سيدي الرئيس : هل تعلم شيئاً عن هذه المصيبة ؟

[se_ Elsyed]

يادي الكسوف ياولاد

هو الريس هايلاحق على إيه ولا إيه ؟

ما تعرفولناش ساحر كويس ويكون واصل يعملنا عمل للشعب المصري يقوم ربنا واخدهم كلهم عشان الريس يرتاح من قرفنا ويرزقه يارب بشعب نضيف بيستحمى كل يوم والبلد تنضف بقى ؟

وبالمره يعملنا كمان عمل أرض جو بعيد المدى عشان المصريين العُملاء اللي سابوا البلد وهجوا من وش .... إسمه إيه ده .. تقوم تجيلهم شوطه هما كمان او يتشحنوا كلهم على جونتانمو ؟

يا سلام ... فعلاً يبقى لكم الحلاوه لو دلتونا على الساحر ده .. خلونا نخلص

هذا الموضوع مثار بقى له فترة قصيرة والإجراءات تجري على قدم وساق للتنفيذ ... ولا عزاء للمصريين ..

قبل 48 ساعة من تنفيذ الأحكام..

النواب يناشدون الرئيس التدخل لدي القذافي لوقف إعدام 23 مصرياً في ليبيا

كتب مجدي عبدالرحمن :

قبل 48 ساعة من تنفيذ أحكام الإعدام في 23 مصرياً متهمين بارتكاب عدد من الجرائم في ليبيا وجه عدد من نواب مجلس الشعب نداءً يناشدون فيه الرئيس مبارك التدخل لدي العقيد الليبي معمر القذافي لوقف وتجميد تنفيذ حكم الإعدام المقرر غداً الأحد بسجن أجديدة في السجين عماد عبدالواحد محمد.. دعا النواب مجلس الشعب إلي مناقشة الملف في جلسة البرلمان غداً برئاسة د. أحمد فتحي سرور وطالبوا بالاتصال الفوري بالعقيد القذافي والتوصل إلي اتفاق عاجل لوقف تنفيذ الحكم مع الأخذ في الاعتبار إعادة محاكمتهم مرة أخري أمام دائرة قضائية جديدة علي نفس نهج قضية الممرضات البلغاريات المتهمات بحقن الأطفال الليبيين بفيروس الإيدز

.قال النواب إنه يجب توفير كافة سبل وفرص دفاع المتهمين عن أنفسهم والسماح لمحامين بالدفاع عنهم مؤكدين أن مطالبهم تلك تنطلق من العلاقات الوثيقة بين الشعبين المصري والليبي.

أضافوا أن مناشدتهم وطلباتهم ليست طعناً في أحكام القضاء الليبي أو تعقيباً عليه لأن القضاء سلطة مستقلة.. كما لا تستهدف أيضاً انتفاء التهم الموجهة إلي المحكوم عليهم ولكن فقط لاستنفاد كافة طرق الطعن خاصة أن بعض المحكوم عليهم مازالوا يتبرأون من التهم الموجهة إليهم.

23 !!!!!!!!!!!!!!!!! ليه

دي ما بتحصلش في مصر على مدار العام إن يتعدم 23 واحد ..

هما لو مُدانين بجرائم تستوجب هذا الحكم يبقى يستاهلوا ..

لكن

لازم على الأقل تُستنفذ كافة وسائل الدفاع عنهم ...

ولا

إحنا بفينا الحيطه الواطيه ؟

خلاص خلاص ما تزوقوش

مانا عارف إن إحنا الحيطه الواطيه بفضل توجيهات وسياسات السيد الرئيس القائد أدام الله ظله

أما الحريم الفاتنات المجرمات القاتلات

يا عيني على الحريم

اللهم صلي عالنبي

5 مجرمات قاتلات بلغاريات كن يعملن ممرضان في الجماهيرة العربية الإشتراكية المهلبية العُظمى لصاحبها الاخ الشاويش معمر دماغه

وعلى مدار خدمتهن قامتن بحقن مئات من الاطفال الأبرياء بفيروس الإيدز

الكلام ده سنة 99 يا جماعة والقضية لسه بتتمطوح في المحاكم .. اللي غايظ أهلي إن كل ما أتفرج على جلسه محاكمة من سنة 99 .. ألاقي كل واحده فيم بـ full make up وكاويين شعرهم وعاملينه ماشيت ولابسين هدوم أخر موضه وكإنهم مسجونين في الشيراتون ولا في سمير قميص

ومن سنة 99 حتى الان توفي أكثر من 150 طفل من تأثير الإصابة بالفيروس والظاهر إن الفيروزس كان مُركز فالعيال ما أخدتش وقلت ... ومازال المئات على قائمة الإنتظار

ومعمر أفندي اللي عامل فيها عنتر عمال يأجل القضية من شهر للتاني ولا يجرؤ إنه يتخذ قرار رجولي بإعدامهم فعلياً

وأوروبا وأمريكا كل شويه يبعتوه له رسائل تهديد بإنه لو أعدمهم .. فهايحطو السيخ المحمي في صرصور ودنه زي ما عملوا فيه في قضية لوكيربي .. وبعد ما صرف مليارات الدولارات على نزوات ومغامرات عبيطة وأسلحة كيماوية ... جت السفن الامريكية والروسية و حملت الأسلحة الكيماوية والمعامل اللي عنده مجاناً .. في عمليه نضيفة 100 % وسابوه له " إسمها إيه دي اللي كان بيعمل فيا بيبي او بيلبسها على دماغه ويقعد ويغني ويقول أنا عندي سلاح كيماوي أنا عندي سلاح كيماوي

وبعد ما صرف مليارات على تلك الخزعبلات ... طلع م مولد بلا حمص

أما علينا أحنا فعامل فيها سبع رجاله والقضية لازم تخلص قوام قوام والجاني ياخد عقابه زي الكتاب ما بيقول وإكرام الميت دفنه

وللأسف مبارك اللي كل يوم والتاني عنده في طرابلس لا يُحرك ساكناً

وهو من إمتى جاب حق واحد مصري منذ أن تولى كُرسي الحكم

بالمناسبة ..

ظابط مصري من قوات الأمم المتحدة في دارفور .. إتقتل النهاردة وقالوا إن ده حادث سطو

وغيره وغيره من مئات الحوادث في عهده الميمون

والراجل مسطح قفا مصر لكل من هب ودب يدينا على قفانا .

وما يهود أولمرت ببعيد .. فبعد مقتل عدة عساكر أبرياء على الحدود بين مصر و دولة بني صهيون على يد أحفاد القردة والخنازير .. إذ بمبارك تاني يوم يظهر في التليفزيون وهو حاطط إيده على كتف أولمرت وهاتك يا ضحك وكركره وكإنه بيقوله : يا راجل ما تعملش في نفسك كده .. فداك مليون مصري ... تحب أبعتهملك تل أبيب تدبح اللي تدبحه .. وتعمل الباقي شاورما ؟

إخص على السياسة وإخص على كراسي الحكم وإخص على حرقة الدم اللي إحنا فيها ولا حياة لمن تنادي

[amrhoras]

:sad: بيقولوا ضربو الاعور علي عينه قال ماهى بايظة بايظة

ياعم انت جيت في جمل 23 مصري بس ولا حبة عساكر من عامة الشعب وايه يعنى هاتو عشرة بدالهم ملعون اللى خلفوهم وان كان على ظابط الحمد لله انها جت على اد كدة دارفور منا وعلينا برده يولاد ابعتو ظابط بداله

ياترى عمل ايه فى عبارة السلام القضية عملت ايه خلصت على دفع التعويضات ولا ايه ؟ انما المصريين اللى راحو هدر كدة اخدتم حقهم ولا لا؟

ياترى عمل ايه لما طيارتنا رحلة رقمم 990 عام 1999 وقالو ان البطوطي الله يرحمه منتحر لما قال توكلنا على الله

ياترى عمل ايه للمصرين جوه بلدهم

فين الخطة الانتخابية اللى كان بيقولنا عليها

عمل ايه في قضايا الفساد جوا مصر ؟

عمل ايه فى الناس اللى هربت بفلوس الشعب

عمل ايه فى دم الاسرى اللى عرضت اسرائيل فيلم وثائقي عنهم من كام اسبوع

عمل ايه في معتقلين جوانتنامو المصريين اللى ميعرفش عنهم حاجة

عمل ايه لما دبابة صهيونية ضربت مجموعة من عساكرنا على الحدود المصرية؟

عمل ايه والموقف اللى عمله مع العراق ايام الضرب 2003 ان مكنش المصريين كفاية فى عرب برده ومصريين فى العراق اللى راح سلمهم للسلطات الامريكية انهم داخلين اراضى العراق للجهاد

عمل ايه لما اسرائيل ضربت لبنان

عمل ايه لما قامت حكاية الرسومات ضد النبي صلي الله عليه وسلم

عمل ايه لما الجنية المصرى بعد ماكان ايام عصر الملكية بكام دولار دلوقتى الجنية ميسواش التراب

عمل ايه فى الخطة التعليمية

عمل ايه فى الخطة الاقتصادية

عمل ايه فى القضايا الخارجية

عمل ايه فى الناس المرمية فى المعتقلات بإذنه

عمل ايه فى دم الشباب اللى بيروح كل يوم بره وجوه حسبي الله ونعم الوكيل

[darlengs]

عمل كتير طبعا انتو هتنكرو خيره دا الراجل بقالو سنين و سنين ملوش شغلانه غيركو لحد ما شعره شاب00

بيعمل فيكو قصدي بيعملكو عمايل 00 محدش عملها فشعبه0 0 قصدي لشعبه قبل كدا00 في حد مدد قانون الطواري لشعبه الفتره دي؟؟احمدو ربنا دانتو فبلد الامن و الامان00 امال بأه بعد قانون الارهاب هتقولو ايه 00 لا دي مفاجاه00

طب حد وصل عدد المعتقلين فتره حكمه زي دلوقت ؟؟؟ داحنا هندخل موسوعه جنيس للارقام القياسيه00 و مع ذلك برضو احنا دوله ديمقراطيه00 محدش يقدر ينكر 00

دنا سمعت انهم هيخلو المستشفيات و يدخلو المعتقلين مش لعلاجهم طبعا00 والله و بكل امانه فعلا محدش بيعرف يعذب المعتقلين زينا 00 دول بيستقدموهم من الخارج يعذبوهم و يرجعوهم تاني 00فعلا تفوق علي نفسه00

اما من ناحيه الدلع فمحدش مدلع زينا 00 اولادنا ناس متعلمه و زي الفل تلاقيهم منتشرين في شتي انحاء الارض بس بكرامتهم برضو 00 مهو في السفر سبع فوايدو الراجل عايز يفيدنا00 و سفاراتنا ربنا يحميها اهي شامخه نفس شموخه الشامخ00

دا من كتر خوفه علينا عمل معركه الطيور بعد ما هاجمتنا انفلونزا الطيور خوفا طبعا علينا 00مش جهل و لا سؤ تخطيط لا سمح الله 00 و دلوقت شوف كيلو الفراخ وصل لكام 00 ودا يؤكد بعد نظر حكومتنا الرشيده 00

و نظامنا الاقتصادي متقوليش احنا نظام فريد من نوعه كوكتيل 00 طبعا الناس الجهله المش مثقفين ميعرفوش النظام دا 00 يعني نظام سلاطه 00 راسمالي علي اشتراكي و حط عليه شويه ابتكارات وضعها وزراء اقتصادنا الحكماءفي ظل الحكومات المتعاقبه المهم انه ملوش معالم 00 لكن هما ناس واصلين و فاهمين بيعملو ايه 00 و اهو باين علينا اوي اننا بلد الرخاء و التقدم00و اسالو مليونيرات مصر و لو معرفتوش توصلولهم 00 روحو اسالو المتسولين وولاد الشوارع اللي تحت الكباري 00

هعدلكو ايه ولا ايه 00 بلاش نتكلم عن الخصخصه 00 ولا سياستنا الخارجيه 00 بلاش نتكلم عن الكرامه 00 ولا الحقوق 00 بلاش نتكلم عن الصحه 00ولا السياسه التعليميه لان دي كلها طبعا اشياء يقينيه مفروغ منها 00 واضحه و مش محتاجه كلام 00 طب بلاش نتكلم عن الاداب و لا الفنون الراقيه لانها بقت دقه قديمه 00ولا علي القوانين و لا علي الحقوق السياسيه و نظم الانتخاب 00 طب تقولو ايه عن ملف الفساد اللي مبيتفتحش 00 اصلهم مش لاقيين مفاتيحه معذورين برضو00بصراحه مفيش وقت لان الانجازات اكبر من ان تعد ولا تحصي بس اهي نبذه وجيزه 00 يعني ذره في بحر خدماته الجليله التي لن يناسها شعبنا لانها معلمه علي وجهه 00 قصدي في ذاكرته و سيكتبها التاريخ حتما 00 لك الله يا مصر

[yasovinas]

طيب وايه اخبار السفير المصري في الصومال اللي حجزوه رهن لغاية ما الحكومه الرشيده تدفع الاتاوة مقابل ما افرج القراصنه عن مراكب الصيادين المصريين وعن الطاقم بتاع المراكب ،، يعني بعد كده لما نلاقي اي سفير مش عايز يتدخل في اي مشكله بخصوص احد الرعاع (زمان كانت بتتكتب الرعايا) يقوم الراجل يلاقي نفسه محبوس زيالخروف الصومالي اللي منتظر العيد الكبير ، وشكراً سيادة الريس ، شكراً نظيف ، شكراً ابو الغيط {في وزير خارجية في الدنيا يبقى ابو الغيط} امال وزير الزراعه يبقى اسمه ايه ولا وزير العمل

يا عم روووووووح

[لا تعليق]

بقيت مش عارف العيب فينا ولا فى الرئيس ولا فى زمان اللى عايشنه ولا هو دة قدرنا في الحياة

الاكيد في حاجة غلط بس اية هيا مش عارف!!!

اعتقد كلنا مخطائين فى حق بلدنا من اكبر راس الى اصغر راس

دي تراكمات سنين طويلة من الاستبداد والظلم ونتيجة هى شعب سالبي في كل حاجة وحفنة من المنتفعين بيتحكموا في مصائر ملايين من الشعب

قضايا الفساد على شاشات التلفزيون والصحف وماخفى كان اعظم

جرائم القتل مش تعد

سرقات اصبح امر طبيعي

بطالة كتير وانواع برضه مش تعد

اية تاني............... كفاية كدة ضغطتي ارتفع

المهم لو سالت اي حد ماشي في شارع في سياسة هيقولك ( كبر دماغك خالينا نشوف اكل عشنا )

لا تعليق

[se_ Elsyed]

كتر خيرك يا حكومة

أحمد أبو الغيط تدخل وتم تأجيل حكم الإعدام في أول واحد مصري كان المفروض يتعدم بالأمس وفي محاولات فردية لإقناع أهل القتيل بقول الدية .. وفي حالة موافقتهم ستقوم جمعية " عائشة لاقذافي الخيريرة " بتحمثل الدية .. وذلك بمبادرة فردية من أهل القتيل الغلابة اللي أتخرب بيتهم في السفر ما بين مصر وليبيا عشان يطمئنوا على إبنهم ...

المهم بقى إني سمعت واحد إسمه السفير محمود عوف بوازرة الخارجية بيقول " إن دور السفارة إنها تتأكد إن في محامي بيتولى الدفاع عن أي متهم في ليبيا "

يا نهار مش فايت ؟

طب وواحد غلبان زي ده وما معهوش الهوا عشان يوكل محامي .. يبقى كده يروح في الزبالة ؟

وبعدين دول ما طلعوش 23 واحد في ليبيا .. لكن العدد زاد بفضل توجيهات السيد الرئيس الحكيمة واتضح إنهم 35 مصر ينتظرون المشنقة ... نصحى مع بعض شويه ... ده في ليبيا بس

ليه وعشان إيه وهو في إيه ؟

دول لو مشتركين في مؤامرة لقلب نظام الحكم ما كانش العدد يبقى كل ده ؟

وبعدين ليه المطمطة والتعذيب ده وقضية تقعد من سنة 99 لحد دلوقت وما فيش محامي بيدافع عن الراجل بشكل منتظم ولكن أهله الغلابة كل ما بيجمعوا قرشين بيروحوا يصرفوهم على المحاميين ؟

وهل دور السفارات ووزارة الخارجية ووزارة القوى العاملة بتاعت عيشه .. إنها تلهف من المغتربين رسوم ومصاريف بس بدون اي خدمات ؟

وهل دور الدولة في حمايه ورعاية رعاياها بينحصر في وجود مكان له سقف وفيه مراوح وموظفين قاعدين بياكلوا ساندوتشات طعمية - والله العظيم العام الماضي رزت سفارتنا في الرياض ولما اطلعت ييجي نص ساعة وما كانش في موظف عايز يفيدني.. في الأخير دلوني على القنصل عمرو بيه مش عارف مين ... ولما دورت عليه لقيته واخد ركن وعمال بياكل سانشدوتشات طعميه ووكان معي في هذا الموقف صديقي هاندي كرافت .. والحمد لله شاف أنا عملت فيهم إيه لإنهم ناس لا تحترم الوقت ولا البشر ومش عارفين إن وقتنا بفلوس - أو مجرد تجديد جواز السفر او إضافة مولود او عمل توكيل ؟!!!!!!!!!

للمره الألف أحب أوجه التحية لحبيبة قلبي رئيسة الفلبين

الي لما لقت حالات إغتصاب الخادمات - واخدين بالكو - الفلبينيات زادت في دو الخليج وكان ردة الفعل إن في بنات بتدافع عن نفسها وشرفها وممكن تقتل المعتدي وكان في حادثة شهيرة منذ سنوات قليلة عن خادمة قامت بقتل مكفولها الإماراتي لإنها أغتصبها وغيرها وغيرها من الحوادث ولسه قاري عن حادثة في السعودية عن خادمة فلبينية في أحدى المُدن السعودية ، البيه خلى مراته نايمه وراح متسحب و رايح المطبخ حيث تنام الخدامة المسكينة وحاول ان يعتدي عليها فراحت ماسكة سكينة المطبخ و و قاطعه ...................... . ما علينا

فالست المحترم رئيسة الجمهورية دي رصدت ميزانية سنوية حوالي 60 ألف دولار للدفاع عن العمالة الفلبينية في دول الخليج .... ومجاناً وبضمير .. وأنا بأشوف ده بنفسي في أي خلافات عُمالية مع الفلبينيين اللي بيروح جري على سفارته وبيقعدوا يبهدلونا تحقيقات ومذكرات ودفاع وهجوم لحد ما ياخدوا حق رعاياهم تالت ومتلت .

أما نحن .. فالدولة مش فاضية .. واللي بيروح بييج غيره .. وربنا يقل من المصريين خلي البلد تروق كده وتفضى وما يبقاش إلا مبارك وحاشيته عشان يبرطعوا في البلد براحتهم

وكان الأولى بالحكومة إنها تسأل عن ألاف بل ملايين المصريين اللي اختفوا في العراق ولحد دلوقت ماحدش عارف هما عايشين ولا أتخرطوا للوز ولا إيه مصيرهم ؟

ووالله العظيم لن ينصلح حال بلدنا إلا لما يكون للمواطن العادي قيمة وكرامة ... والدولة كلها تتهز لما إنسان مصري يحصل له حاجه سواء داخل بلده أو خارجها ...

عارفين ألمانيا حصل فيها إيه من اسبوعين عشان 3 جنود ألمان إتقتلوا في أفغانستان على يد المقاومة الأفغانية اللي بتدافع عن بلدها ؟ ... أسيب عمي أخناتون يحكي لكم او المهندس محمد عبد العزيز اللي بالتأكيد لمسوا إن الخبر هز المانيا كلها ... مع إنهم في حرب هناك وموقوع القتل وارد في كل لحظة .

تحياتي للجميع وبإذن الله فرجه قريب ..

[إبن مصر]

يا سى السيد يا اخويا اسمح لى بس وبالراحه عليا..

قبل ما امسك الكرباج معاك واجلد فى كل حتى فيا وفى البلد والعيشه والى عايشنها شويه عقل بس...

انت كتبت ..:

قبل 48 ساعة من تنفيذ أحكام الإعدام في 23 مصرياً متهمين بارتكاب عدد من الجرائم في ليبيا

ومعرفناش هيا ايه الجرائم ورحت ناطط بيا علطول على الممرضات البلغاريات المتهمات بحقن 450 طفل ليبى بالايدز وتظلمات الدول.. واشى عيال وقاتلات اطفال.. وانا كل ده برضه عايز اعرف جرايمهم ايه الى هاتتدخل الدوله علشان توقف حكمهم...

وبعدين كتبت الحته دى :

أحمد أبو الغيط تدخل وتم تأجيل حكم الإعدام في أول واحد مصري كان المفروض يتعدم بالأمس وفي محاولات فردية لإقناع أهل القتيل بقول الدية

القتيل....!!!!! الله .. يعنى قتل؟؟ يعنى قاتل؟؟ يعنى الحكم عليه بالاعدام قصاص عادل .. مش كده والا ايه؟

وبعدين الاقيك كتبت ,, تانى...

طب وواحد غلبان زي ده وما معهوش الهوا عشان يوكل محامي .. يبقى كده يروح في الزبالة ؟

الله طب قتل ليه ؟؟ يا سى السيد مقدرش اخد المواضيع قفش كده يا بنى.. ما هو لازم نقول الى لينا والى علينا... قاتل.. بقى غلبان ومش لاقى ياكل ويروح فى الزباله...

الله

طب بقيه جرائم .. واخد بالك من الكلمه دى... جرائم التانين ايه؟؟؟

صحصح معايا كده..

مش نعرف عملوا ايه وبعدين نرمى على الحكومه والريس والقضاء والخارجيه.. ونشوف مين الى اتظلم والناس سابوه .. ومين الى ظلم نفسه.. ومطالبين ان احنا ننقذه من ظلمه انفسه؟؟؟

مش كده والا ايييييييييييه.....؟؟؟

الاخوه الافاضل الى مايعرفش بس .. ان سى السيد وانا اكثر من اخوات ولكننا نتناقش....بلغتنا التى نقبلها من بعض..

هذا التنويه لابد منه.

وشكرا ...

[se_ Elsyed]

بص يا أحمد .. واهو هاتفاهم معاك تاتا تاتا ومن غير كرابيج ولا مطاوي

الله الوكيل - على رأي الفلاحين - لو كان المُجرم ده مشترك في قلب نظام الحكم في ليبيا او غيرها ... اليس من حقه إن يوجد محامي محترم يدافع عنه ؟

ولا نسيبه لمصيره وإن شالله يروح في داهية ؟

وبص على أول حاجه كتبتها إيه في الموضوع

هما لو مُدانين بجرائم تستوجب هذا الحكم يبقى يستاهلوا ..

لكن

لازم على الأقل تُستنفذ كافة وسائل الدفاع عنهم ...

وده ماحصلش يا أحمد وما فيش د أتحرك وقاله طب خلينا نشوف محضر التحريات أو الضبط أو ملابسات القضية إيه ؟

ومعليش وأنا أسف في الكلام ده .. إنت عارف معظم المصريين اللي بيسافروا ليبيا بيبقوا من أنهي طبقة ؟

العمال والصنايعية وخلافه

يعني بيعيشوا اليوم بيومه .. يعني لما بتحصل له مصيبة زي دي ما بيلاقيش قرش يصرف على نفسه ولا على اهله .. ما بالك بمصاريف أو تكاليف المحاماه ؟ فهأ يبقى إحنا والزمن والغُربة عليهم ؟

أما لماذا نطيت وأتكلمت عن موضوع الممرضات

فأقول لك إن جريمتهم هي جريمة بشعة هزت العالم كله ... أكثر من 50 طفل بريء يتحقنوا بفيروس الإيدز مش شويه .. و 150 يموتوا لحد دلوقت برضوا مش شويه

ومع ذلك هناك هيئات دفاع من كل حدب وصوب بيدافعوا عنهم .. ومع ذلك هناك ضغوط دولية تحركها بلدهم اللي هي من دول أوروبا الشرقية العدمانه العافية وهي بلغاريا ومع ذلك قلبه الدنيا عشانهم

أنا هنا يا عزيزي احمد اتحدث عن موضوع إنساني بحت ... حتى المجرم لو ثبتت إدانته لازم يتعامل على إنه إنسان

ما بالك لو كان مُدان خارج وطنه ؟

ومع ذلك كله ممكن يكون بريء ...

وإن ما كنتش ألوم الحكومة اللي سايبه ذئاب العالم كله تنهش في لحمنا .. أومال ألوم مين ؟

[إبن مصر]

أه كده نورت المحكمه... يا اخى الحبيب..كل ما تقوله أزيدك أنا عليه.

ما نراه من هبه كل الدول لمواطنيها حين يتعرضوا لاى حكم قضائى او مشكله فى بلد اخر هو ما أريد نقاشه وليس هذه الحاله على وجه الخصوص.

سواء كان مواطنى الدول التى كنا نعتبرها فى فتره الاحلام النرجسيه وفتره امجاد يا عرب امجاد دول من الدرجه الثالثه لا تسمح لمواطنيها ان يمتهنوا ولكننا هنا لا يوجد لدينا ما يشعرنا بالامان ونحن بلا مشاكل فى الغربه فما بالك لو تعرضنا لمشكله.

انا اطلب ان تكون الصوره واضحه بدون تباكى او جلد للذات ان نضع أيدينا على اصل المشكله ونواجهها بكل قوه.

ولا نضيع جهودنا فى ذكر السلبيات المتراكمه بعيدا عن مواجهه اصل هذه السلبيه وهو اننا نفتقد للرؤيه كدوله وهذه هى الكارثه.

[se_ Elsyed]

عارف يا أحمد

تعرضت لموقف هنا في الرياض من سنيتن .. اقسم بالله لن يُمحي من ذاكرتي .. وسبق أن تحدثت عنه بأقضتاب

- فلقد أتصل بي أحد الأصدقاء ذات يوم ليخبرني إن فلان الفلاني صديقه - لا أعرفه ولا توجد علاقة بيننا - قد تم إلقاء القبض عليه بدون أي تهمة اللهم إلا إنه كان بيُدير مركز رياضي ولحُسن خلقه ومعاملته مع الناس زاد عدد الزباين عنده فواحد من المراكز اللي جنبه المنافسين عنده واسطه راح مبلغ عنه وأتقيض عليه لإنه مش شغال تحت الكفالة مع إنه معاه خطاب بيفيد إن كفالته تحت النقل وفعلاً جواز سفره كان في إدارة الجوازات لذلك ..

- فالمهم اخدوه من الدار للنار وكان فاضل له ساعات للترحيل زي ما هو كده بدون حتى ما يغير هدومه ..

خد دي بقى

- زوجته كانت لسه والده ومعاها ييجي 4 أطفال تانيين .. وهو يصرخ ويقولهم طب عيالي .. ولا حد بيسمعه .. وعياله في البيت مش لاقيين حت حد يجيب لهم حليب ..

- المهم دبرنا واسطة عن طريق أحد الأمراء اللي اعطانا كرته وذهبت انا وأخو مراتي وأول الظابط ما شاف الكرت وكعادتنا نحن العرب .. أخر إحترام .. وأتفضل يا فندم وكرسي للبهوات يا ولد ودخلنا للراجل داخل الحبس والحمد لله أخدناه معانا ..

الموقف إيه هو بقى ؟

- عشرات المصريين البسطاء وغالبيتهم فلاحين وصعايدة متكربسين جوه الحجز في إنتظار الترحيل وعلامات البؤس والشقاء على وجوههم .. ولإننا ذهبنا إليه يوم أربعاء على أخر لحظة .. لإن الخميس والجمعة الحكومة هنا أجازة ولو مالحقناش الراجل كان ضاع وأتسفر ... فخرجنا الظهر من العمل على سجن الترحيل على طول .. ونحن بملابسنا الرسمية .. المهم دخلنا الحجز نقابله وأول ما الناس الغلابة دول شافونا بالبدل الرسمية والكرافتات والحركات .. والله العظيم زي ما بأقولك كده .. جريوا ناحيتنا وهم يرددون " رجالة السفارة المصرية جُم .. رجالة السفارة المصرية جُم "

لإن يا عزيزي بيتم تلقيح هؤلاء إلى أجل غير مُسمى لحد ما حد يتعطف ويتكرم ويدبر لهم 1200 ريال ثمن تذكرة العودة ...

ولما السفارة يكون لها مزاج بتوفر لهم التذاكر .. وبتاخدها في مصر من حبابي عينهم .. ما فيش حاجه لوجه الله

فما بالك بقى بشخص منتظر الاعدام أو متهم في قضية قد يقضي فيها بقية حياته في سجن خارج بلده ..وبيبقى متعلق بقشايه

بص الحتة اللي جايه دي بقى والشيء بالشيء يُذكر

- حدثت قضية هنا وتحديداً في المنطقة الشرقية أستمرت شهور طويلة وكانت حديث الساعة ...

- 3 ممرضات .. واحدة أسترالية وأتنين بريطانيات ... الإسترالية دي كان عندها عرق يهودي فكانت بتسلف زميلاتها فلوس بالفايظ - ربا يعني - .. فالإتنين التانيين شكلهم إتورطوا في ديون لها فتأمروا عليه ودبحوها ا .. مش بس كده ... دول اخدوا كروت الصراف اللي معاها وبطريقة ما عرفوا الرقم السري وفضلوا مكمرين الجثة وكل يوم يروحوا يسحبوا الحد الأقصى من الكاش - 5000 ريال - لحد ما خلصوا على فلوسها . لكن الوليه لما اختفت فترة الموضوع رحته فاحت وأتقبض عليهم وأعترفوا بالجريمة

هـــــــــــــا نعدم 2 من الإمبراطورية التي لا تغيب عنها الشمس ؟

دي كانت القيامة تقوم

- السفارة البريطانية أتحركت ووكلت أكبر محامي هنا يترافع عنهم وكان بيسافر أستراليا كل شويه - أخر الدنيا- ويقنع أهل القتيلة أنهم يقبلوا الدية .. مع إن دية إيه في قضية مقترنة بفعل إجرامي زي ده ؟

- المهم القتيلة كان لها أم واخ صغير عنده حوالي 18 سنة ... الحاجة الكبيرة راسها والف جزمة ما تقبل الدية اللي قُدرت بملايين ... وكانت عايزة القصاص طبقاً للشريعة الإسلامية ...

طبعاً كده بقت ورطة .. وبريطانيا العُظمى هاتزعل .. راح المحامي جايب شهادة تُفيد بإن نينه الحاجه مجنونة بنت مجنونة وغير مسئوله عن تصرفاتها .. وراح مميل على الواد الصغير ومعكمو قرشين نُضاف .. فالواد قِبل طبعاً يبيع دم نوسه واللي جابو نوسه كمان ...

وأُفرج عن الممرضتين وقصتهم أتعملت فيلم سنيماوي وبقوا أشهر من نجوم هوليود .. وألفوا كتاب كمان تقرأه زي حواديت قبل النوم .. واهو الساعة بخمسة جنيه والحسابة بتحسب .. يعني قتلوا الوليه وأخدوا فلوسها وعملوا فيلم سنيماوي وألفوا كتاب وعدوا عقبال السامعين وبقوا مليونيرات ...

حذر فذر .... يقدر حد من رعايا الدول الغربية يتحط في سجن الترحيل ؟

طب لو كانوا إتنين ممرضات مصريات .... إزيك بجى ؟

[إبن مصر]

تانى مره عشانى وعلشانك وعلشانا كلنا...

هو ده روح القصيد يا احمد با اخويا.. ايه التصرف الى اتعمل علشان الموضوع ده يوصل للى مشغلين الناس دى فى السفاره بتاعتنا الى هناك دى؟؟؟؟

ده قصدى.. انا قلبى بيتقطع هنا فى بلدى على امور اشد فظاعه من كده وانت عارف الى بشوفه كل يوم شكله ايه والى الواحد بيعمل فيه الى بيقدر عليه بس فى النهايه هى تصرفات فرديه لا ترقى الى درجه الفعل الجماعى .

المشكله الاساسيه هى كيف تقنع من لا رؤيه له ولا تقدير للسعر الادمى ان هناك بيشرا لهم سعر عند الاخرين وأقل احترام لادميتنا ان يكون هناك على الاقل النيه لجعل لنا سعر احياء او اموات.

انا أشعر بكل حرف تقوله لاننى تعرضت له لذلك ابحث عن حل.. او طريقه... او اسلوب... لايصال فكره اننا ادميين.. ولنا الحق فى المعامله الادميه فى بلادنا وخارج بلادنا .كلنا وليس فقط من يستطيع ان يتدبر اموره بمعرفته واتصالاته.

هذا هو روح كلامى وتفكيرى الذى يدمى عقلى .

و مجرد تذكر المواقف يزيد الغضب ولكن لا يضع الحلول.

فما هى الحلول؟؟

[se_ Elsyed]

فما هى الحلول؟؟

اهم الحلول إننا ما نسكتش على الظلم

ونعبر عن غضبنا بشتى الطرق المتاحة .. بدون عنف ولا تخريب ولا إتهامات باطلة ... ويا حبذا لو توفرت الفرصة لرفع الظلم وتغييره إلى الحق

ولا نلتفت إلى كلام المُثبطين للهمم والذي يتهموننا بإننا كلمانجيه او اننا ندور في حلقة مفرغة من الكلام ... فنحن لسنا فصائل او ميليشا مُسلحة يُمكن أن نحارب الحكومة

فسلاحنا هو كلماتنا

وفي كثير من الاحيان تكون الكلمات أقوى من الطلقات ...

[إبن مصر]

ياااااه يا أحمد والله وحشنى الكلام معاك ..

ايوه كده كده صح.. نحدد امكانياتنا ايه؟.؟.

وسلاحنا ايه...

ولا نتوانى عن استخدامه بشتى المجالات وبمنتهى القوه..

فى المنتدى

فى اوساطنا الثقافيه

من خلال اعمالنا..شغلنا.. الشارع.. البيت....

الكلمه الصادقه اكبر سلاح..

وخصوصا اذا كانت من القلب والعقل معا.

[Sherief AbdelWahab]

من المدهش أن يتحدث النظام القذافي عن "تطبيق الشريعة الإسلامية" وتطبيق فتوى الدية بينما هي تطبق على طريقة الكيل بمكيالين، دية آه ، ودية لأ..

ولا أنا اللي بيستهيألي؟

جايز يكون فيه ناس من السفارة البلغارية دفعوا الدية في "السكرتة" كما يقول التعبير المصري الدارج ، وجايز تكون الحكومة الليبية سامحت فيهم ، لكنها ما سامحتش في الليبيين اللي قتلهم مصريين .. أنا فعلاً مش فاهم حاجة!

أتمنى أن تشفى جميع الأنظمة من داء اللعب بالدين واستخدامه لتبرير وجودها وإضفاء شرعية عليه وعلى تصرفاتها ..

خلص الكلام

[Ghost]

لا تعليق , انا اتخرست بجد