة عشر الف شهيد فى حرب 67 و ضف عليهم شهداء اكتوبر إلى حل منفرد مع إسرائيل و يتسبب فى المقاطعة العربية و الاسائة لأسم مصر؟ و أين ننتهى؟ نتتهى حيث ذهب منفردا إلى إسرائيل خاطبا ودها تارك السوريين شركاء الحرب الذين ضحوا باولادهم كما ضحينا نحن فى اكتوبر و تارك الفلسطينين و تارك كل الأمة الاسلامية و العربية ليوقع اتفاق فى نهاية الأمر يرجع به ألامر يرجع به سيناء منقوصة السيادة و منزوعة السلاح و هى بوابة مصر الشرقية و أرض مصرية خالصة داخل حدودنا؟؟؟ أم ننتهى حيث اعتقل كل معارضيه فى مصر من مفكرين و صحفيين و كتاب و اساتذة جامعات و رجال دين و رجال فن و ثقافة , اعتقل صفوة المجتمع المصرى و أضاع ثروة مصر من أثار و تحف فكان سخى فى إهداء الأثار التى لا يملكها و لم يرثها عن السيد الوالد لكل من هب و دب من الشخصيات التى تزور مصر فقد ذكر محمد حسنين هيكل فى خريف الغضب انه فى اخر ايام بطل الحرب و السلام عندما عبر ياخت الاميرة ديانا و الامير شارلز من قناة السويس اثناء قضائهما شهر العسل اثرسيادته على استضافتهما و قدم لهما هدية شهر العسل قطع أثار فرعونية أصلية ,, إرجع للكتاب لتجد التفاصيل,,, و اقول كلمة أخيرة لكى يعلم كل من يقرأ هذه الكلمات أننا دائما نخطئ فى الحكم على الاشخاص لأننا لا نحكم على حسب إنجازاتهم و أخطائهم إنما نحكم عليهم كما نحكم على الممثلين و المطربين فمن يبدو فى مظهر افضل و من تكلم أفضل دخل قلوبنا و صار حبيبنا و ,,حبيبك يبلعلك الزلط و عدوك يتمنالك الغلط,, الكلمة الأخيرة التى أردت أن أختم بها هى أن مصر فى سبتمبر سبعين حين وفاة عبد الناصر كانت مديونة بحوالى اثنين ميليار دولار و حين مات السادات فى واحد و ثمانين بلغت ديون مصر برغم المعونة الأمريكية ثمانية عشرة مليار دولار و اليوم تتعدى ديون مصر برغم خوض اى حرب او الدخول فى مضمار سباق التسلع حوالى خمسة و سبعون مليار دولار .. و لا يقول قائل الزيادة السكانية هى السبب فقد اصحت نكتة الزيادة السكانية نكتة لا تضحك و مؤتمر السكان فى نهاية التسعينات خير دليل على سخافت هذه النكتة .

شكرا لكم

[مهيب]

الى الأخ العزيز (بدون قناع)

السادات مكانش بطل على الاطلاق ... لكنه كان بطل المعركة ... السادات كان مليان عيوب ... أنا معاك ... لكنه ادى لمصر كتير قوى ... يمكن أكتر من الباقيين ... متنساش ان حرب اكتوبر رجعت ثقة المواطن شوية ببلده .... الفكرة مش فكرة هدف الحرب ايه ... ولا أخدنا ايه منها .... الفكرة ان أول مرة الجندىو القائد و المهندس و ظابط المخابرات و ... و... يفكروا فى الحروب بنظرة جديدة ... أيام المملكة كان الجيش ضعيف .... ومدخلش حرب حقيقية .... و أيام 67 اعتقد عبد الناصر ان الحرب بينتصر فيها صاحب اللسان الأطول و الجعجعة الأعلى ... أول مرة يبقى فى تخطيط على المستوى ده ... أو مرة يبقى فى تنفيذ على المستوى ده ... لكن قطعا السادات مش هيقفز بمصر من بسطة التخلف الى قمة السلم ... كل اللى يملكه شوية سلاح روسى فاشل ... أزال من فشله قليلا براعة و عبقرية المقاتل المصرى ...

متنساش ان السادات ربنا جعله كقائد سبب انك تسمع عن الاحتلال فى التليفزيون و الجرايد بس ... و متقراش كل يوم كلمة سيناء المحتلة

وكلنا نتذكر موضوع السوخوى و الميج اللى كانت بتوقع الفانتوم ... السادات انتصر فى معركة ... عبر القناة تحت الضرب ... يمكن انت تشوف ده شيء تافه .. لكن امتى المصريين و العرب حسوا بنشوة النصر قبلها ... يمكن ساعة فتوحات محمد على ... واللى اعتقد ان ساعتها مكانش فى حاجة اسمها عرب

أما موضوع سوريا و فلسطين و الأردن و الكونغو الديمقراطية لو حبيت ... دى كلها شعارات عبد الناصر ... السياسة الدولية مش معتمدة على الصداقة و الجدعنة ... ولو خيرونى ان شبر من سينا تبقى محتلة ولا الأردن كلها تحتل ... صدقنى مش هاتردد و أنا بختار الأردن كلها .... دى بلدى ... وانا مش شايف ان الاردن أو فلسطين أو السعودية أو الكويت بلدى ,... ولا شايف انى بانتميلهم بأى كيفية .. اللهم كونهم مسلمين زى باكستان و بروناى ....

وعلى العموم السادات دعاهم للمفاوضات اللى بحت أصواتهم بالمطالبة بيها بعد كده ....السادات مالوش دعوة بأبناء سوريا اللى ماتوا فى الحرب .... وأن مش هسيب سينا محتلة تضامنا مع الشقيقة سوريا ... كان هدفه ايه فى كل ده يا سيدى الفاضل ... كان هدفه سينا ....

مفيش شك ان السادات كان بيحب مصر ... كمان عبد الناصر كان بيحب بمصر ... حتى الملك فاروق اللى قال لأن أتنازل عن ألف عرش خير من أن يقاتل المصريون المصريين .... لكن السادات يكفيه شيء واحد فقط عن الباقيين ....

ان لو كنت أنا أو انت أو عبد الناصر أو أى من اللى بيهاجموه مكانه بعد حدوث أسوأ هزيمة فى تاريخ الحروب الحديثة اللى هى 67 عمرنا مكنا هنجرؤ على اتخاذ قرار الحرب .... لأن اللى حصل فى 67 كان مهزلة حربية لم تحدث فى التاريخ ....

حرب العاشر من رمضان مكانتش حرب السادات وحده ... كانت حرب المصريين كلهم ... لكنه كان القائد ... ويمكن لولاها كان زمان المصريين مطية العرب ... وكان زمانعم بيتريقوا علينا دلوقتى ان سينا محتلة و اننا حاربنا مرتين و معرفناش ناخدها ....

انت اذا كنت بتعيب على السادات لأنه تخلى عن العرب ... ففى رأيى ان ده زائد الحرب أعقل شيء عمله .... و لو بصيت دلوقتى على العرب هتعرف أنا أقصد ايه

... ده مفيش أجناس أو شعوب أو دول بتكره بعضها قد العرب ... بص على اللى بين السعودية و البحرين ... على اللى بين الكويت و العراق ... على اللى بين الفلسطينيين و الأردنيين على اللى بين قطر و باقى الدول العربية ... العرب متقسمين كالتالى :

دول مجلس التعاون الخليجى و كل اللى يهمهم فى الحياة البترول و الفلوس و الحياة الرغدة

دول المواجهة : زى مصر و االأردن و سوريا .. ودول شافوا كتير من الحروب

دول مقهورة : زى فلسطين و العراق .. واهو متسابين لوحدهم يعانوا

دول مالهاش دعوة بحاجة .. زى الناحية التانية ليبيا و الجزاير و دولة اسمها تونس و دولة اسمها المغرب و موريتانيا على ما أعتقد...

وتقوللى عرب ... وبعدين هو دايما اشمعنى مصر ... مكتوب عليها ولا ايه .... الكويت لما العراق دخلتها استنجدت بأمريكا و زرعتهالنا فى المنطقة .... واحنا علشان حررنا أرضنا عملولنا أفلام ....

لكن خللينى أقولهالك بأمانة ... منطق القومية العربية اللى زرعه عبد الناصر طول عمره كان بيثبت فشله ... لكن المشكلة انه من آن لآخر كان بيطلع رجال عظماء ... زى الملك فيصل يخلونا ممكن نفكر تانى فى نفس المنطق .....

رحم الله السادات ... فقد أعاد لمصر هيبة و روحا كانت قد فقدتها فى المهزلة النكراء ... كانت له أخطاؤه التى لم تتجاوز أخطاء من سبقوه بل كانت أقل منها .... و مننساش عبد الناصر و تعذيبه الرهيب للاخوان ... و انه تقريبا أول من أرسى قواعد التعذيب فى مصر ... رحم الله السادات الذى لم يشفع له ما فعله فقتلوه فى حادثة مؤثرة ...

تم تعديل 13 مارس 2005 بواسطة مهيب

[yasovinas]

ملحوظة غريبة اليوم في المحاورات حوالي خمس او ست مواضيع نشطة اليوم مرفوعه من سنوات سابقة 2002،2003 وهذا الموضوع من العام الماضي خير ما هو السبب