التغشيش فى امتحانات الابتدائية

[عبدالله عكاشه]

السلام عليكم جميعا:

بمناسبة انتهاء امتحانات الابتدائية كل سنة والجميع بخير ونجاح ، الا انى رغم سعادة الاولاد بالاجازة وفك ازمتهم من الاستيقاظ المبكر فى غاية العجب مما ذكره (على عبدالله) ابنى من قيام المدرسين المراقبين على الجان بحل الاسئلة للاولاد وإملاء الاجابة عليهم بشكل عام وجماعى .

فقلت لنفسى تلاقى الواد( على) بيقول عليا دلوقتى فى نفسة بابا غائب عن الدنيا !!!خصوصا لما كنت بوصلة للمدرسة وبقولة بعض من الادعية التى اعتدت ان ارددها كثيرا فى ايام امتحاناتى وكنت قربت اقنعه ان الامتحان ده شئ فى غاية الاهمية لتحديد مستواه بالنسبه لى على الاقل حتى اكافئة بهدية النجاح اللى بيحددها هو قرب كل امتحان.

وحتى يطمئن قلبى لما استقر فى وجدانه سألته " ايه رأيك فى تصرف المدرسين اللى غششوكوا مش هما كدة ظلموا المجتهدين اللى ذيك وساوهم باللى مابيذكروش ؟"

فأجاب ( بص يا بابا هما بيعملو كدة عشان ينجحونا ومفيش حد يسقط ولا انت عايز زميلى يسقطوا )فقلتله اللى ما بيذكرش يسقط طبعا واللى بيذاكر لازم ينحج لانه تعب واجتهد فقال : ( الاستاذ قال الكل هينجح وده عشان متفضلش تقولى ذاكر ...ذاكر الكل بينجح ومفيش حد بيسقط وهتجبلى الهدية امتى؟.

والان هل من الممكن ان نثق فى التعليم والمدارس والمدرسين بعد ان اصبحنا نشاهد خريجى الجامعات شباب بدءوا فى العقد الثالث من اعمارهم وحملوا شهادات جامعيه لايعرفون عن العمل بها شيئا فنرى خريجى التجاره والحقوق والطب والمعاهد العليا منديب مبيعات أو عوطلية فى انتظار حسنة من بصمجى اتعلم فى مدرسة الحياة؟؟؟؟