لو لم أكن مصرياً

[Mohammad Abouzied]

كل السلبيات الي بتقول عليها دي يا محمد سهل جدا القضاء عليها

بالوعي والمتابعة للشعب

ولكن ممكن ان تذهب الى مصلحة الهجرة الجوازات وشوف كام طلب موجود للحصول على الجنسية المصرية وشوف كام قضية مقامة للحصول على الجنسية المصرية

سوف تدهش

عموما طلبات التجنس بالجنسية المصرية تعتبر اصعب جنسية ممكن الحصول عليها

وممكن الاخ الافوكاتو يسرد لنا شروط الحصول على الجنسية المصرية لغير المصريين

[shokry]

هل معنى وجود طلبات للحصول على الجنسيه المصريه هو النعيم الذى نعوم فيه ولا الجحيم الذى يحاولون الهروب منه كالفلسطنيين مثلا

[Faro]

خرجوا أو بمعنى أصح هربوا من مصر ليتفادوا الواجب الوطني وبعد ذلك تشدقوا وتغزلوا فى حب مصر و و صفوا من دافع عنها بالغباء. بسبب الظروف الحالية هناك الكثير على إستعداد للتنازل - مثل الفتاة التي تبيع أعز شيئ لشراء رغيف الخبز - عن الجنسية المصرية للحصول على أخرى تعترف به كإنسان.

[Mohammad Abouzied]

عزيزي شكري

المسئلة نسبية طبعا

فيه ناس شايفه انها ممكن تعيش في مصر مبسوطة جدا

وناس شايفه استحالة الحياة في مصر في ظل الظروف الحالية

وفيه بلاد مليانة مجاعات مثل بعض الدول الافريقية

وبلاد حد الفقر وصل فيها الى تحت الصفر مثل كوريا الشمالية وعندها برامج وتكنولوجيا ذرية

لكن تأكد ان كل بلد فيها مشاكل من شكل ولون يمكن انت تقدر حاليا تعيش في امريكا مثلا مثل كافة الشباب

لكن لما يبقى عندك بنات كبار واولاد وعاوز تربيهم

متقدرشي حتى توجهم صح نحو عقيدتهم سواء كنت مسلم او مسيحي

يعني فيه بنت واحد مصري طلبت الشرطة لأبوها علشان اعترض عليها في مصادقة شاب وحبسته وكادت ترحلة لمصر

وتوجد امثلة كثيرة

مهما كان النعيم والجنة في امريكا

فجحيم مصر اهون كثير

على الاقل جحيم مصر ممكن ينتهي

اما سلبيات امريكا الا أعتقد ابدا

اسئل الامريكان عن مشاكلهم في بلدهم

سوف تغرق من كثرة مشاكلهم بالاضافة الى رغبة العديد للهجرة من امريكا

خاصة السيدات منهم

ومن جهة اخرى وجدت مصريين يعملون في اوكرانيا في البزارات اي الاسواق العامة

ومنهم الجزار ومنهم الفكهاني وكلهم اصحاب شهادات عاليه ومكسبهم قليل جدا يمكن اقل مصر بكتير

الا انهم تزوجو اكرانيات ومنتظرين تحسن احوال اوكرانيا على امل اذا دخلت

السوق الاوربية

لكن اذا الوضع متحسنش وبقى عنده بنات كبار

ياترى هايستمر

ولا هيقول انا مصري وسوف ارجع مصر ؟؟؟؟

[أسد]

الأخوة الأعزاء ..

أعتقد اننا بنخرج عن السياق ...

نحن لا نناقش حب الأمريكي لمصر .. أو ولاء الألماني لمصر ..

نحن نتحدث عن ولاء وانتماء وحب المصريين لمصر ..

لا أعتقد أن الفرنسيون مثلاً يحلمون بالحصول على الجنسية المصرية ..

ومن غير المعقول أن ندعي أن مصر هي أرض الأحلام للإنجليز ..

نحن نتحدث عن مصر بالنسبة للمصريين ..

وعن الولاء المفقود (للأسف) للوطن ..

مقارنة بسيطة ..

مصري هاجر من مصر في أول السبعينيات ..

وآخر ضحى بحياته في حرب أكتوبر ..

مصري .. هاجر من مصر بسبب الأزمة الإقتصادية ..

وآخر .. أصر على الإقامة في مصر .. والعمل فيها .. ولها ..

مصري .. استحل أموال الشعب .. وارتشى .. ونهب .. وسرق أموال البنوك ..

وآخر .. يعمل .. ويكد .. ويقاتل .. بشرف ..

المسألة بسيطة .. هناك من يحبون هذا الوطن ..

وهناك .. من هم يحبون أنفسهم .. فقط ..

ولا علاقة هنا للوطن بالمسألة ..

مصر .. ألمانيا .. أمريكا .. استراليا ... أي حتة والسلام ..

حبنا لمصر .. بحلوها ومرها .. ودفئها .. وقسوتها ..

هو ما نتحدث عنه ..

[Mohammad Abouzied]

لا ابدا يأخ سيد

احنا مخرجناش عن الموضوع ابد

ان لم تكن مصريا ................ هل تود ان تكون مصريا

أنا عن نفسي لا أتصور ان أكون غير مصري مسلم والحمد الله

[الطفشان]

مقولة لو لم اكن مصري لوددت ان اكون مصريا، من قبيل المبالغة و الفخر بالوطن

و هذا منتشر في كل الحضارات و الثقافات حيث تعتقد كل واحدة انها الافضل اطلاقا، سواء بالدين او اللغة او العلم او الفنون او الثقافة او القوة او المال او غيره

و موضوع اين ولدت و اين نشأت شئ قدري محتوم عليك و ليس لك اي اختيار فيه، تماما كمن هم والديك او اقاربك او اولادك او لون جلدك او عينيك، و لكن لك اختيار اشياء اخرى، مثل دينك و اخلاقك و شريك حياتك و البلد التي تعيش فيها، على الاقل جزئيا

و كما ذكر الاخوة، بتاع الماوماو اللي عنده مجاعة، شايف مصر زي ماحنا بنشوف اوروبا، و السودانيين و الفلسطينيين و الصوماليين و الاثيوبيين و غيرهم، يتمنوا يعيشوا في مصر، لانها احسن بمراحل من بلادهم

فان لم اكن مصريا هل وددت ان اكون مصريا؟ الله اعلم لان حب الوطن اللي نظريا كنت ولدت فيه قد يكون كبير كما الان انا احب مصر، موضوع نظري اساسا

و لكن عن نفسي كشخص ولد و نشأ في مصر، فاعتز كثيرا بموطنى و ثقافتي و اصلي

و كنت اتحدث مع زميلة امريكية في العمل بالامس، فسألتني هل تشعر انك امريكي ام مصري، فقلت لها ما معناه من فات قديمه تاه، فلن اشعر يوما ما انني بطلت اكون مصري و مسلم و عربي، هذا جزء من تكويني و شخصيتي و هويتي، و لا يعني العيش هنا و التجنس ان اتنازل عن هذا، بل اضيف الى ما هو موجود اصلا

اما ان حب الوطن و ارض الاجداد يتنافى مع الواقع المرير في بلدنا، فطبعا يؤسفني ما يحدث، فالحكومة فاسدة و الشعب لا قيم عنده و غير ذلك

و لكن رفض الاخطاء الموجودة، هل يعني كرهي لبلدي؟ هل لو لك قريب او ان عمدة القرية مجرم تكون العائلة كلها او القرية مدانة و تتبرأ منها؟ هل لو ابنك اخطأ تتبرأ منه بالكلية؟ بالطبع لا

و كما قال شوقي

بلادي وإن جارت علي عزيزة وأهلي وإن ضنوا علي كرام

لايخرج الظفر من اللحم

[Mohammad Abouzied]

بالظبط هو دا الي كنت اقصده ومقدرتش اعبر عنه

يسلم فمك يأخ طفشان

وأتمنى ان ترجع بلدك

[حشيش]

هل هناك علاقة وثيقة بين الحالة المادية للفرد وقوة إنتمائه لوطنه؟؟..بمعنى أن ميسور الحال يكون إنتمائه لوطنه أكثر من الفقير المعدم الذى لا يكاد يجد قوت يومه...لاحظت أن معظم من يتحدثون عن الإنتماء هم من ميسورى الحال مثل الأستاذ محمد أبو زيد والأستاذ إيجبت 5 والأستاذ الأفوكاتو ( اللهم لا حسد..ربنا يزيد ويبارك :oops: :oops: :oops: )...معظم أراء من يكتبون بالمنتدى تعبر عن أراء طبقة ميسورى الحال الذين يملكون كمبيوتر وقادرون على تحمل فاتورة تليفون باهظة نظير البقاء ساعات وساعات كل يوم على شبكة الإنترنت..أعتقد أن أرائنا هنا فى أى موضوع من المواضيع المطروحة للمناقشة بالمنتدى تعبر عن رأى شريحة المثقفين المستريحين مادياً وليست بالضرورة رأى الغالبية من جماهير الشعب المطحونة التى يمكن حتى أن تبيع أصواتها فى الإنتخابات لقاء دراهم معدودة لمن يدفع!!!!!

[Mohammad Abouzied]

خمسة وخميسة يأخ حشيش

طبعا انا بهظر مش جد

لكن الانتماء مش موجود دتحلنا كلنا سواء غني ولا فقير

فأثناء حرب الاستنزاف وحرب 73 القنابل مكنتش بتفرق بين الغني والفقير

ثم المال ممكن يروح ببساطة وفيه ناس كتير غنيت وناس كتير اصبحت فقيرة ولم تتغير ابدا

المشكلة المشاكل الاقتصادية والاحباط في حلها وعدم ثقة الشباب في ولاة الامر من كثرة الوعود على صفحات الجرائد ثم يسصتدم الشاب بالواقع المر

هذا ما يجعله يحس بالثورة على كل شئ حتى انتمائه لبلده

وبمجرد ان تنحل مشاكله ويستقر يظهر معدنه الاصيل ويرفض الا يكون غير مصري

فكل عند تقريبا بدون استثناء يكون مصريين عند الازمات والشدائد حتى لو مكنشي لاقي يأكل ولكن بعد ذلك يفكر في نفسه ومشاكله وما تنشره الصحافة فيفقد الثقه وتبدأ عملية الثورة الداخليه في نفسه فيكره كل شئ حتى جنسيته

وهذه الحالات مؤقته تزول بالزمن

وانا مريت بها شخصيا

واعتقد انك ماشي في نفس المسار

[Diab]

للرفع و إبداء الرأي

[صبح]

للرفع و إبداء الرأي

أول مرة أقر هذا الموضوع وأتعجب من كل الآراء الموجودة

مع إحترامي لكل ما قرأت ولكني أجد نفسي أفهم السؤال بطريقة أخرى

ويجب أور أن ننحي حب الوطن والموطن والمنشأ جانبا وننظر من حولنا لنستطيع الإجابة

أنا أحب مصر فقط لأنها وطني وتحت فقط هذه مليون خط

ولكن لو خيروني لما إخترتها

يا فرحتي بما نحن فيه

أنا آسف جدا ولكن البلد الذي لا يحترم أدمية أبناؤه لا يشرفني أن أن يكون بلدي

قد أفتخر بما كانت عليه مصر

قد أفتخر بما ضحت به مصر

ولكني حاليا لا أفتخر بكوني مصريا لا قيمة لي داخل بلدي وبالطبع خارجها

[عصام]

الوطن هو الشعب والحكومة ..

وليس الوطن هو التراب والشجر والجيران والحضن زى ما علمونا واحنا صغيرين ..

وحاليا أنا لا أستطيع ولا أرحب بالعيش بين هذا الشعب الذى تمكن منه الفساد والرشوة والاستغلال والفوضى والفهلوة إلخ ولا فى ظل تلك الحكومة التى أثرت فى هذا الشعب وغيرت من أخلاقياته خلال ثلاثة عقود من الزمان ليصبح على ما هو عليه الآن ..

وأرحب بأى جنسية تحترم حاملها وتوفر له الحد الأدنى من الحياة الآدمية الكريمة

[صبح]

وأرحب بأى جنسية تحترم حاملها وتوفر له الحد الأدنى من الحياة الآدمية الكريمة

bv:- bv:- bv:-

[justme]

والله يا جماعة هذا ليس كلامي ولكن كلام صديق مصري رحل عن قطر منذ فترة وجيزة

لو لم اكن مصرياً

لكان

اشطة جدا

bv:-

بس بصراحة رأيي الشخصي ان الحكم على الجنسية والبلد من خلال فترة من الزمن ظلم لأن لو الواحد ما احترمش هويته يبقى مفيش حد هيحترمه أنه يعتبر بيبيع هويته لمن يدفع اكثر وبالتالي فهو شخص عيد الولاء

ومعناه ان الواحد بيهرب لما الاوضاع بتبوظ علشان مش قادر عل المواجهة وافكركم بالراجل اللي جمع اولاده وجاب الحطب مجموع وطلب يكسره

لو كلنا وقفنا مع بعض وبايد واحدة وكل واحد عمل الصح ومخافش ايه هيكون موقفنا

الى اللقاء مؤقتا

[Tafshan]

شكراًَ لدياب للرفع .. فكرتنا بالروح القديمه للمحاورات و الاقلام التى نفتقدها ..

لو لم اكن مصرياً .. اكيد مش ح اود اكون مصرياً ... لوددت ان ابقى منتمياً لبلدى اياً كانت ..

الهويه لا تبدل .. يعنى المصري ح يفضل مصري اياً كان الباسبور الذى يحمله ..

الهويه ليست مجرد انشاء او اوراق ثبوتيه او خدمات حكوميه ..

الهويه هى حفر غائر بمعول الزمن في جسد الانسان ... تحدد ملامحه ... تشكل وجدانه ... تسيطر على افعاله ..

الهويه لا تبدل بتغير البلد او تغير الباسبور او تغير الزوجه بالعند في جحا ..

الهويه هى المذاق الذى تستطعم به الطعام .. و الذوق الشخصى في الملبس و اختيار الالوان و نوع الموسيقى ..

عذراً اعزائى .. صعب تغير الهويه .. مهما تفرنجت او تعربنت ستبقى مصرى بما في وجدانك و ذاكرتك من اساسيات لن تستطيع تغيرها .. سيقفذ المصري بداخلك و يبرهن عن هويتك .. سيسيل لعابك امام قالب جبنه رومى في سوبر ماركت او حجر معسل بفص ليمون و كوباية شاى كشرى

اما عن الشعور الوطنى .. فيمكن ان يتغير من شخص لشخص بحسب احساسه بقيمة هذه الهويه .. و طبعاً مفهوم لماذا وصل بنا الشعور الوطنى للحضيض .. الجميع يسعى للسفر و يا حبذا لو كانت هجره دائمه ...

و لكن ... هل يجب ان ننساق وراء تلك المشاعر السلبيه ؟؟ هل هذه مشاعر صحيه ان نشعر بالاسف تجاه هويتنا التى لن نستطيع ان نغيرها ؟؟ هل هويتنا حقاً بهذا السوء ؟؟

لا اعتقد .

[engmido]

يا اخواننا هو عشلن البلد فيها عصابة فساد

يبقى البلد وحشة

طب انا هاسأل سؤال

لو اى حد معاه فلوس كويسة وعرف يغيش فى مكان كويس واكل شارب نايم 100 100 وعياله فى احسن مدارس وفى وظيفة 10/10

ايه ااخبار ساعتها؟؟؟ ( اللى انا باتكلم عليه ده مطلب عاااااااااااااادى لاى مواطن)

بلاش دى ....هناك بعض الاجانب الذين يعملون فى مصر كخبراء فى اى مجال

عايشين صح افضل الامكانيات متوفرة لهم..........ومعظمهم فى المعادى

هما حبين مصر جداااااااااااااااااااا مش عشان الفلوس الفلوس فى بلادهم كتييييييييييييير......هما حبينها عشان الجو والعيشة حلوة جدااااااااا

[miramikhail]

أنا أولا بشكر اللى رفع الموضوع ده

لأن ألى أنا ملاحظة فى أولادى الأثنين و برغم أنى ربتهم على حب البلد لأنى و مش كلام شعارات بحب البلد دية و بعتبر كل شبر من أسوان لأسكندرية ملكى ألا بلقاهم بيفضلوا أوربا وأمريكا لأنها بلاد نظيفة و غالبا كلاللى بيسمعوه الأنتقادات للبلد و مافيش حاجة حلوة عمل أحباط للولاد و خلاهم مش حسين بالفخر اللى الواحد بيحسة يعنى اللى عايزة أقوله أننا لازم نعلم أولادنا أنهم يفخروا ببلدهم لأن و برغم السلبيات الموجوده فالبلد دية ملهاش زى كفاية جوها .

على فكرة أنا سافرت مرتين برة مصر و فى كل مرة بقعد أسبوعين و أرجع مع أن أول مرة كان عندى أقعد شهر و الثانية سنة لكن مقدرتش و مش ممكن أتخيل أعيش برة مصر و الحقيقة فى أغنيتين بحبهم جدا بحس أنهم بيقولوا اللى جويا

الأغنية بتاعة فيلم غناه واحد مش مصرى اللى بتقول بحبك وحشتينى بحبك و أنتى مطلعة عينى بحبك موت و التانية بتاعة محمود العسيلى و بيقول فيها ما معناه دية بلاد أجدادى و أبوى و أحفادى وديما أقول لولادى أن البلد ديه بلادهم و مش ممكن مهما أن راحوا حتبقى البلاد التانية بلادهم.

و بعدين دية البلد اللى أتقال عنها مبارك أرض مصر مبارك شعب مصر يعنى أى بلد تانية لو أتسرق منها كل اللى بيتسرق ده كان زمنها خربت؟؟؟

علىفكرة مش موضوع مستوى أجتماعى ولا حاجة فية ناس أغنية جدا و بتلاقيهم عملين فية أجانب و أية البلد دية و يعنى عقدة الخواجة يعنى زى ما ولدتى الله يرحمها كانت بتقول؟

وبعدين ما زمان كانت الناس مش أغنية ولا حاجة لكن كنت بتلاقى أنتماء للبلد يمكن ده عشان كان فية عدل و مسواه بين الناس

تم تعديل 4 يناير 2010 بواسطة miramikhail

[myusername]

همممممممممم انا قرأت الردود كلها.. من ايام 2002, و لو انى مبحبش اقرا أى رد قبل ما أقول رأيى عشان متأثرش, ما علينا.

لو علمتم الغيب, لاخترتم الواقع! فى الظروف اللى انا عشتها.. و اللى اتولدت فيها.. و القيم اللى اتربيت عليها.. فالحمدلله راضى بقضاء الله و قدره انى مصرى.

و لكنى حاليا ابحث عن اى جنسية أخرى كى أستعملها كمخرج استراتيجى وقت اللزوم. انا ممن يبحثون عن الحرية و الديموقراطية, و لست مجرد باحث عن عمل او انى اروح كندا ولا الخليج احوش قرشين و ارجع.

و بصراحة... انا شايف ان رأى الناس بيختلف على حسب وضعهم... مثلا تلاقى الناس اللى مسافرتش برة مصر رأيها متقارب (مش كله طبعا)... و الناس اللى راحت اوروبا او امريكا او كندا... و الناس اللى راحت الخليج.. يعنى كل واحد بيتكلم من منطلق تجربته الشخصية.

بس لا استطيع ان انكر ان بعد رحلتى لاوروبا, انقلبت الموازين تماما و اصبحت غير راضى عن اى شىء!

تم تعديل 4 يناير 2010 بواسطة myusername

[doudy]

فى ظل الأيام السوده اللى إحنا عايشينها هل لا زلت موافق على ما قاله الزعيم الراحل "مصطفى كامل":

لو لم أكن مصرياً....لوددت أن أكون مصرياً

شيشو هنا يا مرحبا يا مرحبا :P

خلاص كان زمان المقولة بتاعة مصطفى كامل اتلغت

دلوقتى ((لولم اكن مصريا .....كان يبقى فل قوى)) :D