سؤالات عن التكييفات

[se_ Elsyed]

بما إن الصيف عم .. والحر طم .... والحالة بقت غم

فقلت نطري القاعدة بأسئلة وأستفسارات عن المراوح والمكيفات .

لإن معانا رجل الكيف الأول .. وهو المهندس دياب .. ذو الخبرة الطويلة في الكيف والطراوة ...

وبما إن مراوح توشيبا العربي ما بقتش تعمل حاجه في الصيف الزمهرير .. بل بالعكس .. كل ما تيجي تشغل المروحة في الجو الولعه كإنك بتهوي على دُره مشوي فبيشعلل النار زيادة

وبما إن أسعار المكيفات إدرمغت وبقت في الأرض ..

ونزلت مصر السنة اللي فاتت لقيت الحاج محمود العربي بيصنع مكيفات شارب في مصر - الكمبروسر بتاع أي ماركة مكيف لازم بيبقى مستورد - ودرمغ السوق والأسعار نزلت لأكثر من النص

وممكن بـ 3000 جنيه تجيبلك تكييف سبليت محترم

وبالتالي كارير ويورك وأل جي ويونيون أير وجولدي خفضوا أسعارهم هما كمان ..

فلهذا ولذلك كله .. قررنا فتح موضوع نسأل فيه ونتحاور حوار الاخ مع اخوه .. الصديق مع صديقه ... ونُفرغ ما في ذهننا من سؤالات عن المكيفات لأخينا دياب .. وهو يجاوبكم بكل سعة صدر

المفاجأة بقى وكعادة أهل النوبة الكرماء

وبعد إذنك يا ديب انا هاقولهم عليها

دياب رصد 10 مكيفات سبليت هدية مع التركيب المجاني لأول 10 أسئلة ... مش بس كده

ده في سحب هايتم على العشرة اللي فازوا دول .. وفي واحد سعيد الحظ هايكسب عربية

عربية

عربية

يا خراب بيتك يا ديب ..

-------------------------------------------

نبدأ الأسئلة ....

بسم الله الرحمن الرحيم

س 1 : ده سؤال وصلنا من الاخ / عيسوي الحران ... بيقول فيه

- مساء الخير يا اخ ديب ... أنا شخص أعمل في الخليج وربنا فتحها عليه من وسع .. وقلت نركبو تكييف سبليت في الشقة .. مانت عارفها اللي هي في أول فيصل .. فلاحظت إن المكيف الأسبليت بييجي معاه 5 متر نحاس وهو الوصلة بين الكباس - الكمبروسر يعني - والوحدة الداخلية ... فسؤالي بيقول : ما هي العلاقة بين طول هذه التوصيلة وبين درجة التبريد في التكييف ؟

أخوك عيسوي الحران .... أول فيصل ...أرض اللوا ... أقليم التفاح

( الحمد لله كده ضمنت اول تكييف )

---------------------

السؤال التاني وصلنا من الاخت بهانه الطهقانه

- موساء الهير يا ذياب ... أنا ست باجري على 6 يتامى .. والمهم ربنا كرمني ودبقت قرشين من هنا ومن هنا ونويت أشتري تكييف شوباك .. ولكن لإني صاحبة مزاج ودماغي عاليه .. فما بأعرفش أقعد وسط الدوشة ... حتى العيال بأسربهم على السلم لما يعمول هيصه وزومبليطه ... فتنصحني بأي نوع من تكاييف الشبابيك صوته هادي وروخيص وإبن حلال ؟

أختك بهانه الطهقانة ... الجنجويد ... أقليم دارفور

( يارب أكسب التاني يارب )

---------------------------------

السؤال التالت والتالته تابته

- سؤال وصلنا من إبن المحاورات الغالي ... اللي ما رضيش يقول إسمه ورمز لنفسه بأول حرف وهو " موديست الجداوي "

س 3 : مستر بريزيدانت ديب .... بغض النظر عن إنتمائاتك الكروية او للشركة اللي إنت شغال فيها واللي مشهورة على عيننا وعلى راسنا ... فعايزك تنسى إنك أهلاوي ... أو انا زملكاوي ... وتقولنا ترتيب المكيفات من حيث الجودة والسعر ؟

اخو ك ميم ميم موديست ... جده .. حي بني مالك ... عشه رقم 6

( يارب موديست ما يشوف السؤال ده عشان أستلم الجايزة نيابة عنه وأنزل أبيع التلت حتت دول بتوع النهاردة .. وانزل اهيص بفلوسهم في شرم الشيخ )

[قديم]

عن التكييفات

هل حقيقي ان مكيف الشباك يتحول الي مكيف سبلت ..؟؟

سمعت طريقه سهله جدا لكن ما اعرف جدواها ..

الفكره هــي

بمكيف الشباك العادي . يتم فصل الكمبرسور (((أبو االضمانات )) وينقل الي مكان بعيـــــــــــــــــد شوي عن الشباك .. وتتطول وصله النحاس بالقدر المناسب . ويتم اعاده تعبئه الفريون من جديد . وبكدا تضمن على مكيف نص سبلت .

ما جدوي هذه الفكـــــــــره ؟؟؟؟؟؟

[Diab]

أبنــــتائي الطــــلبـــــــــة :closedeyes:

أسمعو ا وأعوا

ناخد الأسئلة بدون ترتيب

السؤال التاني وصلنا من الاخت بهانه الطهقانه

- موساء الهير يا ذياب ... أنا ست باجري على 6 يتامى .. والمهم ربنا كرمني ودبقت قرشين من هنا ومن هنا ونويت أشتري تكييف شوباك .. ولكن لإني صاحبة مزاج ودماغي عاليه .. فما بأعرفش أقعد وسط الدوشة ... حتى العيال بأسربهم على اسلم لما يعمول هيصه وزومبليطه ... فتنصحني بأي نوع من تكاييف الشبابيك صوته هادي وروخيص وإبن حلال ؟

أختك بهانه الطهقانة ... الجنجويد ... أقليم دارفور

لإ

أنا أعتبر أن كاريير هو ملك التكييف المنزلي في مصر بالتحديد ليه ؟

لانه أنت لما بتشتري مكيف فأنت بتشتري حاجات كتير أسم و جودة وقطع غيار أصلي متوافر و ما يسمي ب after sale وكل ده موجود في ميراكو كاريير

الباقي بقي زي بعض زي باور وأمريكول وشارب و يونيون إير

س 1 : ده سؤال وصلنا من الاخ / عيسوي الحران ... بيقول فيه

- مساء الخير يا اخ ديب ... أنا شخص أعمل في الخليج وربنا فتحها عليه من وسع .. وقلت نركبو تكييف سبليت في الشقة .. مانت عارفها اللي هي في أول فيصل .. فلاحظت إن المكيف الأسبليت بييجي معاه 5 متر نحاس وهو الوصلة بين الكباس - الكمبروسر يعني - والوحدة الداخلية ... فسؤالي بيقول : ما هي العلاقة بين طول هذه التوصيلة وبين درجة التبريد في التكييف ؟ت

أخوك عيسوي الحران .... أول فيصل ...أرض اللوا ... أقليم التفاح

العلاقة هي أن لما يزيد طول التوصيلة عن اللازم فالفريون اللي جوة التوصيلة يسخن بسبب أن مفيش عزل كفائته 100 % وبالتالي ممكن الفريون درجة حرارته تزيد وبالتالي

تقل كفاءة التبريد داخل المكان المطلوب تكييفه وأيضا زيادة طول التوصيلة ممكن تزود الأحتكاك بين النحاس والفريون وبالتالي تزيد درجة حرارة الفريوت

يفضل أن لا يزيد طول التوصيلة عن 15 مترا

للحديث بقية

:blink:

[صـــــقـــــر]

تكييفات شاااااااارب حاليا مسحوبة من السوق المصرى كله للتصدير وانا قاعد مستنى الشركة عشان اركب

سعر 3 حصان 4150

سعر 2.25 3700

بتتحسب ازاى لكل 10متر مربع فى ارتفاع 3 متر 1 حصان اى ا حصان لكل 30متر مكعب

معلومة على الماشى

[رورة]

الأخ دياب

جزاك الله خيرا على تعبك معانا.

السؤال: انا الريسبشن عندي طويل جدا وجي حرف إل

وعيزة اركب تكييف سبليت

اول حاجة عيزة اعرف هل يكفي تكييف سبليت واحد بس في الريسبشن. علما بإن مساحته حوالي 100 متر

تاني حاجة عيزة اعرف احسن نوع وبكم

وجزاك الله خيرا اخي الكريم

[Diab]

أسف يا جماعة علي التأخير بسب إنشغالي الشديد

أنا فقط بسجل متابعة لأسلة الفاضل صقر والفاضلة رورة

راجع بس أروق شوية ليكم بإجابات تفصيلية عشان متخدوش معلومة ناقصة

ok

[صـــــقـــــر]

باشمهندس دياب خد الكام سؤال دول بالمرة

اولا 000 انت ليه بتقول ات كارير ملك التكييف مع ان فى ناس كتير بتشكر فى شارب

ثانيا 000 ايه رايك فى تكييفات كرافت الموجودة فى مصر

ياريت تجاوبنى قبل ما اركب اصل انا متعاقد على تكييفات شارب والشركة لسه ما نزلتش فى السوق

عشان لو ما لقيتش شارب اركب حاجة تانية وشكرا مقدما استاذى الفاضل

[ياسر أبو يحيى]

[السلام عليكم يا عمنا العزيز.....معلومة ال30 م3 لكل 1 حصان صحيحة ؟ أشك جدا" فى كدة عشان أنا جبت شركتين عملوا معاينة عندى فى الشقة وكنت عايز أكيف ريسبشن 53 م2 بإرتفاع 3 متر و الإثنين نصحوا مش أقل من 5 حصان والسعر 8400 جنيه ...هل السعر ده مناسب لكاريير؟.....أرجو الإفادة

[النجم الثاقب]

سؤال كمان على الماشى .. يا رب أكسب

يا ترى ايه سبب تكون التلج على التكييف الويندو ... مع العلم انى بنضف الفلتر اللى عامل زى الشبكه ده

اخوانى الأفاضل سى السيد و دياب تقبلوا تقديرى

[النجم الثاقب]

للرفع

[ozoozo]

من 2007 ماكملتش الاجابات يابو دياب لغايه مافربوا يسحبوا التكيفات من المواطنيين في مصر

وكل شويه واحد يطلع يعايرنا ويقولنا يابو تكييف هاقطع الكهربا عليك عشان التكييف حرام في نهار رمضان