بتحب تأكل ايه !!!

[badroora]

أكيد الستات المصريات ماشاء الله عليهم شطار في المطبخ وما بيعرفوش يعملوا اكل مخبص ...كل أكلهم مرتب ...

ويجنن ...هو فيه زي الأكل المصري؟؟ بس المقلوبه مايعرفوهاش إلا اللي سافرت أو أتعرفت علي جنسيات عربيه أخري وبالتالي للاسف التخبيص مش بيتقنوة يعني اللي بيعملوا المقلوبه بس هما اللي ممكن يخبصوها ....

لكن عمرنا ماسمعنا عن محشي ورق عنب او كرنب مخبص....ولا حتي صينيه مسقه ورقاق ....

استني يا بدريه اروح اشوف زربيان شهد واقولك .....

بس اللي بعدي بيحب ....الطعميه بالسمسم

هلا بناش شخبارك انشالله تكونى بخير

كدا فهمت معنى التخبيص يعنى معجن صح ؟ طيب كويس عشان منظلمش الناس .

انا كتير اسمع عن المقلوبة والكبسة تقريبا واحدة فيهم سعودى وواحدة فلسطينى . بس انا اساسا باطبخ المصري بالعافية وفتلاقينى لا اتجرأ واجرب اكل غريب يعنى 3 سنوات خارج مصر وتقريبا ماكلتش غير مرة ولا مرتين اكل غير مصري , اللى نعرفه نجربة واللى مش نعرفه نقرا عنه .

الطعمية بالسمسم باموت فيها

وخصوصا بقي عندنا كافي شوب مصري اسمها ليالي زمان فى البحرين بتعملها تجنن كل شهر كدا بنعمل ليهم زيارة مفاجئة عشان الطعمية بالذات بيعلموا بشكل غريب ولذيذ.

اللى بعدي بيحب فتة العدس

[nash]

بحب فته العدس جدا ...يا شريرة عرفتي إزاي.....؟؟ :) وخصوصا في البرد

هوة مافيش حد غيرنا النهاره؟؟ :)

انا عرفت أنك هاتفهميها وهي طايرة ...صح برافوا عليكي التخبيص يعني العجن في الأكل..وطبعا أكلنا المصري الروعه مافيهوش ولله الحمد أي تخبيص

أفتكريني لما تروحي تاكلي الطعميه وعند شروق الشمس...وغروبها.....ماشي يا مني؟؟؟ علي اساس اني عماد حمدي.... :D

طيب اللي بعدي بيحب الفخذه في الفرن......

[إيزيس]

مين يا نشنوش ما يحبش الفخدة في الفرن متبلة ببهارات اللحم ومتغزغزة بشوية فلفل إسود صحيح و رشة صويا صوص و بشرة زنجبيل أد فص التوم و بشرة قشر الليمون وزيت الزيتون وشمي الريحة

مين بيحب أم علي

سخنة

في الفرن

في الشتا

بالليل

واحنا بنتفرج على فيلم السهرة

ومكسلين نقوم نجيب كوباية مية بعد ما كلنا واتدفينا أو يمكن مش قادرين نقوم

[badroora]

مين يا نشنوش ما يحبش الفخدة في الفرن متبلة ببهارات اللحم ومتغزغزة بشوية فلفل إسود صحيح و رشة صويا صوص و بشرة زنجبيل أد فص التوم و بشرة قشر الليمون وزيت الزيتون وشمي الريحة

مين بيحب أم علي

سخنة

في الفرن

في الشتا

بالليل

واحنا بنتفرج على فيلم السهرة

ومكسلين نقوم نجيب كوباية مية بعد ما كلنا واتدفينا أو يمكن مش قادرين نقوم

يسلااااااااااااااااااام عليهها كدا وهى سخنة وسكر خفيف او بدون مع المكسرات وجنبها حتتين لفت مخلل (مازدا) عشان بس النفس مش تموع

فكرتينى يوم ماتش النهائي بين مصر والكاميرون كان الكافي شوف عالبحر وكان وايد برد ورطوبة متقوليش لعدوك عليها وجه الجارسون المصري واقترح علينا ام على وانا وصديقتى ضربناهم وهاتك يا كسل وعاوزين ننام لولا الملامة ان كل الموجودين كانوا مصريين والماتش شغال كنت روحت نمت بس خوفت يقولوا علينا عملاء للكاميرون ولا حاجة :closedeyes:

اللى بعدى بيحب المفتئه

تم تعديل 17 فبراير 2008 بواسطة Badria Mekkawy

[se_ Elsyed]

هلا بناش شخبارك

وكان وايد برد ورطوبة

معليش يا بدريه ...

أصله موضوع حازز في نفسي قوي ..

إنتي ليه بتُصري إنك تتكلمي لُغات - ميته - في مداخلاتك ؟

يا ستي خلاص .. وكتاب الله عرفنا إنك في البحرين ..

بس مش معقول نقعد نوضح للناس الكلمات الخليجية المنقرضة والغير منتشرة ...

فياريت تستخدمي لغتنا المصرية السهلة الجميلة حيث إننا في محاورات المصريين ..

والنبي عربي

وبعدين كمان تعالي هنا

إزاي الجو كان برد ورطوبة في نفس ذات الوقت ؟

لأ بجد إزاي

[MZohairy]

إزاي الجو كان برد ورطوبة في نفس ذات الوقت ؟

لأ بجد إزاي

في الخبر ياحمد في الشتا تلاقي الجو برد و رطوبه

كأنك في التلاجه و بيترش عليك ميه

[se_ Elsyed]

إزاي الجو كان برد ورطوبة في نفس ذات الوقت ؟

لأ بجد إزاي

في الخبر ياحمد في الشتا تلاقي الجو برد و رطوبه

كأنك في التلاجه و بيترش عليك ميه

شكراً لإبننا زُهيري

وبرضوا كان عندكوا " وايد " ؟ :danger:

[badroora]

هلا بناش شخبارك

وكان وايد برد ورطوبة

معليش يا بدريه ...

أصله موضوع حازز في نفسي قوي ..

إنتي ليه بتُصري إنك تتكلمي لُغات - ميته - في مداخلاتك ؟

يا ستي خلاص .. وكتاب الله عرفنا إنك في البحرين ..

بس مش معقول نقعد نوضح للناس الكلمات الخليجية المنقرضة والغير منتشرة ...

فياريت تستخدمي لغتنا المصرية السهلة الجميلة حيث إننا في محاورات المصريين ..

والنبي عربي

وبعدين كمان تعالي هنا

إزاي الجو كان برد ورطوبة في نفس ذات الوقت ؟

لأ بجد إزاي

حياالله من جانا .

معذرة يا ابو السيد اصل انت عارف بقي لا بارك الله فى كاتم العلم . وانا احب ان كل الناس تعرف انى اتحدث جميع الغات الحية والمريضة والمحتضرة

وكمان يا اخ ابو السيد نحن ليس لوحدنا فى المحاورات بل يدش كثيرا من البلاد الشقيقة ولذلك اصرارى am insisting انى اكتب بالغة الميتة لكى أحيي روح العروبة والتوحد العربي ونلاحم الشعوب بدل التفرق الذي تعانى منه الامة العربية هذه الايام

عرفت بقي يا خيو انى هدفي وطنى بحت

وتعرف كمان كام باقول كام مرة او بينقالى كام مرة فى اليوم شخبارك وايشلونك وشمسوي :lol: والله وماليك على حلفان حتى احنا المصريين هناك لغتنا اتشوهت .

من كتر عدم الممارسة اسكت يا س س والله قلبت على المواجع .

وكمان من كتر ماكنا بنتريق على اللغة ونقلدهم نسينا لغتنا اسكت يا س س bngn::

عموما اوعدك انى فى المرات القادمة سوف اراعى فرق اللغات وتحدث المصرية

مسامحة خوي

وبخصوص الجو

نتمنى ان تزورنا انت واسرتك الكريمة لكى تنعم بجو شتائي صيفي ورطوبة عالية زى ماقالك زوهيري بالظبط

تعرف ازازة الحاجة الساقعه اللى مشبرة وهى طالعة من التلاجة اهو بالظبط احنا فى الشتا كدا كلنا مشبرين بعيد عنك

ادعيلنا وانت فى الاراضي المباركة ان ينعم الله علينا بجو شتائي جاف زى اللى عندكم

فكرتك داخل تلعب معانا :cry1:

اللى بعدي بيحب البصارة مع فحلين بصل وعيش ايرانى مفقع

تم تعديل 18 فبراير 2008 بواسطة Badria Mekkawy

[badroora]

إزاي الجو كان برد ورطوبة في نفس ذات الوقت ؟

لأ بجد إزاي

في الخبر ياحمد في الشتا تلاقي الجو برد و رطوبه

كأنك في التلاجه و بيترش عليك ميه

العزيز زوهيري صح لسانك بالغلا ...

بوركت خوى عالتأكيد ..

يعطيك العافية

[ام الفوز]

مساء الخير عليكم في المحاورات لما حكيت تخبيص كنت بقصد نفسي مش انتم والله العظيم ما خرجت مني ولا كلمة واحدة فيها اساءة معقول ادخل بيت ناس علشان اغلط فيهم ايش رايحة استفيد اضاعة وقت انا ست بيت من النوع الى بيعمل كل حاجة بداية من العجين والخبز على الصاج(فراشيح) حتى الخضار الطازجة يعني تنظيفها وحفظها مرورا بالمربات والمخللات والحلويات ومن قبل ذلك التسوق وادارة شئون الاسرة من تامين الخدمات ودفع الفواتير مش غاوية ولا زيادة مروة هي الظروف حكمت وبعدين ماسالتوش نفسكم وانت نازلين تردوا ايش معنا اختار هذا المنتدى بالذات؟ انا باحييى تواصل قديم له ذكريات جميلة مع جماعة بلدياتكم دخلت المحاورات ادور عليهم ولكن لما عرفت انه هذا مش مجال هذا المنتدى احترمت من فيه ولكن بقيت متواصلة يعني ريحة البر ولاعدمه ولكن ربما باعذركم لانني في بداية علاقتي مع بلدياتكم تعبت وبقيت محتاجة ارجع افسر فيضحكوا ويقولوا مش تئولى كدة يابانتي دحنا كنا حناكلك ولكن00000 تستوقفني كلمات نجم واصرار بدرية على تذييل كلماتها بها ان كان هذا موقف لدى المنتدى فانا ارجو شطب اسمي من المحاورات فمن يعيش بغزة لن يخطر في باله ولو للحظة ان هذا مكان يعيش فيه ناس نسوا قضيتهم فحتى العجائز لاتتحدث الا عن الاحتلال وممارساته والامل في زواله فلاتظلمونا والله اننا نعيش محنة مابعدها محنة اذا علمتم ان علاقات الاسرة الواحدة اصبحت على شفا الهاوية من الصراع على مواقف الاحزاب ولاتعتقدوا ان الاحزاب ترش السكر والله ليس من ورائها الا تجرع العلقم وماسمعتموه عن صرف في رفح هي تحويشة العمر والله ابني اخذ 400 شيكل وراح بيها على العريش جاب مواد تنظيف وعسل قصب وكباريت وشمع وجبنة ولوازم كمبيوتر بسيطة وفطيرة مشلتت ياخسارة اندلقت عليها علبة فل للجلى خسرت طعمها كان نفسي فيها وراح غصب عني لانه بيحكي اتخنقنا في غزة عاوز اشوف مكان تاني وناس تانية كنت خايفة اسرائيل تضرب المعبر والحمد لله على كل حال احكي لكم بعدين عن المعاناة التي لاتظهرها وسائل الاعلام

[nash]

مساء الخير أختي العزيزة أم الفوز....

صدقيني نحن أخوات وأخوة في المقام الأول ووجودك بيننا شيء يسعد قلوبنا..والله هذا الكلام من قلبي....

يمكن لإنه حدث شيء من سوء التفاهم في أحد الموضوعات ..وأنا شخصيا أستغربت مداخلتك **********************.فأنت صاحبه البيت ( التوبيك ) وألقت عليهن ما يضايق النفس...أكيد تفهمين قصدي...

لذلك أحسسنا أن هذا من الممكن أن يتكرر هنا أيضا..ويا أختي الكريمه نحن سعداء وأنا عن نفسي وواثقه أن الجميع أيضا سعداء بذلك وهو وجودك معنا...

وياستي القلوب بيضاء... والحمدلله لم يحدث ما يعكر الصفو...إن شاء الله

بالنسبه لتوقيع بدريه سأتركها هي تحكي عنه وهو خاص بقضيه مصر والله ولا علاقه لها بقضيه فلسطين..وإن شاء الله هي تؤكد أو تنفي كلامي...

إن شاء الله تنزاح الغمه عن غزة وإن شاء الله تستمتعي بالفطيرة بين أهلك وناسك في مصر ومن الفرن مباشرة...

وعلي فكرة لنا أنسباء في غزة وما يؤلمكم يؤلمنا....

تقبلي تحياتي أختي الكريمه :baby:

تم تعديل 22 فبراير 2008 بواسطة Folana

[إيزيس]

وفطيرة مشلتت ياخسارة اندلقت عليها علبة فل للجلى خسرت طعمها كان نفسي فيها

أختي أم الفوز والله نفسي أبعت لك فطيرة عارفة ليه بالإضافة لإنك دخلتي قلبي أنا حاسة بيكي لما أكون منتظرة إني آكل أكلة معينة وباتصور نفسي باكلها وأنا باجهزها

ثم فجأة يرن التليفون أروح أرد

:wub:

صاحبتي بترغي يعني بتلكلك يعني كتيرة حكي زي ما بتقولوا

بسيتهبخهصثبصغثقبصثبغص78ثبف87صفثب87فص8ثبف87صثفب87صفب9يخهبرتيمسنتبمسينتبهسيابلخغيس

بخلغ

وفجأة أشم الريحة

اتحرقت التكا ( دي كانت آخر أعمالي المحروقة )

ويا خسارة التتبيلة ويا عيني على اللحمة اللي راحت هدر

إحساس بالقهر عارفاه كويس جدا :wub:

و الحل............... إزاي نبعت لك فطيرة قصدي كيف................كيف ؟؟؟؟ :lol:

أقوللك في المطبخ كان فيه طريقة الفطير المشلتت وانتي باين عليكي شاطرة إيه رأيك تجربيها

بس ما ترديش ع التليفون :baby:

[badroora]

أم الفوز كتبت :

تستوقفني كلمات نجم واصرار بدرية على تذييل كلماتها بها ان كان هذا موقف لدى المنتدى

السيدة الفاضلة ام الفوز اولا السلام عليكم ورحمة الله وبركاتة ...

ثانيا يا اختاه اعتقد لا يوجد شيء بينى وبينك يضطرنى ان احاول ان افعل شيء ما لمضايقتك حتى ولو بتلميح بسيط فى كتاباتى او توقيعي كما شعرتين .

اختى العزيزة ليس من طبعى رمى الكلام على الاخرين حتى ولو بتلميح بسيط الحياة عندى ابسط مما تتصورى والحمدلله لدى قلب لا يتحمل الزعل او المشاكل لاكثر من ثوان يعنى انا لا حطاكى فى دماغى ولا بلمح عليكي بشيء حتى لو تلاحظين انا دخلت كتبت لك هنا عادى جدا وهزرت ودا انا بانسي بسرعه ومش باشيل فى قلبي من اى حد خالص .

موضوع توقيعى ليس له علاقة بحضرتك نهائي ولا اعلم لماذا اخذتيه انه موجه لكى وبناء على ذلك كتبت انك لو الوضع كدا هتطلبي شطب اسمك من المحاورات ؟!!!!

طب مش الاول قبل تفسير الاشياء وتحليلها من منظورك الخاص ان تسالى كاتب الكلام هل يقصدك ام لا ..؟!!!

ثم يا اختى العزيزة ثقى تماما القضية الفلسطينية والعراقية وكل المشاكل العربية لن تخصكم وحدكم وكل ما يؤلمكم يؤلمنا ايضا لانها قضية واحدة وكرامة واحدة .

ثالثا او رابعا لما كتبت لحضرتك فى موضوع التلاجة انك مش فاتحة تناقشي القضية الفلسطينية لن اقصد بها شيء لان من الواضح ان حضرتك ربطى بين كلمتى وتوقيعي انى اعنيكي . انا كنت اقصد ان الموضوع بسيط ومش قضية جادة بنقاقشها وكنا هزرنا مش جريمة تحكمينا عليها بكلماتك التى اطلقتيها علينا كالرصاص .

ومع ذلك يا ست الكل مش زعلانه نهائي ونسيت اساسا الموضوع .

اتمنى ان اكون وضحت الصورة ولو بشيء بسيط على فكرة انا كنت تعابنه جدا وهنام بس لما شوفت كلامك قولت لازم ارد عليكي عشان بس اريحك واطمئنك ان انا كلمتى فى الوش وبوقلها وزى ما تيجي تيجي انتى بس عشان لسه متعرفينش انا لن اجيد لغة رمى الكلام ولا التلميح انا انسانة حرة جدا وصريحة جدا وواضحة جدا اللى عاوزة ااقولة واقصدة باقوله وبردوة عندى مبدأ لا ارمى الاخرين بالكلام ولن اتجرا ان اجرح مشاعر احد .

واليكي القصيدة كاملة عشان تعرفي انها ملهاش علاقة بيكي اساسا لا من بعيد ولا قريب .

بالمناسبة دا كان توقيعي من مدة بس غيرته ورجعته تانى ولو حبة تتاكدى من ذلك فى موضوع فى موضوعات خفيفة عنوانة ما هو اجمل توقعيك اوقفك من شدة اعجابك به هتلاقي توقيعيى دا مذكور هناك يعنى قبل حتى ماحضرتك تشتركى معانا .

اليكي القصيدة

وتصبحى على خير

يا عرب .. يا عرب .. يا عرب في أي مصر

يا عرب .. يا عرب .. اسمعوا صوت شعب مصر

أحفظوا لمصر المكان .. و احنا عالعهد اللي كان

مصر أوفى من الزمان ..

و انتو عارفين شعب مصر

يا عرب يا عرب يا أهل مصر

----------------------------

اللي خانوا العهد بينا .. و استباحوا كل حاجة

و استهانوا بالعروبة .. و استكانوا للخواجة

مستحيل حيكونوا منا .. نحنا حاجة و هما حاجة

هما باعوا الجلابية .. و الوطن و البندقية

و ا حنا أصحاب القضية ..

احنا ما بنبيعش مصر

يا عرب يا عرب يا أهل مصر

----------------------------

يطلع الدجال بزيفو .. يملا وادي النيل ضباب

ينزل الجلاد بسيفو ... يزرع الموت و الخراب

يطول الليل زي كيفو .... الصباح له ألف باب

و احنا بوصلتنا بإيدينا .. ما تخافوش من الليل علينا

مهما غبتو عن عينينا ..

انتو جوا بقلب مصر

يا عرب يا عرب يا أهل مصر

-------------------------

سينا و لا .. يافا و لا .. حيفا ولا ... دير ياسين

اسألوا الشمس اللي هالة .. عللي صحيوا مبدرين

يزرعوها نور و غلة .. دول جدودنا و لا مين ؟

حقنا و حتما ً يُعاد .. بس لو بانت سعاد

و البيان ده لوه معاد ...

و المعاد حيكون في مصر

يا عرب يا عرب يا أهل مصر

تم تعديل 19 فبراير 2008 بواسطة Badria Mekkawy

[إيزيس]

المسقعة يا سلام ع المسقعة بالفلفل التشيلي :unsure: مش المكعبر اللي هنا اللي مالوش طعم وشوية لحمة مفرومة صغيرين وبشاميل بالجبنة ع الوش و اوعى من القولون

أنا باخد دوا القولون مع المسقعة يعني تقريبا بارشه عليها لأني مستحيل أبطلها

مين بيحب المسقعة

[ام الفوز]

[مساء الخير عليكم جميعا في المحاورات نرجع لموضوع المحاورات بتحب تاكل ايه احكيلكم على اكلة سهلة وحلوة تعملوها يوم الجمعة يعني تنويع مرة كبسة مرة فتة مرة مقلوبة مرة مفتول يعني كسكسي والجمعة هذه باذن الله قدرة واسمها من القدر الفخار اهل غزة الاصل يعملوها بالقدر الفخار في افران خاصة لكن الايام هذه هي اكل الافراح والاتراح اجاركم الله لها طباخين معروفين بيجيبوا اغراضهم معهم ويكتبولك ليستة قد كده تجيبها على قد الوليمة الى انت عاوز تعملها.

نعملها على قدر خمسة افراد

المقادير:-نصف كيلو رز حبة طويلة -كيلو لحمة ياسلام لو ضاني مغلفة بشوية دهنة-راس توم من غير تقشير افركوه واغسلوه يعني يبقى فصوص(8) مثلا -كاس حمص شامي مسلوق غير مهري حتى ما يتقطع في الطبخ-بصل جوانح رفيعة للقدرة واحدة حلوة-وطبعا بصل وبهارات سلق اللحمة مثل حب الهان والقرنفل واذا كان ورق غار واعواد قرفة خير وبركةوالفلفل والملح- معلقة كركم صغيرةللرز- معلقة كبيرة بهارات الرز مشكلة -ومعلقة صلصة-مكعب ماجي -وقطعة زبدة اوسمنة نظيفة-

بعد سلق اللحمة نحضر الحلة الى مرفوعة في الدولاب جدارها سميك نضع فيها الزبدة او السمنة او ماتيسر كله بيمشي باسم البركة ونضيف البصل ونقلب ثم فصوص الثوم الغير مقشرة وعندما يذبلوا قبل ما يحمروا اضيف الرز المغسول واقلب وبعدين الحمص المسلوق واقلب وبعدين الكركم والبهارات ومعلقة الصلصة ومكعب ماجي وبعد التقليب الجيد اسقي الشوربة المصفية الصحن الواحد باثنين ونصف علشان الحمص والبصل ولو الحلة جدارها رفيع يمكن تحتاجي النصف التاني من طبق الشوربة الثالث وبعد مايشرب الرز الشوربة كلها تبقي تكمرى الحلة بحرام صوف او فوطة تقيلة -وتجهزي سلطة بخضار مشكلة وفلفل مع عصير ليمون وممكن طبق لبن زبادي يبقى بارد جنب القدرة- وعندما تسكبيها وتضعي اللحم فوقها زينيها بالمكسرات يعنى لوز -سوداني محمص بزبدة او سمنة او زيت ذرة وحطي شرايح ليمون خفيفة حول اللحمة وبالف هنا وعافية [/

[zizetta]

يمكن لإنه حدث شيء من سوء التفاهم في أحد الموضوعات ..وأنا شخصيا أستغربت مداخلتك *******تم حذف الاقتباس لحذفه من المداخلة الاصلية .....فأنت صاحبه البيت ( التوبيك ) وألقت عليهن ما يضايق النفس...أكيد تفهمين قصدي...

الست أم الفوز .. أرجو أن تفهمي أن لكل شعب مصطلحاته وأسلوب كلامه .. يعني أنا شخصياً صدمت لما قرأت بعض الكلمات زي التخبيص اللي تفضلت بعض الأخوات بشرحها فيما بعد .. لأن هذه الكلمة تطلق علي الإنحلال الأخلاقي في لغة الشعب المصري .. ثم طلبت حضرتك أن كل واحدة تتكلم عن نفسها وعن مستواها وكان من الأجذر أن تتحدثي أنتي أولا عن نفسك بصفتك صاحبة البيت كما يقولون حتى نعرفك ثم تطلبين من الآخرين تقديم أنفسهم أو حتى ترسلي علي الخاص مش لازم يعني الملايين تعرف كل حاجة عننا..

لكي تحياتي .. لكن الحقيقة أنا سكتت لأني مش من هواه الكلام اللي مالوش لازمة ..

أحيانا نجتمع في موضوع ونتقابل فيه وينقل كل منا رأيه أو تجربته أو وجهة نظرة .. وهذا ليس معناه أننا في النادي قاعدين نتشمس .. لكن الموضوع لم يخرج عن نظاقه .. وحيث أنك صاحبة البيت .. فكان لازماً أكرام ضيوفك ولو بالكلمة الطيبة ...

أعذريني فقد تعودت أن أقول ما بداخلي ولا أترك للآخرين تفسير كلامي أو فهم مقصدي كل بطريقته..

أنا بقى لي طلب عندك يا ست أم الفوز.. نفسي أعرف ازاي أظبط الكبيبة الشامي الحجم السواريه .. ياريت تقولي لنا عليها ولكي حزيل الشكر.

المزمزين بدرية .. وحشاني كتير .. معنديش نت .. ومعنديش وقت .. ومعنديش نفس .. ومعنديش .. بس عندي قلب انتي قاعدة ومتربعة فيه.. لأنك انسانة طيبة ورقيقة .. وواضحة ..

تحياتي

زيزيتا

تم تعديل 22 فبراير 2008 بواسطة Folana

[badroora]

المزمزين بدرية .. وحشاني كتير .. معنديش نت .. ومعنديش وقت .. ومعنديش نفس .. ومعنديش .. بس عندي قلب انتي قاعدة ومتربعة فيه.. لأنك انسانة طيبة ورقيقة .. وواضحة ..

شدة وتزول يا ابلة زيزيى

وان شاء الله ترجعلك النت والوقت والنفس وتنورينى من جديد لانك وحشانى اوى

يا جماعة البيت بيتكم خدو راحتكم عالاخر وانا على جنب معايا العدة لو احتجتونى فى اى وقت هتلاقونى متقلقوش

[إيزيس]

المزمزين بدرية .. وحشاني كتير .. معنديش نت .. ومعنديش وقت .. ومعنديش نفس .. ومعنديش .. بس عندي قلب انتي قاعدة ومتربعة فيه.. لأنك انسانة طيبة ورقيقة .. وواضحة ..

:sad:

ززة ..... ممكن أقعد جنب بدرية

[shahd]

اللى بعدي بيحب الزربيان اليمنى بتاع شهد :happy: وبالزبادي

بدووووووووورة حاولت اجيبلك صورة الزربيان بس مش لأقياها اختفت مش عارفة ليه؟؟

عشان تتأكدي ان الزبادي مش باين ومش مؤثر في الطعم :happy:

ممكن طلب صغنن

نفسي في شاورما ممكن الوصفة :happy:

[badroora]

ا

نفسي في شاورما ممكن الوصفة pps:

ادينى عنوانك وانا ابعتلك احلى ساندويشتين دليفارى ومعاهم اتشبيس وبيبسي كمان .

والنبي يا هوانم اللى تعرف طريقة الشاوريما تكتبها للغالية شهد smk:

بصي هاقولك انا باعمل ايه بس بينى وبينك مش للنشر اوك

احيانا كدا لما اعمل فراخ مرة كل 3 اشهر وناكل منها اول يوم انا وصديقتى ننساها فى التلاجة قيمة اسبوع لاننا كسالا مش بنحب نسخن الاكل وكمان بنخاف من الرايز بتاع الميكروايف فبنعمل ايه :happy:

تقوم تطب علينا صديقة عزيزة وغالية وعاوزين نجاملها ااقوم انا اتشملل وادخل المطبخ وقال هاعمل اكل للضيفة .

اوح سلقة مكونة فى السريع وضرباها فى الصلصة

واجيب باقي الفرخة اللى مركون بقالة اسبوع اسبوعين كدا واروح مفصصاه قطع صغيرة طبعا الفراخ مستوية

وروح جايبة طاسة دلقه فيها ندعة زيت

(قيمة معلقتين كدا ) واروح ضربفة بصلة فى الخلاط وادلؤه فى الطاسة وعلى فحل بصل اخضر وفلفل اى جنسية قطع صغيرة ويتشوحوا مع بعض شوية واروح دزة الفراخ عليهم فى الاخر واقلب والريحة تطلع والضيفة تنشكح انى عملالها غدا محصلش

وبعدين احطهم فى صحن واحط الصحن قدام الضيفة وصحبتى وانا اركز عالمكرون بس وعملة نفسي ماليش تقل عالفراخ وهما الانين يتسابقوا على الشاورما البيتى بتاعتى وبعد كدا باخدهم المستشفي عشان الواوا اللى عملوها فى صوابعهم اثناء اكل الشاورما الحلوة .

جربي طريقتى بس انا للامانة معرفش طعمها بس الاخرين اكلوا صوابعهم وهما بياكلوهالا :happy:

وبالهنا والشفا :happy: